ಹೊಸದಿಲ್ಲಿ: ಮಧ್ಯ ಪ್ರದೇಶದ ಮಾಜಿ ಮುಖ್ಯಮಂತ್ರಿ ಚುನಾವಣಾ ಆಯೋಗದ ನಿರ್ಧಾರದ ವಿರುದ್ಧ ಮೊರೆ ಹೋಗಿದ್ದಾರೆ. ಕಮಲ್‌ನಾಥ್‌ ಅವರ ಹೇಳಿಕೆ ಸಂಬಂಧ, ಆಯೋಗ ಅವರನ್ನು ಮಧ್ಯ ಪ್ರದೇಶ ಉಪಚುನಾವಣೆಯ ತಾರಾ ಪ್ರಚಾರಕರ ಪಟ್ಟಿಯಿಂದ ತೆಗೆದು ಹಾಕಿತ್ತು. 73 ವರ್ಷದ ಕಮಲ್‌ನಾಥ್‌ ಮಾದರಿ ಚುನಾವಣಾ ನೀತಿ ಸಂಹಿತೆಯನ್ನು ಪದೇ ಪದೇ ಉಲ್ಲಂಘಿಸಿದ್ದಾರೆ ಎಂದು ಹೇಳಿ ಅವರನ್ನು ಕಾಂಗ್ರೆಸ್‌ನ ತಾರಾ ಪ್ರಚಾರಕರ ಪಟ್ಟಿಯಿಂದ ತೆಗೆದು ಹಾಕಿತ್ತು. ಒಂದೊಮ್ಮೆ ಕಮಲ್‌ನಾಥ್‌ ಹೀಗಿದ್ದೂ ಪ್ರಚಾರಕ್ಕೆ ಇಳಿದಲ್ಲಿ, ಅವರ ಪ್ರಯಾಣದ ವೆಚ್ಚ, ಉಳಿದುಕೊಳ್ಳುವ ವೆಚ್ಚ ಸೇರಿದಂತೆ ಎಲ್ಲವೂ ಅಭ್ಯರ್ಥಿಯ ಖಾತೆಗೆ ಜಮೆಯಾಗಲಿದೆ. ತಾರಾ ಪ್ರಚಾರಕರ ಎಲ್ಲಾ ಖರ್ಚುಗಳೂ ಪಕ್ಷದ ಖಾತೆಗೆ ಹೋಗುತ್ತವೆ. ತಾರಾ ಪ್ರಚಾರಕರಲ್ಲದಿದ್ದಲ್ಲಿ ಈ ಸೌಲಭ್ಯ ಇರುವುದಿಲ್ಲ. ಚುನಾವಣಾ ಆಯೋಗದ ನಿರ್ಧಾರವನ್ನು ಪ್ರಶ್ನಿಸಿರುವ ಕಮಲ್‌ನಾಥ್‌, "ಒಬ್ಬ ವ್ಯಕ್ತಿಯನ್ನು ಸ್ಟಾರ್ ಪ್ರಚಾರಕರಾಗಿ ನಾಮ ನಿರ್ದೇಶನ ಮಾಡುವುದು ಪಕ್ಷದ ಹಕ್ಕು ಮತ್ತು ಪಕ್ಷದ ನಿರ್ಧಾರ. ಇದಕ್ಕೆ ಚುನಾವಣಾ ಆಯೋಗವು ಹಸ್ತಕ್ಷೇಪ ಮಾಡಲು ಸಾಧ್ಯವಿಲ್ಲ. ಈ ನಿರ್ಧಾರವು ಅಭಿವ್ಯಕ್ತಿ ಮತ್ತು ಚಲನವಲನದ ಮೂಲಭೂತ ಹಕ್ಕಿನ ಉಲ್ಲಂಘನೆಯಾಗಿದೆ,” ಎಂದು ಅವರು ವಾದಿಸಿದ್ದಾರೆ. ಈ ಹಿಂದೆ ಬಿಜೆಪಿ ಅಭ್ಯರ್ಥಿಯನ್ನು ಐಟಂ ಎಂದು ಕರೆದಿದ್ದಕ್ಕೆ ಕಮಲ್‌ನಾಥ್‌ ಅವರಿಗೆ ಎಚ್ಚರಿಕೆ ನೀಡಿತ್ತು. ಇದಾದ ಬಳಿಕ ಸಿಎಂ ಶಿವರಾಜ್‌ ಸಿಂಗ್‌ ಚೌಹಾಣ್ ಓರ್ವ 'ಮುಂಬಯಿನ ಸಿನಿಮಾಗಳಲ್ಲಿ ನಟಿಸಬೇಕಾದ ನೌಟಂಕಿ ಕಲಾಕಾರ' ಎಂದು ಕಮಲ್‌ನಾಥ್‌ ಜರೆದಿದ್ದರು. ಇದಾದ ಬಳಿಕ ಚುನಾವಣಾ ಆಯೋಗ ಅವರನ್ನು ತಾರಾ ಪ್ರಚಾರಕರ ಪಟ್ಟಿಯಿಂದ ತೆಗೆದು ಹಾಕಿತ್ತು. ನವೆಂಬರ್‌ 3 ರಂದು ಮಧ್ಯ ಪ್ರದೇಶದ 28 ಕ್ಷೇತ್ರಗಳಿಗೆ ಉಪಚುನಾವಣೆ ನಡೆಯಲಿದೆ. ಜ್ಯೋತಿರಾದಿತ್ಯ ಸಿಂದಿಯಾ ಕಾಂಗ್ರೆಸ್‌ ತೊರೆದು ಬಿಜೆಪಿ ಸೇರಿದ ವೇಳೆ ಅವರ ಜೊತೆ ಪಕ್ಷ ಬಿಟ್ಟಿದ್ದ ಕಾಂಗ್ರೆಸ್‌ ಶಾಸಕರ ಕ್ಷೇತ್ರಗಳೇ ಇದರಲ್ಲಿ ಹೆಚ್ಚಿನದಾಗಿವೆ. ಬಿಜೆಪಿ ಅಧಿಕಾರದಲ್ಲಿ ಉಳಿಯಲು ಇದರಲ್ಲಿ ಕನಿಷ್ಠ 8 ಕ್ಷೇತ್ರಗಳಲ್ಲಿ ಜಯ ಸಾಧಿಸಲೇಬೇಕಾಗಿದೆ. ಒಂದೊಮ್ಮೆ ಕಾಂಗ್ರೆಸ್‌ ಎಲ್ಲಾ 28 ಕ್ಷೇತ್ರಗಳಲ್ಲಿ ಗೆಲುವು ಸಾಧಿಸಿದಲ್ಲಿ ಮತ್ತೆ ಅಧಿಕಾರಕ್ಕೇರಲಿದೆ.
from India & World News in Kannada | VK Polls https://ift.tt/2TTh6lL
