ಹೊಸದಿಲ್ಲಿ: ಕುತೂಹಲಕಾರಿ ಬೆಳವಣಿಗೆಯೊಂದರಲ್ಲಿ, ಐಎನ್ಎಕ್ಸ್ ಮೀಡಿಯಾ ಹಗರಣದಲ್ಲಿ ಆರೋಪಿಯಾಗಿರುವ ಮಾಜಿ ವಿತ್ತಸಚಿವ ಸೆಪ್ಟೆಂಬರ್ 2ರ ವರೆಗೂ ಸಿಬಿಐ ಕಸ್ಟಡಿಯಲ್ಲೇ ಉಳಿದುಕೊಳ್ಳಲು ಬಯಸುವುದಾಗಿ ಸುಪ್ರೀಂ ಕೋರ್ಟಿಗೆ ಮನವಿ ಮಾಡಿದ್ದಾರೆ. ಆಗಸ್ಟ್ 21ರಂದು ಬಂಧಿತರಾಗಿದ್ದ ಚಿದಂಬರಂ ಇಂದಿನ ವರೆಗೂ ಸಿಬಿಐ ಕಸ್ಟಡಿಯಲ್ಲಿದ್ದಾರೆ. ಈ ಅವಧಿ ಮುಗಿಯುವ ಮುನ್ನ ವಿಚಾರಣಾ ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗುತ್ತಿದೆ. ಜಸ್ಟಿಸ್ ಆರ್ ಭಾನುಮತಿ ಮತ್ತು ಎ.ಎಸ್ ಬೋಪಣ್ಣ ಅವರಿದ್ದ ವಿಭಾಗೀಯ ಪೀಠ, ಚಿದಂಬರಂ ನಿರೀಕ್ಷಣಾ ಜಾಮೀನು ಅರ್ಜಿಯ ವಿಚಾರಣೆಯನ್ನು ಸೆಪ್ಟೆಂಬರ್ 2ಕ್ಕೆ ನಿಗದಿಪಡಿಸಿದೆ. ಈ ಹಿನ್ನೆಲೆಯಲ್ಲಿ ಮತ್ತೆ ಇ.ಡಿ ಅಧಿಕಾರಿಗಳಿಂದ ಬಂಧನಕ್ಕೊಳಪಡುವ ಬದಲು ಸಿಬಿಐ ವಶದಲ್ಲೇ ಇರಲು ಚಿದಂಬರಂ ಬಯಸಿದ್ದಾರೆ. ಚಿದಂಬರಂ ಕೋರಿಕೆಗೆ ಯಾವುದೇ ತೀರ್ಮಾನ ವ್ಯಕ್ತಪಡಿಸದ ಕೋರ್ಟ್, ಸೆಪ್ಟೆಂಬರ್ 5ರಂದು ಪ್ರಕಟಿಸುವುದಾಗಿ ತಿಳಿಸಿತು. ತಮ್ಮ ಜಾಮೀನು ಕೋರಿಕೆ ತಿರಸ್ಕರಿಸಿದ ದಿಲ್ಲಿ ಹೈಕೋರ್ಟಿನ ಆಗಸ್ಟ್ 20ರ ತೀರ್ಪು ಪ್ರಶ್ನಿಸಿ ಚಿದಂಬರಂ ಸುಪ್ರೀಂ ಕೋರ್ಟಿನ ಮೊರೆಹೊಕ್ಕಿದ್ದರು. ಇದೇ ವೇಳೆ ಇ.ಡಿ ಬಂಧನದಿಂದ ಸೆಪ್ಟೆಂಬರ್5 ವರೆಗೂ ಚಿದಂಬರಂಗೆ ಮಧ್ಯಂತರ ರಕ್ಷಣೆ ನೀಡಿ ಕೋರ್ಟ್ ಆದೇಶ ಹೊರಡಿಸಿದೆ. ಅಕ್ರಮ ಹಣ ವರ್ಗಾವಣೆ ಪ್ರಕರಣದಲ್ಲಿ ಚಿದಂಬರಂ ನಿರೀಕ್ಷಣಾ ಜಾಮೀನು ಕೋರಿದ್ದರು. ಚಿದಂಬರಂ ಪರವಾಗಿ ಹಿರಿಯ ವಕೀಲರಾದ ಕಪಿಲ್ ಸಿಬಲ್ ಮತ್ತು ಅಭಿಷೇಕ್ ಮನು ಸಿಂಘ್ವಿ ವಾದಿಸಿದರು. ಸೆಪ್ಟೆಂಬರ್ 2ರ ವರೆಗೂ ಸಿಬಿಐ ಕಸ್ಟಡಿಯಲ್ಲೇ ಇರಲು ಬಯಸಿದ ಚಿದಂಬರಂ ಅಪೇಕ್ಷೆಯನ್ನು ಕೋರ್ಟಿಗೆ ತಿಳಿಸಿದರು. ಸಾಲಿಟರ್ ಜನರಲ್ ತುಷಾರ್ ಮೆಹ್ತಾ, ಪ್ರಕರಣ ವಿಚಾರಣಾ ನ್ಯಾಯಾಲಯದಲ್ಲಿ ಇರುವುದರಿಂದ ಆ ಕೋರ್ಟ್ ಮಾತ್ರವೇ ಚಿದಂಬರಂ ಕಸ್ಟಡಿಯನ್ನು ವಿಸ್ತರಿಸಬಹುದು ಎಂದು ವಾದಿಸಿದರು. ಸಿಆರ್‌ಪಿಸಿ ನಿಯಮಗಳ ಅನುಸಾರ ಬಂಧಿತ ಆರೋಪಿಯನ್ನು ಕಸ್ಟಡಿ ವಿಚಾರಣೆ ಮುಗಿದ ಬಳಿಕ ನ್ಯಾಯಾಂಗ ವಶಕ್ಕೆ ಒಪ್ಪಿಸಿ ಜೈಲಿಗೆ ಕಳುಹಿಸಲಾಗುತ್ತದೆ. ಅಕ್ರಮ ಹಣ ವರ್ಗಾವಣೆ 'ಸಮಾಜ ಮತ್ತು ದೇಶದ' ವಿರುದ್ಧ ನಡೆಸುವ ಅಪರಾಧವಾಗಿರುತ್ತದೆ. ಚಿದಂಬರಂ ಅವರನ್ನು ನಿರೀಕ್ಷಣಾ ಜಾಮೀನು ಎಂಬ ನೆರಳಿನ ರಕ್ಷಣೆಯಿಲ್ಲದೆ ಬಂಧಿಸಿ ವಿಚಾರಣೆ ನಡೆಸಬೇಕಿದೆ ಎಂದು ಮೆಹ್ತಾ ವಾದಿಸಿದರು. 'ಐಎನ್ಎಕ್ಸ್ ಮೀಡಿಯಾ ಹಗರಣದಲ್ಲಿ 2009ರ ಬಳಿಕ ಇಂದಿನ ವರೆಗೂ ಅಕ್ರಮ ಹಣದ ವರ್ಗಾವಣೆ ನಡೆದಿರುವುದಕ್ಕೆ ಸಾಕ್ಷ್ಯಾಧಾರಗಳು ನಮ್ಮ ಬಳಿಯಿವೆ' ಎಂದು ಮೆಹ್ತಾ ನುಡಿದರು.
from India & World News in Kannada | VK Polls https://ift.tt/2ZEyQ8E
