ದುಬೈ: ಸನ್‌ರೈಸರ್ಸ್ ಹೈದರಾಬಾದ್ ವಿರುದ್ಧದ ಪಂದ್ಯದಲ್ಲಿ ನಾಯಕ ಅವರ ಬದಲು ಮಾರ್ಕಸ್‌ ಸ್ಟೋಯ್ನಿಸ್‌ ಹಾಗೂ ಶಿಮ್ರಾನ್ ಹೆಟ್ಮಾಯೆರ್‌ ಅವರನ್ನು ಬ್ಯಾಟಿಂಗ್‌ ಕಳುಹಿಸಿದ ಕಾರಣವನ್ನು ಮುಖ್ಯ ಕೋಚ್ ವಿವರಿಸಿದ್ದಾರೆ. ಮೊದಲು ಬ್ಯಾಟಿಂಗ್‌ ಮಾಡಿದ ಸನ್‌ರೈಸರ್ಸ್ ಹೈದರಾಬಾದ್ ತಂಡ ನಿಗದಿತ 20 ಓವರ್‌ಗಳಿಗೆ ಎರಡು ವಿಕೆಟ್‌ಗಳ ನಷ್ಟಕ್ಕೆ 219 ರನ್‌ಗಳನ್ನು ಗಳಿಸಿತು. ಬಳಿಕ ಗುರಿ ಹಿಂಬಾಲಿಸಿದ ಡೆಲ್ಲಿ ಕ್ಯಾಪಿಟಲ್ಸ್ 19 ಓವರ್‌ಗಳಿಗೆ 131 ರನ್‌ಗಳಿಗೆ ಆಲೌಟ್‌ ಆಯಿತು. ಆ ಮೂಲಕ ಶ್ರೇಯಸ್‌ ಅಯ್ಯರ್ ಬಳಗ 88 ರನ್‌ಗಳಿಂದ ಸೋಲು ಅನುಭವಿಸಿತು. ಪಂದ್ಯದ ಬಳಿಕ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ರಿಕಿ ಪಾಂಟಿಂಗ್, " 220 ರನ್‌ಗಳ ಗುರಿ ಹಿಂಬಾಲಿಸಿ ಡೆಲ್ಲಿ ಕ್ಯಾಪಿಟಲ್ಸ್ ಪರ ಅಜಿಂಕ್ಯಾ ರಹಾನೆ ಹಾಗೂ ಶಿಖರ್‌ ಧವನ್‌ ಆರಂಭಿಕರಾಗಿ ಕಣಕ್ಕೆ ಇಳಿಸಲಾಯಿತು. ಮೊದಲನೇ ವಿಕೆಟ್ ಬೇಗ ಉರುಳಿದರೆ, ಪವರ್‌ ಪ್ಲೇನಲ್ಲಿ ಸನ್‌ರೈಸರ್ಸ್ ಹೈದರಾಬಾದ್ ಗಳಿಸಿದ್ದ ರನ್‌ಗಳನ್ನು ಸರಿದೂಗಿಸಲು ಸ್ಟೋಯ್ನಿಸ್‌ ಹಾಗೂ ಹೆಟ್ಮಾಯೆರ್‌ ಅವರನ್ನು ಕಳುಹಿಸುವ ಯೋಜನೆಯನ್ನು ಹೊಂದಲಾಗಿತ್ತು," ಎಂದು ಹೇಳಿದರು. "ಮಾರ್ಕಸ್‌ ಸ್ಟೋಯ್ನಿಸ್‌ ಪ್ರಸಕ್ತ ಆವೃತ್ತಿಯಲ್ಲಿ ಅದ್ಭುತ ಫಾರ್ಮ್‌ನಲ್ಲಿದ್ದಾರೆ ಹಾಗೂ ಅವರು ಅಗ್ರ ಕ್ರಮಾಂಕದಲ್ಲಿ ಆಡಲು ಕಾಯುತ್ತಿದ್ದಾರೆ. ಅದರಂತೆ ಎರಡನೇ ಎಸೆತದಲ್ಲಿ ಅವರು ಲಾಂಗ್‌ ಆನ್‌ ಮೇಲೆ ಬೌಂಡರಿ ಗಳಿಸಿದನ್ನು ನೀವು ನೋಡಬಹುದು. ಆದರೆ, ಇಷ್ಟು ದೊಡ್ಡ ಮೊತ್ತವನ್ನು ಬೆನ್ನತ್ತುವಾಗ ಕೆಲವೊಮ್ಮೆ ಇಂತಹ ಸಂಗತಿಗಳು ಸಂಭವಿಸುತ್ತವೆ. ನಾಲ್ಕನೇ ಕ್ರಮಾಂಕದಲ್ಲಿ ಹೆಟ್ಮಾಯೆರ್‌ ಹಾಗೂ ಐದನೇ ಕ್ರಮಾಂಕದಲ್ಲಿ ರಿಷಭ್‌ ಪಂತ್‌ ಹಾಗೂ ಆರನೇ ಕ್ರಮಾಂಕದಲ್ಲಿ ಶ್ರೇಯಸ್‌ ಅಯ್ಯರ್ ಅವರನ್ನು ಆಡಿಸಿದ್ದು, ಸ್ವಲ್ಪ ಪ್ರಯೋಗಾತ್ಮಕವಾಗಿತ್ತು," ಎಂದು ಪಾಂಟಿಂಗ್ ವಿವರಿಸಿದರು. ವೃದ್ದಿಮನ್‌ ಸಾಹ ಅವರ 87 ರನ್‌ಗಳ ಸಹಾಯದಿಂದ ಸನ್‌ರೈಸರ್ಸ್ ಹೈದರಾಬಾದ್, 200ರನ್‌ಗಳಿಗೂ ಹೆಚ್ಚಿನ ಮೊತ್ತವನ್ನು ಕಲೆ ಹಾಕಿತು. ಸಾಹ ಅಂತಿಮ 11ರಲ್ಲಿ ಕಾಣಿಸಿಕೊಳ್ಳಲಿದ್ದಾರೆಂಬ ನಿರೀಕ್ಷೆ ಇತ್ತು, ಆದರೆ ಸ್ಪೋಟಕ ಬ್ಯಾಟಿಂಗ್‌ ಮಾಡಿರುವುದು ಅಚ್ಚರಿ ತಂದಿದೆ ಎಂದು ಪಾಯಿಂಟ್‌ ಹೇಳಿದರು. "ಕಳೆದ ಕೆಲ ಪಂದ್ಯಗಳಲ್ಲಿ ನಮ್ಮ ಫೀಲ್ಡಿಂಗ್ ವಿಭಾಗದಲ್ಲಿ ಸ್ವಲ್ಪ ಹಿನ್ನಡೆಯಾಗಿದೆ ಹಾಗೂ ಬ್ಯಾಟ್ಸ್‌ಮನ್‌ಗಳು ಕೂಡ ಲಯಕ್ಕೆ ಮರಳುವಲ್ಲಿ ಸ್ವಲ್ಪ ಎಡವುತ್ತಿದ್ದಾರೆ. ಜಾನಿ ಬೈರ್‌ಸ್ಟೋವ್‌ ಈ ಪಂದ್ಯದಲ್ಲಿ ಕುಳಿತುಕೊಂಡು ಕೇನ್‌ ವಿಲಿಯಮ್ಸನ್‌ ಕಣಕ್ಕೆ ಇಳಿಯಲಿದ್ದಾರೆಂದು ಮೊದಲೇ ನಮಗೆ ತಿಳಿದಿತ್ತು. ಹಾಗಾಗಿ, ವೃದ್ದಿಮನ್‌ ಸಾಹ ವಿಕೆಟ್ ಕೀಪಿಂಗ್‌ ಸ್ಥಾನದಲ್ಲಿ ಕಣಕ್ಕೆ ಇಳಿದರು," ಎಂದು ಹೇಳಿದರು. "ಪಂದ್ಯಕ್ಕೂ ಮುನ್ನ ಬೆಳಗ್ಗೆ ವೃದ್ದಿಮನ್‌ ಸಾಹ ವಿರುದ್ಧ ಹೇಗೆ ಆಡಬೇಕೆಂಬ ಬಗ್ಗೆ ಚರ್ಚೆ ನಡೆಸಲಾಗಿತ್ತು. ನಿಸ್ಸಂಶಯವಾಗಿ ಕೇನ್‌ ವಿಲಿಯಮ್ಸನ್‌ ನಾಲ್ಕನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್‌ ಮಾಡಿದರು. ಸಾಹ ಅದ್ಭುತವಾಗಿ ಬ್ಯಾಟಿಂಗ್‌ ಮಾಡಿದರು. ಇದು ನಮಗೆ ಅಚ್ಚರಿ ಉಂಟು ಮಾಡಿತು," ಎಂದು ಡೆಲ್ಲಿ ಕ್ಯಾಪಿಟಲ್ಸ್ ಕೋಚ್ ತಿಳಿಸಿದರು. "ಡೇವಿಡ್‌ ವಾರ್ನರ್ ವಿಕೆಟ್ ಪಡೆಯಲು ಆನ್ರಿಚ್‌ ನಾರ್ಟ್ಜ್‌ ಹಾಗೂ ಕಗಿಸೋ ರಬಾಡ ಅವರಿಗೆ ಹೊಸ ಚೆಂಡು ನೀಡಲಾಯಿತು. ಸಾಹ ಅಪಾಯಕಾರಿ ಆಟಗಾರ ಎಂದು ನಮಗೆ ಗೊತ್ತಿತ್ತು. ಪವರ್‌ಪ್ಲೇ ಮುಕ್ತಾಯಕ್ಕೆ ಹೈದರಾಬಾದ್ 77 ರನ್‌ಗಳನ್ನು ಗಳಿಸಿತ್ತು ಹಾಗೂ ವಾರ್ನರ್ ಮತ್ತು ಸಾಹ ಜೋಡಿ ಸುಂದರವಾಗಿ ಬ್ಯಾಟಿಂಗ್‌ ಮಾಡಿತು," ಎಂದು ಹೇಳಿದರು. ಈ ಗೆಲುವಿನೊಂದಿಗೆ ಸನ್‌ರೈಸರ್ಸ್ ಹೈದರಾಬಾದ್ ತಂಡ 10 ಅಂಕಗಳೊಂದಿಗೆ ಆರನೇ ಸ್ಥಾನಕ್ಕೇರಿತು. ಸೋಲಿನೊಂದಿಗೆ ಡೆಲ್ಲಿ ಕ್ಯಾಪಿಟಲ್ಸ್ 14 ಅಂಕಗಳೊಂದಿಗೆ ಮೂರನೇ ಸ್ಥಾನಕ್ಕೆ ಇಳಿಯಿತು. ಶನಿವಾರ ಮುಂಬೈ ಇಂಡಿಯನ್ಸ್ ವಿರುದ್ಧ ಡೆಲ್ಲಿ ಕ್ಯಾಪಿಟಲ್ಸ್ ಸೆಣಸಲಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/35JKUqa
