ವಿಜ್ಞಾನಿಗಳಿಂದ 'ಪರ್ಸಿ' ಎಂದು ಪ್ರೀತಿಯಿಂದ ಕರೆಸಿಕೊಳ್ಳುವ 'ಪರ್ಸಿವರೆನ್ಸ್' ನೌಕೆ ಮಂಗಳನ ಅಂಗಳ ತಲುಪಿದೆ. ಇದನ್ನು ಸೇಫ್ ಆಗಿ ಲ್ಯಾಂಡ್ ಮಾಡುವಲ್ಲಿ ಕನ್ನಡತಿ ಯಶಸ್ವಿಯಾಗಿದ್ದಾರೆ. ನಾಸಾದ ಹಲವು ವರ್ಷಗಳ ಕಾರ್ಯಕ್ಕೂ ಜಯ ಸಿಕ್ಕಿದೆ. ಹಾಗಾದರೆ ಈ ನಾಸಾದ ಈ ಯೋಜನೆಯ ಉದ್ದೇಶ, ಕಾರ್ಯ, ಹಿನ್ನೆಲೆ ಮುನ್ನೆಲೆಗಳ ಬಗ್ಗೆ ಒಂದು ನೋಟ ಇಲ್ಲಿದೆ. ಆರುವರೆ ತಿಂಗಳ ಯಾನಕಳೆದ ವರ್ಷ ಜುಲೈ 30ರಂದು ಅಮೆರಿಕದ ಪ್ಲೋರಿಡಾದ ಕೇಪ್ ಕೆನವರಲ್ ಸ್ಪೇಸ್ ಸ್ಟೇಶನ್ನಿಂದ ಹೊರಟ ಪರ್ಸಿವರೆನ್ಸ್ ಮಾರ್ಸ್ ರೋವರ್ ಅನ್ನು ಹೊತ್ತ ನೌಕೆ, ಶುಕ್ರವಾರ ಮಂಗಳನ ಅಂಗಳವನ್ನು ತಲುಪಿದೆ. 203 ದಿನಗಳಲ್ಲಿ ಭೂಮಿಯಿಂದ ಮಂಗಳನವರೆಗೆ ಇರುವ 47.20 ಕೋಟಿ ಕಿಲೋಮೀಟರ್ ದೂರವನ್ನು ಗಂಟೆಗೆ ಸುಮಾರು 97,000 ಕಿಲೋಮೀಟರ್ ವೇಗದಲ್ಲಿ ಪ್ರಯಾಣಿಸಿ ತಲುಪಿದೆ ಈ ನೌಕೆ. ಮಂಗಳನ ವಾತಾವರಣವನ್ನು ಭೇದಿಸಿ, ಅಲ್ಲಿರುವ ಜೆಝೆರೋ ಎಂಬ ಮಹಾಕುಳಿಯಲ್ಲಿ ಅದು ಇಳಿದಿದೆ. ಮಂಗಳನ ನೆಲದಿಂದ ಅಧ್ಯಯನಕ್ಕಾಗಿ ಹಲವು ಮಾದರಿಗಳನ್ನು ಸಂಗ್ರಹಿಸುವುದು ಹಾಗೂ ಭೂಮಿಗೆ ತರುವುದು ಅದರ ಗುರಿ. 'ಪರ್ಸಿವರೆನ್ಸ್' ಎಂದರೆ ದೃಢ ಹಾಗೂ ನಿರಂತರವಾದ ಪ್ರಯತ್ನ ಎಂಬರ್ಥ. ಇದು ನೂರಾರು ವಿಜ್ಞಾನಿಗಳು ಹಾಗೂ ತಜ್ಞರ ನಿರಂತರ ಪರಿಶ್ರಮದ ಫಲ. ಮಂಗಳನ ಬಗ್ಗೆ ಅರಿಯುವ ಮಾನವನ ನಿರಂತರ ಹಂಬಲದ ಹಿನ್ನೆಲೆಯಲ್ಲಿಇದು ರೂಪುಗೊಂಡಿದೆ. ಮುಂದಿನ ದಿನಗಳಲ್ಲಿ ಮಂಗಳನ ಬಗ್ಗೆ ನಮ್ಮ ಗ್ರಹಿಕೆಗಳನ್ನೇ ಬದಲಿಸಬಲ್ಲಮಹತ್ವದ ಮಾಹಿತಿಗಳನ್ನು ಈ ರೋವರ್ ಒದಗಿಸಲಿದೆ ಎಂದು ನಾಸಾದ ತಜ್ಞರು ತಿಳಿಸಿದ್ದಾರೆ. ರೋವರ್ನ ಕೆಲಸವೇನು? ಒಂದು ಕಾರಿನ ಗಾತ್ರದಷ್ಟಿರುವ ಪರ್ಸಿವರೆನ್ಸ್ ರೋವರ್, ಒಂದೆರಡು ವಾರ ಟೆಸ್ಟಿಂಗ್ ಹಂತದಲ್ಲಿದ್ದು, ಬಳಿಕ ಎರಡು ವರ್ಷ ಇಲ್ಲಿ ನಡೆದಾಡಿ ಮಾಹಿತಿ, ಮಾದರಿ ಸಂಗ್ರಹಿಸಲಿದೆ. ವಿಜ್ಞಾನಿಗಳು ಇದನ್ನು ರೊಬಾಟಿಕ್ ಜಿಯಾಲಜಿಸ್ಟ್ ಮತ್ತು ಆಸ್ಟೊ್ರೕಬಯಾಲಜಿಸ್ಟ್ (ರೊಬಾಟಿಕ್ ಭೂವಿಜ್ಞಾನಿ ಹಾಗೂ ಖಗೋಳಜೀವವಿಜ್ಞಾನಿ) ಎಂದು ಕರೆದಿದ್ದಾರೆ. ಮಂಗಳಗ್ರಹದಲ್ಲಿ ಒಂದು ಕಾಲದಲ್ಲಿ ಜೀವ- ಜೀವನ ಇತ್ತೇ ಎಂದು ತಿಳಿಯುವುದು ಈ ರೋವರ್ ಕಳುಹಿಸಿದುದರ ಪ್ರಮುಖ ಉದ್ದೇಶ. ಅದಕ್ಕೆ ಜೆಝೆರೋ ಕುಳಿ ಸೂಕ್ತವಾದ ಸ್ಥಳ ಎಂದು ವಿಜ್ಞಾನಿಗಳು ನಂಬಿದ್ದಾರೆ. ಇದು ಸುಮಾರು 350 ಕೋಟಿ ವರ್ಷಗಳ ಹಿಂದೆ ಇಲ್ಲಿನ ಸರೋವರ ಅಥವಾ ನದಿಪಾತ್ರ ಆಗಿದ್ದಿರಬಹುದು ಎಂಬುದು ಇವರ ಊಹೆ. ಮಂಗಳಗ್ರಹದ ವಿಭಾಜಕ ವೃತ್ತದ ಉತ್ತರದಲ್ಲಿರುವ ಐಸಿಡಿಸ್ ಪ್ಲಾನಿಷಿಯಾ ಎಂಬ ಮಹಾ ತಗ್ಗು ಪ್ರದೇಶವೊಂದರಲ್ಲಿಈ ಕುಳಿ ಇದೆ. ವಿಜ್ಞಾನಿಗಳ ಊಹೆ ನಿಜವೇ ಆಗಿದ್ದರೆ ಇಲ್ಲಿನೀರಿನ ಉತ್ಪತ್ತಿಗೆ ಕಾರಣವಾಗುವ ಮೂಲವಸ್ತುಗಳು ದೊರೆಯಬೇಕು. ಅಥವಾ ಜೀವನಾಶಕ್ಕೆ ಕಾರಣವಾದ ಸಂಗತಿಗಳ ಬಗೆಗೆ ಸ್ಥೂಲ ನೋಟವಾದರೂ ದೊರೆಯಬಹುದು. ಒಂದು ಕಾಲದಲ್ಲಿ ಮಂಗಳನಲ್ಲಿ ಜೀವಜಾಲ ಇದ್ದಿರಬಹುದು ಎಂಬ ಅಂಶ ಬೆಳಕಿಗೆ ಬಂದರೆ ಇಡೀ ವಿಜ್ಞಾನ ವಲಯಕ್ಕ ರೋಮಾಂಚನ ಉಂಟಾಗಲಿದೆ. ಸೌರಮಂಡಲ ಹಾಗೂ ಖಗೋಲ ಅಧ್ಯಯನವೇ ಬೇರೆ ದಿಕ್ಕಿಗೆ ಹೊರಳಿಕೊಳ್ಳಬಹುದು. ಅಲ್ಲಿ ಜೀವ ಸೃಷ್ಟಿಗೆ ಕಾರಣವಾದ ಅಂಶಗಳೇನು, ಅವುಗಳ ನಾಶಕ್ಕೇನು ಕಾರಣ, ಅದರಲ್ಲಿ ಸೂರ್ಯನ ಶಾಖ- ತಾಪಮಾನದ ಪಾತ್ರ ಎಷ್ಟು, ಭೂಮಿಯೂ ಮಂಗಳನಂಥದೇ ವಿಧಿಯತ್ತ ಕ್ರಮಿಸುತ್ತಿದೆಯೇ- ಹೀಗೆ ಹಲವು ದಿಕ್ಕಿನಲ್ಲಿಅಧ್ಯಯನ ನಡೆಯಲು ಸಾಧ್ಯ. ಅತ್ಯಾಧುನಿಕ ರೋವರ್ ಅಮೆರಿಕದ ಬಾಹ್ಯಾಕಾಶ ಸಂಶೋಧನ ಸಂಸ್ಥೆ ನಾಸಾ ವಿನ್ಯಾಸಗೊಳಿಸಿ ಸಿದ್ಧಪಡಿಸಿದ ಈ ನೌಕೆ, ಮಂಗಳಗ್ರಹವನ್ನು ಶೋಧಿಸಲು ಅಗತ್ಯವಾದ ಅತ್ಯಾಧುನಿಕ ಸಾಧನೋಪಕರಣಗಳನ್ನು ಹೊಂದಿದೆ. ಈಗಾಗಲೇ ಅದರಲ್ಲಿರುವ 'ದಿ ಮಾರ್ಸ್ ಎಂಟ್ರಿ, ಡಿಸೆಂಟ್ ಆ್ಯಂಡ್ ಲ್ಯಾಂಡಿಂಗ್ ಇನ್ಸ್ಟು್ರಮೆಂಟೇಶನ್ 2' ಎಂಬ ಯಂತ್ರವು ರೋವರ್ ಕೆಳಗೆ ಇಳಿಯುತ್ತಿರುವಾಗಲೇ ಗ್ರಹದ ಮೇಲಿನ ವಾತಾವರಣವನ್ನು ದಾಖಲಿಸಿಕೊಂಡಿದೆ. ನೆಲಕ್ಕಿಳಿಯುವ ಕೊನೆಯ ಹಂತದಲ್ಲಿ, ರೋವರ್ನ ಟೆರೇನ್ ರಿಲೇಟಿವ್ ನ್ಯಾವಿಗೇಶನ್ ವ್ಯವಸ್ಥೆಯು ಸೂಕ್ತ ಸ್ಥಳದಲ್ಲಿಇಳಿಯುವಂತೆ ಸ್ವತಂತ್ರವಾಗಿಯೇ ನಿರ್ದೇಶಿಸಿದೆ. ಮಾಸ್ಟ್ಕ್ಯಾಮ್-ಝಡ್ ಎಂಬ ಹೆಸರಿನ ಜಂಟಿ ಕ್ಯಾಮೆರಾಗಳು ಅಲ್ಲಿನ ವರ್ಣಮಯ ತ್ರಿಡಿ ಚಿತ್ರಗಳನ್ನು ತೆಗೆದು ಕಳುಹಿಸಲಿವೆ. ಸೂಪರ್ಕ್ಯಾಮ್ ಎಂಬ ಸಾಧನ, ಇಲ್ಲಿನ ಮಣ್ಣು- ಕಲ್ಲಿನ ರಾಸಾಯನಿಕ ಸಂರಚನೆಯನ್ನು ಗ್ರಹಿಸಲಿದೆ. ಇದುವರೆಗಿನ ರೋವರ್ಗಳು ಒಮ್ಮೆ ನೌಕೆಯಿಂದ ಅನ್ಯಗ್ರಹಗಳ ಮೇಲೆ ಇಳಿದರೆ, ಅಲ್ಲಿನ ನೆಲದ ಮೇಲೆ ನಡೆದಾಡುತ್ತಿದ್ದವು ಅಷ್ಟೇ. ಆದರೆ ಈ ರೋವರ್ನ ತಲೆಯಲ್ಲಿಅಳವಡಿಸಲಾಗಿರುವ 'ಇಂಜೀನ್ಯುಟಿ' ಎಂಬ 'ಮಾರ್ಸ್ ಹೆಲಿಕಾಪ್ಟರ್'ನ ಬಲದಿಂದ ಈ ರೋವರ್ ತಾನಿದ್ದೆಡೆಯಿಂದ ಎತ್ತರಕ್ಕೆ ಹಾರಿ ಬೇರೆ ಸ್ಥಳದಲ್ಲಿಇಳಿಯುವ ಸಾಹಸವನ್ನೂ ಮಾಡಲಿದೆ. ಇದು ಇಂಥ ಪ್ರಥಮ ಸಾಹಸ. ಈ ಹಾರಾಟವನ್ನು ಭೂಮಿಯ ಮೇಲಿನಿಂದ ನಿಯಂತ್ರಿಸಲಾಗುತ್ತದೆ. ಇದನ್ನು ಭಾರತ ಮೂಲದ ವಿಜ್ಞಾನಿ ಸ್ವಾತಿ ಮೋಹನ್ ನೋಡಿಕೊಳ್ಳುತ್ತಾರೆ. ಆಮ್ಲಜನಕ ಸೃಷ್ಟಿಸಬಹುದೇ? ಮಂಗಳ ಗ್ರಹದಲ್ಲಿ ನೀರಿತ್ತೇ ಎಂದು ತಿಳಿಯುವುದು ಒಂದು ಉದ್ದೇಶವಾದರೆ, ಅಲ್ಲಿರುವ ಕಾರ್ಬನ್ ಡಯಾಕ್ಸೈಡ್ನಿಂದ ಆಮ್ಲಜನಕವನ್ನು ಉತ್ಪಾದಿಸುವುದು ಇನ್ನೊಂದು ಉದ್ದೇಶ. ಈ ರೋವರ್ನಲ್ಲಿಇರುವ 'ಮೋಕ್ಸೀ' ಎಂಬ ಕಾರ್ ಬ್ಯಾಟರಿಯಷ್ಟು ದೊಡ್ಡದಾದ ಸಾಧನ, ಇಲ್ಲಿ ಲಭ್ಯವಾಗುವ ಕಾರ್ಬನ್ ಡಯಾಕ್ಸೈಡ್ ಅನ್ನು ಆಮ್ಲಜನಕವಾಗಿ ಪರಿವರ್ತಿಸಲಿದೆ. ಇದು ಭವಿಷ್ಯದಲ್ಲಿ ಮಾನವ ಸಹಿತ ಮಂಗಳಯಾನಗಳಿಗೆ ನೆರವಾಗಬಹುದಾದ ಪ್ರಯೋಗ. ಹಾಗೇ ರಾಕೆಟ್ ಇಂಧನವನ್ನು ಉತ್ಪಾದಿಸುವ ಉದ್ದೇಶವೂ ಇದೆ. ಬೇರೆ ಯಾವ ದೇಶಗಳು ಪ್ರಯತ್ನಿಸಿವೆ?ಬಾಹ್ಯಾಕಾಶ ಸಂಶೋಧನೆಯಲ್ಲಿ ಮುಂಚೂಣಿಯಲ್ಲಿರುವ ದೇಶಗಳೆಲ್ಲ ಮಂಗಳ ಗ್ರಹದತ್ತ ನೌಕೆಗಳನ್ನು ಕಳುಹಿಸಿವೆ. ಇದರಲ್ಲಿ ಗ್ರಹದ ಮೇಲೆ ವಾಹನವನ್ನು ಇಳಿಸಲು ಶಕ್ತವಾಗಿರುವುದು ಅಮೆರಿಕ ಮಾತ್ರ. ಅಮೆರಿಕದ ಎರಡು ರೋವರ್ಗಳು ಈಗ ಗ್ರಹದ ಮೇಲೆ ಸಕ್ರಿಯವಾಗಿ ಕಾರ್ಯಾಚರಿಸುತ್ತ ಮಾಹಿತಿಗಳನ್ನು ಕಳುಹಿಸುತ್ತಿವೆ. ಚೀನಾ, ಜಪಾನ್, ಯುರೋಪ್ ಒಕ್ಕೂಟದ ಆರ್ಬಿಟರ್ಗಳೂ ಇವೆ. ವಿಚಿತ್ರವೆಂದರೆ, 1971ರಲ್ಲಿಇಲ್ಲಿ ಲ್ಯಾಂಡರ್ (ಮಾರ್ಸ್-3) ಇಳಿಸಿದ ಮೊದಲ ದೇಶ ಸೋವಿಯತ್ ರಷ್ಯಾ. ಆದರೆ ಇಳಿದ 104 ಸೆಕೆಂಡ್ಗಳಲ್ಲಿಅದರ ಸಂಪರ್ಕ ಕಡಿದು ಹೋಯಿತು. ಅಮೆರಿಕದ 'ವೈಕಿಂಗ್ 1' 1975ರಲ್ಲಿ ಇಲ್ಲಿಳಿದ ಮೊದಲ ಲ್ಯಾಂಡರ್. ಅಮೆರಿಕದ ಸೊಜರ್ನರ್(1997), ಅಪರ್ಚುನಿಟಿ (2004), ಸ್ಪಿರಿಟ್ (2004)ಗಳು ಸಾಕಷ್ಟು ಮಾಹಿತಿ ಕಳುಹಿಸಿವೆ. 2011ರಲ್ಲಿ ಕಳಿಸಲಾದ 'ಕ್ಯೂರಿಯಾಸಿಟಿ' ರೋವರ್ ಈಗಲೂ ಕೆಲಸ ಮಾಡುತ್ತಿದೆ. ಮಂಗಳಯಾನದ ಕತೆ ಭಾರತದ 'ಮಂಗಳಯಾನ' ಆರ್ಬಿಟರ್ (ಗ್ರಹದ ಕಕ್ಷೆಯಲ್ಲಿಸುತ್ತುವ ನೌಕೆ) ಉಡಾವಣೆ 2013ರಲ್ಲಿ ಯಶಸ್ವಿಯಾಗಿದ್ದು, ಮಂಗಳನ ಕಕ್ಷೆಯಲ್ಲಿ ಪರಿಭ್ರಮಿಸುತ್ತ ಮಾಹಿತಿಗಳನ್ನು ಕಳುಹಿಸುತ್ತಿದೆ. ಇದರ ಉದ್ದೇಶಿತ ಕಾಲಾವಧಿ 300 ದಿನ. 'ಮಂಗಳಯಾನ-2' ಸಿದ್ಧತೆಯ ಕೆಲಸ ಕಾರ್ಯಗಳು ಸದ್ದಿಲ್ಲದೆ ನಡೆಯುತ್ತಿದ್ದು, ಈ ಬಾರಿ ಲ್ಯಾಂಡರ್, ರೋವರ್ಗಳನ್ನೂ ಕಳಿಸುವ ಉದ್ದೇಶವಿದೆ. ಆದರೆ ಕಳೆದ ಬಾರಿಯ ಚಂದ್ರಯಾನದ ಲ್ಯಾಂಡರ್ ವೈಫಲ್ಯದ ಬಳಿಕ, ಲ್ಯಾಂಡರ್ ಇಳಿಸುವ ತಂತ್ರಜ್ಞಾನದಲ್ಲಿ ಇನ್ನಷ್ಟು ನಿಖರತೆ ಸಾಧಿಸುವ ಉದ್ದೇಶದಿಂದ ಹೆಚ್ಚಿನ ಕೆಲಸ ನಡೆಯುತ್ತಿದೆ. ಮಂಗಳದಲ್ಲಿ ಜೀವವಿದೆಯೇ? ಮಂಗಳ ಗ್ರಹದಲ್ಲಿ ಕೆಲವು ಜೀವರಾಶಿಯಾದರೂ ಹಿಂದೊಂದು ಕಾಲದಲ್ಲಿ ಇದ್ದಿರಬಹುದು ಎಂದು ಖಗೋಳ ವಿಜ್ಞಾನಿಗಳಲ್ಲಿ ಬಹುತೇಕರು ನಂಬುತ್ತಾರೆ. ಯಾಕೆಂದರೆ ಸೌರಮಂಡಲದ ತಾಪ ಕಾಲಕಾಲಕ್ಕೆ ಏರುಪೇರಾಗುತ್ತ ಹೋಗಿದೆ. ಒಂದು ಕಾಲದಲ್ಲಿ ಹಿಮದ ಉಂಡೆಯಾಗಿದ್ದ ಭೂಮಿ ಕ್ರಮೇಣ ಬಿಸಿಯಾಗುತ್ತ ಇಂದು ಜೀವರಾಶಿಯಿಂದ ನಳನಳಿಸುತ್ತಿದೆ. ಇಂದು ಜೀವರಾಶಿಗೆ ಅಗತ್ಯವಾದ ವಾತಾವರಣ ಮತ್ತು ತಾಪಮಾನ ಭೂಮಿಯ ಮೇಲಿರುವಂತೆ, ಹಿಂದೊಂದು ಕಾಲದಲ್ಲಿ ಮಂಗಳನಲ್ಲಿ ಇದ್ದಿರಬಹುದು. ಹೀಗಾಗಿ ಜೀವವೂ ಇದ್ದಿರಬಹುದು ಎಂಬ ತರ್ಕ. ಇದಕ್ಕೆ ಪೂರಕ ಎಂಬಂತೆ ಮಂಗಳನ ಮೇಲಿನ ತಾಪಮಾನ ಸುಮಾರು ಮೈನಸ್ 80 ಡಿಗ್ರಿ ಸೆಲ್ಷಿಯಸ್.
from India & World News in Kannada | VK Polls https://ift.tt/3pCWUla
