ನಾಗ್ಪುರ: ಮನರಂಜನೆಗೋಸ್ಕರ ಜನ ಕುಣಿತಾರೆ, ಹಾಡ್ತಾರೆ ಮತ್ತೆ ತಮಗೆ ಇಷ್ಟಬಂದದ್ದನ್ನು ಮಾಡ್ತಾರೆ. ಆದರೆ, ನಾಗ್ಪುರದಲ್ಲಿ ಬರ್ತ್‌ಡೇ ಸೆಲೆಬ್ರೆಷನ್‌ಗೋಸ್ಕರ ಮೂರು ಜನ 16 ಕಾರುಗಳ ಗಾಜು ಹೊಡೆದು, ಜಖಂಗೊಳಿಸಿ, ಹಚ್ಚಿದ ವಿಚಿತ್ರ ಘಟನೆ ನಡೆದಿದೆ. ಗುರುವಾರ ಬೆಳ್ಳಂಬೆಳಗ್ಗೆ ಪಶ್ಚಿಮ ನಾಗ್ಪುರದಲ್ಲಿ ಈ ಘಟನೆ ನಡೆದಿದ್ದು, ಅಜನಿ ಮತ್ತು ಬೆಲ್ತರೋಡಿ ಪೊಲೀಸ್‌ ಠಾಣೆಗಳಲ್ಲಿ ಪ್ರತ್ಯೇಕ ಎಫ್‌ಐಆರ್‌ಗಳು ದಾಖಲಾಗಿವೆ. ಹಿರಿಯ ಪೊಲೀಸ್‌ ಇನ್ಸ್‌ಪೆಕ್ಟರ್‌ ವಿಜಯ್‌ ಅಕೋಟ್‌ ನೇತೃತ್ವದಲ್ಲಿ ಬೆಲ್ತರೋಡಿ ಪೊಲೀಸ್‌ ತಂಡ ಮೂವರನ್ನು ವಶಕ್ಕೆ ಪಡೆಯುವಲ್ಲಿ ಯಶಸ್ವಿಯಾಗಿದೆ. ಇದರಲ್ಲಿ ಓರ್ವ ಆರೋಪಿ ಕ್ರಿಮಿನಲ್‌ ಹಿನ್ನೆಲೆ ಹೊಂದಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ. ವಾರ್ದಾದ ಹಿಂಗಾನ್‌ಘಾಟ್‌ನಲ್ಲಿ ಓರ್ವ ಆರೋಪಿ ತಪ್ಪಿಸಿಕೊಳ್ಳುವ ವೇಳೆ ಖಾಕಿ ಕೈಗೆ ಸಿಕ್ಕಿಬಿದ್ದಿದ್ದಾನೆ. ರಿತೇಶ್‌ ದಿಕಾಟೆ, ಚಿರಾಗ್‌ ತಲ್ಕೂರ್‌ ಮತ್ತು ಆವಿಶ್‌ ತಾಯ್ವಡೆ ಬಂಧಿತ ಆರೋಪಿಗಳು. ಬರ್ತ್‌ಡೇ ಪಾರ್ಟಿ ಮುಗಿಸಿಕೊಂಡು ಮನೆಗೆ ಹೋಗುವ ವೇಳೆ ಮನರಂಜನೆಗೋಸ್ಕರ ಕಾರ್‌ಗಳ ಗಾಜು ಪುಡಿ ಪುಡಿ ಮಾಡಿದ್ದಾರೆ. ಸ್ಕೂಟರ್‌ನಲ್ಲಿ ಹೋಗುತ್ತಿರುವಾಗ ನರೇಂದ್ರ ನಗರ, ಬಾರ್ಕುಟೆ ಲೇಔಟ್‌, ರಾಮಕೃಷ್ಣ ಸೊಸೈಟಿ, ರಚನಾವಾಟಿಕ ಅಪಾರ್ಟ್‌ಮೆಂಟ್‌, ಮನೀಶ್‌ ನಗರ್‌ ಹಾಗೂ ವಾರ್ದಾ ರಸ್ತೆಯಲ್ಲಿ ವಾಹನಗಳನ್ನು ಜಖಂಗೊಳಿಸಿದ್ದಾರೆ. ಸಮೀರ್‌ ರಾವತ್‌ ಎಂಬುವವರಿಗೆ ಸೇರಿದ ಕಾರ್‌ಗೆ ಮೂವರು ಸೇರಿ ಬೆಂಕಿ ಹಚ್ಚಿದ್ದಾರೆ. ನರೇಂದ್ರ ನಗರದಲ್ಲಿ ವಾಸವಾಗಿರುವ ರಾವತ್‌ ಖಾಸಗಿ ಸಂಸ್ಥೆಯಲ್ಲಿ ಉದ್ಯೋಗಿಯಾಗಿದ್ದಾರೆ. ನನಗೆ ಯಾರೊಂದಿಗೂ ವೈರತ್ವವಿಲ್ಲ. ಆದರೆ, ಈ ಮೂವರು ನನ್ನ ಕಾರ್‌ಗೆ ಬೆಳಗ್ಗೆ 4.20ರ ಸುಮಾರಿಗೆ ಬೆಂಕಿ ಹಚ್ಚಿದ್ದಾರೆ. ಸಿಸಿಟಿವಿಯಲ್ಲಿಯೂ ದೃಶ್ಯಾವಳಿ ಸೆರೆಯಾಗಿದೆ ಎಂದು ರಾವತ್‌ ಹೇಳಿದ್ದಾರೆ. ಸಿಸಿಟಿವಿಯಲ್ಲಿ ಮೂವರು ಆರೋಪಿಗಳ ಮುಖ ಸ್ಪಷ್ಟವಾಗಿ ಗೋಚರಿಸುತ್ತಿದೆ. ತನಿಖೆ ನಡೆಸಿ ಮೂವರನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದೇವೆ ಎಂದು ಇನ್ಸ್‌ಪೆಕ್ಟರ್‌ ಅಕೋಟ್‌ ಹೇಳಿದ್ದಾರೆ. ಎಸ್‌ಐ ವಿಕಾಸ್‌ ಮಾನ್ಪಿಯಾ, ಪೊಲೀಸ್‌ ಪ್ರಶಾಂತ್‌ ಸೋನುಲ್ಕರ್‌, ನಿತೀನ್‌ ಭವಾನೆ, ಗೋಪಾಲ್‌ ದೇಶಮುಖ್‌, ಅವಿನಾಶ್‌ ಥಾಕ್ರೆ, ವಿಜಯ್‌ ಶ್ರೀಬಾಸ್‌ ಮತ್ತಿತರರು ಪೊಲೀಸರ ತಂಡದಲ್ಲಿದ್ದಾರೆ.
from India & World News in Kannada | VK Polls https://ift.tt/3e7WI9H
