ಸಾಲದ ಸೋಪಾನದಲ್ಲಿ ಬೆಂಗಳೂರು ಉಪನಗರ ರೈಲು ಸಂಚಾರ: ಬಜೆಟ್‌ ಬಳಿಕ ಕಾಮಗಾರಿ ಆರಂಭ!

ಆರ್‌.ತುಳಸಿಕುಮಾರ್‌ ಬೆಂಗಳೂರು: ಬೆಂಗಳೂರು ಉಪನಗರ ಯೋಜನೆಯ ಒಟ್ಟು ಮೊತ್ತ 15,767 ಕೋಟಿ ರೂ. ಈ ಪೈಕಿ ಕೇಂದ್ರ ಹಾಗೂ ರಾಜ್ಯ ಸರಕಾರಗಳು ತಲಾ 20ರಷ್ಟು ಹಣವನ್ನು ಭರಿಸಲಿದೆ. ಉಳಿದ ಶೇ.60ರಷ್ಟು ಹಣವನ್ನು ಸಾಲದ ಮೂಲಕ ಪಡೆಯಲು ಸರಕಾರ ಒಪ್ಪಿಗೆ ನೀಡಿದೆ. ಇದರಿಂದ ಸಾಲದ ಹಣವನ್ನು ಜಾಗತಿಕ ಬ್ಯಾಂಕ್‌ಗಳಾದ ಏಷ್ಯನ್‌ ಅಭಿವೃದ್ಧಿ ಬ್ಯಾಂಕ್‌(ಎಡಿಬಿ), ಜಪಾನ್‌ ಅಂತಾರಾಷ್ಟ್ರೀಯ ಸಹಕಾರ ಬ್ಯಾಂಕ್‌(ಜೈಕಾ) ಮೊರೆ ಹೋಗುವುದು ಅನಿವಾರ್ಯವಾಗಿದೆ. ಸಾಲ ಎತ್ತುವಳಿ ಮೂಲಕ 7,438 ಕೋಟಿ ರೂ. ಸಂಗ್ರಹಿಸುವುದು ಸಾಹಸದ ಕೆಲಸವಾಗಿದ್ದು, ಯಾವ ವರ್ಷದಲ್ಲಿ ಎಷ್ಟು ಹಣ ಬೇಕಾಗುತ್ತದೆ ಎಂಬ ಲೆಕ್ಕಾಚಾರ ಮಾಡಿದ ನಂತರ ಸಾಲವನ್ನು ಪಡೆಯುವ ಚಿಂತನೆಯಲ್ಲಿದೆ ಕೆ-ರೈಡ್‌. 2021-22 ಸಾಲಿನ ಮಂಡನೆಯಾದ ಬಳಿಕ ಶುರುವಾಗುವ ಸಾಧ್ಯತೆ ಇದೆ. ಏರ್‌ಪೋರ್ಟ್‌ ಮಾರ್ಗಕ್ಕೆ ಆದ್ಯತೆ ಯೋಜನೆಯು ನಾಲ್ಕು ಕಾರಿಡಾರ್‌ಗಳನ್ನು ಹೊಂದಿದೆ. ಈ ಪೈಕಿ ಬೆಂಗಳೂರು ಸಿಟಿ-ದೇವನಹಳ್ಳಿ ಕಾರಿಡಾರ್‌ 41.40 ಕಿ.ಮೀ. ಉದ್ದವಿರಲಿದೆ. ಈ ಮಾರ್ಗ ಕೆಂಪೇಗೌಡ ವಿಮಾನ ನಿಲ್ದಾಣದ ಬಳಿ ಹಾದು ಹೋಗಲಿದೆ. ಇಲ್ಲಿಂದ ಕೆಐಎ ಸಮೀಪವಿದ್ದು, ಪ್ರಯಾಣಿಕರಿಗೆ ಹೆಚ್ಚಿನ ಅನುಕೂಲಕ್ಕಾಗಿ ಈ ಕಾರಿಡಾರನ್ನೇ ಆದ್ಯತೆ ಮೇಲೆ ಕೈಗೆತ್ತಿಕೊಳ್ಳಲಾಗುತ್ತದೆ. ಸದ್ಯ ನಗರದಿಂದ ಕೆಐಎ ತಲುಪಲು ತ್ರಾಸ ಪಡಬೇಕಿದ್ದು, ನಾಗರಿಕರಿಗೆ ಹೋಗಿ ಬರಲು ಸಮಯ, ಹಣ ಹೆಚ್ಚು ವ್ಯಯವಾಗುತ್ತಿದೆ. ಜತೆಗೆ ಏರ್‌ಪೋರ್ಟ್‌ ರಸ್ತೆಯಲ್ಲಿ ಸಂಚಾರ ದಟ್ಟಣೆಯಿಂದಾಗಿ ವಿಮಾನ ಹಿಡಿಯಲು ಕಸರತ್ತು ಮಾಡಬೇಕಿದೆ. ಈ ಸಮಸ್ಯೆಗೆ ಪರಿಹಾರ ನೀಡುವ ಜತೆಗೆ ಉಪನಗರ ರೈಲಿಗೆ ಅಧಿಕ ಸಂಖ್ಯೆಯ ಪ್ರಯಾಣಿಕರನ್ನು ಸೆಳೆಯಲು ಈ ಮಾರ್ಗದಲ್ಲಿ ಮೊದಲು ಕಾಮಗಾರಿ ಆರಂಭಿಸಲಾಗುತ್ತದೆ. ಕಾಮಗಾರಿಗೆ ವರ್ಷಾಂತ್ಯದೊಳಗೆ ಟೆಂಡರ್‌ ಆಹ್ವಾನಿಸುವ ಸಾಧ್ಯತೆ ಇದೆ ಎಂದು ಕೆ-ರೈಡ್‌ ಸಂಸ್ಥೆಯ ಮೂಲಗಳು ತಿಳಿಸಿವೆ. ಇಡೀ ಯೋಜನೆ ಆರು ವರ್ಷದಲ್ಲಿ ಪೂರ್ಣಗೊಳಿಸಲು ಗುರಿ ಹೊಂದಿದ್ದು, ಮೂರು ವರ್ಷದ ಅವಧಿಯೊಳಗೆ ಏರ್‌ಪೋರ್ಟ್‌ ಮಾರ್ಗವನ್ನು ಸಾರ್ವಜನಿಕ ಸೇವೆಗೆ ಲೋಕಾರ್ಪಣೆ ಮಾಡುವ ಆಲೋಚನೆ ಇದೆ. ಸಕಾಲಕ್ಕೆ ಸಾಲ ದೊರೆತು ಭೂಸ್ವಾಧೀನ, ಪರಿಹಾರ ಬಿಡುಗಡೆ, ಸಂಪನ್ಮೂಲ ಕ್ರೊಡೀಕರಣ, ನಿಗದಿತ ಅವಧಿಯೊಳಗೆ ಕಾಮಗಾರಿ ಪೂರ್ಣಗೊಂಡಲ್ಲಿ ಗಡುವಿನೊಳಗೆ ರೈಲು ಓಡಬಹುದು. ಇದಕ್ಕಾಗಿ ಸರಕಾರದ ಇಚ್ಛಾಶಕ್ತಿ ಮುಖ್ಯ. ಭವಿಷ್ಯದಲ್ಲಿ ಸಾರ್ವಜನಿಕ ಸಾರಿಗೆ ಮುನ್ನೆಲೆಗೆ ಬರುವ ಕಾರಣ ಜನರಿಗೂ ಕೂಡ ರೈಲು ಸೌಲಭ್ಯವನ್ನು ಪಡೆದುಕೊಳ್ಳುವುದು ಅನಿವಾರ್ಯವಾಗಲಿದೆ. ಹೀಗಾಗಿ ಉಪನಗರ ರೈಲು ಯೋಜನೆಯನ್ನು ಆದ್ಯತೆ ಮೇಲೆ ಕೈಗೆತ್ತಿಕೊಳ್ಳಬೇಕು ಎಂದು ನಗರ ತಜ್ಞರು ದನಿಗೂಡಿಸಿದ್ದಾರೆ. ಸದ್ಯ ಆಗಬೇಕಿರುವ ಕೆಲಸ ಏನು ?

• ಆರ್ಥಿಕ ಸಂಪನ್ಮೂಲ ಕ್ರೊಡೀಕರಣ
• ಭೂಸ್ವಾಧೀನ, ಪುನರ್ವಸತಿ
• ಕಾಮಗಾರಿಗೆ ನುರಿತ ಏಜನ್ಸಿ
• ನಾನಾ ಸಂಸ್ಥೆಗಳೊಂದಿಗೆ ಸಮನ್ವಯ
• ಕೇಂದ್ರ/ರಾಜ್ಯ ಸರಕಾರದ ನಿಗಾ

ಉಪನಗರ ರೈಲು ಯೋಜನೆ ಜಾರಿಗೆ ಕೇಂದ್ರ ಹಾಗೂ ರಾಜ್ಯ ಸರಕಾರ ಬದ್ಧತೆಯನ್ನು ಪ್ರದರ್ಶಿಸಿವೆ. ಶೀಘ್ರವೇ ಅಗತ್ಯ ಕೆಲಸ-ಕಾರ್ಯಗಳು ಆರಂಭಗೊಳ್ಳಲಿದೆ. ಮುಂದಿನ ವರ್ಷದಿಂದ ಹಣದ ಅಗತ್ಯತೆ ಇರುವುದರಿಂದ ಈಗಲೇ ಆದ್ಯತೆಯ ಮೇಲೆ ಕಾರ್ಯವನ್ನು ಕೈಗೆತ್ತಿಕೊಳ್ಳಲು ಅಡ್ಡಿ ಇಲ್ಲ. ಬೆಂಗಳೂರಿನ ಎಲ್ಲ ಸಂಸದರು ಕೇಂದ್ರದ ಮೇಲೆ ಒತ್ತಡ ಹೇರಿ ಅಗತ್ಯ ಹಣಕಾಸು ಬಿಡುಗಡೆಗೆ ಯತ್ನಿಸುತ್ತೇವೆ. ಪಿ.ಸಿ. ಮೋಹನ್‌, ಸಂಸದ ಯೋಜನೆಗೆ ಬೇಕಿರುವ ಹಣದ ವಿವರ

• ಕೇಂದ್ರ ಸರಕಾರದ ಪಾಲು-2,479 ಕೋಟಿ ರೂ.
• ರಾಜ್ಯ ಸರಕಾರದ ಪಾಲು-2,479 ಕೋಟಿ ರೂ.
• ಖಾಸಗಿಯವರಿಂದ ಸಾಲ-7,438 ಕೋಟಿ ರೂ.
• ಭೂಸ್ವಾಧೀನ, ಪುನರ್ವಸತಿ-1,470 ಕೋಟಿ ರೂ.
• ಜಿಎಸ್‌ಟಿ, ಕೇಂದ್ರದಿಂದ ಸಾಲ-763 ಕೋಟಿ ರೂ.
• ಜಿಎಸ್‌ಟಿ, ರಾಜ್ಯದಿಂದ ಸಾಲ- 785 ಕೋಟಿ ರೂ.
• ಕಾಮಗಾರಿ ಅವಧಿಗೆ ರಾಜ್ಯದ ಸಾಲ-353 ಕೋಟಿ ರೂ.
• ಒಟ್ಟು ಯೋಜನೆಯ ವೆಚ್ಚ-15,767 ಕೋಟಿ ರೂ.

ಯೋಜನೆಯ ಕಾರಿಡಾರ್‌ ವಿವರ ಕಾರಿಡಾರ್‌ 1(ಬೆಂಗಳೂರು ಸಿಟಿ-ದೇವನಹಳ್ಳಿ) ಮಾರ್ಗ: ಕೆಎಸ್‌ಆರ್‌ ರೈಲು ನಿಲ್ದಾಣ-ಶ್ರೀರಾಮಪುರ-ಮಲ್ಲೇಶ್ವರ-ಯಶವಂತಪುರ-ಮುತ್ಯಾಲನಗರ-ಕೊಡಿಗೇಹಳ್ಳಿ-ನ್ಯಾಯಾಂಗ ಬಡಾವಣೆ-ಯಲಹಂಕ-ನಿಟ್ಟೆ ಕಾಲೇಜು-ಬೆಟ್ಟಹಲಸೂರು-ದೊಡ್ಡಜಾಲ-ಕೆಐಎ ಟ್ರಂಪೆಟ್‌-ದೇವನಹಳ್ಳಿ.(ಒಟ್ಟು ಉದ್ದ-41.40 ಕಿ.ಮೀ.) ಕಾರಿಡಾರ್‌ 2(ಚಿಕ್ಕಬಾಣಾವರ-ಬೈಯಪ್ಪನಹಳ್ಳಿ) ಮಾರ್ಗ: ಚಿಕ್ಕಬಾಣಾವರ-ಶೆಟ್ಟಿಹಳ್ಳಿ-ಜಾಲಹಳ್ಳಿ-ಲೊಟ್ಟೆಗೊಲ್ಲಹಳ್ಳಿ-ಹೆಬ್ಬಾಳ-ನಾಗವಾರ-ಬಾಣಸವಾಡಿ-ಬೈಯಪ್ಪನಹಳ್ಳಿ. (ಒಟ್ಟು ಉದ್ದ-25.01 ಕಿ.ಮೀ.) ಕಾರಿಡಾರ್‌ 3(ಕೆಂಗೇರಿ-ಬೈಯಪ್ಪನಹಳ್ಳಿ) ಕೆಂಗೇರಿ-ಆರ್‌.ವಿ.ಕಾಲೇಜು-ಜ್ಞಾನಭಾರತಿ-ನಾಯಂಡನಹಳ್ಳಿ-ಕೃಷ್ಣದೇವರಾಯ-ಜೆ.ಜೆ.ನಗರ-ಕೆಎಸ್‌ಆರ್‌-ಬೆಂಗಳೂರು ದಂಡು-ಬೆಂಗಳೂರು ಪೂರ್ವ-ಬೈಯಪ್ಪನಹಳ್ಳಿ-ಕೆ.ಆರ್‌.ಪುರ-ಹೂಡಿ-ವೈಟ್‌ಫೀಲ್ಡ್‌. (ಒಟ್ಟು ಉದ್ದ-36.12 ಕಿ.ಮೀ.) ಕಾರಿಡಾರ್‌ 4(ಹೀಲಲಿಗೆ-ರಾಜಾನುಕುಂಟೆ) ಮಾರ್ಗ: ಹೀಲಲಿಗೆ-ಬೊಮ್ಮಸಂದ್ರ, ಸಿಂಗೇನ ಅಗ್ರಹಾರ-ಹುಸ್ಕೂರು-ಅಂಬೇಡ್ಕರ್‌ನಗರ-ಕಾರ್ಮೆಲಾರಾಂ-ಬೆಳ್ಳಂದೂರು ರಸ್ತೆ-ಮಾರತ್‌ಹಳ್ಳಿ-ಕಗ್ಗದಾಸಪುರ-ಬೈಯಪ್ಪನಹಳ್ಳಿ-ಚನ್ನಸಂದ್ರ-ಹೊರಮಾವು-ಹೆಣ್ಣೂರು-ಥಣಿಸಂದ್ರ-ಹೆಗಡೆನಗರ-ಜಕ್ಕೂರು-ಯಲಹಂಕ-ಮುದ್ದೇನಹಳ್ಳಿ-ರಾಜಾನುಕುಂಟೆ. (ಒಟ್ಟು ಉದ್ದ-46.24 ಕಿ.ಮೀ.)

from India & World News in Kannada | VK Polls https://ift.tt/37Pho56