ಉಡುಪಿ: ಪೊಲೀಸ್‌ ಠಾಣಾ ವ್ಯಾಪ್ತಿಯ ಎರಡು ಗೇರು ಬೀಜ ಕಾರ್ಖಾನೆಗಳಿಂದ 1.40ಲಕ್ಷ ರೂ. ಮೌಲ್ಯದ ಗೇರುಬೀಜಗಳ 32 ಡಬ್ಬ ಕಳವು ಮಾಡಿದ್ದ ಆರೋಪಿಗಳನ್ನು ಪೊಲೀಸರು ಗುರುವಾರ ಬಂಧಿಸಿದ್ದಾರೆ. ದಕ್ಷಿಣ ಕನ್ನಡ ಜಿಲ್ಲೆಯ ಪುತ್ತೂರು ತಾಲೂಕು ಕೆಮ್ಮಿಂಜೆ ಗ್ರಾಮ ಇಂದಿರಾ ನಗರ ಮೊಟ್ಟೆತಡ್ಕದ ಸೈಯದ್‌ ಮೊಹಮದ್‌ ಬಶೀರ್‌ ಹಾಗೂ ಬಂಟ್ವಾಳ ಮಿತ್ತೂರು ಕೆದಿಲದ ಉಮ್ಮರ್‌ ಫಾರೂಕ್‌ ಬಂಧಿತ ಆರೋಪಿಗಳಾಗಿದ್ದಾರೆ. ಕೃತ್ಯಕ್ಕೆ ಬಳಸಿದ 4ಲಕ್ಷ ರೂ. ಮೌಲ್ಯದ ಕಾರು, 12,000ರೂ. ಮೌಲ್ಯದ 3 ಮೊಬೈಲ್‌ ಸಹಿತ 5.52ಲಕ್ಷ ರೂ. ಮೌಲ್ಯದ ಸೊತ್ತು ವಶಪಡಿಸಿದ್ದು ಗುರುವಾರ ನ್ಯಾಯಾಲಯಕ್ಕೆ ಹಾಜರುಪಡಿಸಿದ ಹೆಚ್ಚಿನ ತನಿಖೆಗೆ ಪೊಲೀಸ್‌ ಕಸ್ಟಡಿಗೆ ಪಡೆಯಲಾಗಿದೆ. ಹೊಸೂರು ಗ್ರಾಮದ ಕೆಳಕರ್ಜೆಯ ವಿನಾಯಕ ಕ್ಯಾಶ್ಯೂ ಇದರ ಪಾಶ್ರ್ವ ಬಾಗಿಲು ಮೀಟಿ, ಶಟರ್‌ ಬಾಗಿಲು ಮೇಲೆತ್ತಲು ಯತ್ನಿಸಿದ ಪ್ರಕರಣ ಸೋಮವಾರ ದಾಖಲಾಗಿತ್ತು. ಚೇರ್ಕಾಡಿ ಗ್ರಾಮದ ಮುಂಡ್ಕಿನಜೆಡ್ಡು ವಿಜಯದುರ್ಗಾ ಗೇರು ಬೀಜ ಕಾರ್ಖಾನೆಯ ಶಟರ್‌ ಮುರಿದು ಗೇರು ಬೀಜವಿದ್ದ 32 ಡಬ್ಬ ಕಳವು ವಿರುದ್ಧ ಮಂಗಳವಾರ ಪ್ರಕರಣ ದಾಖಲಾಗಿತ್ತು. ಹೆಬ್ರಿ, ಅಜೆಕಾರು ಪೊಲೀಸ್‌ ಠಾಣೆಗಳಲ್ಲೂ ಇದೇ ರೀತಿಯ ಪ್ರಕರಣ ದಾಖಲಾಗಿದ್ದು ಬ್ರಹ್ಮಾವರ ಪೊಲೀಸ್‌ ಉಪನಿರೀಕ್ಷಕ ರಾಘವೇಂದ್ರ ಸಿ. ನೇತೃತ್ವದ ವಿಶೇಷ ತಂಡದಲ್ಲಿ ಬ್ರಹ್ಮಾವರ ಪೊಲೀಸ್‌ ಠಾಣಾ ಸಿಬ್ಬಂದಿಗಳಾದ ಎಎಸ್‌ಐ ಶಾಂತರಾಜ್‌, ಗೋಪಾಲ ಪೂಜಾರಿ, ವೆಂಕಟರಮಣ ದೇವಾಡಿಗ, ಪ್ರವೀಣ ಶೆಟ್ಟಿಗಾರ, ರಾಘವೇಂದ್ರ ಕಾರ್ಕಡ, ಸಂತೋಷ್‌ ಶೆಟ್ಟಿ, ಗಣೇಶ್‌ ದೇವಾಡಿಗ, ದಿಲೀಪ್‌ ಕುಮಾರ, ಚಾಲಕ ಅಣ್ಣಪ್ಪ ಕಾರ್ಯಾಚರಣೆಯಲ್ಲಿ ಪಾಲ್ಗೊಂಡಿದ್ದರು.
from India & World News in Kannada | VK Polls https://ift.tt/3mA3wzJ
