ಬೆಂಗಳೂರು: ನಾಲ್ಕು ವರ್ಷ ಮೇಲ್ಪಟ್ಟ ಸೇರಿದಂತೆ ಹಿಂಬದಿ ಸವಾರರು ಧರಿಸುವುದು ಕಡ್ಡಾಯ. 2019ರ ಮೋಟಾರು ವಾಹನ(ತಿದ್ದುಪಡಿ) ಕಾಯಿದೆ ಪ್ರಕಾರ ಹೆಲ್ಮೆಟ್‌ ಧರಿಸದೇ ವಾಹನ ಚಲಾಯಿಸಿದರೆ 1,000 ರೂ. ದಂಡ, ಜತೆಗೆ ಮೂರು ತಿಂಗಳ ಮಟ್ಟಿಗೆ ಚಾಲನಾ ಪರವಾನಗಿಯನ್ನು ರದ್ದುಪಡಿಸಲು ಅವಕಾಶವಿದೆ. ದಂಡದ ಮೊತ್ತ ಹೆಚ್ಚಳ ಕುರಿತು ಸಾರ್ವಜನಿಕರಿಂದ ಆಕ್ಷೇಪ ವ್ಯಕ್ತವಾದ ಹಿನ್ನೆಲೆಯಲ್ಲಿ ಸರಕಾರ ದಂಡದ ಮೊತ್ತವನ್ನು 500 ರೂ.ಗೆ ಇಳಿಸಿದೆ. ಆದರೆ ಈ ಹಿಂದೆ ಚಾಲನಾ ಪರವಾನಗಿ ರದ್ದುಪಡಿಸುವ ಕ್ರಮವನ್ನು ಅಷ್ಟಾಗಿ ಜಾರಿಗೊಳಿಸಿರಲಿಲ್ಲ. ಆದರೆ ಸಂಚಾರ ನಿಯಮ ಉಲ್ಲಂಘಿಸುವ ದ್ವಿಚಕ್ರ ವಾಹನ ಸವಾರರ ವಿರುದ್ಧ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಲು ಇತ್ತೀಚೆಗೆ ಸಂಚಾರ ಇಲಾಖೆ ತೀರ್ಮಾನಿಸಿದೆ. ''ದ್ವಿಚಕ್ರ ವಾಹನ ಸವಾರರು, ಮಕ್ಕಳು ಸೇರಿದಂತೆ ಹಿಂಬದಿ ಸವಾರರು ಹೆಲ್ಮೆಟ್‌ ಧರಿಸುವುದು ಕಡ್ಡಾಯ. ಹೆಲ್ಮೆಟ್‌ ಧರಿಸದ ದ್ವಿಚಕ್ರ ವಾಹನ ಸವಾರರ ಚಾಲನಾ ಪರವಾನಗಿ ರದ್ದುಪಡಿಸಲಾಗುವುದು,'' ಎಂದು ಸಾರಿಗೆ ಇಲಾಖೆಯ(ಬೆಂಗಳೂರು ನಗರ) ಜಂಟಿ ಆಯುಕ್ತರಾದ ಕೆ.ಟಿ.ಹಾಲಸ್ವಾಮಿ ಎಚ್ಚರಿಸಿದರು. ಹೆಲ್ಮೆಟ್‌ ಮಾರಾಟ ಹೆಚ್ಚಳ ಲಾಲ್‌ಬಾಗ್‌ ಮತ್ತು ಜೆ.ಸಿ.ರಸ್ತೆಯ ಹೆಲ್ಮೆಟ್‌ ಅಂಗಡಿಗಳಲ್ಲಿ ದೊಡ್ಡ ಪ್ರಮಾಣದಲ್ಲಿ ಮಕ್ಕಳ ಹೆಲ್ಮೆಟ್‌ ಮಾರಾಟವಾಗುತ್ತಿದೆ. ''ಸಾಮಾನ್ಯವಾಗಿ ಮಕ್ಕಳ ಹೆಲ್ಮೆಟ್‌ಗಳಿಗೆ ಕಡಿಮೆ ಇರುತ್ತದೆ. ಹಾಗಾಗಿ ಮಕ್ಕಳ ಹೆಲ್ಮೆಟ್‌ಗಳಲ್ಲಿ ವಿಧಗಳು ಕಡಿಮೆ. ಕೊರೊನಾ ಲಾಕ್‌ಡೌನ್‌ ನಂತರ ವ್ಯಾಪಾರ ಕಡಿಮೆಯಾಗಿದೆ. ಆದರೆ ಇತ್ತೀಚೆಗೆ ಮಕ್ಕಳ ಹೆಲ್ಮೆಟ್‌ಗೆ ಬೇಡಿಕೆ ಹೆಚ್ಚಾಗಿದೆ. 500-1000 ರೂ.ನಲ್ಲಿ ಮಕ್ಕಳ ಹೆಲ್ಮೆಟ್‌ ಸಿಗುತ್ತದೆ,'' ಎಂದು ಜೆ.ಸಿ.ರಸ್ತೆಯ ಹೆಲ್ಮೆಟ್‌ ಅಂಗಡಿ ಮಾಲೀಕ ರಮೇಶ್‌ ಎನ್‌. ವಿವರಿಸಿದರು. ''ಹೆಚ್ಚಿನ ಸಮಯದವರೆಗೆ ದೊಡ್ಡ ಹೆಲ್ಮೆಟ್‌ ಧರಿಸಲು ನನ್ನ ಮಗ ಕಿರಿಕಿರಿ ಅನುಭವಿಸುತ್ತಾನೆ. ಆದರೆ ಮಕ್ಕಳಿಗಾಗಿ ಕಡಿಮೆ ತೂಕದ ಹೆಲ್ಮೆಟ್‌ ಹೆಚ್ಚಾಗಿ ಸಿಗುತ್ತಿಲ್ಲ. ನನ್ನ ಬಳಿ ದ್ವಿಚಕ್ರ ವಾಹನ ಒಂದೇ ಇರುವುದು. ಹೀಗಾಗಿ ಹೆಲ್ಮೆಟ್‌ ಇಲ್ಲದೇ ಚಾಲನಾ ಪರವಾನಗಿ ರದ್ದಾಗುವ ಕ್ರಮಕ್ಕೆ ನಾವು ಸಿದ್ಧರಿಲ್ಲ,'' ಎಂದು ಹೆಲ್ಮೆಟ್‌ ಖರೀದಿಗೆ ಬಂದಿದ್ದ ಎಲೆಕ್ಟ್ರಿಶಿಯನ್‌ ಸುರೇಂದ್ರ ಆರ್‌. ಹೇಳಿದರು. ಅಪಘಾತಗಳು ಸಂಭವಿಸಿದಾಗ ಮಕ್ಕಳು ಹೆಚ್ಚಾಗಿ ಅಪಾಯಕ್ಕೆ ಸಿಲುಕುತ್ತಾರೆ. ಮುಖ್ಯವಾಗಿ ತಲೆಗೆ ತೀವ್ರ ಗಾಯ, ಮೆದುಳಿಗೆ ಹಾನಿ ಮತ್ತು ಅಪಘಾತ ಸ್ಥಳದಲ್ಲೇ ಸಾವಿಗೆ ತುತ್ತಾಗುತ್ತಾರೆ. ''ಮಕ್ಕಳು ಹೆಲ್ಮೆಟ್‌ ಧರಿಸುವ ಬಗ್ಗೆ ಪೋಷಕರು ಹೆಚ್ಚು ಗಂಭಿರವಾಗಿ ತೆಗೆದುಕೊಳ್ಳುವುದಿಲ್ಲ. ಬಹುತೇಕ ಹೊರ ದೇಶಗಳಲ್ಲಿ ಸೈಕಲ್‌ ತುಳಿಯುವಾಗಲೂ ಹೆಲ್ಮೆಟ್‌ ಧರಿಸುವುದು ಕಡ್ಡಾಯ. ಇಲ್ಲದಿದ್ದರೆ ಶಿಕ್ಷೆಗೆ ಗುರಿಯಾಗಬೇಕಾಗುತ್ತದೆ,'' ಎಂದು ಸಾಮಾಜಿಕ ಕಾರ್ಯಕರ್ತರೊಬ್ಬರು ಅಭಿಪ್ರಾಯಪಟ್ಟರು. 11,168 ಮಕ್ಕಳು ಸಾವು ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಇಲಾಖೆಯ ಇತ್ತೀಚಿನ ವರದಿ ಪ್ರಕಾರ, 2019ರಲ್ಲಿ ದೇಶದಲ್ಲಿ ನಡೆದ ರಸ್ತೆ ಅಪಘಾತಗಳಲ್ಲಿ 11,168 ಮಕ್ಕಳು (ಕರ್ನಾಟಕದ 460 ಮಕ್ಕಳು ಒಳಗೊಂಡಂತೆ) ಪ್ರಾಣ ಕಳೆದುಕೊಂಡಿದ್ದಾರೆ. ಕಳೆದ ವರ್ಷ ರಾಜ್ಯದಲ್ಲಿ ನಡೆದ ರಸ್ತೆ ಅಪಘಾತಗಳಲ್ಲಿ 1,546 ದ್ವಿಚಕ್ರ ವಾಹನ ಸವಾರರು ಮತ್ತು 711 ಹಿಂಬದಿ ಸವಾರರು ಸಾವನ್ನಪ್ಪಿದ್ದಾರೆ. ''ಭಾರತದಲ್ಲಿ ಮಕ್ಕಳ ಸಾವಿನ ಸಂಖ್ಯೆ ಹೆಚ್ಚುತ್ತಿದೆ. ದ್ವಿಚಕ್ರ ವಾಹನಗಳಲ್ಲಿ ತೆರಳುವಾಗ ಮಕ್ಕಳು ಹೆಲ್ಮೆಟ್‌ ಧರಿಸದಿರುವುದು ಕೂಡ ಇದಕ್ಕೆ ಮುಖ್ಯ ಕಾರಣಗಳಲ್ಲಿ ಒಂದು. ಮಕ್ಕಳಿಗಾಗಿ ಹೆಲ್ಮೆಟ್‌ ಖರೀದಿಸಿ ಕೊಡದ ಪೋಷಕರನ್ನು ಹೊಣೆಗಾರರನ್ನಾಗಿ ಮಾಡಬೇಕು. ಮಕ್ಕಳ ಸುರಕ್ಷತೆಯನ್ನು ಗಮನದಲ್ಲಿಟ್ಟುಕೊಂಡು ಕರ್ನಾಟಕ ಸರಕಾರ ಸಂಚಾರ ನಿಯಮಗಳನ್ನು ಕಟ್ಟುನಿಟ್ಟಾಗಿ ಜಾರಿಗೊಳಿಸಬೇಕು,'' ಎಂದು ಸೇವ್‌ ಲೈಫ್‌ ಫೌಂಡೇಶನ್‌ನ ಸ್ಥಾಪಕ ಮತ್ತು ಸಿಇಒ ಪಿಯೂಶ್‌ ತಿವಾರಿ ಒತ್ತಾಯಿಸಿದರು. 2019ರಲ್ಲಿ ರಾಜ್ಯದಲ್ಲಿ ನಡೆದ ಅಪಘಾತಗಳಲ್ಲಿದ್ವಿಚಕ್ರ ವಾಹನ ಸವಾರರು ಮೃತಪಟ್ಟವರು 1,546 ಗಾಯಗೊಂಡವರು 5,667 ಹಿಂಬದಿ ಸವಾರರು ಮೃತಪಟ್ಟವರು 711 ಗಾಯಗೊಂಡವರು 2,696
from India & World News in Kannada | VK Polls https://ift.tt/37RFMTI
