ತಿ.ನಾ ಪದ್ಮನಾಭ ಗ್ರಾಮಾಂತರ ರಾಮನಗರ: ಜಿಲ್ಲೆಯ ಮಾಗಡಿ ತಾಲೂಕಿನ ತಿಪ್ಪಸಂದ್ರ ರೈಲ್ವೆ ನಿಲ್ದಾಣದ ಸಮೀಪ ರೈಲ್ವೆ ಹಳಿಗಳ ಬದಿಯಲ್ಲಿರುವ ಗುಡ್ಡೇಗೌಡನಪಾಳ್ಯ, ಗೊರವನಪಾಳ್ಯ, ಹೊಸಲಾಯ ಗ್ರಾಮದ ರೈತರ ಭತ್ತ, ಜೋಳ, ರಾಗಿ ಬೆಳೆಯುವ ಸುಮಾರು 40 ಹೆಕ್ಟೇರ್‌ಗೂ ಹೆಚ್ಚು ಕೃಷಿ ಭೂಮಿಯಲ್ಲಿ ಹಳಿಯ ದಿಬ್ಬದಿಂದ ಕೆಳೆಗೆ ಹರಿದು ಬಂದ ಮಳೆ ನೀರು ತುಂಬಿ ನಿಂತಿದೆ. ಮಳೆ ನೀರು ಹರಿದು ಹೋಗಲು ಸರಿಯಾದ ಕಾಲುವೆ ನಿರ್ಮಿಸದೇ ಇರುವುದರಿಂದ ಕೃಷಿ ಭೂಮಿ ನೀರು ನಿಂತು ಕೃಷಿಗೆ ಅಯೋಗ್ಯವಾದ ಜೌಗು ಭೂಮಿಯಾಗಿ ಪರಿವರ್ತನೆ ಆಗಿದೆ. ಅವೈಜ್ಞಾನಿಕ ಕಾಮಗಾರಿ ಕಾರಣ ಭೂ ಮೇಲ್ಮೈ ನಿಂದ 70 ಅಡಿ ಎತ್ತರಕ್ಕೆ ಮಣ್ಣು ಹಾಕಿ ಅದರ ಮೇಲೆ ರೈಲು ಹಳಿಗಳನ್ನು ಹಾಕಲಾಗಿದೆ. ಹಳಿ ಹಾದು ಹೋಗಿರುವ ದಿಬ್ಬದ ಮೇಲೆ ಬಿದ್ದ ಮಳೆ ನೀರು ಹರಿದು ಹೋಗಲು ಸೂಕ್ತ ಕಾಲುವೆ ವ್ಯವಸ್ಥೆ ಮಾಡಿಲ್ಲ. ಎಲ್ಲೆಡೆ ಇದೇ ಸಮಸ್ಯೆ ಈ ಸಮಸ್ಯೆ ಮಾಗಡಿ ತಾಲೂಕಿನ ಸೋಲೂರು, ತಿಪ್ಪಸಂದ್ರ, ಬಗೀನಗೆರೆ ಹಾಗೂ ರಾಮನಗರ ಜಿಲ್ಲೆಗೆ ಮಾತ್ರ ಸೀಮಿತಗೊಂಡಿಲ್ಲ. ನೆರೆಯ ಜಿಲ್ಲೆಗಳಾದ ತುಮಕೂರು ಜಿಲ್ಲೆಯ ಕುಣಿಗಲ್‌ ತಾಲೂಕಿನ ಗೊಟ್ಟೀಕೆರೆ, ಕಗ್ಗರೆ ಮುಖ್ಯರಸ್ತೆ ಬಳಿ ಇರುವ ರೈತರ ಜಮೀನು ಬಹುತೇಕ ಇಂತಹುದೇ ಸಮಸ್ಯೆಯಲ್ಲಿ ಮುಳುಗಿದೆ. ರೈಲ್ವೆಗೆ ಕಗ್ಗಂಟಾದ ಸಮಸ್ಯೆ ರೈಲ್ವೆ ಇಲಾಖೆಗೆ ಈ ಸಮಸ್ಯೆಯ ಯಕ್ಷ ಪ್ರಶ್ನೆಯಾಗಿಯೇ ಉಳಿದಿದೆ. ರೈಲ್ವೆ ಇಲಾಖೆ ರೈತರಿಂದ ವಶಪಡಿಸಿಕೊಂಡ ಜಮೀನಿನಲ್ಲಿ ಒಂದು ಸ್ವಲ್ಪವೂ ಜಾಗ ಉಳಿಸದೆ ಈಗಾಗಲೇ ರೈಲ್ವೆ ಕಾಮಗಾರಿ ಮಾಡಿ ಮುಗಿಸಿದೆ. ಆದರೆ ಎತ್ತರದ ರೈಲ್ವೆ ಹಳಿಗಳ ಮೇಲಿಂದ ಹರಿದು ಬರುವ ನೀರನ್ನು ಹರಿಸುವುದಕ್ಕೆ ಇಲಾಖೆ ಬಳಿ ಜಾಗವೇ ಇಲ್ಲ. ಒಂದು ವೇಳೆ ರೈಲ್ವೆ ಹಳಿಯ ಪಕ್ಕದಲ್ಲಿಯೇ ಇಂಗು ಕಾಲುವೆ ಮಾಡಿದರೆ ಅದು ರೈಲ್ವೆ ಹಳಿಗಳಿಗೇ ಅಪಾಯ ತಂದೊಡ್ಡಲಿದೆ. ಕೃಷಿ ಮಾಡಿ 4 ವರ್ಷವಾಯ್ತು ರೈಲ್ವೆ ಕಾಮಗಾರಿಯಿಂದ ಜಲಾವೃತವಾಗಿರುವ ಕೃಷಿ ಭೂಮಿಯ ರೈತರು ತಮ್ಮ ಜಮೀನಿನಲ್ಲಿ ಬೆಳೆ ಬೆಳೆದು 4 ವರ್ಷವಾಗಿದೆ. ಜೀವನಾಧರವಾದ ಭೂಮಿಯೇ ನೀರು ಪಾಲಾಗುತ್ತಿರುವಾಗ ತುತ್ತಿನ ಚೀಲ ತುಂಬಿಸಿಕೊಳ್ಳಲು ಮುಂದೇನು ಮಾಡಬೇಕು ಎಂದು ದಿಕ್ಕು ತೋಚದೆ ಸಮಸ್ಯೆ ಬಗೆಹರಿಸುವಂತೆ ವಿವಿಧ ಇಲಾಖೆಗಳಿಗೆ ಅಲೆದು ಸೋತಿದ್ದಾರೆ. ದಾರಿ ಸಮಸ್ಯೆಯೂ ಕಂಟಕ ರೈಲು ಹಳಿ ಹಾದು ಹೋಗಿರುವುದರಿಂದ ಬಹುತೇಕ ರೈತರ ಜಮೀನು ಎರಡು ತುಂಡಾಗಿದೆ. ಒಂದು ಕಡೆಯಿಂದ ಮತ್ತೊಂದು ಕಡೆಗೆ ಹೋಗಬೇಕಾದರೆ ಹಳಿ ದಾಟುವುದು ಅನಿವಾರ‍್ಯ. ಆದರೆ, ಎತ್ತರದ ದಿಬ್ಬ ಹಾಕಿರುವುದರಿಂದ ಹಾಗೂ ಸದಾ ರೈಲು ಓಡಾಡುತ್ತಿರುವುದರಿಂದ ಎತ್ತಿನಗಾಡಿ, ಟ್ರಾಕ್ಟರ್‌ಗಳನ್ನು ಬಳಸಲು ಸಾದ್ಯವೇ ಇಲ್ಲಎಂಬಂತಾಗಿದೆ. ದೇವೇಗೌಡರ ಕಾಲದ ಯೋಜನೆ ಹೆಚ್‌.ಡಿ ದೇವೇಗೌಡರು ಪ್ರಧಾನಿಯಾಗಿದ್ದಾಗ ಅಂದಿನ ರೈಲ್ವೆ ಸಚಿವರಾಗಿದ್ದ ರಾಮ್‌ವಿಲಾಸ್‌ ಪಾಸ್ವಾನ್‌ಗೆ ಆದೇಶ ನೀಡಿ ಬೆಂಗಳೂರು - ಹಾಸನ ರೈಲು ಮಾರ್ಗ ನಿರ್ಮಿಸಿದ್ದರು. ಹಳಿ ಪೂರ್ಣಗೊಂಡು ರೈಲು ಸಂಚಾರ ಆರಂಭಗೊಂಡು ಎರಡು ವರ್ಷ ಕಳೆದಿವೆ. ಆದರೆ, ಈ ಭಾಗದ ನೂರಾರು ಕೃಷಿಕ ಕುಟುಂಬಗಳು ಬೀದಿ ಪಾಲಾಗುವ ಆತಂಕ ಎದುರಾಗಿದೆ. ರೈಲು ಮಾರ್ಗ ಹಾದು ಹೋಗಿರುವ ಹಲವು ಕಡೆ ಇಂತಹ ಸಮಸ್ಯೆ ಇದೆ. ಮಳೆಗಾಲದಲ್ಲಿಈ ಸಮಸ್ಯೆ ಹೆಚ್ಚು ಗೋಚರವಾಗುತ್ತಿದ್ದು ಇಲಾಖೆಯ ಎಂಜಿನಿಯರ್‌ಗಳಿಗೆ ಸೂಚಿಸಿ ಸೂಕ್ತ ಕ್ರಮ ಕೈಗೊಳ್ಳಲಾಗುವುದು. ರಾಘವೇಂದ್ರ, ರೈಲ್ವೆ ಅಧಿಕಾರಿ, ಬೆಂಗಳೂರು
from India & World News in Kannada | VK Polls https://ift.tt/3jB1gGs
