ಬೆಂಗಳೂರು: ಸಾಮಾಜಿಕ ಜಾಲತಾಣ ಹಾಗೂ ಜನರು ಮನಸ್ಸು ಮಾಡಿದರೆ ಏನು ಬೇಕಾದರು ಮಾಡಬಹುದು ಎನ್ನುವುದಕ್ಕೆ ಇದು ತಾಜಾ ಉದಾಹರಣೆ. ಅಲ್ಲದೆ ಮಾನವೀಯತೆ ಇನ್ನು ಬದುಕಿದೆ ಎನ್ನುವುದಕ್ಕೂ ಇದೇ ಪುರಾವೆ. ಹೌದು, ಕನಕಪುರ ರಸ್ತೆಯಲ್ಲಿ ಔಷಧಿ ಗಿಡಗಳನ್ನು ಮಾರುತ್ತಿರುವ ಎಂಬ 80 ವರ್ಷದ ತಾತನಿಗೆ ಕೊರೊನಾದಿಂದಾಗಿ ಬ್ಯುಸಿನೆಸ್‌ ಇಲ್ಲದಂತೆ ಆಗಿತ್ತು. ಅಲ್ಲದೆ ಒಂದು ವಾಣಿಜ್ಯ ಕಟ್ಟಡದ ಮುಂದೆ ಕೂರುವ ಸಿದ್ದಪ್ಪ ಅವರು, ಬಟ್ಟೆ ಹಾಸಿದ ನೆಲದಲ್ಲೆ ಗಿಡಗಳನ್ನು ಇಟ್ಟು ಮಾರುತ್ತಿದ್ದರು. ಅದು ಕೂಡ ಒಂದು ಕೈಯಲ್ಲಿ ಛತ್ರಿ ಹಿಡಿದುಕೊಂಡು. ಈ ದೃಶ್ಯ ಎಂತಹುದೇ ಕಲ್ಲು ಹೃದಯವನ್ನು ಕರಗಿಸುವಂತಿದೆ. ತಾತನ ಕಷ್ಟ ಅಶ್ವಿನಿ ಎಂಬ ನೆಟ್ಟಿಗರ ಗಮನ ಸೆಳೆದಿದೆ. ಹೀಗಾಗಿ ಅವರು ಕೈಯಲ್ಲಿ ಛತ್ರಿ, ನೆಲದಲ್ಲಿ ಗಿಡ ಇಟ್ಟು ಮಾರುತ್ತಿದ್ದ ತಾತನ ಫೋಟೊವನ್ನು ಶೇರ್‌ ಮಾಡಿ ಗಿಡಗಳನ್ನು ಖರೀದಿಸಿ ಎಂದು ಟ್ವೀಟ್‌ ಮಾಡಿದ್ದರು. ಈ ಟ್ವೀಟ್‌ಗೆ ಭಾರೀ ಬೆಂಬಲ ವ್ಯಕ್ತವಾಗಿದೆ. ಒಂದು ಟ್ವೀಟ್‌ ತಾತನ ವ್ಯಾಪಾರ ಜೀವನವನ್ನೇ ಬದಲಿಸಿ ಬಿಟ್ಟಿದೆ. ಹೌದು, ಒಂದು ಟ್ವೀಟ್‌ ಹಲವು ನೆಟ್ಟಿಗರ ಬಳಿ ತಲುಪಿದ್ದು, ಚೇಂಜ್‌ ಮೇಕರ್ಸ್‌ ಆಫ್‌ ಕನಕಪುರ ರೋಡ್‌ ಎಂಬ ಹೆಸರಿನ ಎನ್‌ಜಿಒವೊಂದು ಕೂಡಲೇ ಸಿದ್ದಪ್ಪ ಅವರ ಬಳಿ ತೆರಳಿ ಅವರಿಗೆ ವ್ಯಾಪಾರ ನಡೆಸಲು ಒಂದು ಟೇಬಲ್‌ ಹಾಗೂ ಅದನ್ನು ಸುತ್ತುವರಿಯುವ ದೊಡ್ಡದಾದ ಛತ್ರಿ ನೀಡಿ ಸಹಕರಿಸಿದೆ. ಇನ್ನು ಸಿದ್ದಪ್ಪ ಅವರ ಸುದ್ದಿ ಬಾಲಿವುಡ್‌ ನಟ ರಣದೀಪ್‌ ಹೂಡಾ ಗಮನ ಸೆಳೆದಿದ್ದು ಅವರು ಕೂಡ ಟ್ವೀಟ್‌ ಮೂಲಕ, ಗಿಡಗಳನ್ನು ಕೊಳ್ಳುವಂತೆ ಮನವಿ ಮಾಡಿದ್ದಾರೆ. ಒಟ್ಟಾರೆಯಾಗಿ ಸಾಮಾಜಿಕ ಜಾಲತಾಣದ ಫಲಶ್ರುತಿಯಿಂದಾಗಿ ಇಪ್ಪತ್ತಕ್ಕೂ ಹೆಚ್ಚು ಜನರು ಸಿದ್ದಪ್ಪ ಅವರ ಬಳಿ ತೆರಳಿ ಗಿಡಗಳನ್ನು ಖರೀದಿಸಿ ಮಾನವೀಯತೆ ಮೆರೆದಿದ್ದಾರೆ. ಇನ್ನು ಇತ್ತ ನಟಿ ಸಂಯುಕ್ತಾ ಸಂಯುಕ್ತ ಹೊರನಾಡು ಕೂಡ ಸಿದ್ದಪ್ಪ ಅವರ ಬಳಿ ತೆರಳಿ ಅವರಿಗೆ ಬೆಂಬಲ ಸೂಚಿಸಿ ಹಲವರಿಗೆ ಗಿಡ ಖರೀದಿಸುವಂತೆ ಕರೆ ನೀಡಿದ್ದಾರೆ. ಹೀಗೆ ಬಿಸಿಲಿನ ಬೇಗೆಗೆ ಬಳಲಿ ಬೆಂಡಾಗಿದ್ದ ಸಿದ್ದಪ್ಪ ಅವರ ವ್ಯಾಪಾರದ ಜೀವನದಲ್ಲಿ ಸಾಮಾಜಿಕ ಜಾಲತಾಣ ಖುಷಿ ತಂದಿದೆ. ಛತ್ರಿ ನೀಡಿ ಅವರಿಗೆ ತಣ್ಣಗೆ ಇರುವಂತೆ ಹೇಳಿದೆ. ಇದಕ್ಕಿಂತ ಮಾನವೀಯತೆ ಬೇರೆನಾದ್ರೂ ಬೇಕಾ ಹೇಳಿ? ಮಾನವೀಯತೆಗೆ ಸಲಾಂ.
from India & World News in Kannada | VK Polls https://ift.tt/31HH1Ru
