ಅಬುಧಾಬಿ: ಸನ್‌ರೈಸರ್ಸ್ ಹೈದರಾಬಾದ್‌ ವಿರುದ್ಧದ ಪಂದ್ಯದಲ್ಲಿ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌(ಐಪಿಎಲ್‌) ನೀತಿ ಸಂಹಿತೆ ಉಲ್ಲಂಘಿಸಿದ ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡದ ಬ್ಯಾಟ್ಸ್‌ಮನ್ ಕ್ರಿಸ್‌ ಗೇಲ್‌ಗೆ ಪಂದ್ಯದ ಸಂಭಾವನೆಯಲ್ಲಿ ಶೇ. 10 ರಷ್ಟು ದಂಡವನ್ನು ವಿಧಿಸಲಾಗಿದೆ. ಶೇಖ್‌ ಝಾಹೇದ್‌ನಲ್ಲಿ ಶುಕ್ರವಾರ ರಾತ್ರಿ ನಡೆದಿದ್ದ ಪಂದ್ಯದಲ್ಲಿ 99 ರನ್‌ಗಳನ್ನು ಗಳಿಸಿ ಆಡುತ್ತಿದ್ದ ಅವರನ್ನು ರಾಜಸ್ಥಾನ್ ರಾಯಲ್ಸ್ ವೇಗಿ ಜೋಫ್ರ ಆರ್ಚರ್‌ ಕ್ಲೀನ್‌ ಬೌಲ್ಡ್ ಮಾಡಿದರು. ಕೇವಲ ಒಂದು ರನ್‌ನಿಂದ ಶತಕ ವಂಚಿತನಾಗಿದ್ದಕ್ಕೆ ಯೂನಿವರ್ಸ್‌ ಬಾಸ್‌ ಬ್ಯಾಟ್‌ ಬೀಸಾಡುವ ಮೂಲಕ ತಮ್ಮ ಬೇಸರವನ್ನು ಹೊರಹಾಕಿದ್ದರು. ನಂತರ ವೇಗಿ ಆರ್ಚರ್‌ ಅವರನ್ನು ಶ್ಲಾಘಿಸಿದರು. ಐಪಿಎಲ್‌ನ ನೀತಿ ಸಂಹಿತೆಯ ಲೆವೆಲ್ 1 ಅಪರಾಧ 2.2 ಅನ್ನು ಕ್ರಿಸ್‌ ಗೇಲ್ ಒಪ್ಪಿಕೊಂಡರು ಮತ್ತು ಅನುಮೋದನೆಯನ್ನು ಸ್ವೀಕರಿಸಿದರು. "ನೀತಿ ಸಂಹಿತೆಯ ಹಂತ 1 ಉಲ್ಲಂಘನೆಯ ಬಗ್ಗೆ ಪಂದ್ಯದ ತೀರ್ಪುಗಾರರ ನಿರ್ಧಾರವು ಅಂತಿಮ" ಎಂದು ಐಪಿಎಲ್‌ ಹೇಳಿಕೆಯಲ್ಲಿ ತಿಳಿಸಿದೆ. ಪಂದ್ಯದ ಗೆಲುವಿನೊಂದಿಗೆ ರಾಜಸ್ಥಾನ್ ರಾಯಲ್ಸ್ ಪ್ಲೇಆಫ್ಸ್ ಹಾದಿಯನ್ನು ಜೀವಂತವಾಗಿರಿಸಿಕೊಂಡಿತು. ಸ್ಟೀವನ್ ಸ್ಮಿತ್‌ ಬಳಗ 12 ಅಂಕಗಳೊಂದಿಗೆ ಪಾಯಿಂಟ್ಸ್‌ ಟೇಬಲ್‌ನಲ್ಲಿ ಐದನೇ ಸ್ಥಾನವನ್ನು ಪಡೆದಿದೆ. ಭಾನುವಾರ ಕೋಲ್ಕತಾ ನೈಟ್‌ ರೈಡರ್ಸ್ ವಿರುದ್ಧ ಸೆಣಸಲಿದೆ. ಪಂದ್ಯದ ಸೋಲಿನ ಹೊರತಾಗಿಯೂ ಕಿಂಗ್ಸ್ ಇಲೆವೆನ್ ಪಂಜಾಬ್ ಪಾಯಿಂಟ್ಸ್‌ ಟೇಬಲ್‌ನಲ್ಲಿ ನಾಲ್ಕನೇ ಸ್ಥಾನದಲ್ಲಿದ್ದು ಪ್ಲೇಆಫ್ಸ್ ರೇಸ್‌ನಲ್ಲಿದೆ. ಭಾನುವಾರ ಇದೇ ಅಂಗಳದಲ್ಲಿ ಚೆನ್ನೈ ಸೂಪರ್‌ ಕಿಂಗ್ಸ್ ವಿರುದ್ಧ ಪಂಜಾಬ್ ಸೆಣಸಲಿದೆ. ಇನಿಂಗ್ಸ್‌ ನಂತರ ತಮ್ಮ ಬ್ಯಾಟಿಂಗ್‌ ಬಗ್ಗೆ ಮಾತನಾಡಿದ ಗೇಲ್, "99ರ ಗಡಿಯಲ್ಲಿ ಔಟಾಗುವುದು ಬಹಳ ಬೇಸರ ತರುತ್ತದೆ. ಆದರೆ ಕ್ರಿಕೆಟ್‌ನಲ್ಲಿ ಇದು ಸಹಜ. ಅದೊಂದು ಅತ್ಯುತ್ತಮ ಎಸೆತ. ನಿಜ ಹೇಳುವುದಾದರೆ ಇವೆಲ್ಲವೂ ಮಾನಸಿಕ ಸ್ಥಿತಿಯನ್ನು ಆಧರಿಸಿರುತ್ತದೆ. ನನ್ನ ಆಟವನ್ನು ನಾನು ಆನಂದಿಸುತ್ತಿದ್ದೇನೆ," ಎಂದು ಹೇಳಿದ್ದರು. ಪಂಜಾಬ್-ರಾಜಸ್ಥಾನ್ ಪಂದ್ಯದ ಸಂಕ್ಷಿಪ್ತ ಸ್ಕೋರ್‌ ಕಿಂಗ್ಸ್ ಇಲೆವೆನ್ ಪಂಜಾಬ್: 20 ಓವರ್‌ಗಳಲ್ಲಿ 4 ವಿಕೆಟ್‌ಗೆ 185 (ಕೆಎಲ್ ರಾಹುಲ್ 46, ಕ್ರಿಸ್‌ ಗೇಲ್ 99, ನಿಕೋಲಸ್ ಪೂರನ್ 22; ಜೋಫ್ರ ಆರ್ಚರ್‌ 26ಕ್ಕೆ 2, ಬೆನ್‌ ಸ್ಟೋಕ್ಸ್‌ 32ಕ್ಕೆ 2). ರಾಜಸ್ಥಾನ್ ರಾಯಲ್ಸ್: 17.3 ಓವರ್‌ಗಳಲ್ಲಿ 3 ವಿಕೆಟ್‌ಗೆ 186 (ರಾಬಿನ್ ಉತ್ತಪ್ಪ 30, ಬೆನ್‌ ಸ್ಟೋಕ್ಸ್‌ 50, ಸಂಜು ಸ್ಯಾಮ್ಸನ್ 48, ಸ್ಟೀವ್‌ ಸ್ಮಿತ್‌ 31*, ಜೋಸ್‌ ಬಟ್ಲರ್‌ 22*; ಮುರುಗನ್ ಅಶ್ವಿನ್ 43ಕ್ಕೆ 1, ಕ್ರಿಸ್‌ ಜಾರ್ಡನ್ 44ಕ್ಕೆ 1). ಪಂದ್ಯಶ್ರೇಷ್ಠ: ಬೆನ್‌ ಸ್ಟೋಕ್ಸ್‌
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/381aVnJ
