ಮುಂಬೈ: ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ, ತನ್ನ ಕ್ರಿಕೆಟ್ ಸಲಹಾ ಸಮಿತಿಗೆ (ಸಿಎಸಿ) ಮಾಜಿ ಕ್ರಿಕೆಟಿಗರಾದ ಮದನ್‌ ಲಾಲ್‌, ರುದ್ರಪ್ರತಾಪ್‌ ಸಿಂಗ್‌ ಮತ್ತು ಮಹಿಳಾ ತಂಡದ ಮಾಜಿ ಆಟಗಾರ್ತಿ ಸುಲಕ್ಷಣಾ ನಾಯಕ್‌ ಅವರನ್ನು ಶುಕ್ರವಾರ ನೇಮಕ ಮಾಡಿದೆ. ಈ ಮೊದಲು ಮದನ್‌ ಲಾಲ್‌, ಸುಲಕ್ಷಣಾ ನಾಯಕ್‌ ಮತ್ತು ಗೌತಮ್‌ ಗಂಭೀರ್‌ ಅವರನ್ನು ಈ ಹುದ್ದೆಗೆ ನೇಮಕ ಮಾಡಲು ಮುಂದಾಗಲಾಗಿತ್ತು. ಆದರೆ ಗಂಭೀರ್‌ ಸಂಸದರಾಗಿರುವ ಕಾರಣ ಅವರಿಗೆ ಬಿಸಿಸಿಐನಲ್ಲಿ ಯಾವುದೇ ಹುದ್ದೆ ಹೊಂದಲು ಸಾಧ್ಯವಾಗುವುದಿಲ್ಲ. ಹೀಗಾಗಿ ಆ ಸ್ಥಾನಕ್ಕೆ ಮಾಜಿ ವೇಗದ ಬೌಲರ್‌ ಆರ್‌ಪಿ ಸಿಂಗ್‌ ಅವರನ್ನು ಆಯ್ಕೆ ಮಾಡಿ ನೂತನ ರಚಿಸಲಾಗಿದೆ. ಇದೀಗ ಸಿಎಸಿ ಭಾರತ ಕ್ರಿಕೆಟ್ ತಂಡದ ಸದಸ್ಯರ ಆಯ್ಕೆ ಸಲುವಾಗಿ ಸಂದರ್ಶನ ಕಾರ್ಯ ನಡೆಸಿಕೊಡಲಿದ್ದಾರೆ. ಚೀಫ್‌ ಸೆಲೆಕ್ಟರ್‌ ಎಂಎಸ್‌ಕೆ ಪ್ರಸಾದ್‌ ಮತ್ತು ಕೇಂದ್ರ ವಲಯದ ಸೆಲೆಕ್ಟರ್‌ ಗಗನ್‌ ಖೋಡಾ ಅವರ ಅಧಿಕಾರಾವಧಿ ಮುಗಿದ್ದಿದ್ದು, ಅವರಿಬ್ಬರ ಸ್ಥಾನಕ್ಕೆ ಮುಂದಿನ 4 ವರ್ಷಗಳ ಅವಧಿಗೆ ನೂತನ ಸೆಲೆಕ್ಟರ್‌ಗಳ ಆಯ್ಕೆಯಾಗಲಿದೆ. ಇದೇ ವೇಳೆ ಮುಖ್ಯಸ್ಥರ ನೇಮಕ ವಿಚಾರದಲ್ಲಿ ಸ್ಪಷ್ಟ ಮಾಹಿತಿ ನೀಡಿರುವ ಅಧ್ಯಕ್ಷ ಯಾರು ಅತಿ ಹೆಚ್ಚು ಟೆಸ್ಟ್‌ ಪಂದ್ಯಗಳನ್ನು ಆಡಿರುತ್ತಾರೋ ಅವರಿಗೆ ಮುಖ್ಯಸ್ಥನ ಸ್ಥಾನ ಲಭ್ಯವಾಗಲಿದೆ ಎಂದಿದ್ದಾರೆ. ಆದರೆ, ನಿಯಮಗಳ ಪ್ರಕಾರ ಆಯ್ಕೆ ಸಮಿತಿಯ ನಾಲ್ಕು ಮಂದಿ ಸದಸ್ಯರಲ್ಲಿ ಟೆಸ್ಟ್‌ ಕ್ರಿಕೆಟ್ ಆಡಿದ ಅತ್ಯಂತ ಹಿರಿಯನಿಗೆ ಮುಖ್ಯಸ್ಥನ ಸ್ಥಾನ ಸಿಗಬೇಕೆಂದಿದೆ. ಆದರೆ, ಗಂಗೂಲಿ ಅತಿ ಹೆಚ್ಚು ಟೆಸ್ಟ್‌ ಆಡಿದವರಿಗೆ ಮುಖ್ಯಸ್ಥನ ಸ್ಥಾನ ನೀಡಲಾಗುವುದು ಎಂದಿದ್ದಾರೆ. ಮಾಜಿ ಕ್ರಿಕೆಟಿಗರಾದ ಲಕ್ಷ್ಮಣ್‌ ಶಿವರಾಮಕೃಷ್ಣನ್‌, ವೆಂಕಟೇಶ್‌ ಪ್ರಸಾದ್‌, ರಾಜೇಶ್‌ ಚೌಹಾಣ್‌, ನಯನ್‌ ಮೋಂಗ್ಯಾ, ಚೇತನ್‌ ಚೌಹಾಣ್‌, ನಿಖಿಲ್‌ ಚೋಪ್ರ ಮತ್ತು ಅಬೇ ಕುರುವಿಲ್ಲ ನ್ಯಾಷನಲ್‌ ಸೆಲೆಕ್ಟರ್‌ ಹುದ್ದೆಗಳಿಗೆ ಅರ್ಜಿ ಸಲ್ಲಿಸಿದ್ದಾರೆ. ಭಾರತ ಟೆಸ್ಟ್‌ ತಂಡದ ಪರ 9 ಟೆಸ್ಟ್‌ ಪಂದ್ಯಗಳನ್ನು ಆಡಿರುವ ಮಾಜಿ ಲೆಗ್‌ ಸ್ಪಿನ್ನರ್‌ ಲಕ್ಷ್ಮಣ್‌ ಶಿವರಾಮಕೃಷ್ಣನ್‌ ಸಮಿತಿಗೆ ಆಯ್ಕೆಯಾದರೆ ನಿಯಮಾನುಸಾರ ಅತಿ ಹಿರಿಯ ಟೆಸ್ಟ್‌ ಆಟಗಾರ ಎಂಬ ಆಧಾರದ ಮೇರೆಗೆ ಮುಖ್ಯಸ್ಥನ ಸ್ಥಾನ ಸಿಗಲಿದೆ. ಗಂಗೂಲಿ ಪ್ರಕಾರ ವೆಂಕಟೇಶ್‌ ಪ್ರಸಾದ್‌ (33 ಟೆಸ್ಟ್‌) ಮತ್ತು ಅಜಿತ್‌ ಅಗರ್ಕರ್‌ (26 ಟೆಸ್ಟ್‌) ಕೂಡ ಅಷ್ಟೇ ಅರ್ಹ ಅರ್ಜೀದಾರರಾಗಿದ್ದಾರೆ ಎಂದಿದ್ದಾರೆ. ವೆಂಕಟೇಶ್‌ ಪ್ರಸಾದ್‌, ಈಗಾಗಲೇ ರಾಷ್ಟ್ರೀಯ ಕಿರಿಯರ ತಂಡದ ಆಯ್ಕೆ ಸಮಿತಿಯಲ್ಲಿ ಕಳೆದ ಒಂದೂವರೆ ವರ್ಷ ಸೇವೆ ಸಲ್ಲಿಸಿದ್ದು, ನ್ಯಾಷನಲ್‌ ಸೆಲೆಕ್ಟರ್‌ ಆಗಿ 4 ವರ್ಷಗಳ ಸೇವೆಗೆ ಅವರು ಲಭ್ಯರಾಗುವುದಿಲ್ಲ. ಒಟ್ಟಾರೆ ಟೀಮ್‌ ಇಂಡಿಯಾದ ಆಯ್ಕೆ ಸಮಿತಿ ಮುಖ್ಯಸ್ಥರು ಯಾರಾಗುತ್ತಾರೆ? ಎಂಎಸ್‌ಕೆ ಪ್ರಸಾದ್‌ ಹುದ್ದೆ ಅಲಂಕರಿಸುವವರು ಯಾರು? ಎಂಬ ಕುತೂಹಲ ಮುಂದುವರಿದಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/38Z7ECQ
