Daily News in Kannda: ಪ್ರವಾಸೋದ್ಯಮ ಹೆಸರಿನಲ್ಲಿ ಮದ್ಯ ಮಾರಾಟ ದಂಧೆ: ಅಬಕಾರಿ ಇಲಾಖೆಯಿಂದಲೇ ಲೈಸೆನ್ಸ್ !

ಪ್ರವಾಸೋದ್ಯಮ ಹೆಸರಿನಲ್ಲಿ ಮದ್ಯ ಮಾರಾಟ ದಂಧೆ: ಅಬಕಾರಿ ಇಲಾಖೆಯಿಂದಲೇ ಲೈಸೆನ್ಸ್ !

ಶ್ರೀಕಾಂತ್‌ ಹುಣಸವಾಡಿ ಬೆಂಗಳೂರು ವೆಂ. ಸುನೀಲ್‌ ಕುಮಾರ್‌ ಬೆಂಗಳೂರು: ಹೆಸರಿನಲ್ಲಿ ಸಿಎಲ್-7 ಮದ್ಯ ಸನ್ನದು ಮಂಜೂರು ಮಾಡುವ ದಂಧೆ ಹಲವು ವರ್ಷಗಳಿಂದ ಸದ್ದಿಲ್ಲದೆ ತೆರೆಮರೆಯಲ್ಲಿ ನಡೆಯುತ್ತಿತ್ತು. ಇತ್ತೀಚಿನ ತಿಂಗಳಲ್ಲಿ ರಾಜಾರೋಷವಾಗಿ ನಡೆಯುತ್ತಿದ್ದು, ಕಳೆದ ಒಂದೂವರೆ ವರ್ಷದಲ್ಲಿ ಸುಮಾರು 350ಕ್ಕೂ ಅಧಿಕ ಲೈಸನ್ಸ್‌ಗಳನ್ನು ಮಂಜೂರು ಮಾಡಿದೆ. ಇನ್ನೂ ಜಿಲ್ಲಾ ಅಬಕಾರಿ ನಿರೀಕ್ಷಕರ ಬಳಿ ಸುಮಾರು 600 ಅರ್ಜಿಗಳು ಬಾಕಿ ಇವೆ ಎನ್ನಲಾಗಿದೆ. ಕೋವಿಡ್‌ ನಂತರ ಬೆಂಗಳೂರು, ಮಂಡ್ಯ, ಮೈಸೂರು, ಹಾಸನ ಸೇರಿದಂತೆ ದಕ್ಷಿಣ ಕರ್ನಾಟಕದ ಹಲವು ಜಿಲ್ಲೆಗಳಲ್ಲಿ ಲೈಸೆನ್ಸ್‌ ದಂಧೆ ಭಾರಿ ಹೆಚ್ಚಾಗಿದೆ. ನೇರವಾಗಿ ಲೈಸೆನ್ಸ್‌ ನೀಡಿದರೆ ಸಾರ್ವಜನಿಕರ ಪ್ರತಿರೋಧ ಎದುರಿಸಬೇಕಾಗಿರುವುದರಿಂದ ಪ್ರವಾಸೋದ್ಯಮದ ಹೆಸರಿನಲ್ಲಿ ಈ ದಂಧೆ ದಿನೇದಿನೆ ವ್ಯಾಪಕವಾಗುತ್ತಿದೆ. 'ದುಡ್ಡಿನ ಕುಳ'ಗಳು ಯಾವುದಾದರೂ ಒಂದು ಕಟ್ಟಡವನ್ನು ಬಾಡಿಗೆ ಪಡೆದು, ನಗರ ಪ್ರದೇಶದಲ್ಲಿ 15 ಅಥವಾ ಗ್ರಾಮಾಂತರ ಪ್ರದೇಶದಲ್ಲಿ 10 ರೂಮ್‌ಗಳನ್ನು ತೋರಿಸಿ, ಹಣ ಖರ್ಚು ಮಾಡಿದರೆ ಸಾಕು ಲೈಸೆನ್ಸ್‌ ಸಿಗುತ್ತದೆ. ಅಲ್ಲಿಗೆ ಪ್ರವಾಸಿಗರು ಬರುತ್ತಾರೆಯೇ, ನಿಜಕ್ಕೂ ಪ್ರವಾಸೋದ್ಯಮಕ್ಕೆ ಉತ್ತೇಜನ ಸಿಗುತ್ತದೆಯೇ ಎಂಬುದರ ಬಗ್ಗೆ ಯಾರೂ ಯೋಚಿಸಬೇಕಿಲ್ಲ! ಹಾಗಾಗಿ, ಇತ್ತೀಚಿನ ತಿಂಗಳಲ್ಲಿ ಇಂಥ ಲೈಸೆನ್ಸ್‌ಗಳಿಗೆ ಭಾರಿ ಬೇಡಿಕೆ ಸೃಷ್ಟಿಯಾಗಿದೆ. 40ರಿಂದ 50 ಲಕ್ಷ ರೂ. ಖರ್ಚು ಮಾಡಿದರೆ ಸಾಕು, ಲೈಸೆನ್ಸ್‌ ಗಿಟ್ಟಿಸಬಹುದು ಎಂಬ ಮಾತು ಅಬಕಾರಿ ಉದ್ಯಮದಲ್ಲಿ ಕೇಳಿ ಬರುತ್ತಿದೆ. ಕೋವಿಡ್‌ ನಂತರ ಹಾಸನ, ಮಂಡ್ಯ, ಮೈಸೂರು ಸೇರಿದಂತೆ ಹಲವೆಡೆ ಖಾಸಗಿ ಶಾಲೆಗಳನ್ನೇ ಮುಚ್ಚಿ, ಅದರ ರೂಮ್‌ಗಳನ್ನು ತೋರಿಸಿ ಲೈಸೆನ್ಸ್‌ ಪಡೆದ ಸೋಜಿಗವೂ ನಡೆದಿದೆ. ಇದರ ಹಿಂದೆ ಸ್ಥಳೀಯ ರಾಜಕೀಯ ಮುಖಂಡರ ಪ್ರಭಾವವೂ ಇದೆ. ಇತ್ತೀಚೆಗೆ ಅಬಕಾರಿ ಆಯುಕ್ತರ ಅಧ್ಯಕ್ಷತೆಯಲ್ಲಿ ನಡೆದ ರಾಜ್ಯ ಮಾರಾಟಗಾರರ ಸಭೆಯಲ್ಲೂ ಈ ವಿಚಾರದ ಬಗ್ಗೆ ಗಂಭೀರ ಚರ್ಚೆ ನಡೆದಿದೆ ಎಂದು ಮೂಲಗಳು ತಿಳಿಸಿವೆ. 28 ವರ್ಷಗಳಿಂದ ಹೊಸ ಲೈಸೆನ್ಸ್‌ ಇಲ್ಲ ಕರ್ನಾಟಕದಲ್ಲಿ 1992ರಿಂದ ಸಿಎಲ್-9(ಬಾರ್‌) ಮತ್ತು ಸಿಎಲ್‌ 2(ಎಂಆರ್‌ಪಿ ಮಳಿಗೆಗಳು ಮತ್ತು ವೈನ್‌ ಸ್ಟೋರ್‌)ಗಳಿಗೆ ಹೊಸ ಪರವಾನಗಿ ನೀಡುತ್ತಿಲ್ಲ. ಆಗಾಗ ಸರಕಾರಗಳು ಬದಲಾದಾಗ ಹೊಸ ಲೈಸೆನ್ಸ್‌ ವಿಚಾರ ಪ್ರಸ್ತಾಪವಾಗುತ್ತದೆಯಾದರೂ ಸಾರ್ವಜನಿಕರು, ಸಂಘ-ಸಂಸ್ಥೆಗಳ ವಿರೋಧದಿಂದಾಗಿ ಆ ಪ್ರಸ್ತಾವಗಳು ಹಾಗೆಯೇ ಶೈತ್ಯಾಗಾರ ಸೇರುತ್ತಿವೆ. ಉಳಿದಂತೆ ಎಂಎಸ್‌ಐಎಲ್‌ ಮಳಿಗೆ, ಲಾಡ್ಜ್‌ ಸೌಕರ್ಯವಿರುವ ಮದ್ಯ ಸನ್ನದುಗಳನ್ನು ನೀಡುವ ಕಾರ್ಯ ಅವ್ಯಾಹತವಾಗಿ ನಡೆದಿದೆ. ವರ್ಷದಿಂದ ವರ್ಷಕ್ಕೆ ಏರಿಕೆ ಅಬಕಾರಿ ಇಲಾಖೆಯ ಅಧಿಕೃತ ದಾಖಲೆಗಳ ಪ್ರಕಾರ 2009-10ರಲ್ಲಿ 485 ಇದ್ದ ಸಿಎಲ್-7 ಲೈಸೆನ್ಸ್‌ 2018ರಲ್ಲಿ 1004ಕ್ಕೆ, 2019ರಲ್ಲಿ 1226ಕ್ಕೆ ಹೆಚ್ಚಳವಾಗಿತ್ತು. ಇದೀಗ 2020ರ ಜೂ.30ವರೆಗೆ 1453ಕ್ಕೆ ಹೆಚ್ಚಳವಾಗಿದೆ. ಆದರೆ ಈ ಲೈಸೆನ್ಸ್‌ಗಳ ಸಂಖ್ಯೆ ಕಳೆದ ನಾಲ್ಕು ತಿಂಗಳಲ್ಲಿ ಇನ್ನೂ ಏರಿಕೆಯಾಗಿದೆ. ಸದ್ಯ ಸಿಎಲ್-7 ಸನ್ನದುಗಳ ಸಂಖ್ಯೆ 1550 ದಾಟಿದೆ ಎನ್ನುತ್ತವೆ ಅಬಕಾರಿ ಮೂಲಗಳು. ಕೆಎಸ್‌ಟಿಡಿಸಿ ಅನುಮತಿ ಬೇಕಿಲ್ಲ ಸಿಎಲ್-7 ಮದ್ಯ ಮಾರಾಟ ಪರವಾನಗಿಗಳಿಗೆ 2018ರ ಮೊದಲು ಪ್ರವಾಸೋದ್ಯಮ ನಿಗಮದ ಅನುಮೋದನೆ ಕಡ್ಡಾಯವಾಗಿ ಬೇಕಿತ್ತು. ಆನಂತರವೇ ಅಬಕಾರಿ ಇಲಾಖೆ ಸನ್ನದು ನೀಡುವ ವ್ಯವಸ್ಥೆ ಇತ್ತು. ಜತೆಗೆ, ಮದ್ಯ ಲೈಸೆನ್ಸ್‌ ಪಡೆಯಲು ವಸತಿ ಸೌಕರ್ಯದ ಲಾಡ್ಜ್‌ಗಳಲ್ಲಿ ಕನಿಷ್ಠ 21 ಕೋಣೆಗಳಿರಬೇಕಿತ್ತು. ಆದರೆ, ಮೂರು ವರ್ಷಗಳ ಹಿಂದೆ ಆ ನಿಯಮ ಸಡಿಲಗೊಳಿಸಿ ಪ್ರವಾಸೋದ್ಯಮ ಇಲಾಖೆ ಅನುಮತಿ ತೆಗೆದು ಹಾಕಲಾಗಿದೆ. ಅಲ್ಲದೆ ಕೋಣೆಗಳ ಸಂಖ್ಯೆಯನ್ನು ಇಳಿಸಲಾಗಿದೆ. ಹಾಗಾಗಿ, ಲೈಸೆನ್ಸ್‌ ನೀಡುವುದು ಇನ್ನೂ ಆರಾಮಾಗಿದೆ! ಎಲ್ಲ ಸರಕಾರಗಳದ್ದೂ ಪಾಲು ಸಿಎಲ್-7 ಹೆಸರಿನಲ್ಲಿ ವಾಮಮಾರ್ಗದ ಮೂಲಕ ಮದ್ಯ ಮಾರಾಟ ಸನ್ನದು ನೀಡುವ ಕಾರ್ಯದಲ್ಲಿ ಎಲ್ಲ ಸರಕಾರಗಳ ಪಾಲೂ ಇದೆ. ನೇರ ಮದ್ಯ ಸನ್ನದು ನೀಡಿದರೆ ಸಾರ್ವಜನಿಕ ವಿರೋಧ ಎದುರಿಸಬೇಕಾಗುತ್ತದೆ ಎಂದು ಎಲ್ಲ ಸರಕಾರಗಳೂ ತಮ್ಮ ತಮ್ಮ ಅಧಿಕಾರಾವಧಿಯಲ್ಲಿ'ಕದ್ದುಮುಚ್ಚಿ' ಲೈಸೆನ್ಸ್‌ ಮಂಜೂರು ಮಾಡುತ್ತಲೇ ಇವೆ. ಅದರಲ್ಲೂ ಬಹುತೇಕ ಇಂತಹ ಲೈಸೆನ್ಸ್‌ ಪಡೆಯುವವರೆಲ್ಲ ರಾಜಕಾರಣಿಗಳ ಹಿಂಬಾಲಕರೇ ಆಗಿರುತ್ತಾರೆ. ರಾಜ್ಯದಲ್ಲಿ ಸಿಎಲ್- 7 ಹೆಸರಿನಲ್ಲಿ ಮದ್ಯ ಮಾರಾಟ ಪರವಾನಗಿ ನೀಡುತ್ತಿರುವುದು ಇತ್ತೀಚಿನ ವರ್ಷಗಳಲ್ಲಿ ಹೆಚ್ಚುತ್ತಿದೆ. ಇದಕ್ಕೆ ಸರಕಾರ ಕಡಿವಾಣ ಹಾಕಬೇಕು. ಬಿ. ಗೋವಿಂದರಾಜ ಹೆಗ್ಡೆ, ಪ್ರಧಾನ ಕಾರ್ಯದರ್ಶಿ, ಕರ್ನಾಟಕ ರಾಜ್ಯ ವೈನ್‌ ಮರ್ಚೆಂಟ್ಸ್‌ ಅಸೋಸಿಯೇಷನ್‌ ರಾಜ್ಯದಲ್ಲಿರುವ ಮದ್ಯ ಸನ್ನದು ಎಷ್ಟು?