ಹೊಸದಿಲ್ಲಿ: ಕ್ರಿಕೆಟ್ ದಿಗ್ಗಜ ಸಚಿನ್ ತೆಂಡೂಲ್ಕರ್‌ ಅವರನ್ನು ಇಂಗ್ಲೆಂಡ್‌ ಆಲ್‌ರೌಂಡರ್‌ ಬೆನ್ ಸ್ಟೋಕ್ಸ್ ಜತೆ ಹೋಲಿಕೆ ಮಾಡಿರುವ ಟ್ವಿಟರ್‌ ಪೋಸ್ಟ್‌ ವಿರುದ್ಧ ಅಭಿಮಾನಿಗಳು ಸಾಮಾಜಿಕ ಜಾಲತಾಣಗಳ ಮೂಲಕ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ವಿಶ್ವಕಪ್‌ ಫೈನಲ್‌ ಬಳಿಕ ಬೆನ್ ಸ್ಟೋಕ್ಸ್‌ಗೆ ಸಚಿನ್ ಪ್ರಶಸ್ತಿ ನೀಡುವ ಚಿತ್ರವನ್ನು ಟ್ವಿಟರ್‌ನಲ್ಲಿ ಪ್ರಕಟಿಸಿರುವ ಐಸಿಸಿ, 'ಸಾರ್ವಕಾಲಿಕ ಕ್ರಿಕೆಟರ್‌ ಜತೆ ಸಚಿನ್ ತೆಂಡೂಲ್ಕರ್‌' ಎಂದು ಅಡಿಬರಹ ಕೊಟ್ಟಿತ್ತು. ಇದಾದ ಬಳಿಕ ಅದೇ ಚಿತ್ರವನ್ನು ಮತ್ತೊಮ್ಮೆ ಪ್ರಕಟಿಸಿ ಈಗಾಗಲೇ ಹೇಳಿದ್ದೆವಲ್ಲ ಎಂದು ಅಡಿಬರಹ ಕೊಡಲಾಗಿತ್ತು. ಇದು ಸಚಿನ್ ಅಭಿಮಾನಿಗಳನ್ನು ಕೆರಳಿಸಿದೆ. ಸಚಿನ್ ಅವರಿಗೆ ಬೆನ್ ಸ್ಟೋಕ್ಸ್ ಅನ್ನು ಹೋಲಿಕೆ ಮಾಡುವುದು ಯಾವ ರೀತಿ ಸರಿ ಎಂದು ಪ್ರಶ್ನಿಸಿದ್ದಾರೆ. ''ಟೆಸ್ಟ್‌ ಹಾಗೂ ಏಕದಿನ ಕ್ರಿಕೆಟ್‌ನಲ್ಲಿ ಬೆಟ್ಟದಷ್ಟು ರನ್‌ ಪೇರಿಸಿರುವ ಸಚಿನ್‌ಗೆ ಸ್ಟೋಕ್ಸ್ ಯಾವ ಲೆಕ್ಕದಲ್ಲಿ ಹೋಲಿಕೆಯಾಗುತ್ತಾರೆ,'' ಎಂದು ಅಭಿಮಾನಿಗಳು ಛೀಮಾರಿ ಹಾಕಿದ್ದಾರೆ. ''ಸ್ಟೋಕ್ಸ್ ಸಾರ್ವಕಾಲಿಕ ಕ್ರಿಕೆಟರ್‌ ಇರಬಹುದು. ಆದರೆ, ಅವರು ಕ್ರಿಕೆಟ್ ದೇವರಾಗಲು ಸಾಧ್ಯವಿಲ್ಲ,'' ಎಂದು ಇನ್ನೊಬ್ಬ ಅಭಿಮಾನಿಯು ಉಲ್ಲೇಖಿಸಿದ್ದಾರೆ. ''ಶ್ರೇಷ್ಠ ಕ್ರಿಕೆಟಿಗರು ಎಂದರೆ ಒಬ್ಬರೇ, ಉಳಿದವರೆಲ್ಲರೂ ನಂತರದ ಸ್ಥಾನದಲ್ಲಿ ನಿಲ್ಲುತ್ತಾರೆ,'' ಎಂದು ಸಚಿನ್ ಸಾಧನೆಯನ್ನು ಮೆಲುಕು ಹಾಕಲಾಗಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2Ld99D2
