ಬೆಂಗಳೂರು: ಬೆಳ್ಳಂದೂರು ವಾರ್ಡ್ನ ಅಂಬಾಲಿಪುರ ಎಸ್ಜೆಆರ್ ವಾಟರ್ಮಾರ್ಕ್ ವಸತಿ ಸಮುಚ್ಛಯದಲ್ಲಿ ಏಳು ದಿನಗಳಲ್ಲಿ(ಫೆ.15ರಿಂದ ಫೆ.22) 10 ಜನರಿಗೆ ಕೊರೊನಾ ಸೋಂಕು ದೃಢಪಟ್ಟಿದೆ. ಇತ್ತೀಚೆಗೆ ನಗರದಲ್ಲಿ ಕ್ಲಸ್ಟರ್ ಮಾದರಿಯಲ್ಲಿ ಕೊರೊನಾ ಸೋಂಕು ಕಾಣಿಸಿಕೊಂಡ ಮೂರನೇ ಪ್ರಕರಣ ಇದಾಗಿದ್ದು, ಈ ರೀತಿ ವಸತಿ ಸಮುಚ್ಛಯಗಳಲ್ಲಿ ಕೊರೊನಾ ಸೋಂಕು ಮತ್ತೆ ಕಾಣಿಸಿಕೊಳ್ಳುತ್ತಿರುವುದು ಮತ್ತೆ ನಗರದಲ್ಲಿ ಕ್ಲಸ್ಟರ್ ಮಾದರಿ ಕೊರೊನಾ ಎದುರಾಗಬಹುದೆಂಬ ಆತಂಕ ಎದುರಾಗಿದೆ. ಕೋವಿಡ್ ದೃಢಪಟ್ಟಿರುವ ಪ್ರದೇಶವನ್ನು ಕಂಟೈನ್ಮೆಂಟ್ ವಲಯ ಎಂದು ಘೋಷಿಸಲಾಗಿದ್ದು, ಸೋಂಕು ದೃಢಪಟ್ಟ ಪ್ರದೇಶದ ಸುತ್ತಮುತ್ತ ಸೋಂಕು ನಿವಾರಕ ದ್ರಾವಣ ಸಿಂಪಡಣೆ ಮಾಡಲಾಗಿದೆ. ಅಲ್ಲದೆ, ಹೊರಗಿನಿಂದ ಯಾರೂ ಸೋಂಕು ದೃಢಪಟ್ಟ ಪ್ರದೇಶಕ್ಕೆ ಪ್ರವೇಶಿಸದಂತೆ ಬ್ಯಾರಿಕೇಡ್ಗಳನ್ನು ಅಳವಡಿಸಿ, ಎಚ್ಚರಿಕೆಯ ಬ್ಯಾನರ್ಗಳನ್ನು ಪಾಲಿಕೆಯ ಅಧಿಕಾರಿಗಳು ಅಳವಡಿಸಿದ್ದಾರೆ. ಈ ಸಮುಚ್ಛಯದಲ್ಲಿ ಒಟ್ಟು 9 ಬ್ಲಾಕ್ಗಳಿದ್ದು, 1500 ಮಂದಿ ನೆಲೆಸಿದ್ದಾರೆ. ವಸತಿ ಸಮುಚ್ಛಯದ ಆರು ಬ್ಲಾಕ್ಗಳಲ್ಲಿ ಇಲ್ಲಿಯವರೆಗೆ 10 ಜನರಿಗೆ ಕೊರೊನಾ ದೃಢಪಟ್ಟಿದ್ದು, ಉಳಿದ ಮೂರು ಬ್ಲಾಕ್ಗಳಲ್ಲಿ ಯಾರಿಗೂ ಕೋವಿಡ್ ಕಾಣಿಸಿಕೊಂಡಿಲ್ಲ. ಅಲ್ಲದೆ, ಸೋಂಕು ದೃಢಪಟ್ಟಿರುವ ಪ್ರದೇಶದಿಂದ 200 ಮೀಟರ್ ದೂರದಲ್ಲಿವೆ ಈ ಮೂರು ಬ್ಲಾಕ್ಗಳು. ಒಂಬತ್ತು ಮೊಬೈಲ್ ತಂಡ ನೇಮಕ ''ವಸತಿ ಸಮುಚ್ಛಯದಲ್ಲಿರುವವರನ್ನು ಕೊರೊನಾ ಸೋಂಕು ಪರೀಕ್ಷೆಗೆ ಒಳಪಡಿಸಲು ಪಾಲಿಕೆ 9 ಮೊಬೈಲ್ ತಂಡಗಳನ್ನು ಹಾಗೂ ನಾಲ್ವರು ವೈದ್ಯರನ್ನು ನೇಮಿಸಿದೆ. ಇಲ್ಲಿಯವರೆಗೆ 600 ಜನರನ್ನು ಆರ್ಟಿ-ಪಿಸಿಆರ್ ಸೋಂಕು ಪರೀಕ್ಷೆಗೆ ಒಳಪಡಿಸಲಾಗಿದೆ. ಇವರಲ್ಲಿ ಯಾರಿಗೂ ಕೊರೊನಾ ಸೋಂಕು ದೃಢಪಟ್ಟಿಲ್ಲ. ಇನ್ನು 500 ಜನರನ್ನು ಕೊರೊನಾ ಸೋಂಕು ಪರೀಕ್ಷೆಗೆ ಒಳಪಡಿಸಲಾಗಿದ್ದು, ಇವರ ವರದಿ ಮಂಗಳವಾರ ಬರಲಿದೆ'' ಎಂದು ಬಿಬಿಎಂಪಿ ಆಯುಕ್ತ ಎನ್. ಮಂಜುನಾಥ್ ಪ್ರಸಾದ್ ತಿಳಿಸಿದ್ದಾರೆ.
from India & World News in Kannada | VK Polls https://ift.tt/2ZImSJQ
