ಹೊಸದಿಲ್ಲಿ: ಸಾರ್ವಜನಿಕ ಜೀವನದಲ್ಲಿ ನಾನಾ ಬಗೆಯ ಚಿಂತನೆಗಳನ್ನು ಗೌರವಿಸುವ ನಾಗರಿಕತೆ ಇರಲೇಬೇಕು; ಪರಸ್ಪರ ದೃಷ್ಟಿಕೋನಗಳನ್ನು ಆಲಿಸುವ ಸೌಹಾರ್ದತೆಯಿರಬೇಕು ಎಂದು ಪ್ರಧಾನಿ ನರೇಂದ್ರ ಮೋದಿ ಹೇಳಿದ್ದಾರೆ. 'ರಚನಾತ್ಮಕ ಟೀಕೆಗಳು ಇರಬೇಕು. ನಾನು ಇಲ್ಲಿ ನನ್ನ ಚಿಂತನೆಗೆ ಸರಿ ಹೊಂದುವ ಒಂದೇ ಬಗೆಯ ಚಿಂತನೆಯುಳ್ಳವರ ವೇದಿಕೆಯಲ್ಲಿ ಭಾಗವಹಿಸಿರಬಹುದು; ಆದರೆ ರಚನಾತ್ಮಕ ಟೀಕೆಗಳಿಗೂ ಸ್ವಾಗತವಿದೆ' ಎಂದು ಕೇರಳ ಮೂಲದ ಮಾಧ್ಯಮ ಸಂಸ್ಥೆಯೊಂದರ ಕಾರ್ಯಕ್ರಮದಲ್ಲಿ ನುಡಿದರು. ನಾನಾ ಚಿಂತನೆ, ಸಿದ್ಧಾಂತಗಳ ವಿಚಾರ ವಿನಿಮಯ ನಡೆಯಬೇಕು. ಜನರು ತಮ್ಮ ಹಿತಕರವಾದ ಚಿಪ್ಪಿನಿಂದ (ಕಂಫರ್ಟ್ ಝೋನ್) ಹೊರಬರಬೇಕು. ಹಾಗಾದಾಗ ಮಾತ್ರ ಇತರರ ದೃಷ್ಟಿಕೋನಗಳನ್ನು ಗೌರವಿಸುವ, ಅವರ ಮಾತುಗಳನ್ನು ಕೇಳುವ ಗುಣ ಬೆಳೆಯುತ್ತದೆ' ಎಂದು ಪ್ರಧಾನಿ ನುಡಿದರು. 'ಸಾಮಾನ್ಯವಾಗಿ ಸಾರ್ವಜನಿಕ ವ್ಯಕ್ತಿಗಳು ತಮ್ಮ ಚಿಂತನೆ, ದೃಷ್ಟಿಕೋನಗಳಿಗೆ ಸರಿ ಹೊಂದುವ ವೇದಿಕೆಗಳಲ್ಲಿ ಮಾತ್ರ ಭಾಗವಹಿಸುತ್ತಾರೆ ಎಂಬ ನಂಬಿಕೆಯಿದೆ. ಅಂತಹ ಜನರ ನಡುವೆ ಇರುವುದರಲ್ಲೂ ಬಹಳ ಹಿತಕರ ಅನುಭವವಾಗುತ್ತದೆ' ಎಂದು ಪ್ರಧಾನಿ ಹೇಳಿದರು. 'ನಾನೂ ಸಹ ನನ್ನ ಸಮಾನ ಚಿಂತನೆಯ ಗುಂಪಿನ ಜತೆಗೆ ಇರುವುದನ್ನೇ ಬಯಸುತ್ತೇನೆ ಎಂಬ ನಂಬಿಕೆಯಿದ್ದರೆ ತಪ್ಪಲ್ಲ; ಆದರೆ ಅದೇ ವೇಳೆಗೆ ವ್ಯಕ್ತಿಗಳು ಮತ್ತು ಸಂಘಟನೆಗಳ ನಡುವೆ ಭಿನ್ನ ಚಿಂತನಾ ಕ್ರಮಗಳಿದ್ದರೂ ಪರಸ್ಪರ ಸಮಾಲೋಚನೆಯ ಅಭ್ಯಾಸ ಬೆಳೆಯಬೇಕು' ಎಂದು ಪ್ರಧಾನಿ ಮೋದಿ ಹೇಳಿದರು. 'ಈ ಪ್ರಕ್ರಿಯೆಯ ಮೂಲಕ ದೇಶದಲ್ಲಿ ಪರಿವರ್ತನೆ ಮತ್ತು ಆಶೋತ್ತರಗಳ ನಿರ್ಮಾಣ ನಡೆಯಬೇಕು. ನವಭಾರತದ ನಿರ್ಮಾಣವೆಂದರೆ ವೈಯಕ್ತಿಕ ಆಶೋತ್ತರಗಳು, ಸಂಘಟಿತ ಪ್ರಯತ್ನಗಳು ಮತ್ತು ರಾಷ್ಟ್ರೀಯ ಅಭಿವೃದ್ಧಿಗಾಗಿ ಹೊಣೆಗಾರಿಕೆ ಮನೋಭಾವ ಬೆಳೆಯಬೇಕು' ಎಂದು ಅವರು ನುಡಿದರು. ದೇಶವೀಗ ಲೈಸೆನ್ಸ್‌ ರಾಜ್ ಮತ್ತು ಪರ್ಮಿಟ್‌ ರಾಜ್ ವ್ಯವಸ್ಥೆಯಿಂದ ಪರಿವರ್ತನೆ ಹೊಂದಿದೆ. ಯಾವುದೇ ಹಿನ್ನೆಲೆಯಿಂದ ಬಂದಿದ್ದರೂ ಯುವಜನತೆಯ ಆಶೋತ್ತರಗಳು ದೊಡ್ಡದಿವೆ. ಅವರ ಆಶೋತ್ತರಗಳನ್ನು ಮುಟ್ಟುವ ಪ್ರಯತ್ನ ನಾವು ಮಾಡಬೇಕಿದೆ ಎಂದು ಪ್ರಧಾನಿ ಹೇಳಿದರು. 'ಸಣ್ಣ ಪಟ್ಟಣಗಳು ಮತ್ತು ಹಳ್ಳಿಗಳಲ್ಲಿ ಯುವಕರಿದ್ದಾರೆ. ಅವರು ಪ್ರತಿಷ್ಠಿತ ಕುಟುಂಬಗಳಿಂದ ಬಂದವರಲ್ಲ, ದೊಡ್ಡ ಬ್ಯಾಂಕ್ ಬ್ಯಾಲೆನ್ಸ್ ಕೂಡ ಹೊಂದಿದವರಲ್ಲ. ಆದರೆ ಅವರಲ್ಲಿ ತಮ್ಮ ಆಶೋತ್ತರಗಳ ಈಡೇರಿಗೆ ದೃಢವಾದ ಸಮರ್ಪಣಾ ಮನೋಭಾವವಿದೆ. ಅವರು ಉತ್ಕೃಷ್ಟ ಮತ್ತು ಹೆಮ್ಮೆಯ ಭಾರತ ನಿರ್ಮಾಣಕ್ಕೆ ಕೊಡುಗೆಗಳನ್ನು ನೀಡುತ್ತಿದ್ದಾರೆ. ಇದೇ ನವಭಾರತದ ಮನೋಭಾವ' ಎಂದು ಪ್ರಧಾನಿ ತಿಳಿಸಿದರು.
from India & World News in Kannada | VK Polls https://ift.tt/2ZsSsxq
