ನಾಗಪ್ಪ ನಾಗನಾಯಕನಹಳ್ಳಿ ಬೆಂಗಳೂರು ಬೆಂಗಳೂರು: ಮುಂಗಾರಿನಲ್ಲಿ ವಾಡಿಕೆಗಿಂತ ಹೆಚ್ಚು ಮಳೆಯಾಗಿದೆ. ಈವರೆಗೆ 1267 ಮಿ.ಮೀ ಸುರಿದಿದೆ. ಇದರಿಂದ ಕೆರೆಗಳು ಭರ್ತಿಯಾಗಿವೆ. ಪರಿಣಾಮ ಮಟ್ಟದಲ್ಲಿ ಭಾರಿ ಏರಿಕೆಯಾಗಿದೆ. ರಾಜ್ಯದಲ್ಲಿನ 227 ತಾಲೂಕುಗಳ ಪೈಕಿ 183 ಕಡೆ ಸ್ಥಿರ ಜಲಮಟ್ಟ ಏರಿದೆ. 41 ತಾಲೂಕುಗಳಲ್ಲಿ ಮಾತ್ರ ಅಂತರ್ಜಲ ಮಟ್ಟ ಕುಸಿತ ಕಂಡಿದೆ. ಬರದ ನಾಡು ಎನಿಸಿರುವ ಚಿತ್ರದುರ್ಗ ಜಿಲ್ಲೆಯ ಮೊಳಕಾಲ್ಮೂರು ತಾಲೂಕಿನಲ್ಲಿ 2019ರ ಸೆಪ್ಟೆಂಬರ್‌ಗೆ ಹೋಲಿಸಿದಾಗ ಈ ವರ್ಷದ ಸೆಪ್ಟೆಂಬರ್‌ನಲ್ಲಿ ಅಂತರ್ಜಲ ಮಟ್ಟವು 56.37 ಮೀಟರ್‌ನಷ್ಟು ಮೇಲೆ ಬಂದಿದೆ. ಕಳೆದ ಸೆಪ್ಟೆಂಬರ್‌ನಲ್ಲಿ ಅಂತರ್ಜಲವು ನೆಲಮಟ್ಟದಿಂದ 74.58 ಮೀಟರ್‌ನಷ್ಟು ಆಳದಲ್ಲಿತ್ತು. ಈಗ 18.21 ಮೀಟರ್‌ಗೆ ಕೊಳವೆಬಾವಿಗಳಲ್ಲಿಸ್ಥಿರ ಜಲ ದೊರಕುತ್ತಿದೆ. ಬರ ಜಿಲ್ಲೆಗಳಾದ ಕೋಲಾರ, ಚಿಕ್ಕಬಳ್ಳಾಪುರ, ತುಮಕೂರಿನಲ್ಲೂ ಸ್ಥಿರ ಜಲಮಟ್ಟ ಜಾಸ್ತಿಯಾಗಿದೆ. ಆಶ್ಚರ್ಯವೆಂದರೆ ಉರಿ ಬೇಗೆ ಮತ್ತು ನೀರಿನ ಬವಣೆಯಿಂದ ಬಳಲುವ ಬಳ್ಳಾರಿ, ಯಾದಗಿರಿ, ಕೊಪ್ಪಳ, ಕಲಬುರ್ಗಿ, ರಾಯಚೂರು ಜಿಲ್ಲೆಗಳಲ್ಲಿ ಸ್ಥಿರ ಜಲಮಟ್ಟ ಕುಸಿದಿಲ್ಲ. ಬದಲಿಗೆ ನಾಲ್ಕೈದು ಮೀಟರ್‌ನಷ್ಟು ಏರಿಕೆಯಾಗಿದೆ. ವಿಜಯಪುರ ಜಿಲ್ಲೆಯ ಚಡಚಣ ತಾಲೂಕಿನಲ್ಲಿ 31.10 ಮೀ, ಇಂಡಿಯಲ್ಲಿ 24.03 ಮೀ, ರಾಮನಗರ ಜಿಲ್ಲೆಯ ಕನಕಪುರ ತಾಲೂಕಿನಲ್ಲಿ 16.39 ಮೀ, ತುಮಕೂರಿನ ಪಾವಗಡ 16.12 ಮೀ, ಶಿರಾ 13.31 ಮೀ, ಮಧುಗಿರಿ 14.46 ಮೀ, ತುರುವೇಕೆರೆ 14.59 ಮೀ, ಬೆಂಗಳೂರು ನಗರ ಜಿಲ್ಲೆಯ ಉತ್ತರ ತಾಲೂಕಿನಲ್ಲಿ 14.80 ಮೀ, ಕೋಲಾರದ ಕೆಜಿಎಫ್‌ನಲ್ಲಿ 10.26 ಮೀ.ನಷ್ಟು ಜಲಮಟ್ಟ ಹೆಚ್ಚಾಗಿದೆ. ಮಲೆನಾಡು-ಕರಾವಳಿ ಜಿಲ್ಲೆಗಳಾದ ಉತ್ತರ ಕನ್ನಡ, ಶಿವಮೊಗ್ಗ, ಚಿಕ್ಕಮಗಳೂರು, ಕೊಡಗು, ದಕ್ಷಿಣ ಕನ್ನಡ, ಉಡುಪಿ ಜಿಲ್ಲೆಗಳಲ್ಲೂ ನೀರಿನ ಮಟ್ಟ ಕುಸಿತವಾಗಿಲ್ಲ. ಕೊಳವೆ ಬಾವಿಗಳಲ್ಲಿ ತಳ ಸೇರಿದ್ದ ಅಂತರ್ಜಲ ಮಟ್ಟವು ಗಣನೀಯವಾಗಿ ಏರಿಕೆಯಾಗಿರುವುದರಿಂದ ಮೇಲೆ ಬಂದಿದೆ. ಬತ್ತಿ ಹೋಗಿದ್ದ ಬೋರ್‌ವೆಲ್‌ಗಳಲ್ಲೂ ನೀರು ಚಿಮ್ಮುತ್ತಿದೆ. ದಾಖಲೆ ಮಳೆಯಿಂದಾಗಿ ಬಿತ್ತನೆ ಪ್ರಮಾಣವೂ ಜಾಸ್ತಿ ಆಗಿದೆ. ಕೃಷಿ ಇಲಾಖೆಯು ಮುಂಗಾರು ಹಂಗಾಮಿನಲ್ಲಿ 76 ಲಕ್ಷ ಹೆಕ್ಟೇರ್‌ನಲ್ಲಿ ಬಿತ್ತನೆಯ ಗುರಿ ಹೊಂದಿತ್ತು. ಆದರೆ, 78 ಲಕ್ಷ ಹೆಕ್ಟೇರ್‌ ಪ್ರದೇಶದಲ್ಲಿ ಬಿತ್ತನೆ ಆಗಿದೆ. ಹಿಂಗಾರು ಹಂಗಾಮಿನಲ್ಲಿ ಇಲ್ಲಿಯವರೆಗೆ 3.2 ಲಕ್ಷ ಹೆಕ್ಟೇರ್‌ನಲ್ಲಿ ಬಿತ್ತನೆ ಮಾಡಲಾಗಿದೆ. ಕೃಷಿಕರು ಈ ಸಲ ಭರ್ಜರಿ ಫಸಲಿನ ನಿರೀಕ್ಷೆಯಲ್ಲಿದ್ದಾರೆ. ಸ್ಥಿರ ಜಲಮಟ್ಟ ಎಂದರೇನು? ರಾಜ್ಯ ಅಂತರ್ಜಲ ನಿರ್ದೇಶನಾಲಯವು 1106 ಕೊಳವೆಬಾವಿ ಮತ್ತು 369 ತೆರೆದ ಬಾವಿ ಸೇರಿ 1475 ಒಟ್ಟು ಬಾವಿಗಳಲ್ಲಿ ಪ್ರತಿ ತಿಂಗಳು ಅಂತರ್ಜಲ ಸ್ಥಿರ ಮಟ್ಟವನ್ನು ದಾಖಲಿಸುತ್ತದೆ. ಈ ದತ್ತಾಂಶ ಕ್ರೋಡೀಕರಿಸಿ ಜಲಮಟ್ಟದ ಏರಿಳಿತ ಲೆಕ್ಕ ಹಾಕಲಾಗುತ್ತದೆ. ಈ ಬಾವಿಗಳಲ್ಲಿ ಒಂದು ಹನಿ ನೀರನ್ನೂ ಹೊರ ತೆಗೆಯುವುದಿಲ್ಲ. ಬಳಸುವುದೂ ಇಲ್ಲ. ಇದನ್ನು ಭೂವಿಜ್ಞಾನ ಇಲಾಖೆಯ ಭಾಷೆಯಲ್ಲಿ'ಸ್ಥಿರ ಜಲಮಟ್ಟ' ಎಂದು ಕರೆಯಲಾಗುತ್ತದೆ. ''ಇಂಥ 1475 ಬಾವಿಗಳ ಪೈಕಿ 226 ಕಡೆ ಜಲಮಟ್ಟ ಅಳೆಯುವ ಸಲುವಾಗಿಯೇ ಡಿಜಿಟಲ್‌ ವಾಟರ್‌ ಲೆವೆಲ್‌ ರೆಕಾರ್ಡರ್‌ (ಡಿಡಬ್ಲ್ಯೂಎಲ್‌ಆರ್‌) ಸಾಧನ ಅಳವಡಿಸಲಾಗಿದೆ. ಇದರಿಂದ ಪ್ರತಿ 6 ತಾಸಿಗೊಮ್ಮೆ ನೀರಿನ ಏರಿಳಿತದ ಸಮಗ್ರ ಮಾಹಿತಿ ದೊರಕುತ್ತಿದೆ,'' ಎಂದು ರಾಜ್ಯ ಅಂತರ್ಜಲ ನಿರ್ದೇಶನಾಲಯದ ಉಪ ನಿರ್ದೇಶಕ ಜಿ.ಜಯಣ್ಣ ತಿಳಿಸಿದರು. 45 ತಾಲೂಕುಗಳಲ್ಲಿ ಜಲಕ್ಷಾಮ ರಾಜ್ಯದ 45 ತಾಲೂಕುಗಳಲ್ಲಿ ಅಂತರ್ಜಲ ಮಟ್ಟ ಪಾತಾಳ ಸೇರಿದೆ. ಈ ಪ್ರದೇಶಗಳಲ್ಲಿ ಜಲ ಸಂರಕ್ಷಣೆಗೆ ಆದ್ಯತೆ ನೀಡದಿದ್ದರೆ ಮುಂಬರುವ ದಶಕಗಳಲ್ಲಿ ಭೀಕರ ಜಲಕ್ಷಾಮ ಆವರಿಸಲಿದೆ. ಅಂತರ್ಜಲ ನಿರ್ದೇಶನಾಲಯದ ಅಂಕಿ-ಅಂಶಗಳ ಪ್ರಕಾರ 45 ತಾಲೂಕುಗಳಲ್ಲಿಅಂತರ್ಜಲ ಮಿತಿ ಮೀರಿ ಬಳಕೆಯಾಗಿದೆ. ವಾಡಿಕೆ ಮಳೆ ಪ್ರಮಾಣವು ಕಡಿಮೆಯಾಗುತ್ತಿರುವುದರಿಂದ ಅಂತರ್ಜಲ ಪಾತಾಳದತ್ತ ಸರಿದಿದೆ. ಅಂತರ್ಜಲ ಸಂಪನ್ಮೂಲ ಮೌಲ್ಯೀಕರಿಸಿ ಈ ಹಿಂದೆ 15 ಜಿಲ್ಲೆಗಳ 43 ತಾಲೂಕುಗಳನ್ನು ಅತಿ ಬಳಕೆ ಪ್ರದೇಶಗಳೆಂದು ವರ್ಗೀಕರಿಸಲಾಗಿತ್ತು. ಇದೀಗ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ಮತ್ತು ಚಿಕ್ಕಬಳ್ಳಾಪುರ ಜಿಲ್ಲೆಯ ಬಾಗೇಪಲ್ಲಿ ತಾಲ್ಲೂಕುಗಳು ಈ ಪಟ್ಟಿಗೆ ಹೊಸದಾಗಿ ಸೇರಿವೆ. ತಾಲೂಕು ಸ್ಥಿರ ಜಲಮಟ್ಟ ಏರಿಕೆ (ಮೀ.ಗಳಲ್ಲಿ)
- ಮೊಳಕಾಲ್ಮೂರು 56.37
- ಚಡಚಣ 31.10
- ಇಂಡಿ 24.03
- ದಾವಣಗೆರೆ 16.65
- ಕನಕಪುರ 16.39
- ಪಾವಗಡ 16.12
- ತುರುವೇಕೆರೆ 14.59
- ಮಧುಗಿರಿ 14.46
- ಬೆಂಗಳೂರು ಉತ್ತರ 14.80
- ಗೌರಿಬಿದನೂರು 10.39
- ಕೆಜಿಎಫ್‌ 10.26
- ಗುರುಮಿಠ್ಕಲ್‌ 7.48
- ಬಸವಕಲ್ಯಾಣ 10.24
- ಮಸ್ಕಿ 7.86
- ಜೇವರ್ಗಿ 6.08
from India & World News in Kannada | VK Polls https://ift.tt/34zLS9h
