ಬರ್ಮಿಂಗ್‌ಹ್ಯಾಮ್: 2018ರ ಮಾರ್ಚ್‌ನಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ ನಡೆದ ಕೇಪ್ ಟೌನ್ ಟೆಸ್ಟ್ ಪಂದ್ಯದಲ್ಲಿ ಮಾಡಿದ ತಪ್ಪಿಗಾಗಿ 16 ತಿಂಗಳುಗಳ ಕಾಲ ಕ್ರಿಕೆಟ್ ರಂಗದಿಂದ ದೂರವುಳಿಯಬೇಕಾಯಿತು. ಚೆಂಡನ್ನು ವಿರೂಪಗೊಳಿಸಿರುವ , ಡೇವಿಡ್ ವಾರ್ನರ್ ಹಾಗೂ ಕ್ಯಾಮರೂನ್ ಬ್ಯಾಂಕ್ರಾಫ್ಟ್ ಕ್ರಿಕೆಟ್ ಆಸ್ಟ್ರೇಲಿಯಾದಿಂದ ನಿಷೇಧಕ್ಕೊಳಗಾಗಿದ್ದರು. ಅಂದು ಸ್ಮಿತ್ ಅಳುತ್ತಾ ಕ್ರಿಕೆಟ್ ರಂಗದಿಂದ ದೂರ ಸರಿದಿದ್ದರು. ಆ ಸಂದರ್ಭದಲ್ಲಿ ಸ್ಮಿತ್ ಕೆರಿಯರ್ ಅಸ್ತಮಿಸಿದೆ ಎಂದೇ ಅಂದಾಜಿಸಲಾಗಿತ್ತು. ಆದರೆ ನಿಷೇಧದ ಬಳಿಕ ಆ್ಯಶಸ್ ಟೆಸ್ಟ್ ಸರಣಿಗೆ ಭರ್ಜರಿ ಕಮ್‌ಬ್ಯಾಕ್ ಮಾಡಿರುವ ಸ್ಮಿತ್, ಅಮೋಘ ಶತಕದ ಮೂಲಕ ಉತ್ತರಿಸಿದ್ದಾರೆ. ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಸ್ಮಿತ್, ಇನ್ನೊಂದು ಸಲ ಕ್ರಿಕೆಟ್ ಆಡುವ ಅವಕಾಶ ಸಿಗಲಿದೆ ಎಂಬ ನಂಬಿಕೆಯಿರಲಿಲ್ಲ ಎಂದಿದ್ದಾರೆ. ಒಂದು ಹಂತದಲ್ಲಿ ಕ್ರಿಕೆಟ್ ಜತೆಗಿನ ಪ್ರೀತಿಯನ್ನು ಕಳೆದುಕೊಂಡಿದ್ದೆ. ವಿಶೇಷವಾಗಿಯೂ ನನಗೆ ಎಲ್ಬೋ ಆಪರೇಷನ್ ಆದ ಬಳಿಕ ಕ್ರಿಕೆಟ್ ಆಡುವ ಆಸಕ್ತಿಯನ್ನು ಕಳೆದುಕೊಂಡಿದ್ದೆ. ಇದು ನಿಜಕ್ಕೂ ವಿಲಕ್ಷಣವಾಗಿತ್ತು. ಆದರೆ ಮಾರ್ಚ್ ತಿಂಗಳಲ್ಲಿ ಗಾಯಮುಕ್ತಗೊಂಡ ಬಳಿಕ ಮತ್ತೆ ಕ್ರಿಕೆಟ್ ಆಡುವ ಆಸೆ ಮತ್ತೆ ಹುಟ್ಟಿಕೊಂಡಿತು ಎಂದು ನುಡಿದರು. ಅದು ಏನೆಂದು ನನಗೆ ತಿಳಿದಿಲ್ಲ. ಏನೋ ಒಂದು ಪ್ರಚೋದನೆಯಂತೆ ನಾನು ಮತ್ತೆ ಆಡಲು ಸಿದ್ಧವಾಗಿದ್ದೇನೆ ಎಂಬ ಅಂತರಾಳ ಮಾತನ್ನು ಆಡಿದರು. ಮಗದೊಮ್ಮೆ ದೇಶಕ್ಕಾಗಿ ಆಡುವ ಮೂಲಕ ಆಸೀಸ್ ಜನರು ಹೆಮ್ಮೆಪಟ್ಟುಕೊಳ್ಳುವಂತೆ ಮಾಡುವುದು ನನ್ನ ಗುರಿಯಾಗಿತ್ತು. ನಾನದನ್ನು ಮಾಡುವುದನ್ನು ಹೆಚ್ಚು ಇಷ್ಟಪಡುತ್ತೇನೆ ಎಂದು ಸೇರಿಸಿದರು. ಹಿಂದೆಂದೂ ಅಂತಹ ಭಾವನೆ ಇರವಿಲ್ಲ. ಆದರೆ ಕ್ರಿಕೆಟ್ ಜತೆಗಿನ ಪ್ರೀತಿ ಮತ್ತಷ್ಟು ಅಂಟಿಕೊಂಡಿದೆ. ಅದೃಷ್ಟವಶಾತ್ ಆ ಪ್ರೀತಿ ಮತ್ತೆ ಉಕ್ಕಿ ಬಂದಿದೆ. ಆಸ್ಟ್ರೇಲಿಯಾಕ್ಕಾಗಿ ಮತ್ತೆ ಆಡಲು ಅವಕಾಶ ದೊರಕಿರುವ ನಾನು ತುಂಬಾನೇ ಅದೃಷ್ಟವಂತ ಎಂದಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2KoPEqy
