ಅಬುಧಾಬಿ: ರಾಜಸ್ಥಾನ್ ರಾಯಲ್ಸ್ ವಿರುದ್ಧದ ಪಂದ್ಯದಲ್ಲಿ ಅದ್ಭುತ ಬ್ಯಾಟಿಂಗ್ ಪ್ರದರ್ಶನ ತೋರಿದ ಕ್ರಿಸ್‌ ಗೇಲ್ ಅವರನ್ನು ಕಿಂಗ್ಸ್ ಇಲೆವೆನ್ ಪಂಜಾಬ್‌ ತಂಡದ ನಾಯಕ ಶ್ಲಾಘಿಸಿದ್ದಾರೆ. ಶೇಖ್‌ ಝಾಹೇದ್‌ ಕ್ರೀಡಾಂಗಣದಲ್ಲಿ ಅವರ 99 ರನ್‌ಗಳ ನೆರವಿನಿಂದ , ನಿಗದಿತ 20 ಓವರ್‌ಗಳಿಗೆ 4 ವಿಕೆಟ್‌ಗಳನ್ನು ಕಳೆದುಕೊಂಡು 185 ರನ್‌ಗಳನ್ನು ದಾಖಲಿಸಿದೆ. ಬಳಿಕ 186 ರನ್‌ಗಳ ಗುರಿ ಹಿಂಬಾಲಿಸಿದ ರಾಜಸ್ಥಾನ್ ರಾಯಲ್ಸ್ 7 ವಿಕೆಟ್‌ಗಳ ಭರ್ಜರಿ ಜಯ ದಾಖಲಿಸಿತು. ಆ ಮೂಲಕ ಪ್ಲೇಆಫ್ಸ್ ಹಾದಿ ಜೀವಂತವಾಗಿರಿಸಿಕೊಂಡಿತು. ಪಂದ್ಯದ ಬಳಿಕ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಪಂಜಾಬ್‌ ನಾಯಕ ರಾಹುಲ್‌, "ಕ್ರಿಸ್‌ ಗೇಲ್ ಅವರಿಂದ ಮತ್ತೊಂದು ಅತ್ಯುತ್ತಮ ಇನಿಂಗ್ಸ್ ಮೂಡಿ ಬಂದಿದೆ. ಮುಂದಿನ ಪಂದ್ಯದಲ್ಲಿಯೂ ಅವರು ಖಂಡಿತಾ ಉತ್ತಮ ಬ್ಯಾಟಿಂಗ್ ಮಾಡಿ ತಂಡಕ್ಕೆ ಜಯ ತಂದುಕೊಡಲಿದ್ದಾರೆ," ಎಂದು ಹೇಳಿದರು. "ನಾವು ಅಂದುಕೊಂಡಿದ್ದಕ್ಕಿಂತ 10 ರಿಂದ 15 ರನ್‌ಗಳನ್ನು ಜಾಸ್ತಿ ಗಳಿಸಿದ್ದೇವೆ. ಈ ಹಿಂದಿನ ಪಂದ್ಯಗಳನ್ನು ಆಧರಿಸಿ 160-170 ರನ್‌ಗಳು ಗೆಲುವಿನ ಮೊತ್ತ ಎಂದು ಭಾವಿಸಿದ್ದೆವು. ಮಂದೀಪ್‌ ಸಿಂಗ್‌ ಔಟ್‌ ಆದ ಬಳಿಕ, ಈ ಪಿಚ್‌ನಲ್ಲಿ ಬ್ಯಾಟಿಂಗ್ ಮಾಡುವುದು ಸುಲಭವಲ್ಲ ಎಂದು ನಾನು ಮತ್ತು ಗೇಲ್ ಮಾತನಾಡಿದ್ದೆವು. ಆದರೆ, ಇಷ್ಟು ಮೊತ್ತ ಗಳಿಸಿದ ಶ್ರೇಯ ಗೇಲ್‌ಗೆ ಸಲ್ಲುತ್ತದೆ. ಇಂತಹ ಕಠಿಣ ವಿಕೆಟ್‌ನಲ್ಲಿ ಗೇಲ್ ಬಿಟ್ಟರೆ, ಬೇರೆ ಯಾವ ಆಟಗಾರ ಈ ರೀತಿ ಆಡಲು ಸಾಧ್ಯವಿಲ್ಲ ಎಂದು ಭಾವಿಸುತ್ತೇನೆ," ಎಂದು ರಾಹುಲ್‌ ಹೇಳಿದರು. "ಅವರನ್ನು(ಗೇಲ್) ಡ್ರೆಸ್ಸಿಂಗ್‌ ಕೊಠಡಿಯಲ್ಲಿ ಹೊಂದಿರುವುದು ಹಾಗೂ ಬ್ಯಾಟಿಂಗ್ ಮಾಡುವುದನ್ನು ನಾವು ಇಷ್ಟಪಡುತ್ತೇವೆ. ಅವರಿಗೆ 41 ವರ್ಷ ವಯಸ್ಸಾಗಿದೆ ಎಂದು ಯಾರೂ ಹೇಳುವುದಿಲ್ಲ. ಇದು ನಮಗೆ ದೊಡ್ಡ ಸಂಕೇತವಾಗಿದೆ. ಮುಂದಿನ ಪಂದ್ಯದಲ್ಲಿಯೂ ಗೇಲ್ ಅವರಿಂದ ಅತ್ಯುತ್ತಮ ಇನಿಂಗ್ಸ್ ಮೂಡಿ ಬರಲಿದೆ ಹಾಗೂ ನಾವು ಅಂತಿಮ ನಾಲ್ಕರಲ್ಲಿ ಸ್ಥಾನ ಪಡೆಯುತ್ತೇವೆಂಬ ನಿರೀಕ್ಷೆ ಇದೆ," ಎಂದರು. ಪಂದ್ಯದ ಸೋಲಿನ ಹೊರತಾಗಿಯೂ ಕಿಂಗ್ಸ್ ಇಲೆವೆನ್ ಪಂಜಾಬ್‌ ಪಾಯಿಂಟ್ಸ್‌ ಟೇಬಲ್‌ನಲ್ಲಿ ನಾಲ್ಕನೇ ಸ್ಥಾನದಲ್ಲಿದ್ದು ಪ್ಲೇಆಫ್ಸ್ ರೇಸ್‌ನಲ್ಲಿದೆ. ಭಾನುವಾರ ಇದೇ ಅಂಗಳದಲ್ಲಿ ಚೆನ್ನೈ ಸೂಪರ್‌ ಕಿಂಗ್ಸ್ ವಿರುದ್ಧ ಸೆಣಸಲಿದೆ. ಗೆಲುವು ಸಾಧಿಸಿದ ರಾಜಸ್ಥಾನ್ ರಾಯಲ್ಸ್ ಖಾತೆಯಲ್ಲಿಯೂ 12 ಅಂಕಗಳಿವೆ, ಆದರೆ ರನ್‌ರೇಟ್‌ ಕಡಿಮೆ ಇರುವ ಕಾರಣ ಐದನೇ ಸ್ಥಾನದಲ್ಲಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3kKZDHT
