: ಮಂಡ್ಯ ಸೇರಿದಂತೆ ನೆರೆ ಜಿಲ್ಲೆಗಳಲ್ಲಿ ಶಾಲೆಗಳನ್ನೇ ಟಾರ್ಗೆಟ್‌ ಮಾಡಿಕೊಂಡು ಕಂಪ್ಯೂಟರ್‌ ಹಾಗೂ ಇತರ ವಸ್ತುಗಳನ್ನು ಮಾಡುತ್ತಿದ್ದ ಏಳು ಮಂದಿಯನ್ನು ಬಂಧಿಸಲಾಗಿದೆ. ಇವರಿಂದ 160 ಕಂಪ್ಯೂಟರ್‌ಗಳು ಸೇರಿದಂತೆ ಬರೋಬ್ಬರಿ 61 ಲಕ್ಷ ರೂ. ಮೌಲ್ಯದ ವಸ್ತುಗಳನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ಕೆ.ಪರಶುರಾಮ್‌ ತಿಳಿಸಿದರು. ನಾಗಮಂಗಲ ತಾಲೂಕು ಚಾಕೇನಹಳ್ಳಿಯ ಸಿ.ರವಿಕುಮಾರ್‌(39), ಮಂಡ್ಯ ತಾಲೂಕು ಸೂನಗಹಳ್ಳಿಯ ಎಸ್‌.ಆರ್‌.ಮಂಜುನಾಥ್‌(33), ಎಸ್‌.ಪಿ. ನಾಗರಾಜು(22), ಸಿ.ಬಿ.ಹೇಮಂತ್‌ಕುಮಾರ್‌(27), ಬೆಂಗಳೂರಿನ ಕಾಮಾಕ್ಷಿಪಾಳ್ಯ ಮಾರುತಿನಗರದ ಎನ್‌.ವೈ.ರಾಮಕೃಷ್ಣ(46), ಬೆಂಗಳೂರು ಗಿಡದಹೊನ್ನೇನಹಳ್ಳಿ ಬಿ.ಜಿ.ವೆಂಕಟೇಶ್‌ (39), ಮಂಡ್ಯದ ವಿ.ವಿ.ಪುರಂ ನಿವಾಸಿ ಸಾದಿಕ್‌(50) ಬಂಧಿತರು ಎಂದು ಮಂಗಳವಾರ ಸುದ್ದಿಗೋಷ್ಠಿಯಲ್ಲಿ ಹೇಳಿದರು. ಇವರು ಮಂಡ್ಯ ಜಿಲ್ಲೆಯಲ್ಲಿ 20, ತುಮಕೂರು, ಮೈಸೂರು ಜಿಲ್ಲೆಗಳಲ್ಲಿ ತಲಾ 5, ಹಾಸನದಲ್ಲಿ 2, ರಾಮನಗರ, ಬೆಂಗಳೂರು ನಗರ ಜಿಲ್ಲೆಗಳಲ್ಲಿ ತಲಾ 1ರಂತೆ ಒಟ್ಟು 34 ಕಳವು ಪ್ರಕರಣಗಳ ಭಾಗಿಯಾಗಿದ್ದರು ಎಂದು ವಿಚಾರಣೆ ವೇಳೆ ಆರೋಪಿಗಳು ಒಪ್ಪಿಕೊಂಡಿದ್ದಾರೆ. ಇವರು ನೀಡಿದ ಮಾಹಿತಿ ಮೇರೆಗೆ 160 ಕಂಪ್ಯೂಟರ್‌, 16 ಬ್ಯಾಟರಿ, ತಲಾ 3 ಟಿವಿ, ಜೆರಾಕ್ಸ್‌ ಮಿಷನ್‌, ತಲಾ ಒಂದೊಂದು ವಾಷಿಂಗ್‌ ಮಿಷನ್‌, ಜೀಯಿಂಗ್‌ ಮಿಷನ್‌, ಪ್ರಿಂಟರ್‌ ಹಾಗೂ ಆರೋಪಿಗಳು ಕೃತ್ಯಕ್ಕೆ ಬಳಸುತ್ತಿದ್ದರಿಂದ ತಲಾ 3 ಕಾರು, 1 ಲಗೇಜ್‌ ವಾಹನವನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ವಿವರಿಸಿದರು. ಮಂಡ್ಯ ತಾಲೂಕು ವಿ.ಸಿ.ಫಾರ್ಮ್ ಗೇಟ್ ಬಳಿಯ ಸರಕಾರಿ ಪ್ರೌಢಶಾಲೆ ಮತ್ತು ಸರಕಾರಿ ಪದವಿ ಪೂರ್ವ ಕಾಲೇಜಿನಲ್ಲಿ ಆ.26ರಂದು ಕಂಪ್ಯೂಟರ್‌, ಜೆರಾಕ್ಸ್‌ ಮಿಷನ್‌, ಕಂಪ್ಯೂಟರ್‌ ಬ್ಯಾಟರಿಗಳು ಕಳವಾಗಿದ್ದವು. ಶಾಲೆಯ ಡೋರ್‌ನ ಬೀಗ ಮುರಿದು, ಕಿಟಕಿ ಸರಳುಗಳನ್ನು ಕತ್ತರಿಸಿ ಕೃತ್ಯವೆಸಗಲಾಗಿತ್ತು. ಈ ಹಿನ್ನೆಲೆಯಲ್ಲಿ ಆರೋಪಿಗಳ ಪತ್ತೆಗಾಗಿ ತನಿಖಾ ತಂಡ ರಚಿಸಲಾಗಿತ್ತು. ಈ ತಂಡವು ಕಾರ್ಯಾಚರಣೆ ನಡೆಸಿ ಅ.17ರಂದು ಮಂಡ್ಯ ತಾಲೂಕು ದುದ್ದ ಸರ್ಕಲ್‌ನಲ್ಲಿ ಎಚ್‌.ಆರ್‌.ಮಂಜುನಾಥ್‌, ನಾಗರಾಜು ಹಾಗೂ ಅ.18ರಂದು ಕೆ.ಎಂ.ದೊಡ್ಡಿ ಬಳಿ ಸಿ.ರವಿಕುಮಾರ್‌, ಅ.22ರಂದು ಮಂಡ್ಯ ತಾಲೂಕು ಚಿಕ್ಕಕೊಪ್ಪಲು ಬಳಿ ಹೇಮಂತ್‌ನನ್ನು ಬಂಧಿಸಲಾಗಿದೆ ಎಂದು ತಿಳಿಸಿದರು. ಏಳು ಆರೋಪಿಗಳ ಪೈಕಿ ಕ್ರಿಮಿನಲ್‌ ಹಿನ್ನೆಲೆ ಹೊಂದಿರುವ ಸಿ.ರವಿಕುಮಾರ್‌ ವಿರುದ್ಧ ಕೊಲೆ, ಅಪಹರಣ ಸಂಬಂಧ 4 ಪ್ರಕರಣಗಳು ದಾಖಲಾಗಿದೆ. ರವಿಕುಮಾರ್‌, ಮಂಜುನಾಥ್‌, ನಾಗರಾಜು ಹಾಗೂ ಇತರರು ಕಳವು ಮಾಡಿ ತಂದ ಮಾಲುಗಳ ಮಾರಾಟಕ್ಕೆ ಹೇಮಂತ್‌ಕುಮಾರ್‌, ರಾಮಕೃಷ್ಣ, ವೆಂಕಟೇಶ್‌, ಸಹಕರಿಸುತ್ತಿದ್ದರು. ಹೀಗಾಗಿ ಬಂಧಿತರು ಬೇರೆಯವರಿಗೆ ಮಾರಾಟ ಮಾಡಿದ್ದ ಕಂಪ್ಯೂಟರ್‌ ಹಾಗೂ ಇತರ ವಸ್ತುಗಳನ್ನು ಅವರು ನೀಡಿದ ಮಾಹಿತಿ ಮೇರೆಗೆ ವಶಕ್ಕೆ ಪಡೆಯಲಾಗಿದೆ ಎಂದು ಹೇಳಿದರು. ಕೊರೊನಾ ಲಾಕ್‌ಡೌನ್‌ ಹಿನ್ನೆಲೆಯಲ್ಲಿ ವರ್ಕ್ ಫ್ರಂ ಹೋಮ್‌, ಆನ್‌ಲೈನ್‌ ತರಗತಿಗಳು ನಡೆಯುತ್ತಿರುವುದರಿಂದ ಕಂಪ್ಯೂಟರ್‌ಗಳಿಗೆ ಬೇಡಿಕೆ ಹೆಚ್ಚಾಗಿದೆ. ಇದನ್ನೇ ಬಂಡವಾಳ ಮಾಡಿಕೊಂಡ ಆರೋಪಿಗಳಿಗೆ ಶಾಲೆಗಳೇ ಸುಲಭದ ಟಾರ್ಗೆಟ್‌ ಆಗಿದ್ದವು. ಹೀಗಾಗಿ ಆರೋಪಿಗಳು ಶಾಲೆಗಳ ಬಳಿ ಎಸಿ, ಎಕ್ಸಾಟ್‌ಫ್ಯಾನ್‌ ಇರುವ ಕೊಠಡಿಗಳನ್ನೇ ಗಮನಿಸಿಕೊಂಡು ಕನ್ನ ಹಾಕುತ್ತಿದ್ದರು ಎಂದು ಮಾಹಿತಿ ನೀಡಿದರು. ಶಾಲೆಗಳಲ್ಲಿ ಕಳುವಾಗಿದ್ದ ಕಂಪ್ಯೂಟರ್‌ಗಳ ಬಗ್ಗೆ ದೂರಿನಲ್ಲಿ ನಮೂದಿಸಿರುವ ನಂಬರ್‌ಗಳನ್ನು ಆಧರಿಸಿ ಆಯಾಯ ಶಾಲೆಗಳಿಗೆ ಕಂಪ್ಯೂಟರ್‌ಗಳನ್ನು ತಲುಪಿಸಲು ಕ್ರಮ ವಹಿಸಲಾಗಿದೆ ಎಂದು ವಿವರಿಸಿದರು. ಗೋಷ್ಠಿಯಲ್ಲಿ ಡಿವೈಎಸ್‌ಪಿ ಎಲ್‌.ನವೀನ್‌ಕುಮಾರ್‌, ಸಿಪಿಐಗಳಾದ ಕೆ.ಸಂತೋಷ್‌, ಕೆ.ವಿ.ಮಹೇಶ್‌ ಹಾಜರಿದ್ದರು.
from India & World News in Kannada | VK Polls https://ift.tt/3jDfmaq
