ಕೊಲ್ಕತ್ತ: ವಿಧಾನಸಭೆ ಚುನಾವಣೆ ಹೊಸ್ತಿಲಲ್ಲಿರುವ ಪಶ್ಚಿಮ ಬಂಗಾಳದಲ್ಲಿ ಹಾಗೂ ಜಿದ್ದಾಜಿದ್ದಿ ಜೋರಾಗಿರುವ ಹೊತ್ತಲ್ಲಿಯೇ ತೃಣಮೂಲ ಕಾಂಗ್ರೆಸ್ ತನ್ನ ಚುನಾವಣಾ ಘೋಷಣೆ ಬಿಡುಗಡೆ ಮಾಡಿದೆ. 'ಸ್ವಂತ ಮಗಳಿಗೆ ಮನ್ನಣೆ ನೀಡುತ್ತದೆ ಬಂಗಾಳ' ಎನ್ನುವ ಘೋಷಣೆ ಬಿಡುಗಡೆ ಮಾಡಿದ್ದು, ಪ್ರಧಾನಿ ನರೇಂದ್ರ ಮೋದಿ ಹಾಗೂ ಗೃಹ ಸಚಿವ ಅಮಿತ್ ಶಾ ಅವರನ್ನು ಹೊರಗಿನವರೆಂದು ಬಿಂಬಿಸಲು ಯತ್ನಿಸಲಾಗಿದೆ. ಕಳೆದ 10 ವರ್ಷಗಳಿಂದ ಟಿಎಂಸಿ ತೆಕ್ಕೆಯಲ್ಲಿರುವ ಪಶ್ಚಿಮ ಬಂಗಾಳದಲ್ಲಿ ಜಯದ ಪತಾಕೆ ಹಾರಿಸಲು ಬಿಜೆಪಿ ಭಾರಿ ಸಿದ್ಧತೆಗಳನ್ನು ನಡೆಸಿಕೊಂಡು ಬರುತ್ತಿದೆ. ಪ್ರಧಾನಿ ಮೋದಿ, ಅಮಿತ್ ಶಾ, ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಜೆ.ಪಿ.ನಡ್ಡಾ ಸೇರಿದಂತೆ ಅನೇಕ ನಾಯಕರು ಭೇಟಿ ನೀಡಿ ಪ್ರಚಾರದ ಕಹಳೆ ಮೊಳಗಿಸಿದ್ದು, ಮುಂದಿನ ದಿನಗಳಲ್ಲಿ ಇದು ಇನ್ನಷ್ಟು ಬಿರುಸುಗೊಳ್ಳಲಿದೆ. ಕೃಷಿ ಕಾಯಿದೆಗಳು, ಪೆಟ್ರೋಲ್ ಮತ್ತು ಡೀಸೆಲ್ ದರ ಏರಿಕೆ ಸೇರಿ ಅನೇಕ ವಿಚಾರಗಳನ್ನು ಮುಂದಿಟ್ಟು ಕೇಂದ್ರದ ವಿರುದ್ಧ ಹಾರಿಯುತ್ತಲೇ ಬಂದಿರುವ ಸಿಎಂ ಅವರ ಟಿಎಂಸಿ, ಮತ ಸೆಳೆಯಲು ಈಗ 'ಮನೆ ಮಗಳು' ಎಂಬ ಟ್ರಂಪ್ ಕಾರ್ಡ್ ಬಳಸಿದೆ. 'ದೀದಿ' ಅವರನ್ನು ಬಂಗಾಳದ ಮಗಳು ಎಂದು ಕರೆದುಕೊಂಡಿರುವ ಪಕ್ಷವು ಕೋಲ್ಕೊತಾದೆಲ್ಲೆಡೆ ಮಮತಾ ಅವರ ಫೋಟೊ ಜತೆ ಈ ಘೋಷಣೆಯ ಹೋರ್ಡಿಂಗ್ಗಳನ್ನು ಹಾಕುತ್ತಿದೆ. ಸಿಎಂ ಆಗಿ ಹಲವು ವರ್ಷಗಳಿಂದಲೂ ತಮ್ಮ ಜತೆ ಇರುವ ಮಮತಾ ಅವರನ್ನೇ ಪಶ್ಚಿಮ ಬಂಗಾಳ ಜನರು ಮತ್ತೊಮ್ಮೆ ಅಧಿಕಾರಕ್ಕೆ ತರಲು ಬಯಸುತ್ತಿದ್ದಾರೆ. ಬಂಗಾಳದಲ್ಲಿ ಹೊರಗಿನವರಿಗೆ ಅವಕಾಶ ನೀಡುವುದು ಬೇಡವಾಗಿದೆ. ಮುಖ್ಯಮಂತ್ರಿಗಳು ಈಗಾಗಲೇ ಜನತೆಗೆ ರಿಪೋರ್ಟ್ ಕಾರ್ಡ್ ಒಪ್ಪಿಸಿಯಾಗಿದೆ. ಮಹಿಳೆಯರ ರಕ್ಷಣೆಗೆ ಅನೇಕ ಕಾರ್ಯಕ್ರಮಗಳನ್ನು ಜಾರಿಗೊಳಿಸಿದ್ದು. ಗ್ರಾಮಗಳಲ್ಲಿ 34 ಲಕ್ಷ ಮನೆಗಳನ್ನು ನಿರ್ಮಿಸಲಾಗಿದೆ. 96 ಲಕ್ಷ ಮನೆಗಳಿಗೆ ವಿದ್ಯುತ್ ಸಂಪರ್ಕ ಕಲ್ಪಿಸಲಾಗಿದೆ. ಅಭಿವೃದ್ಧಿ ಕಾರ್ಯಗಳು ದೀದಿ ಅವರ ಕೈಹಿಡಿಯಲಿದೆ ಎಂದು ಎಂದು ಟಿಎಂಸಿ ಕಾರ್ಯದರ್ಶಿ ಪಾರ್ಥ ಚಟರ್ಜಿ ಹೇಳಿದ್ದಾರೆ. 294 ಸೀಟುಗಳಿಗೆ ಪಶ್ಚಿಮ ಬಂಗಾಳದಲ್ಲಿ ವಿಧಾನಸಭೆ ಚುನಾವಣೆ ನಡೆಯುತ್ತಿದ್ದು, ಈಗಾಗಲೇ ಬಿಜೆಪಿ ಪರಿವರ್ತನಾ ಯಾತ್ರೆ ನಡೆಸಿದೆ. ಟಿಎಂಸಿ ಕೂಡ ಸಾಲು ಸಾಲು ಪ್ರಚಾರ ಮೆರವಣಿಗೆ ನಡೆಸುತ್ತಿದೆ. ಸೋಮವಾರ ಮೋದಿ ಭೇಟಿಪ್ರಧಾನಿ ಮೋದಿ ಅವರು ಚುನಾವಣೆ ಸಿದ್ಧತೆಯಲ್ಲಿರುವ ಅಸ್ಸಾಂ ಮತ್ತು ಪಶ್ಚಿಮ ಬಂಗಾಳಕ್ಕೆ ಸೋಮವಾರ ಭೇಟಿ ನೀಡಿ ಹಲವು ಅಭಿವೃದ್ಧಿ ಯೋಜನೆಗಳಿಗೆ ಶಂಕುಸ್ಥಾಪನೆ ನೆರವೇರಿಸಲಿದ್ದಾರೆ. ಅಸ್ಸಾಂನ ಸಿಲಾಪತಾರ್ನಲ್ಲಿ ನಡೆವ ಕಾರ್ಯಕ್ರಮದಲ್ಲಿ ಇಂಡಿಯನ್ ಆಯಿಲ್ನ ತೈಲ ಸಂಸ್ಕರಣಾ ಘಟಕವನ್ನು ದೇಶಕ್ಕೆ ಸಮರ್ಪಿಸುವುದರ ಜತೆಗೆ ಧೇಮಾಜಿ ಎಂಜಿನಿಯರಿಂಗ್ ಕಾಲೇಜಿಗೆ ಶಂಕುಸ್ಥಾಪನೆ ನೆರವೇರಿಸಲಿದ್ದಾರೆ. ಸಂಜೆ ಪಶ್ಚಿಮ ಬಂಗಾಳದ ಹೂಗ್ಲಿಗೆ ತೆರಳಿ, 464 ಕೋಟಿ ರೂ. ಮೊತ್ತದ ನೌಪಾರಾ- ದಕ್ಷಿಣೇಶ್ವರ ವಿಸ್ತರಿತ ಮೆಟ್ರೊ ಯೋಜನೆ ಸೇರಿ ಹಲವು ರೈಲು ಯೋಜನೆಗಳಿಗೆ ಚಾಲನೆ ನೀಡಲಿದ್ದಾರೆ ಎಂದು ಪ್ರಧಾನ ಮಂತ್ರಿ ಕಾರ್ಯಾಲಯ ಹೇಳಿದೆ.
from India & World News in Kannada | VK Polls https://ift.tt/3dyQCRA
