ಮಂಜುನಾಥ ನಾಗಲೀಕರ್‌ ಬೆಂಗಳೂರು ಬೆಂಗಳೂರು: ಕೋವಿಡ್‌-19 ಸೋಂಕಿನ ಹೊಡೆತದಿಂದ ತತ್ತರಿಸಿದ್ದ ನಾಗರಿಕ ಚೇತರಿಕೆ ಹಾದಿ ಹಿಡಿದಿದ್ದು, ಬೆಂಗಳೂರು ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಮೂಲಕ ಸೆಪ್ಟೆಂಬರ್‌ ತಿಂಗಳಲ್ಲಿ 8.55 ಲಕ್ಷ ಪ್ರಯಾಣಿಕರು ಪ್ರಯಾಣಿಸಿದ್ದಾರೆ. ಆಗಸ್ಟ್‌ ತಿಂಗಳಿಗೆ ಹೋಲಿಸಿದರೆ ಸೆಪ್ಟೆಂಬರ್‌ ತಿಂಗಳಲ್ಲಿ 2 ಲಕ್ಷಕ್ಕೂ ಹೆಚ್ಚು ಜನ ಪ್ರಯಾಣ ಬೆಳೆಸಿದ್ದಾರೆ. ದೇಶೀಯ ಮಾರ್ಗದಲ್ಲಿ ಆಗಸ್ಟ್‌ ತಿಂಗಳಲ್ಲಿ 6.52 ಲಕ್ಷ ಜನ ಪ್ರಯಾಣಿಸಿದ್ದರು. ಸೆಪ್ಟೆಂಬರ್‌ ತಿಂಗಳಲ್ಲಿ 8.26 ಲಕ್ಷ ಜನ ಪ್ರಯಾಣಿಸಿದ್ದಾರೆ. ಅಂತಾರಾಷ್ಟ್ರೀಯ ಮಾರ್ಗದಲ್ಲಿ 2020ರ ಆಗಸ್ಟ್‌ನಲ್ಲಿ 25,215 ಜನ ಪ್ರಯಾಣಿಸಿದ್ದು, ಸೆಪ್ಟೆಂಬರ್‌ನಲ್ಲಿ 29,510 ಮಂದಿ ಪ್ರಯಾಣಿಸಿದ್ದಾರೆ. ಪ್ರಯಾಣಿಕರ ಸಂಖ್ಯೆಯಲ್ಲಿನ ಪ್ರಗತಿ ತೀವ್ರ ಸಂಕಷ್ಟದಲ್ಲಿದ್ದ ಕಂಪನಿಗಳು ಸ್ವಲ್ಪ ನಿಟ್ಟುಸಿರು ಬಿಡುವಂತೆ ಮಾಡಿದೆ. ಲಾಕ್‌ಡೌನ್‌ ಸಡಿಲಿಕೆ ನಂತರ ವಹಿವಾಟು ನಿಧಾನವಾಗಿ ಸಹಜ ಸ್ಥಿತಿಗೆ ಬರುತ್ತಿದೆ. ಸಾಕಷ್ಟು ಸುರಕ್ಷತಾ ಕ್ರಮಗಳನ್ನು ಕೈಗೊಳ್ಳುತ್ತಿರುವ ಕಾರಣ ಪ್ರಯಾಣಿಕರ ಸಂಖ್ಯೆ ಹೆಚ್ಚಳವಾಗುತ್ತಿದೆ. ಹಿಂದಿನ ವರ್ಷಕ್ಕೆ ಹೋಲಿಸಿದರೆ ಪ್ರಯಾಣಿಕರ ಸಂಖ್ಯೆ ಬಹಳ ಕಡಿಮೆಯೇ. ಆದರೆ, ಕೋವಿಡ್‌ ಲಾಕ್‌ಡೌನ್‌ ಕಾರಣ ಸಂಪೂರ್ಣ ಬಂದ್‌ ಆಗಿದ್ದ ವಿಮಾನಯಾನ ಕ್ಷೇತ್ರದ ಬೆಳವಣಿಗೆ ಆಶಾದಾಯಕವಾಗಿದೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ಲಾಕ್‌ಡೌನ್‌ ನಂತರದ ತಿಂಗಳಲ್ಲಿ ವಿಮಾನ ಹಾರಾಟ ಪ್ರಮಾಣ ಶೇ.30ರಷ್ಟಿದೆ. ಹೀಗಾಗಿ, ಇನ್ನು ಸಾಕಷ್ಟು ಸುಧಾರಣೆ ಕಾಣಬೇಕಿದೆ. ವಾಣಿಜ್ಯ ವಹಿವಾಟು, ಇತರ ಚಟುವಟಿಕೆಗಳು ಮೊದಲಿನಂತೆ ಆರಂಭವಾದರೆ ವಿಮಾನ ಹಾರಾಟ ಹೆಚ್ಚಾಗುತ್ತದೆ ಎನ್ನುತ್ತಾರೆ ವಿಮಾನ ನಿಲ್ದಾಣದ ಅಧಿಕಾರಿಗಳು. ಸೆಪ್ಟೆಂಬರ್‌ ತಿಂಗಳಲ್ಲಿ ಅಂತಾರಾಷ್ಟ್ರೀಯ ಮಾರ್ಗದಲ್ಲಿ 948 ವಿಮಾನಗಳು ಹಾರಾಟ ನಡೆಸಿವೆ. ದೇಶೀಯ ಮಾರ್ಗದಲ್ಲಿ 8,805 ವಿಮಾನಗಳು ಹಾರಾಡಿವೆ. ಅಂತಾರಾಷ್ಟ್ರೀಯ ಮಾರ್ಗದಲ್ಲಿ 29,510 ಮಂದಿ ಹಾಗೂ ದೇಶೀಯ ಮಾರ್ಗದಲ್ಲಿ 8,26,291 ಜನ ಪ್ರಯಾಣಿಸಿದ್ದಾರೆ. ದೇಶ-ವಿದೇಶಗಳ ನಗರಗಳ ನಡುವೆ ಬೆಂಗಳೂರಿನಿಂದ 32,458 ಮೆಟ್ರಿಕ್‌ ಟನ್‌ ಕಾರ್ಗೋ ಸಾಗಣೆಯಾಗಿದೆ. ಕಾರ್ಗೋದಲ್ಲಿ ಮಾತ್ರ ಸ್ವಲ್ಪ ಧನಾತ್ಮಕ ಬೆಳವಣಿಗೆಯಾಗಿದೆ. ಅತಿಥ್ಯ ಕ್ಷೇತ್ರ ಅಲ್ಪ ಚೇತರಿಕೆ ವಿಮಾನ ಹಾರಾಟ ದಿನದಿಂದ ದಿನಕ್ಕೆ ಏರಿಕೆಯಾಗುತ್ತಿರುವ ಕಾರಣ ಆತಿಥ್ಯ ಕ್ಷೇತ್ರಕ್ಕೆ ಸ್ವಲ್ಪ ಜೀವ ಬಂದಂತಾಗಿದೆ. ನಿಂತಲ್ಲೇ ನಿಂತಿದ್ದ ಕ್ಯಾಬ್‌ಗಳ ಸಂಚಾರ ಏರಿಕೆ ಕಾಣುತ್ತಿದೆ. ಬಿಎಂಟಿಸಿ ಬಸ್‌ಗಳ ಸಂಚಾರ ಕೂಡ ಏರಿಕೆಯಾಗುತ್ತಿದೆ. ಬಿಸಿನೆಸ್‌ ಪ್ರಯಾಣಿಕರ ಸಂಖ್ಯೆ ಕಡಿಮೆ ಇದೆ. ಹೀಗಾಗಿ, ಟ್ರಾವೆಲ್ಸ್‌ ಮತ್ತು ಲಾಡ್ಜಿಂಗ್‌, ಹೋಟೆಲ್‌ ಗ್ರಾಹಕರ ಸಂಖ್ಯೆಯಲ್ಲಿ ಏರಿಕೆಯಾಗಿಲ್ಲ. ಪ್ರತಿದಿನ ವಿಮಾನ ನಿಲ್ದಾಣಕ್ಕೆ ಒಂದು ಲಕ್ಷ ಅಥವಾ ಅದಕ್ಕೂ ಹೆಚ್ಚು ಜನ ಓಡಾಡುತ್ತಿದ್ದರು. ಅದರಲ್ಲಿ ಸುಮಾರು 5 ಸಾವಿರದಷ್ಟು ಜನ ಬಿಸಿನೆಸ್‌ ಉದ್ದೇಶದ ಪ್ರಯಾಣಿಕರಾಗಿರುತ್ತಿದ್ದರು. ದೊಡ್ಡ ದೊಡ್ಡ ಕಾರ್ಯಕ್ರಮಗಳು, ಸಭೆಗಳು ಇದ್ದಾಗ ಇಂತಹ ಪ್ರಯಾಣಿಕರ ಓಡಾಟ ಹೆಚ್ಚಿರುತ್ತದೆ. ಅಲ್ಲದೆ, ಐಟಿ-ಬಿಟಿ ಕಂಪನಿಗಳು ಕೂಡ ಇನ್ನು ವರ್ಕ್ ಫ್ರಮ್‌ ಹೋಂನಲ್ಲೇ ಇರುವ ಕಾರಣ ವಿಮಾನ ಹಾರಾಟಕ್ಕೆ ಹೊಂದಿಕೊಂಡಿರುವ ಕ್ಯಾಬ್‌ ಒಳಗೊಂಡಂತೆ ಬೆಂಗಳೂರು ಟ್ರಾವೆಲ್ಸ್‌ ಕ್ಷೇತ್ರಕ್ಕೆ ಅಂತಹ ಹೆಚ್ಚಿನ ಅನುಕೂಲ ಆಗಿಲ್ಲ ಎಂದು ಟೂರಿಸ್ಟ್‌ ಟ್ರಾವೆಲ್ಸ್‌ ವಾಹನಗಳ ಸಂಘದ ಅಧ್ಯಕ್ಷ ರಾಧಾಕೃಷ್ಣ ಹೊಳ್ಳ ಹೇಳಿದರು. ಅಂಕಿ- ಅಂಶತಿಂಗಳು ಪ್ರಯಾಣಿಕರು(ದೇಶೀಯ) ಅಂತಾರಾಷ್ಟ್ರೀಯ
- 2020 ಆಗಸ್ಟ್‌ 6,27,367 25,215
- 2020 ಸೆಪ್ಟೆಂಬರ್‌ 8,26,291 29,510
from India & World News in Kannada | VK Polls https://ift.tt/35Pf0Zk
