ಮೈಸೂರು: ಮತ್ತೊಮ್ಮೆ ಬ್ಯಾಟಿಂಗ್‌ ವೈಫಲ್ಯಕ್ಕೊಳಗಾದ ಬೆಳಗಾವಿ ಪ್ಯಾಂಥರ್ಸ್‌ ತಂಡ ಕೆಪಿಎಲ್‌ 8ನೇ ಆವೃತ್ತಿಯ ಕ್ವಾಲಿಫೈಯರ್‌-2 ಪಂದ್ಯದಲ್ಲಿ ಹುಬ್ಬಳ್ಳಿ ಟೈಗರ್ಸ್‌ ವಿರುದ್ಧ 26 ರನ್‌ಗಳ ಸೋಲಿನೊಂದಿಗೆ ಪ್ಲೇಆಫ್‌ ಹಂತದಲ್ಲಿ ತನ್ನ ಹೋರಾಟ ಕೊನೆಗೊಳಿಸಿತು. ಹುಬ್ಬಳ್ಳಿ ತಂಡ 3ನೇ ಬಾರಿ ಫೈನಲ್‌ ಪ್ರವೇಶಿಸಿದ ಸಾಧನೆ ಮಾಡಿತು. ಇದಕ್ಕೂ ಮುನ್ನ 2015-16, 2016-17ರಲ್ಲಿ ಫೈನಲ್‌ ತಲುಪಿದ್ದ ಟೈಗರ್ಸ್‌ ಕೇವಲ ರನ್ನರ್‌ಅಪ್‌ ಸ್ಥಾನಕ್ಕೆ ತೃಪ್ತಿಪಟ್ಟಿತ್ತು. ವಿನಯ್‌ ಕುಮಾರ್‌ ನೇತೃತ್ವದ ಟೈಗರ್ಸ್‌ ಚೊಚ್ಚಲ ಪ್ರಶಸ್ತಿಗಾಗಿ ಶನಿವಾರ ನಡೆಯಲಿರುವ ಹೈವೋಲ್ಟೇಜ್‌ ಫೈನಲ್‌ ಹಣಾಹಣಿಯಲ್ಲಿ ಬಳ್ಳಾರಿ ಟಸ್ಕರ್ಸ್‌ ತಂಡವನ್ನು ಎದುರಿಸಲಿದ್ದು, ಈ ಬಾರಿಯಾದರೂ ತಂಡದ ಪ್ರಶಸ್ತಿ ಬರ ನೀಗುವುದೇ ಎಂಬುದನ್ನು ಕಾದುನೋಡಬೇಕಿದೆ. ಇಲ್ಲಿನ ಎಸ್‌ಡಿಎನ್‌ ಆರ್‌ ಒಡೆಯರ್‌ ಕ್ರೀಡಾಂಗಣದಲ್ಲಿ ಶುಕ್ರವಾರ ನಡೆದ ಕ್ವಾಲಿಫೈಯರ್‌ 2ರಲ್ಲಿ ಟಾಸ್‌ ಸೋತು ಬ್ಯಾಟಿಂಟ್‌ಗೆ ಆಹ್ವಾನ ಪಡೆದ ಹುಬ್ಬಳ್ಳಿ ತಂಡ ನಿಗದಿತ 20 ಓವರ್‌ಗಳಲ್ಲಿ ತನ್ನೆಲ್ಲಾ ವಿಕೆಟ್‌ ನಷ್ಟಕ್ಕೆ 154 ರನ್‌ ಗಳಿಸಿತು. ಬಳಿಕ ಸಾಧಾರಣ ಗುರಿ ಬೆನ್ನಟ್ಟಿದ ಪ್ಯಾಂಥರ್ಸ್‌ ಎದುರಾಳಿ ತಂಡದ ಶಿಸ್ತಿನ ದಾಳಿಗೆ ತತ್ತರಿಸಿ 19.4 ಓವರ್‌ಗಳಲ್ಲಿ ತನ್ನೆಲ್ಲಾ ವಿಕೆಟ್‌ಗೆ 128 ರನ್‌ ಗಳಿಸಲಷ್ಟೇ ಶಕ್ತಗೊಂಡಿತು. 7 ಓವರ್‌ಗಳಲ್ಲಿ ಅಗ್ರ ಕ್ರಮಾಂಕದ ಆರ್‌. ಸಮರ್ಥ್‌ (4), ಸ್ಟಾಲಿನ್‌ ಹೂವರ್‌ (12) ಮತ್ತು ಅವಿನಾಶ್‌ ಡಿ (13) ಒಳಗೊಂಡಂತೆ 32ಕ್ಕೆ 3 ವಿಕೆಟ್‌ ಕಳೆದುಕೊಂಡು ಶೋಚನೀಯ ಸ್ಥಿತಿ ತಲುಪಿದ ಪ್ಯಾಂಥರ್ಸ್‌ಗೆ ಅಭಿನವ್‌ ಮನೋಹರ್‌ (38 ರನ್‌, 33 ಎಸೆತ) ಮತ್ತು ಶುಭಾಂಗ್‌ ಹೆಗಡೆ (25 ರನ್‌ , 11 ಎಸೆತ) ಹೋರಾಟ ತೋರಿದರಾದರೂ ಇತರ ಬ್ಯಾಟ್ಸ್‌ಮನ್‌ಗಳು ಸಾಥ್‌ ನೀಡದ ಕಾರಣ ಅಲ್ಪ ಮೊತ್ತ ಬೆನ್ನಟ್ಟುವಲ್ಲಿ ಬೆಳಗಾವಿಗೆ ಸಾಧ್ಯವಾಗಲಿಲ್ಲ. ಮೊದಲ ಹತ್ತು ಓವರ್‌ಗಳಲ್ಲಿ 3 ವಿಕೆಟ್‌ಗೆ 51 ರನ್‌ಗಳಿಸಿದ್ದ ಪ್ಯಾಂಥರ್ಸ್‌ ಕೊನೆಯ 58 ಎಸೆತಗಳಲ್ಲಿ 7 ವಿಕೆಟ್‌ಗೆ 77 ರನ್‌ ಗಳಿಸಲಷ್ಟೇ ಶಕ್ತಗೊಂಡಿತು. ಟೈಗರ್ಸ್‌ ಪರ ಅಬಿಲಾಶ್‌ ಶೆಟ್ಟಿ (33ಕ್ಕೆ 3), ಶ್ರೇಯಸ್‌ ಗೋಪಾಲ್‌ (17ಕ್ಕೆ 2) ಮತ್ತು ಪ್ರವೀಣ್‌ ದುಬೆ (31ಕ್ಕೆ 2) ಶಿಸ್ತಿನ ಬೌಲಿಂಗ್‌ ನಡೆಸಿ ತಂಡಕ್ಕೆ ಸುಲಭ ಗೆಲುವು ತಂದುಕೊಟ್ಟರು. ಇದಕ್ಕೂ ಮುನ್ನ 15 ಓವರ್‌ಗಳಲ್ಲಿ 4 ವಿಕೆಟ್‌ ಕಳೆದುಕೊಂಡು 120 ರನ್‌ ಗಳಿಸಿ 200ರ ಗಡಿ ಮುಟ್ಟುವ ಸುಳಿವು ನೀಡಿದ ಟೈಗರ್ಸ್‌ ತಂಡ, ಪ್ಯಾಂಥರ್ಸ್‌ ಬೌಲರ್‌ಗಳ ಕರಾರುವಾಕ್‌ ದಾಳಿ ಮತ್ತು ಉತ್ತಮ ಫೀಲ್ಡಿಂಗ್‌ಗೆ ಕಂಗಾಲಾಗಿ ನಿಯಮಿತವಾಗಿ ವಿಕೆಟ್‌ ಕಳೆದುಕೊಂಡು ಸ್ಪರ್ಧಾತ್ಮಕ್ಕೆ ಮೊತ್ತಕ್ಕೆ ಕುಸಿದರು. ಕೊನೆಯ 30 ಎಸೆತಗಳಲ್ಲಿ ಆರು ವಿಕೆಟ್‌ಗೆ 34 ರನ್‌ ಗಳಿಸಿದ್ದು ಟೈಗರ್ಸ್‌ ಬ್ಯಾಟಿಂಗ್‌ ವೈಫಲ್ಯಕ್ಕೆ ಕೈಗನ್ನಡಿಯಾದರೆ, ಪ್ಯಾಂಥರ್ಸ್‌ ತಂಡದ ಬೌಲಿಂಗ್‌ ಪರಾಕ್ರಮಕ್ಕೆ ಸಾಕ್ಷಿಯಾಯಿತು. ಅದರಲ್ಲೂ ಬೆಳಗಾವಿ ಪರ ಮಿಂಚಿದ ಶ್ರೀಶ ಆಚಾರ್‌ 34ಕ್ಕೆ 3 ವಿಕೆಟ್‌ ಉರುಳಿಸಿದರೆ, ರಿತೇಶ್‌ ಭಟ್ಕಳ್‌ 26ಕ್ಕೆ 2 ವಿಕೆಟ್‌ಗಳನ್ನು ತಮ್ಮ ಖಾತೆಗೆ ಸೇರಿಸಿಕೊಂಡರು. ತಾಹ ಮಿಂಚಿನ ಅರ್ಧಶತಕ ಆರಂಭಿಕ ಬ್ಯಾಟ್ಸ್‌ಮನ್‌ ಮೊಹಮ್ಮದ್‌ ತಾಹ ಅಬ್ಬರದ ಬ್ಯಾಟಿಂಗ್‌ ನಡೆಸಿ ಕೇವಲ 30 ಎಸೆತಗಳಲ್ಲಿ ಅರ್ಧಶತಕ ಪೂರೈಸಿದರು. ಇದಕ್ಕೂ ಮುನ್ನ ಪ್ಯಾಂಥರ್ಸ್‌ ತಂಡದ ವಿರುದ್ಧವೇ 75 ರನ್‌ ಗಳಿಸಿದ್ದರು. 2ನೇ ವಿಕೆಟ್‌ಗೆ ವಿನಯ್‌ ಜತೆ 27 ಎಸೆತಗಳಲ್ಲಿ 40 ರನ್‌ ಕಾಣಿಕೆ ನೀಡಿದ ತಾಹ, ಅಂತಿಮವಾಗಿ 44 ಎಸೆತಗಳಲ್ಲಿ 9 ಫೋರ್‌, 1 ಸಿಕ್ಸರ್‌ ಒಳಗೊಂಡ 63 ರನ್‌ಗಳಿಗೆ ಪೂರ್ಣ ವಿರಾಮ ಹಾಕಿದರು. ಸಂಕ್ಷಿಪ್ತ ಸ್ಕೋರ್‌ ಹುಬ್ಬಳ್ಳಿ ಟೈಗರ್ಸ್‌ - 20 ಓವರ್‌ಗಳಲ್ಲಿ 154 (ಮೊಹಮ್ಮದ್‌ ತಾಹ 63, ಕೆ.ಬಿ. ಪವನ್‌ 31, ಪ್ರವೀಣ್‌ ದುಬೆ 29, ಶ್ರೀಶ 34ಕ್ಕೆ 3, ರಿತೇಶ್‌ ಭಟ್ಕಳ್‌ 26ಕ್ಕೆ 2) . ಬೆಳಗಾವಿ ಪ್ಯಾಂಥರ್ಸ್‌ - 19.2 ಓವರ್‌ಗಳಲ್ಲಿ 128 (ಅಭಿನವ್‌ ಮನೋಹರ್‌ 38, ಅವಿನಾಶ್‌ 13, ಸ್ಟಾಲಿನ್‌ ಹೂವರ್‌ 12, ಶುಭಾಂಗ್‌ ಹೆಗಡೆ 25, ಅಭಿಲಾಶ್‌ ಶೆಟ್ಟಿ 33ಕ್ಕೆ 3, ಶ್ರೇಯಸ್‌ ಗೋಪಾಲ್‌ 17ಕ್ಕೆ 2, ಪ್ರವೀಣ್‌ ದುಬೆ 31ಕ್ಕೆ 2).
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2Ps96ss
