ವೆಲ್ಲಿಂಗ್ಟನ್: ಟೀಮ್ ಇಂಡಿಯಾ ವಿರುದ್ಧದ ಪ್ರಥಮ ಟೆಸ್ಟ್ ಪಂದ್ಯದಲ್ಲಿ 10 ವಿಕೆಟ್ಗಳ ಭರ್ಜರಿ ಜಯ ದಾಖಲಿಸಿದ ಬಳಿಕ ಮಾತನಾಡಿದ ನ್ಯೂಜಿಲೆಂಡ್ ಕಪ್ತಾನ ಕೇನ್ ವಿಲಿಯಮ್ಸನ್ ತಂಡದ ಪ್ರದರ್ಶನವನ್ನು ಹಾಡಿಹೊಗಳಿದ್ದಾರೆ. ಎರಡು ಟೆಸ್ಟ್ಗಳ ಸರಣಿಯ ಮೊದಲ ಹಣಾಹಣಿಯಲ್ಲಿ ಟಾಸ್ ಗೆದ್ದು ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡ ನ್ಯೂಜಿಲೆಂಡ್, ಪ್ರವಾಸಿ ಭಾರತ ತಂಡವನ್ನು 165 ರನ್ಗಳಿಗೆ ಆಲ್ಔಟ್ ಮಾಡಿತು. ಬಳಿಕ ಕೆಳ ಕ್ರಮಾಂಕದ ಬ್ಯಾಟ್ಸ್ಮನ್ಗಳ ವೀರಾವೇಶದಿಂದ ಮೊದಲ ಇನಿಂಗ್ಸ್ನಲ್ಲಿ 183 ರನ್ಗಳ ಭರ್ಜರಿ ಮುನ್ನಡೆ ಪಡೆದುಕೊಂಡಿತು. ಎರಡನೇ ಇನಿಂಗ್ಸ್ನಲ್ಲೂ 191ಕ್ಕೆ ಆಲ್ಔಟ್ ಆದ ಟೀಮ್ ಇಂಡಿಯಾ ಎದುರಾಳಿಗೆ ಜುಜುಬಿ 9 ರನ್ಗಳ ಗುರಿ ನೀಡಲಷ್ಟೇ ಶಕ್ತವಾಯಿತು. ಇದನ್ನು ಕೇವಲ 10 ಎಸೆತಗಳಲ್ಲಿ ಮೆಟ್ಟಿನಿಂದ ನ್ಯೂಜಿಲೆಂಡ್ ತಂಡ 10 ವಿಕೆಟ್ಗಳ ಭರ್ಜರಿ ಗೆಲುವು ತನ್ನದಾಗಿಸಿಕೊಂಡು ಸರಣಿಯಲ್ಲಿ 1-0 ಅಂತರದ ಮೇಲುಗೈ ಪಡೆಯಿತು. "ಕಳೆದ ನಾಲ್ಕು ದಿನಗಳಲ್ಲಿ ನಮ್ಮ ತಂಡ ಅದ್ಭುತ ಪ್ರದರ್ಶನ ನೀಡಿದೆ. ವಿಶ್ವದ ಯಾವುದೇ ಭಾಗದಲ್ಲಿ ಭಾರತ ತಂಡ ಎಷ್ಟು ಬಲಿಷ್ಠ ಎಂಬುದನ್ನು ತಿಳಿದಿದ್ದೇವೆ. ಹೀಗಿರುವಾಗ ಮೊದಲ ಇನಿಂಗ್ಸ್ನಲ್ಲಿ ನೀಡಿದ ಅದ್ಭುತ ಬೌಲಿಂಗ್ ಪ್ರದರ್ಶನ ಮತ್ತು ಬಳಿಕ ಬ್ಯಾಟಿಂಗ್ನಲ್ಲಿ ದಾಖಲಿಸಿದ ಸ್ಪರ್ಧಾತ್ಮಕ ಮೊತ್ತ ಯಶಸ್ಸು ತಂದುಕೊಟ್ಟಿತು. ಕೆಳ ಕ್ರಮಾಂಕದ ಬ್ಯಾಟ್ಸ್ಮನ್ಗಳ ಹೋರಾಟದಿಂದ ಹೆಚ್ಚುವರಿ ಮುನ್ನಡೆ ಪಡೆಯಲು ಸಾಧ್ಯವಾಯಿತು," ಎಂದು ವಿಲಿಯಮ್ಸನ್ ಹೇಳಿದ್ದಾರೆ. ಎರಡನೇ ಇನಿಂಗ್ಸ್ನಲ್ಲಿ ಕಿವೀಸ್ ಪಡೆಯ ಬೌಲಿಂಗ್ ದಾಳಿಯನ್ನು ಮುನ್ನಡೆಸಿದ ಅನುಭವಿ ವೇಗಿಗಳಾದ ಟಿಮ್ ಸೌಥೀ ಮತ್ತು ಟ್ರೆಂಟ್ ಬೌಲ್ಟ್ ಒಟ್ಟಾಗಿ 9 ವಿಕೆಟ್ಗಳನ್ನು ಪಡೆಯುವ ಮೂಲಕ ಟೀಮ್ ಇಂಡಿಯಾ ಬ್ಯಾಟ್ಸ್ಮನ್ಗಳನ್ನು ಪೆವಿಲಿಯನ್ಗೆ ಅಟ್ಟಿದರು. ಸೌಥೀ ಒಟ್ಟು 110ಕ್ಕೆ 9 ವಿಕೆಟ್ ಪಡೆದು ಪಂದ್ಯಶ್ರೇಷ್ಠ ಗೌರವ ಪಡೆದುಕೊಂಡರು. "ಟೆಸ್ಟ್ನ ಮೊದಲ ದಿನದಂದು ಪಿಚ್ನಿಂದ ಏನು ನಿರೀಕ್ಷಿಸಬೇಕು ಎಂಬುದನ್ನು ನಾವು ತಿಳಿದಿರಲಿಲ್ಲ. ಏಕೆಂದರೆ ಈವಾರ ಗಾಳಿ ಹೆಚ್ಚು ಬೀಸುತ್ತಿದ್ದ ಕಾರಣ ಸ್ವಿಂಗ್ ಕೂಡ ಅಧಿಕವಾಗಿತ್ತು. ಬೌಲರ್ಗಳ ಸಂಘಟಿತ ಪ್ರದರ್ಶನ ಪ್ರಶಂಸಾರ್ಹ. ಅದರಲ್ಲೂ ಜೇಮಿಸನ್ ಭರ್ಜರಿ ಆಟವಾಡಿದರು. ಬಿಳಿ ಚೆಂಡಿನಲ್ಲೂ ಅವರು ಉತ್ತಮವಾಗಿ ಆಡಿದ್ದರು. ಈಗ ಟೆಸ್ಟ್ನಲ್ಲೂ ಅದ್ಭುತವಾಗಿ ತಂಡಕ್ಕೆ ಪದಾರ್ಪಣೆ ಮಾಡಿದ್ದಾರೆ," ಎಂದು ವಿಲಿಯಮ್ಸನ್ ತಂಡದ ಪ್ರದರ್ಶನವನ್ನು ಹೊಗಳಿದ್ದಾರೆ. "ಭಾರತದಂತಹ ಗುಣಮಟ್ಟದ ತಂಡವನ್ನು ಮಣಿಸಿರುವುದು 'ಮಹೋನ್ನತ ಗೆಲುವು' ಎಂದೇ ಹೇಳಬಹುದು. ತಾಯ್ನಾಡಿನಲ್ಲಿ ಆಡಿ ಗೆದ್ದಿರುವುದು ಸಂತಸ ಹೆಚ್ಚಿಸಿದೆ. ಇಂದು ಮುಂಜಾನೆ ಪಂದ್ಯದ ಅತ್ಯಂತ ಮುಖ್ಯ ಘಟ್ಟ. ಎರಡನೇ ಹೊಸ ಚೆಂಡನ್ನು ತೆಗೆದುಕೊಳ್ಳುವ ಮೊದಲೇ ಎರಡು ಅತ್ಯಮೂಲ್ಯ ವಿಕೆಟ್ ಪಡೆದದ್ದು ಪ್ರಮುಖ ಸಂಗತಿ. ಪಂದ್ಯದಲ್ಲಿ ತಂಡದ ಬೌಲಿಂಗ್ ವಿಭಾಗ ಸಂಪೂರ್ಣ 20 ವಿಕೆಟ್ ಪಡೆದದ್ದು ಪ್ರಶಂಸಾರ್ಹ," ಎಂದಿದ್ದಾರೆ. ಇದೀಗ ಇತ್ತಂಡಗಳು ಫೆ.29ರಂದು (ಶನಿವಾರ) ಕ್ರೈಸ್ಟ್ಚರ್ಚ್ನ ಹ್ಯಾಗ್ಲೀ ಓವಲ್ ಕ್ರೀಡಾಂಗಣದಲ್ಲಿ ಆರಂಭವಾಗಲಿರುವ ಎರಡನೇ ಹಾಗೂ ಅಂತಿಮ ಟೆಸ್ಟ್ ಪಂದ್ಯದಲ್ಲಿ ಮುಖಾಮುಖಿಯಾಗಲಿವೆ. ಭಾರತ ಈ ಟೆಸ್ಟ್ನಲ್ಲಿ ತಿರುಗೇಟು ನೀಡಿ ಮಾನ ಉಳಿಸಿಕೊಳ್ಳುವತ್ತ ಎದುರು ನೋಡಲಿದೆ. ಅಂಕಪಟ್ಟಿಯಲ್ಲಿ ಸತತ 7 ಗೆಲುವಿನೊಂದಿಗೆ ಅಗ್ರಸ್ಥಾನದಲ್ಲಿದ್ದ ವಿಶ್ವದ ನಂ.1 ಭಾರತ ತಂಡಕ್ಕೆ ಮೊದಲ ಸೋಲಿನ ಆಘಾತ ಎದುರಾಗಿದೆ. ಮತ್ತೊಂದೆಡೆ ನ್ಯೂಜಿಲೆಂಡ್ ತಂಡ ತನ್ನ ಎರಡನೇ ಗೆಲುವಿನ ಸಿಹಿಯುಂಡಿದೆ. ಈ ಮೂಲಕ ಅಂಕಪಟ್ಟಿಯಲ್ಲಿ ಆರನೇ ಸ್ಥಾನದಿಂದ ಮೇಲೇರಿ ಐದನೇ ಸ್ಥಾನ ಪಡೆದುಕೊಂಡಿದೆ. ಸಂಕ್ಷಿಪ್ತ ಸ್ಕೋರ್ ಭಾರತ: ಮೊದಲ ಇನಿಂಗ್ಸ್ 165/10 ನ್ಯೂಜಿಲೆಂಡ್: ಮೊದಲ ಇನಿಂಗ್ಸ್ 100.2 ಓವರ್ಗಳಲ್ಲಿ 348/10 (ಕೇನ್ ವಿಲಿಯಮ್ಸನ್ 89, ರಾಸ್ ಟೇಲರ್ 44, ಕಾಲಿನ್ ಡಿ'ಗ್ರ್ಯಾಂಡ್ ಹೋಮ್ 43, ಕೈಲ್ ಜೇಮಿಸನ್ 44, ಟ್ರೆಂಟ್ ಬೌಲ್ಟ್ 38; ಇಶಾಂತ್ ಶರ್ಮಾ 68ಕ್ಕೆ 5, ಆರ್. ಅಶ್ವಿನ್ 99ಕ್ಕೆ 3). ಭಾರತ: 2ನೇ ಇನಿಂಗ್ಸ್ 81 ಓವರ್ಗಳಲ್ಲಿ 191/10 (ಅಜಿಂಕ್ಯ ರಹಾನೆ 29, ಹನುಮ ವಿಹಾರಿ 15, ರಿಷಭ್ ಪಂತ್ 25; ಟ್ರೆಂಟ್ ಬೌಲ್ಟ್ 39ಕ್ಕೆ 4, ಟಿಮ್ ಸೌಥೀ 61ಕ್ಕೆ 5). ನ್ಯೂಜಿಲೆಂಡ್: 2ನೇ ಇನಿಂಗ್ಸ್ 1.4 ಓವರ್ಗಳಲ್ಲಿ 9/0 (ಟಾಮ್ ಲೇಥಮ್ ಅಜೇಯ 7, ಟಾಮ್ ಬ್ಲಂಡಲ್ ಅಜೇಯ 2).
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2Plxycx
