ನವದೆಹಲಿ: ಲಡಾಖ್ ಗಡಿಯಲ್ಲಿ ಚೀನಿ ಸೈನಿಕರ ಪ್ರಚೋದನೆಯಿಂದಾಗಿ ಸಂಭವಿಸಿರುವ ಹಿಂಸಾತ್ಮಕ ಘರ್ಷಣೆ, ದೇಶದಲ್ಲಿ ಆಕ್ರೋಶ ಅಲೆಯನ್ನೇ ಎಬ್ಬಿಸಿದೆ. ನಮ್ಮ ವೀರ ಸೈನಿಕರನ್ನು ಬಲಿ ಪಡೆದ ಚೀನಾಗೆ ಬುದ್ಧಿ ಕಲಿಸಲು ಸರ್ಕಾರ ಹಾಗೂ ಸಮಾಜ ಒಗ್ಗೂಡಿ ನಿರ್ಣಯ ಕೈಗೊಂಡಿರುವುದು ವಿಶೇಷವಾಗಿದೆ. ಚಿನಾಗೆ ವಾಣಿಜ್ಯ ಕ್ಷೇತ್ರದಲ್ಲಿ ಹೊಡೆತ ಕೊಡುವುದು ಭಾರತದ ಸದ್ಯದ ಗುರಿಯಾಗಿದೆ. ಪ್ರಮುಖವಗಿ ಚೀನಾ ವಸ್ತುಗಳ ಬಳಕೆಯನ್ನು ನಿಲ್ಲಿಸುವ ನಿರ್ಣಯವನ್ನು ಜನತೆ ಕೈಗೊಂಡಿದ್ದರೆ, ಚೀನಿ ವಸ್ತುಗಳ ಆಮದನ್ನು ಹಂತ ಹಂತವಾಗಿ ಕಡಿಮೆ ಮಾಡಲು ಕೇಂದ್ರ ಸರ್ಕಾರ ನಿರ್ಧರಿಸಿದೆ. ಅದರಂತೆ ಚೀನಿ ವಸ್ತುಗಳ ಪ್ರಮಾಣವನ್ನು ಕಡಿಮೆ ಮಾಡಲು ಮುಂದಾಗಿರುವ ಪ್ರಧಾನಿ ಮೋದಿ ನೇತೃತ್ವದ ಕೇಂದ್ರ ಸರ್ಕಾರ ಇದಕ್ಕಾಗಿ ತನ್ನ ಇ-ವ್ಯಾಪಾರ ನೀತಿಯನ್ನೇ ಬದಲಿಸಲು ನಿರ್ಧರಿಸಿದೆ. ಹೌದು, ಚೀನಾ ವಸ್ತುಗಳ ಆಮದು ಮತ್ತು ದೇಶದಲ್ಲಿ ಅವುಗಳ ಬಳಕೆಯನ್ನು 'ಗ್ರೌಂಡ್ ಝಿರೋ'ಗೆ ತರಲು ಉದ್ದೇಶಿಸಿರುವ ಮೋದಿ ಸರ್ಕಾರ, ಇದಕ್ಕಾಗಿ ಹೊಸ ಇ-ವ್ಯಾಪಾರ ನೀತಿಯನ್ನು ಅನುಸರಿಸಲಿದೆ. ಅದರಂತೆ ಇನ್ನು ಮುಂದೆ ದೇಶದ ಇ-ಕಾಮರ್ಸ್ ಸಂಸ್ಥೆಗಳು ತಮ್ಮ ಆನ್ಲೈನ್ ಪೋರ್ಟಲ್ಗಳಲ್ಲಿ ಮಾರಾಟವಾಗುವ ವಸ್ತುಗಳು ಸ್ವದೇಶಿ ನಿರ್ಮಿತವೋ ಅಥವಾ ವಿದೇಶೀ ನಿರ್ಮಿತವೋ ಎಂಬುದರ ಮಾಹಿತಿಯನ್ನು ಕಡ್ಡಾಯವಾಗಿ ನೀಡಬೇಕು ಎಂಬ ನಿಯಮವನ್ನು ಜಾರಿಗೆ ತರಲಿದೆ. ಈ ಕುರಿತು ಮಾಹಿತಿ ನೀಡಿರುವ ಕೇಂದ್ರ ವಾಣಿಜ್ಯ ಮತ್ತು ಕೈಗಾರಿಕೆ ಸಚಿವಾಲಯ, ಆನ್ಲೈನ್ನಲ್ಲಿ ಮಾರಾಟ ಮಾಡುತ್ತಿರುವ ವಸ್ತುಗಳ ಮೂಲ ಯಾವುದು ಎಂಬ ಮಾಹಿತಿಯನ್ನು ಇ-ಕಾಮರ್ಸ್ ಸಂಸ್ಥೆಗಳು ಕಡ್ಡಾಯವಾಗಿ ನೀಡಬೇಕು ಎಂಬ ನಿಯಮ ಶೀಘ್ರದಲ್ಲೇ ಜಾರಿಗೆ ಬರಲಿದೆ ಎಂದು ಸ್ಪಷ್ಟಪಡಿಸಿದೆ. ಈ ಮಾಹಿತಿಯನ್ನು ಕಲೆ ಹಾಕುವ ಮೂಲಕ ಯಾವ ಯಾವ ಕ್ಷೇತ್ರದಲ್ಲಿ ಚೀನಾ ವಸ್ತುಗಳು ಹೆಚ್ಚು ಮಾರಾಟವಾಗುತ್ತವೆ ಮತ್ತು ಆ ಕ್ಷೇತ್ರಗಳಲ್ಲಿ ದೇಶಿ ಉತ್ಪನ್ನಗಳ ಮಾರಾಟಕ್ಕೆ ಹೇಗೆ ಉತ್ತೇಜನ ನೀಡಬಹುದು ಎಂಬುದನ್ನು ಅರಿಯಲು ಸರ್ಕಾರಕ್ಕೆ ಸಹಾಯವಾಗಲಿದೆ. ಅಲ್ಲದೇ ಈ ಮಹತ್ವದ ವ್ಯಾಪಾರ ನೀತಿ ಬದಲಾವಣೆಯಿಂದ ಮೋದಿ ಸರ್ಕಾರದ ಆತ್ಮ ನಿರ್ಭರ ಭಾರತ ಯೋಜನೆಗೆ ಮತ್ತಷ್ಟು ಬಲ ನೀಡಲಿದೆ ಎಂದೂ ತಜ್ಞರು ಭರವಸೆ ವ್ಯಕ್ತಪಡಿಸಿದ್ದಾರೆ. ಪ್ರಸಕ್ತ ಹಣಕಾಸು ವರ್ಷದಲ್ಲಿ ಭಾರತದೊಂದಿಗೆ ಬರೋಬ್ಬರಿ 47 ಬಿಲಿಯನ್ ಅಮೆರಿಕನ್ ಡಾಲರ್ ಮೊತ್ತದ ವ್ಯಾಪಾರ ಮಾಡಿರುವ ಚೀನಾ, ಇನ್ಮುಂದೆ ತನ್ನದೇ ತಪ್ಪುಗಳಿಂದ ಈ ಅವಕಾಶ ಕಳೆದುಕೊಳ್ಳುವುದು ಖಚಿತವಾಗಿದೆ.
from India & World News in Kannada | VK Polls https://ift.tt/3hHKoOH
