ಮೌಂಟ್ ಮಾಂಗನುಯಿ: ಆತಿಥೇಯ ನ್ಯೂಜಿಲೆಂಡ್ ವಿರುದ್ಧ ಭಾನುವಾರ ನಡೆದ ಕೊನೆಯ ಟಿ20 ಪಂದ್ಯದಲ್ಲೂ ಏಳು ರನ್ ಅಂತರದ ಗೆಲುವು ಬಾರಿಸಿರುವ ಟೀಮ್ ಇಂಡಿಯಾ, ಐದು ಪಂದ್ಯಗಳ ಟಿ20 ಸರಣಿಯನ್ನು 5-0 ಅಂತರದಲ್ಲಿ ಕ್ಲೀನ್ಸ್ವೀಪ್ಗೈದಿದೆ. ಈ ಮೂಲಕ ಐದು ಪಂದ್ಯಗಳ ಟಿ20 ಪ್ರಕಾರದಲ್ಲಿ ಕ್ಲೀನ್ ಸ್ವೀಪ್ ಗೆಲುವು ದಾಖಲಿಸಿದ ಮೊದಲ ತಂಡವೆಂಬ ಹೆಗ್ಗಳಿಕೆಗೆ ಪಾತ್ರವಾಗಿದ್ದಾರೆ. ಈ ನಡುವೆ ಟೀಮ್ ಇಂಡಿಯಾ ಬಲಗೈ ವೇಗದ ಬೌಲರ್ ಸದ್ದಿಲ್ಲದೆ ವಿಶಿಷ್ಟ ದಾಖಲೆಯನ್ನು ಬರೆದಿದ್ದಾರೆ. ಟ್ವೆಂಟಿ-20 ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಅತಿ ಹೆಚ್ಚು (7) ಮೇಡನ್ ಓವರ್ಗಳನ್ನು ದಾಖಲಿಸಿರುವ ಹಿರಿಮೆಗೆ ಭಾಜನವಾಗಿದ್ದಾರೆ. ನ್ಯೂಜಿಲೆಂಡ್ ವಿರುದ್ಧ ನಡೆದ ಅಂತಿಮ ಟಿ20 ಪಂದ್ಯದಲ್ಲಿ ಜಸ್ಪ್ರೀತ್ ಬುಮ್ರಾ ಕೇವಲ 12 ರನ್ ತೆತ್ತು ಮೂರು ವಿಕೆಟ್ ಕಬಳಿಸಿ ವಿಜಯದ ರೂವಾರಿ ಎನಿಸಿದ್ದರು. ಇದರಲ್ಲಿ ಒಂದು ಮೇಡನ್ ಓವರ್ ಸೇರಿತ್ತು. ಇದು ಟಿ20 ಕ್ರಿಕೆಟ್ನಲ್ಲಿ ಬುಮ್ರಾ ಎಸೆದಿರುವ ಏಳನೇ ಮೇಡನ್ ಓವರ್ ಆಗಿದೆ. ಪರಿಣಾಮ 164ರ ಗೆಲುವಿನ ಗುರಿ ಬೆನ್ನಟ್ಟಿದ ನ್ಯೂಜಿಲೆಂಡ್ ಒಂಬತ್ತು ವಿಕೆಟ್ ನಷ್ಟಕ್ಕೆ 156 ರನ್ ಗಳಿಸಲಷ್ಟೇ ಶಕ್ತವಾಗಿತ್ತು. ಜಸ್ಪ್ರೀತ್ ಬುಮ್ರಾ ಅರ್ಹವಾಗಿಯೇ ಪಂದ್ಯಶ್ರೇಷ್ಠ ಪ್ರಶಸ್ತಿಗೆ ಭಾಜನವಾದರು. ಮೊದಲೆರಡು ಪಂದ್ಯಗಳಲ್ಲಿ ಗಮನಾರ್ಹ ಪ್ರದರ್ಶನ ನೀಡಿರುವ ಜಸ್ಪ್ರೀತ್ ಬುಮ್ರಾ, ಹ್ಯಾಮಿಲ್ಟನ್ನಲ್ಲಿ ಟೈನಲ್ಲಿ ಅಂತ್ಯಗೊಂಡ ಮೂರನೇ ಪಂದ್ಯದಲ್ಲಿ 45 ರನ್ ಬಿಟ್ಟುಕೊಟ್ಟು ಸಾಕಷ್ಟು ದುಬಾರಿಯೆನಿಸಿದ್ದರು. ಬಳಿಕ ಸೂಪರ್ ಓವರ್ನಲ್ಲಿ 17 ರನ್ ಬಿಟ್ಟುಕೊಟ್ಟರು. ವೆಲ್ಲಿಂಗ್ಟನ್ನಲ್ಲಿ ನಡೆದ ನಾಲ್ಕನೇ ಟಿ20 ಪಂದ್ಯದಲ್ಲೂ ಪ್ರಭಾವಿ ಎನಿಸಿಕೊಳ್ಳುವಲ್ಲಿ ವಿಫಲವಾಗಿದ್ದರು. ಆದರೆ ಅಂತಿಮ ಟಿ20ನಲ್ಲಿ ಮಗದೊಮ್ಮೆ ಮ್ಯಾಚ್ ವಿನ್ನಿಂಗ್ ಪ್ರದರ್ಶನ ನೀಡಿರುವ ಬುಮ್ರಾ, ತಾವೇ ಡೆತ್ ಬೌಲಿಂಗ್ ಸ್ಪೆಷಲಿಸ್ಟ್ ಎಂಬುದನ್ನು ಸಾಬೀತು ಮಾಡಿದರು. ಸ್ಟ್ರೆಸ್ ಫ್ರಾಕ್ಚರ್ ಗಾಯದ ಸಮಸ್ಯೆಯಿಂದ ಮುಕ್ತಗೊಂಡಿರುವ ಬುಮ್ರಾ, ಕಳೆದ ಆಸ್ಟ್ರೇಲಿಯಾ ಸರಣಿ ವೇಳೆಯಷ್ಟೇ ಕಮ್ಬ್ಯಾಕ್ ಮಾಡಿದ್ದರು. ಇದೀಗ ನ್ಯೂಜಿಲೆಂಡ್ ವಿರುದ್ಧವೂ ತಮ್ಮ ಶ್ರೇಷ್ಠ ಪ್ರದರ್ಶನ ನೀಡುವ ಮೂಲಕ ಲಯಕ್ಕೆ ಮರಳಿದ್ದಾರೆ. ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಬುಮ್ರಾ, "ತುಂಬಾನೇ ಸಂತಸವಾಗುತ್ತಿದೆ. ಒಂದು ಹಂತದಲ್ಲಿ ಪಂದ್ಯವು ನಿಕಟ ಹಂತವನ್ನು ತಲುಪಿತ್ತು. ಆದರೆ ಎರಡು ಉತ್ತಮ ಓವರ್ ಎಸೆದರೆ ಪಂದ್ಯದಲ್ಲಿ ನಮಗೆ ಅವಕಾಶವಿದೆ ಎಂಬುದನ್ನು ನಂಬಿಕೊಂಡಿದ್ದೆವು" ಎಂದರು. "ಮೈದಾನದಲ್ಲಿ ಗಾಳಿಯು ಬೀಸುತ್ತಿತ್ತು. ಇದರ ಸಂಪೂರ್ಣ ಪ್ರಯೋಜನ ಪಡೆಯಲು ಬಯಸಿದ್ದೆ. ಮೊದಲ ಬಾರಿಗೆ ನ್ಯೂಜಿಲೆಂಡ್ ಪ್ರವಾಸದಲ್ಲಿ ವಿವಿಧ ಕೋನಗಳ ಮೈದಾನದಲ್ಲಿ ಪ್ರದರ್ಶನ ನೀಡಲು ಸಾಧ್ಯವಾಗಿರುವುದು ಉತ್ತಮ ಕಲಿಕಾ ಹಂತವಾಗಿದೆ" ಎಂದು ಸೇರಿಸಿದರು. ಟಿ20 ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಅತಿ ಹೆಚ್ಚು ಮೇಡನ್ ಓವರ್ ಎಸೆದಿರುವ ಬೌಲರ್ಗಳ ಪಟ್ಟಿ ಇಂತಿದೆ: ಜಸ್ಪ್ರೀತ್ ಬುಮ್ರಾ: 7 (49 ಪಂದ್ಯ) ನುವಾನ್ ಕುಲಶೇಖರ: 6 (58 ಪಂದ್ಯ) ಹರ್ಭಜನ್ ಸಿಂಗ್: 5 (27 ಪಂದ್ಯ) ಟ್ರೆಂಟ್ ಜಾನ್ಸ್ಟನ್: 5 (28 ಪಂದ್ಯ) ಅಜಂತ ಮೆಂಡಿಸ್: 5 (39 ಪಂದ್ಯ)
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2RRhXmv
