ಅಬುಧಾಬಿ: ಪ್ರಸಕ್ತ ಆವೃತ್ತಿಯ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ ಟೂರ್ನಿಯಲ್ಲಿ ಉಂಟಾಗುವ ಹಲವು ಸನ್ನಿವೇಶಗಳಿಗೆ ಕಳೆದ ವರ್ಷ ಐಸಿಸಿ ಏಕದಿನ ವಿಶ್ವಕಪ್‌ ಟೂರ್ನಿಯ ವೇಳೆ ಮಾಡಿದ್ದ ಟ್ವೀಟ್‌ಗಳಿಗೆ ಅಭಿಮಾನಿಗಳು ತಾಳೆ ಹಾಕುತ್ತಿದ್ದಾರೆ. ಶುಕ್ರವಾರ ಶೇಖ್‌ ಝಾಯೆದ್‌ ಕ್ರೀಡಾಂಗಣದಲ್ಲಿ ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡದ ಕ್ರಿಸ್ ಗೇಲ್ ಅವರನ್ನು 99 ರನ್‌ಗಳಿಗೆ ಆರ್ಚರ್‌ ಕ್ಲೀನ್ ಬೌಲ್ಡ್ ಮಾಡಿದ ಬಳಿಕ, ಆಲ್ರೌಂಡರ್ ಅವರ ಹಳೆಯ ಟ್ವೀಟ್ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿತ್ತು. 63 ಎಸೆತಗಳಲ್ಲಿ ಆರು ಸಿಕ್ಸರ್‌ಗಳು ಹಾಗೂ ಎಂಟು ಬೌಂಡರಿಗಳೊಂದಿಗೆ ಈ ಮೊತ್ತವನ್ನು ಕಲೆ ಹಾಕಿದ್ದರು. ಕಿಂಗ್ಸ್ ಇಲೆವೆನ್ ಪಂಜಾಬ್ ಇನಿಂಗ್ಸ್‌ನಲ್ಲಿ ಕ್ರಿಸ್ ಗೇಲ್ 92 ರನ್‌ಗಳಿಸಿದ್ದಾಗ ಜೋಫ್ರ ಆರ್ಚರ್‌ ಕೊನೆಯ ಓವರ್‌ ಬೌಲಿಂಗ್‌ ಮಾಡಲು ಬಂದರು. ಮೊದಲನೇ ಎಸೆತದಲ್ಲಿ ಗೇಲ್ ಸಿಂಗಲ್ ತೆಗೆದುಕೊಂಡರು. ನಂತರ ಎರಡನೇ ಎಸೆತದಲ್ಲಿ ಗ್ಲೆನ್‌ ಮ್ಯಾಕ್ಸ್‌ವೆಲ್‌ ಒಂದು ರನ್ ಗಳಿಸಿ ಗೇಲ್‌ಗೆ ಸ್ಟ್ರೈಕ್ ನೀಡಿದರು. ಮೂರನೇ ಎಸೆತದಲ್ಲಿ ಗೇಲ್ ಸಿಕ್ಸರ್‌ ಸಿಡಿಸಿದರು. ಆ ಮೂಲಕ ಪ್ರಸಕ್ತ ಆವೃತ್ತಿಯ ಐಪಿಎಲ್‌ ಮೊದಲ ಶತಕದ ಸನಿಹವಿದ್ದರು. ಆದರೆ, ಆರ್ಚರ್‌ ಅವರ ನಾಲ್ಕನೇ ಎಸೆತದಲ್ಲಿ ಚೆಂಡನ್ನು ಪ್ಯಾಡ್‌ ಮೇಲೆ ಹಾಕಿಕೊಂಡು ಬೌಲ್ಡ್ ಆದರು. 99 ರನ್‌ಗಳಿಗೆ ಕ್ರಿಸ್ ಗೇಲ್ ಕ್ಲೀನ್ ಬೌಲ್ಡ್ ಆಗುತ್ತಿದ್ದಂತೆ, ಜೋಫ್ರ ಆರ್ಚರ್‌ ಅವರ ಹಳೆಯ ಟ್ವೀಟ್ ವೈರಲ್ ಆಯಿತು. 2013ರಲ್ಲಿ ಪೋಸ್ಟ್ ಮಾಡಲಾದ ಟ್ವೀಟ್‌ನಲ್ಲಿ, ಬಾರ್ಬಡೋಸ್ ಮೂಲದ ಆಲ್ರೌಂಡರ್ ಅವರು ಶತಕ ಗಳಿಸುವ ಮುನ್ನ ಯಾರನ್ನಾದರೂ ಔಟ್‌ ಮಾಡುವ ಬಗ್ಗೆ ಹಂಬಲ ಹೊಂದಿದ್ದರು ಎಂಬುದು ಆ ಟ್ವೀಟ್ ಅರ್ಥವಾಗಿತ್ತು. "ನಾನು ಬೌಲಿಂಗ್‌ ಮಾಡಿದರೆ, ಅವರನ್ನು 100 ರನ್‌ಗಳನ್ನು ಗಳಿಸಲು ಬಿಡುವುದಿಲ್ಲ ಎಂಬುದು ನನಗೆ ಗೊತ್ತು" ಎಂದು ಅವರು ಹಿಂದೆ ಟ್ವೀಟ್ ಮಾಡಿದ್ದರು. ಈ ಟ್ವೀಟ್ ಅನ್ನು ಅಭಿಮಾನಿಗಳು ಮತ್ತೊಮ್ಮೆ ಶೇರ್‌ ಮಾಡುವ ಮೂಲಕ ಪ್ರತಿಕ್ರಿಯೆಗಳನ್ನು ನೀಡಿದ್ದಾರೆ. ಇದು ತುಂಬಾ ವೈರಲ್ ಆಗಿದೆ. 184 ರನ್‌ಗಳ ಗುರಿಯನ್ನು ಹಿಂಬಾಲಿಸಿದ ರಾಜಸ್ಥಾನ್ ರಾಯಲ್ಸ್‌ ಏಳು ವಿಕೆಟ್‌ಗಳಿಂದ ಜಯ ಸಾಧಿಸಿತು. ಈ ಪಂದ್ಯದಲ್ಲಿ ಬೆನ್‌ ಸ್ಟೋಕ್ಸ್‌ 26 ಎಸೆತಗಳಲ್ಲಿ 50 ರನ್‌ಗಳನ್ನು ಗಳಿಸಿದ್ದರು. ಸ್ಟೀವನ್‌ ಸ್ಮಿತ್‌ ಹಾಗೂ ಜೋಸ್ ಬಟ್ಲರ್‌ ಜೋಡಿ 41 ರನ್‌ಗಳ ಜತೆಯಾಟದೊಂದಿಗೆ ರಾಜಸ್ಥಾನ್ ರಾಯಲ್ಸ್‌ಗೆ ಜಯ ತಂದುಕೊಟ್ಟಿತು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/320pswb
