ಹೊಸದಿಲ್ಲಿ: ಸತತ ಯಶಸ್ಸಿನೊಂದಿಗೆ ಮುನ್ನುಗ್ಗುತ್ತಿರುವ ಹರಿಯಾಣ ಸ್ಟೀಲರ್ಸ್‌ ತಂಡ ಬುಧವಾರ ನಡೆದ ಪ್ರೊ ಕಬಡ್ಡಿ ಲೀಗ್‌ನ 62ನೇ ಪಂದ್ಯದಲ್ಲಿ ಗುಜರಾತ್‌ ಸೂಪರ್‌ಜಯಂಟ್ಸ್‌ ವಿರುದ್ಧ 41-25 ಅಂಕಗಳ ಅಂತರದ ಗೆಲುವು ಸಾಧಿಸಿದೆ. ದಿಲ್ಲಿಯ ತ್ಯಾಗರಾಜ್‌ ಕ್ರೀಡಾ ಸಂಕೀರ್ಣದಲ್ಲಿ ನಡೆದ ಪಂದ್ಯದಲ್ಲಿ ಆರಂಭದಿಂದಲೂ ಮುನ್ನಡೆ ಪಡೆದುಕೊಂಡು ಬಂದ ಸ್ಟೀಲರ್ಸ್‌ ಅತಿ ಸುಲಭದ ಗೆಲುವನ್ನು ತನ್ನದಾಗಿಸಿಕೊಂಡಿತು. ಗುಜರಾತ್‌ ಆಟಗಾರರನ್ನು ನಿರಂತರವಾಗಿ ಅಂಗಣದಿಂದ ಹೊರಕ್ಕೆ ಕಳುಹಿಸಿ ಅಂಕಗಳನ್ನು ಕ್ರೋಡೀಕರಿಸುತ್ತಲೇ ಬಂದ ಸ್ಟೀಲರ್ಸ್‌ ಕಲಿಗಳು ಪ್ರಥಮಾರ್ಧ ಮುಕ್ತಾಯದ ವೇಳೆಗೆ 20-11ರ ಮುನ್ನಡೆ ಪಡೆದುಕೊಂಡರು. ದ್ವಿತೀಯಾರ್ಧದಲ್ಲಿ ಇನ್ನೂ ಚುರುಕಾಗಿ ಆಟವಾಡಿ ವಿಶ್ವಾಸ ಕಳೆದುಕೊಳ್ಳುತ್ತಲೇ ಸಾಗುತ್ತಿದ್ದ ಗುಜರಾತ್‌ ಆಟಗಾರರ ಮೇಲೆ ಸವಾರಿ ಮಾಡಿದರು. ಹರಿಯಾಣ ಪರ ವಿಕಾಸ್‌ ಕಂಡೋಲಾ 8, ಪ್ರಶಾಂತ್‌ ಕುಮಾರ್‌ ರೈ 8, ವಿನಯ್‌ 7 ಮತ್ತು ರವಿಕುಮಾರ್‌ 6 ಅಂಕ ಗಳಿಸಿದರು. ಗುಜರಾತ್‌ ತಂಡ ಅಬೊಲ್‌ಫಜಲ್‌, ಮೋರೆ ಜಿ.ಬಿ ಹಾಗೂ ರೋಹಿತ್‌ ಗುಲಿಯಾ ತಲಾ 4 ಅಂಕ ಗಳಿಸಿದರು. ಮುಂಬಾಗೆ ದಬಾಂಗ್‌ ಗುದ್ದು ಬುಧವಾರ ನಡೆದ 2ನೇ ಪಂದ್ಯದಲ್ಲಿ ಅಂಕಪಟ್ಟಿಯ ಅಗ್ರಸ್ಥಾನಿ ದಬಾಂಗ್‌ ಡೆಲ್ಲಿ ತಂಡ 40-24 ಅಂಕಗಳ ಅಂತರದಿಂದ ಯು ಮುಂಬಾ ತಂಡಕ್ಕೆ ಆಘಾತ ನೀಡಿದೆ. ನವೀನ್‌ ಕುಮಾರ್‌ (11) ಅವರ ಮತ್ತೊಂದು ಸೂಪರ್‌ ಟೆನ್‌ ಪಾಯಿಂಟ್‌ ಮೂಲಕ ಮುನ್ನಡೆ ಸಾಧಿಸಿದ ಡೆಲ್ಲಿ ತಂಡ ಮುಂಬಾಗೆ ಸುಲಭವಾಗಿ ಸೋಲಿನ ಹಾದಿ ತೋರಿಸಿತು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2LifMnu
