ಅಹಮದಾಬಾದ್‌: ಇಲ್ಲಿನ ನರೇಂದ್ರ ಮೋದಿ ಕ್ರಿಕೆಟ್ ಸ್ಟೇಡಿಯಂನಲ್ಲಿ ಇಂಗ್ಲೆಂಡ್‌ ವಿರುದ್ಧ ಬುಧವಾರ ಆರಂಭವಾದ ಪಂದ್ಯದ ಪ್ರಥಮ ಇನಿಂಗ್ಸ್‌ನಲ್ಲಿ ಭಾರತದ ಸ್ಪಿನ್‌ ಆಲ್‌ರೌಂಡರ್‌ ಅಕ್ಷರ್‌ ಪಟೇಲ್‌ ಆರು ವಿಕೆಟ್ ಪಡೆದರು. ಆ ಮೂಲಕ ಪ್ರವಾಸಿಗರನ್ನು ಕೇವಲ 112 ರನ್‌ಗಳಿಗೆ ಆಲೌಟ್‌ ಮಾಡಲು ತಂಡಕ್ಕೆ ನೆರವಾಗಿದ್ದರು. ಕಳೆದ ಪಂದ್ಯದಲ್ಲಿ ಅಂತಾರಾಷ್ಟ್ರೀಯ ಟೆಸ್ಟ್ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡಿದ್ದ ಅಕ್ಷರ್‌ ಪಟೇಲ್‌, ಐದು ವಿಕೆಟ್ ಸಾಧನೆ ಮಾಡಿದ್ದರು ಹಾಗೂ ಇದೀಗ ತಮ್ಮ ಎರಡನೇ ಪಂದ್ಯದಲ್ಲಿಯೂ 5 ವಿಕೆಟ್ ಕಿತ್ತರು. ಆ ಮೂಲಕ ತಮ್ಮ ಆರಂಭಿಕ ಎರಡು ಪಂದ್ಯಗಳಲ್ಲಿ ಸತತ ಎರಡನೇ ಬಾರಿ ಐದು ವಿಕೆಟ್ ಸಾಧನೆ ಮಾಡಿದ ಭಾರತದ ಮೂರನೇ ಬೌಲರ್‌ ಎಂಬ ಕೀರ್ತಿಗೆ ಅಕ್ಷರ್‌ ಪಟೇಲ್‌ ಭಾಜನರಾದರು. ಮೊದಲನೇ ದಿನದ ಅಂತ್ಯಕ್ಕೆ ತಮ್ಮ ಗೇಮ್‌ ಪ್ಲ್ಯಾನ್‌ ಬಗ್ಗೆ ಮಾತನಾಡಿದ ಅಕ್ಷರ್‌ ಪಟೇಲ್‌, "ಸಂಗತಿಗಳು ನಿಮ್ಮ ಪರವಾಗಿದ್ದರೆ, ಅವುಗಳನ್ನು ದೊಡ್ಡದಾಗಿಸಿಕೊಳ್ಳಬೇಕು. ವಿಕೆಟ್ ಟು ವಿಕೆಟ್‌ಗೆ ಬೌಲಿಂಗ್ ಮಾಡಿ ಲಭ್ಯವಾಗುವ ಅವಕಾಶವನ್ನು ಪಡೆಯುವುದು ನನ್ನು ಗುರಿಯಾಗಿತ್ತು. ಚೆನ್ನೈನಲ್ಲಿ ಚೆಂಡು ಜಾರುತ್ತಿತ್ತು. ಆದರೆ, ಇಲ್ಲಿ ನಮಗೆ ಎಲ್‌ಬಿಡಬ್ಲ್ಯು ಜಾಸ್ತಿ ಸಿಕ್ಕಿದೆ," ಎಂದು ಹೇಳಿದರು. "ಟಿ20 ಕ್ರಿಕೆಟ್ ತುಂಬಾ ನಡೆಯುತ್ತಿದೆ, ಇದರ ಪ್ರಭಾವ ಟೆಸ್ಟ್ ಕ್ರಿಕೆಟ್‌ಗೂ ಬೀರಿದ್ದು ಬ್ಯಾಟ್ಸ್‌ಮನ್‌ ಹೆಚ್ಚು ಆಕ್ರಮಣಕಾರಿಯಾಗಿ ಆಡುತ್ತಿದ್ದಾನೆ. ಈ ಹಿನ್ನೆಲೆಯಲ್ಲಿ ಟೈಟ್‌ ಲೈನ್‌ ಹಾಕಿದೆ ಹಾಗೂ ಇದರ ನಡುವೆ ಹಾಗಾಗಿ ಕ್ವಿಕ್‌ ಆಗಿ ಕೆಲವು ಎಸೆತಗಳನ್ನು ಹಾಕಿ ಯಶಸ್ವಿಯಾಗಿದ್ದೇನೆ. ಒಂದು ವೇಳೆ ಬ್ಯಾಟ್ಸ್‌ಮನ್‌ ರಕ್ಷಣಾತ್ಮಕವಾಗಿ ಆಡುತ್ತಿದ್ದರೆ, ನಿಮ್ಮ ಮನಸಿನಲ್ಲಿ ಬ್ಯಾಕ್‌ ಫುಟ್‌ಗೆ ಹೋಗಬೇಕು. ಇನ್ನು, ರಕ್ಷಣಾತ್ಮಕವಾಗಿ ಆಡದೇ ಸ್ವೀಪ್‌ ಹಾಗೂ ರಿವರ್ಸ್ ಸ್ವೀಪ್‌ಗೆ ಆಡುತ್ತಿದ್ದರೆ, ಖಂಡಿತಾ ನೀವು ವಿಕೆಟ್ ಪಡಯುವ ಸಾಧ್ಯತೆ ಹೆಚ್ಚಿರುತ್ತದೆ," ಎಂದು ತಿಳಿಸಿದರು. ವರ್ಚುವಲ್‌ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅಕ್ಷರ್‌ ಪಟೇಲ್‌, ಆರು ವಿಕೆಟ್ ಪಡೆಯುತ್ತೇನೆಂದು ನಾನು ನಿರೀಕ್ಷೆ ಮಾಡಿರಲಿಲ್ಲ, ಆದರೆ, ಲೈನ್‌ ಅಂಡ್‌ ಲೆನ್ತ್‌ ಬಗ್ಗೆ ವಿಶ್ವಾಸವಿತ್ತು ಎಂದರು. "ಪಂದ್ಯದ ಮೊದಲನೇ ದಿನ ನಾನು ಆರು ವಿಕೆಟ್ ಪಡೆಯುತ್ತೇನೆಂದು ನಿರೀಕ್ಷೆ ಮಾಡಿರಲಿಲ್ಲ. ಏಕೆಂದರೆ ನಾವು ಮೊದಲು ಬ್ಯಾಟಿಂಗ್ ಅಥವಾ ಬೌಲಿಂಗ್ ಮಾಡುತ್ತೇವೆಂಬ ಬಗ್ಗೆ ನನಗೆ ಖಚಿತತೆ ಇರಲಿಲ್ಲ. ಆದರೆ, ಕಳೆದ ಪಂದ್ಯದ ರೀತಿ ಇಲ್ಲಿಯೂ ಐದು ವಿಕೆಟ್ ಪಡೆಯಲು ಸಿದ್ದನಾದೆ. ನಾನು ಬೌಲಿಂಗ್ ಚೆನ್ನಾಗಿ ಮಾಡುತ್ತಿದ್ದರಿಂದ, ಪಿಂಕ್‌ ಬಾಲ್‌ನಲ್ಲೂ ಅದೇ ಮೈಂಡ್ ಸೆಟ್‌ ಮಾಡಿಕೊಂಡೆ. ಪಿಂಕ್‌ ಬಾಲ್ ಬಗ್ಗೆ ನನಗೆ ಅಷ್ಟೊಂದು ಗೊತ್ತಿರಲಿಲ್ಲ. ಆದರೆ, ನನ್ನ ಲೈನ್‌ ಹಾಗೂ ಲೆನ್ತ್‌ ಬಗ್ಗೆ ಚೆನ್ನಾಗಿ ವಿಶ್ವಾಸವಿತ್ತು ಹಾಗೂ ಅದರಂತೆ ಸಕ್ಸಸ್‌ ಸಿಕ್ಕಿತು," ಎಂದು ಅಕ್ಷರ್‌ ಪಟೇಲ್‌ ತಿಳಿಸಿದರು. ಮೊದಲ ಇನಿಂಗ್ಸ್ ಆರಂಭಿಸಿದ್ದ ಭಾರತ ತಂಡ ರೋಹಿತ್‌ ಶರ್ಮಾ ಅರ್ಧಶತಕದ ಬಲದಿಂದ ಆರಂಭಿಕ ದಿನದ ಅಂತ್ಯಕ್ಕೆ ಮೂರು ವಿಕೆಟ್ ಕಳೆದುಕೊಂಡು 99 ರನ್‌ ಗಳಿಸಿದೆ. ಪ್ರವಾಸಿಗರ ವಿರುದ್ಧ ಮುನ್ನಡೆ ಸಾಧಿಸಲು ಭಾರತಕ್ಕೆ ಇನ್ನು ಕೇವಲ 13 ರನ್‌ ಅಗತ್ಯವಿದೆ ಹಾಗೂ ಕೈಯಲ್ಲಿ 7 ವಿಕೆಟ್‌ಗಳಿವೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3bCP7Px
