ಪಾಕಿಸ್ತಾನದ ಸಂಸತ್‌ನಲ್ಲಿ ಭಾರತದ ಪ್ರಧಾನಿ ಪರ ಕೂಗಲಾಯ್ತು ಎಂಬ ಸುದ್ದಿ ಹರಡುತ್ತಿದೆ. ಪಾಕಿಸ್ತಾನದ ರಾಷ್ಟ್ರೀಯ ಅಸೆಂಬ್ಲಿ ಸದಸ್ಯರು, ಮೋದಿ ಪರ ಘೋಷಣೆ ಕೂಗಿದರು ಎಂದು ಹಲವಾರು ಸುದ್ದಿ ಸಂಸ್ಥೆಗಳು ಹಾಗೂ ಜನಪ್ರಿಯ ಟ್ವಿಟ್ಟರ್ ಬಳಕೆದಾರರು ವಾದಿಸಿದ್ದಾರೆ. ಬಿಜೆಪಿ ಸಂಸದೆ ಶೋಭಾ ಕರಂದ್ಲಾಜೆ ಅವರೂ ಈ ಸಂಬಧ ಟ್ವೀಟ್ ಮಾಡಿದ್ದಾರೆ. ಪಾಕ್ ಸಂಸತ್‌ನಲ್ಲಿ ಇಮ್ರಾನ್ ಖಾನ್ ಸರ್ಕಾರದ ವಿರುದ್ಧ ಅಲ್ಲಿನ ವಿರೋಧ ಪಕ್ಷಗಳು ಮೋದಿ ಮೋದಿ ಎಂದು ಘೋಷಣೆ ಕೂಗಿದರು ಎಂದು ವಾದಿಸಿದ್ದಾರೆ. ಶೋಭಾ ಕರಂದ್ಲಾಜೆ ಅವರು ಟ್ವೀಟ್ ಮಾಡಿರುವ ಈ ವಿಡಿಯೋದಲ್ಲಿ ಪಾಕ್ ವಿದೇಶಾಂಗ ಸಚಿವರ ಭಾಷಣಕ್ಕೆ ವಿರೋಧ ಪಕ್ಷಗಳು ಅಡ್ಡಿ ಮಾಡುತ್ತಿರುವ ದೃಶ್ಯ ನೋಡಬಹುದಾಗಿದೆ. ಪಾಕ್‌ನ ವಿದೇಶಾಂಗ ಸಚಿವರು ಫ್ರಾನ್ಸ್ ದೇಶದಲ್ಲಿ ವಿವಾದಕ್ಕೆ ಕಾರಣವಾಗಿರುವ ಪ್ರವಾದಿ ಮೊಹಮ್ಮದರ ಕಾರ್ಟೂನ್ ಹಾಗೂ ಎಫ್‌ಎಟಿಎಫ್‌ನಲ್ಲಿ ಈಗಲೂ ಬೂದು ಬಣ್ಣದ ಪಟ್ಟಿಯಲ್ಲೇ ಇರುವ ಕುರಿತು ಮಾತನಾಡುತ್ತಿದ್ದರು. ಆದ್ರೆ, ಅವರ ಭಾಷಣಕ್ಕೆ ಅಡ್ಡಿಪಡಿಸಲಾಗಿತ್ತು. ಇದೇ ವಿಡಿಯೋ ಬಳಸಿಕೊಂಡು ಇಂಡಿಯಾ ಟಿವಿ ದೃಶ್ಯದ ತುಣುಕನ್ನು ಟ್ವೀಟ್ ಮಾಡಿರುವ ಆಂಕರ್ ದೀಪಕ್ ಚೌರಾಸಿಯಾ ಅವರು, ಶೀಘ್ರದಲ್ಲೇ ಕರಾಚಿ ಹಾಗೂ ಲಾಹೋರ್ ಭಾರತದ ಭಾಗವಾಗುತ್ತದೆ ಎಂದಿದ್ದಾರೆ. ಲೆಕ್ಕವಿಲ್ಲದಷ್ಟು ಪ್ರತಿಷ್ಠಿತ ಸುದ್ದಿ ಸಂಸ್ಥೆಗಳೂ ಕೂಡಾ ಪಾಕ್ ಸಂಸತ್‌ನಲ್ಲಿ ಮೋದಿ ಪರ ಘೋಷಣೆ ಕೇಳಿ ಬಂತು ಎಂದು ಸುದ್ದಿ ಪ್ರಕಟಿಸಿದ್ದವು. ಸತ್ಯಾಂಶವೇನು..? ಪಾಕ್ ಸಂಸತ್‌ನಲ್ಲಿ ವೋಟಿಂಗ್, ವೋಟಿಂಗ್ ಎಂದು ಘೋಷಣೆ ಕೂಗಲಾಗುತ್ತಿತ್ತು. ಪ್ರಧಾನಿ ಮೋದಿ ಪರ ಪಾಕ್ ಸಂಸತ್‌ನಲ್ಲಿ ಯಾವುದೇ ಘೋಷಣೆ ಕೂಗಲಿಲ್ಲ. ಪತ್ತೆ ಮಾಡಿದ್ದು ಹೇಗೆ..? ಈ ಸಂಬಂಧ ಸೂಕ್ತ ಕೀ ವರ್ಡ್‌ಗಳನ್ನು ಬಳಸಿ ಹುಡುಕಿದಾಗ ಶಾ ಮೆಹಮೂದ್ ಖುರೇಷಿ ಅವರ ಭಾಷಣ ಇರುವ ದೃಶ್ಯ ಸಿಕ್ಕಿತು. ಅಕ್ಟೋಬರ್ 26, 2020ರಂದು ಅವರು ಭಾಷಣ ಮಾಡಿದ್ದರು. ಪಾಕಿಸ್ತಾನದ ದುನಿಯಾ ನ್ಯೂಸ್ ತನ್ನ ಅಧಿಕೃತ ಯೂಟ್ಯೂಬ್ ಅಕೌಂಟ್‌ನಲ್ಲಿ ಈ ವಿಡಿಯೋ ಪೋಸ್ಟ್‌ ಮಾಡಿತ್ತು. ಈ ವಿಡಿಯೋದಲ್ಲಿ ವಿರೋಧ ಪಕ್ಷಗಳು ವೋಟಿಂಗ್, ವೋಟಿಂಗ್ ಎಂದು ಕೂಗೋದು ಸ್ಪಷ್ಟವಾಗಿ ಕೇಳುತ್ತದೆ. ಈ ವೇಳೆ ಸಿಟ್ಟಾಗುವ ಖುರೇಷಿ ಅವರು, ಮೋದಿ ಅವರ ರೀತಿ ವಿರೋಧ ಪಕ್ಷಗಳು ಆಡುತ್ತಿವೆ ಎನ್ನುತ್ತಾರೆ. ಪಾಕ್ ಸಂಸತ್‌ನಲ್ಲಿ ಮೋದಿ ಪರ ಘೋಷಣೆ ಕೂಗಲಾಯ್ತು ಎಂಬ ಇಂಡಿಯಾ ಟಿವಿ ಟ್ವೀಟ್‌ಗೆ ಪ್ರತಿಕ್ರಿಯೆ ನೀಡಿರುವ ಪತ್ರಕರ್ತ ಆದಿತ್ಯ ರಾಜ್ ಕೌಲ್ ಅವರು, ಪಾಕ್ ಸಂಸತ್‌ನಲ್ಲಿ ವೋಟಿಂಗ್ ಎಂದು ಘೋಷಣೆ ಮಾಡುತ್ತಿದ್ದಾರೆ. ಪಾಕಿಸ್ತಾನದ ವಿರೋಧ ಪಕ್ಷದ ನಾಯಕ ಕ್ವಾಜಾ ಆಸಿಫ್ ಅವರು ಶಾ ಮೆಹಮೂದ್ ಖುರೇಷಿ ಅವರ ಭಾಷಣಕ್ಕೆ ಮುನ್ನ ಸದನದಲ್ಲಿ ಮತದಾನ ನಡೆಯಬೇಕೆಂದು ಆಗ್ರಹಿಸುತ್ತಿದ್ದಾರೆ. ಇದೇ ವಿಚಾರವಾಗಿ ಘೋಷಣೆ ಕೂಗಲಾಯ್ತು ಎಂದು ಆ ಸಂದರ್ಭವನ್ನು ವಿವರಿಸಿದ್ದಾರೆ. ಪಾಕಿಸ್ತಾನದ ಡಾನ್ ವೆಬ್‌ಸೈಟ್‌ನಲ್ಲೂ ಈ ಕುರಿತ ಸಮಗ್ರ ಮಾಹಿತಿ ಲಭ್ಯವಾಗಿದೆ. ಪಾಕ್ ಸಂಸತ್‌ನಲ್ಲಿ ವೋಟಿಂಗ್‌ಗಾಗಿ ಘೋಷಣೆ ಕೂಗಲಾಯ್ತು ಎಂದು ವಿವರಣೆ ನೀಡಲಾಗಿದೆ. ಟೈಮ್ಸ್‌ ಫ್ಯಾಕ್ಟ್‌ನ ಸಮಗ್ರ ಅಧ್ಯಯನದ ಬಳಿಕ ಹೇಳೋದಾದ್ರೆ, ಪಾಕ್ ಸಂಸತ್‌ನಲ್ಲಿ ವೋಟಿಂಗ್, ವೋಟಿಂಗ್ ಎಂದು ಘೋಷಣೆ ಹಾಕಿದ ವಿಡಿಯೋವನ್ನು ಮೋದಿ ಮೋದಿ ಎಂದು ಘೋಷಣೆ ಹಾಕಲಾಯ್ತು ಎಂದು ತಿರುಚಲಾಗಿದೆ.
from India & World News in Kannada | VK Polls https://ift.tt/34ForLA
