ಲಾಹೋರ್: ಸಿಖ್ ಯುವತಿಯೊಬ್ಬಳನ್ನು ಅಪಹರಣ ಮಾಡಿ ಇಸ್ಲಾಂಗೆ ಮತಾಂತರಗೊಳಿಸಿ ಮುಸ್ಲಿಂ ಯುವಕನೊಬ್ಬ ವಿವಾಹವಾಗಿರುವ ಘಟನೆ ಲಾಹೋರ್ ನ ನಂಕನಾ ಸಾಹಿಬ್ ಎಂಬಲ್ಲಿ ನಡೆದಿದೆ. ಇಲ್ಲಿನ ಗುರುದ್ವಾರವೊಂದರ ಪೂಜಾರಿಯಾಗಿದ್ದ ಭಗವಾನ್ ಸಿಂಗ್ ಎಂಬುವರ ಪುತ್ರಿ 19 ವರ್ಷ ವಯಸ್ಸಿನ ಜಗ್ಜೀತ್ ಕೌರ್, ದೌರ್ಜನ್ಯಕ್ಕೀಡಾದ ಯುವತಿ. ಯುವತಿಯ ಅಪಹರಣ ಮಾಡಿದ ದುಷ್ಕರ್ಮಿಗಳು, ಬಂದೂಕನ್ನು ಹಣೆಗೆ ಇಟ್ಟು ಇಸ್ಲಾಂಗೆ ಮಾಡಿಸಿದ್ದಾರೆ. ಬಳಿಕ ಮುಸ್ಲಿಂ ಯುವಕನೊಬ್ಬನ ಜೊತೆ ಮದುವೆಯನ್ನೂ ಮಾಡಿಸಿದ್ದಾರೆ ಎಂದು ತಿಳಿದುಬಂದಿದೆ. ಘಟನೆ ನಡೆದು ಹತ್ತು ದಿನಗಳೇ ಕಳೆದಿದ್ದು, ಯುವತಿ ಈಗ ಎಲ್ಲಿದ್ದಾಳೆ ಎಂದು ಯಾರಿಗೂ ಗೊತ್ತಿಲ್ಲ. ಹೀಗಾಗಿ ಭಯಭೀತವಾಗಿರುವ ಜಗ್ಜೀತ್ ಕೌರ್ ಕುಟುಂಬ ಪಂಜಾಬ್ ರಾಜ್ಯಪಾಲರ ಮೊರೆ ಹೋಗಿದೆ. ತಮ್ಮ ಮಗಳನ್ನು ಹುಡುಕಿಕೊಡದಿದ್ದರೆ ಪಂಜಾಬ್ ರಾಜ್ಯಪಾಲರ ನಿವಾಸದ ಎದುರಲ್ಲೇ ಸಾಮೂಹಿಕ ಆತ್ಮಹತ್ಯೆ ಮಾಡಿಕೊಳ್ಳುವುದಾಗಿ ಪಟ್ಟು ಹಿಡಿದಿದೆ. ಜಗ್ಜೀತ್ ಕೌರ್ ಕುಟುಂಬ ತಮ್ಮ ಮಗಳನ್ನು ಹುಡುಕಿಕೊಡಿ ಎಂದು ಪೊಲೀಸರ ಮೊರೆ ಹೋದ್ರೆ, ದೂರು ದಾಖಲಿಸೋದಿರಲಿ ಕನಿಷ್ಟ ಪಕ್ಷ ಅವರ ಮಾತನ್ನೂ ಕೇಳಿಸಿಕೊಂಡಿಲ್ಲ. ಪೊಲೀಸ್ ಠಾಣೆಯಿಂದ ಮನೆಗೆ ಹಿಂದಿರುಗಿದ ಕೂಡಲೇ ಮನೆಗೆ ನುಗ್ಗಿದ ಗೂಂಡಾಗಳು ಇಡೀ ಕುಟುಂಬವನ್ನೇ ಇಸ್ಲಾಂಗೆ ಮತಾಂತರಿಸುವ ಬೆದರಿಕೆ ಒಡ್ಡಿದ್ದಾರೆ. ಪಾಕಿಸ್ತಾನದಲ್ಲಿ ಮುಸ್ಲಿಮೇತರ ಪ್ರಜೆಗಳ ಪರಿಸ್ಥಿತಿ ಎಷ್ಟು ಹೀನಾಯವಾಗಿದೆ ಅನ್ನೋದಕ್ಕೆ ಈ ಪ್ರಕರಣ ಜ್ವಲಂತ ನಿದರ್ಶನವಾಗಿದೆ. ಯುವತಿ ಜಗ್ಜೀತ್ ಕೌರ್ ತಂದೆ ಭಗವಾನ್ ಸಿಂಗ್, ಪಾಕಿಸ್ತಾನದ ಪ್ರಧಾನಿ ಇಮ್ರಾನ್ ಖಾನ್ ಹಾಗೂ ಪಾಕಿಸ್ತಾನ ಸುಪ್ರೀಂ ಕೋರ್ಟ್ ಮುಖ್ಯನ್ಯಾಯಮೂರ್ತಿ ಆಸೀಫ್ ಸಯೀದ್ ಖೋಸ ಅವರಿಗೂ ದೂರು ನೀಡಿದ್ದಾರೆ. ಈ ವಿಚಾರ ಗೊತ್ತಾದ ಕೂಡಲೇ ಗೂಂಡಾಗಳು ಇಡೀ ಕುಟುಂಬಕ್ಕೆ ಕೊಲೆ ಬೆದರಿಕೆ ಒಡ್ಡಿದ್ದಾರೆ. ಇಷ್ಟಾದ್ರೂ ಯಾವುದೇ ಪ್ರಯೋಜನವಾಗಿಲ್ಲ. ಪಾಕ್ ಸೇನಾ ಮುಖ್ಯಸ್ಥ ಖಮರ್ ಬಾಜ್ವಾ ಅವರಿಗೂ ದೂರು ನೀಡಿರುವ ಭಗವಾನ್ ಸಿಂಗ್, ತಮಗೆ ನ್ಯಾಯ ಸಿಗದಿದ್ದರೆ ಪಾಕಿಸ್ತಾನದ ಬಹುನಿರೀಕ್ಷಿತ ಕರ್ತಾರ್ ಪುರ ಕಾರಿಡಾರ್ ಯೋಜನೆ ಮೇಲೆ ಪರಿಣಾಮ ಬೀರಲಿದೆ ಎಂದು ಎಚ್ಚರಿಕೆ ನೀಡಿದ್ದಾರೆ. ಯುವತಿಯ ಅಪಹರಣ, ಮತಾಂತರ ಹಾಗೂ ಬಲವಂತದ ಬಳಿಕ, ತಮ್ಮ ದುಷ್ಕೃತ್ಯದ ಫೋಟೋಗಳನ್ನು ಸಾಮಾಜಿಕ ಜಾಲತಾಣದಲ್ಲೂ ಹರಿಬಿಟ್ಟಿದ್ದಾರೆ. ಈ ಎಲ್ಲಾ ಬೆಳವಣಿಗೆಗಳಿಂದಾಗಿ, ಪಾಕಿಸ್ತಾನದಲ್ಲಿನ ಸಿಖ್ ಸಮುದಾಯ ರೊಚ್ಚಿಗೆದ್ದಿದೆ. ಕರ್ತಾರ್ ಪುರ ಕಾರಿಡಾರ್ ಯೋಜನೆ ಸಂಬಂಧ ನಡೆಯಲಿರುವ ಅಂತಾರಾಷ್ಟ್ರೀಯ ಸಮ್ಮೇಳನದ ವೇಳೆಯಲ್ಲೂ ಪ್ರತಿಭಟನೆ ನಡೆಸಲು ನಿರ್ಧರಿಸಿದೆ. ಅಷ್ಟೇ ಅಲ್ಲ, ಭಾರತದ ಪ್ರಧಾನಿ ನರೇಂದ್ರ ಮೋದಿ ಹಾಗೂ ವಿದೇಶಾಂಗ ಸಚಿವ ಎಸ್. ಜೈಶಂಕರ್ ಗಮನಕ್ಕೂ ತರಲಾಗಿದೆ. ಪಾಕಿಸ್ತಾನದಲ್ಲಿ ಹಿಂದೂ, ಸಿಖ್ ಹಾಗೂ ಕ್ರೈಸ್ತ ಸಮುದಾಯಕ್ಕೆ ಸೇರಿದ ಯುವತಿಯರ ಅಪಹರಣ, ಬಲವಂತದ ಮತಾಂತರ ಸರ್ವೇ ಸಾಮಾನ್ಯ ಸಂಗತಿ ಎಂಬಂತಾಗಿಬಿಟ್ಟಿದೆ. ಬಲವಂತವಾಗಿ ಮತಾಂತರ ಮಾಡುವ ದುಷ್ಕರ್ಮಿಗಳು, ಮುಸ್ಲಿಂ ಯುವಕನೊಂದಿಗೆ ಬಲವಂತದ ಮದುವೆಯನ್ನೂ ಮಾಡಿಸುತ್ತಿದ್ದಾರೆ.
from India & World News in Kannada | VK Polls https://ift.tt/2LkBasg
