ಮೈಸೂರು: ಬಳ್ಳಾರಿ ತಂಡದ ಸಂಘಟಿತ ಬೌಲಿಂಗ್‌ ನಿರ್ವಹಣೆಗೆ ಬೆಚ್ಚಿಬಿದ್ದ ಬೆಳಗಾವಿ ಪ್ಯಾಂಥರ್ಸ್ ತಂಡ ಕೆಪಿಎಲ್‌ 8ನೇ ಆವೃತ್ತಿಯ ಕ್ವಾಲಿಫೈಯರ್‌-1 ಪಂದ್ಯದಲ್ಲಿ 37 ರನ್‌ಗಳಿಂದ ಸೋತು ನೇರವಾಗಿ ಫೈನಲ್‌ ಪ್ರವೇಶಿಸುವ ಅವಕಾಶ ಕಳೆದುಕೊಂಡಿತು. ದೊರಕಿದ ಅವಕಾಶವನ್ನು ಎರಡೂ ಕೈಗಳಿಂದ ಬಾಚಿಕೊಂಡ ಸಿಎಂ ಗೌತಮ್ ಬಳಗ 2ನೇ ಬಾರಿ ಫೈನಲ್‌ಗೆ ಲಗ್ಗೆಯಿಟ್ಟಿತು. 2016ರಲ್ಲಿ ಟಸ್ಕರ್ಸ್ ಚಾಂಪಿಯನ್‌ ಆಗಿತ್ತು. ಇಲ್ಲಿನ ಶ್ರೀಕಂಠದತ್ತ ನರಸಿಂಹ ರಾಜ ಒಡೆಯರ್‌ ಕ್ರೀಡಾಂಗಣದಲ್ಲಿ ಬುಧವಾರ ನಡೆದ ಹಣಾಹಣಿಯಲ್ಲಿ ಟಾಸ್‌ ಗೆದ್ದು ಮೊದಲು ಬ್ಯಾಟಿಂಗ್ ಮಾಡಿದ ಟಸ್ಕರ್ಸ್ ನಿಗದಿತ 20 ಓವರ್‌ಗಳಲ್ಲಿ 7 ವಿಕೆಟ್‌ಗೆ 201 ರನ್‌ ಗಳಿಸಿತು. ಬಳಿಕ ಬೃಹತ್‌ ಗುರಿ ಬೆನ್ನಟ್ಟಿದ ಬೆಳಗಾವಿ ತಂಡ 20 ಓವರ್‌ಗಳಲ್ಲಿ 7 ವಿಕೆಟ್‌ಗೆ 164 ರನ್‌ ಗಳಿಸಲಷ್ಟೇ ಶಕ್ತಗೊಂಡಿತು. ಆದರೆ ಈ ಸೋಲಿನಿಂದ ಪ್ಯಾಂಥರ್ಸ್ ಫೈನಲ್‌ ಹಾದಿ ಮುಚ್ಚಿಲ್ಲ. ಈ ಬಾರಿ ನೂತನವಾಗಿ ಪರಿಚಯಿಸಲಾಗಿರುವ ನಿಯಮದನ್ವಯ, ಕ್ವಾಲಿಫೈಯರ್‌-2 ಪಂದ್ಯದ ಮೂಲಕ ಪ್ರಶಸ್ತಿ ಸುತ್ತಿಗೇರುವ ಅವಕಾಶ ಹೊಂದಿದೆ. ಇಂದು (ಗುರುವಾರ) ಹುಬ್ಬಳ್ಳಿ ಟೈಗರ್ಸ್‌ ಮತ್ತು ಶಿವಮೊಗ್ಗ ಲಯನ್ಸ್‌ ನಡುವಣ ಎಲಿಮಿನೇಟರ್‌ ಪಂದ್ಯದ ವಿಜೇತರ ವಿರುದ್ಧ ಶುಕ್ರವಾರ ಪ್ಯಾಂಥರ್ಸ್ ಆಡಲಿದ್ದು, ಅಂದು ಗೆದ್ದರೆ ಫೈನಲ್‌ ಪ್ರವೇಶಿಸಲಿದೆ. ಸ್ಟಾಲಿನ್‌ ಹೂವರ್‌ (39), ಅಭಿನವ್‌ ಮನೋಹರ್‌ (ಅಜೇಯ 62 ರನ್‌, 39 ಎಸೆತ) ಮತ್ತು ಅವಿನಾಶ್‌ ಡಿ (31) ಹೊರತುಪಡಿಸಿ ಉಳಿದ ಯಾವುದೇ ಬ್ಯಾಟ್ಸ್‌ಮನ್‌ಗಳು ಟಸ್ಕರ್ಸ್ ದಾಳಿಯನ್ನು ಎದುರಿಸುವ ಧೈರ್ಯ ತೋರಲಿಲ್ಲ. ಪ್ಯಾಂಥರ್ಸ್ ಬ್ಯಾಟಿಂಗ್ ಶಕ್ತಿಯಾಗಿದ್ದ ಮನೀಶ್‌ ಪಾಂಡೆ ಅನುಪಸ್ಥಿತಿ ತಂಡವನ್ನು ಬಹುವಾಗಿ ಕಾಡಿತು. ಪ್ರಸಕ್ತ ಟೂರ್ನಿಯಲ್ಲಿ ಟಸ್ಕರ್ಸ್ ವಿರುದ್ಧ ಪ್ಯಾಂಥರ್ಸ್‌ಗೆ ಎದುರಾದ 2ನೇ ಸೋಲು ಇದಾಗಿದೆ. ಲೀಗ್‌ ಹಂತದಲ್ಲಿ ಬಳ್ಳಾರಿ ವಿರುದ್ಧ ಅಬ್ಬಾಸ್‌ ಬಳಗ 5 ರನ್‌ಗಳಿಂದ ಸೋಲುಂಡಿತ್ತು. ಬಳ್ಳಾರಿ ಪರ ಕೆ.ಪಿ. ಅಪ್ಪಣ್ಣ ಗರಿಷ್ಠ 2 ವಿಕೆಟ್‌ ಉರುಳಿಸಿದರು. ಇದಕ್ಕೂ ಮುನ್ನ ಪಂದ್ಯದ ಆರಂಭದಿಂದ ಕೊನೆಯವರೆಗೂ ಸ್ಫೋಟಕ ಬ್ಯಾಟಿಂಗ್‌ನಿಂದ ಪ್ರೇಕ್ಷ ಕರಿಗೆ ರಸದೌತಣ ಉಣಬಡಿಸಿದ ಸಿಎಂ ಗೌತಮ್ ಕೇವಲ 4 ರನ್‌ಗಳ ಕೊರತೆಯಿಂದ ಶತಕ ವಂಚಿತರಾದರು. 63 ಎಸೆತಗಳನ್ನೆದುರಿಸಿದ ಗೌತಮ್ 9 ಫೋರ್‌, 5 ಸಿಕ್ಸರ್‌ ಒಳಗೊಂಡ 96 ರನ್‌ಗಳಿಸಿ ಅಂತಿಮವಾಗಿ ಜಹೂರ್‌ ಫಾರೂಕಿಗೆ ವಿಕೆಟ್‌ ಒಪ್ಪಿಸಿದರು. ಆದಾಗ್ಯೂ 33 ವರ್ಷದ ಗೌತಮ್, ಸಿಎ ಕಾರ್ತಿಕ್‌ (25) ಜತೆ ನಾಲ್ಕನೇ ವಿಕೆಟ್‌ಗೆ 67 ರನ್‌ ಹಾಗೂ ಜೀಶನ್‌ ಅಲಿ (32 ರನ್‌, 9 ಎಸೆತ, 3 ಫೋರ್‌, 3 ಸಿಕ್ಸರ್‌) ಜತೆ 5ನೇ ವಿಕೆಟ್‌ಗೆ 49 ರನ್‌ ಪೇರಿಸಿ ತಂಡದ ಮೊತ್ತವನ್ನು 200ರ ಗಡಿ ದಾಟಿಸಿದರು. ಪ್ಯಾಂಥರ್ಸ್‌ಗೆ ಕಾಡಿದ ಸಿಎಂ ಆರಂಭದಲ್ಲೇ ಪ್ರಮುಖ ಎರಡು ವಿಕೆಟ್‌ ಕಳೆದುಕೊಂಡ ಬಳ್ಳಾರಿ ತಂಡಕ್ಕೆ ನಾಯಕ ಸಿಎಂ ಗೌತಮ್ ಆಸರೆಯಾದರು. ಬೆಳಗಾವಿ ತಂಡದ ಬೌಲರ್‌ಗಳನ್ನು ರಕ್ಷ ಣಾತ್ಮಕವಾಗಿ ಎದುರಿಸಿದ ಬಲಗೈ ಬ್ಯಾಟ್ಸ್‌ಮನ್‌ ಗೌತಮ್, ಮೂರನೇ ವಿಕೆಟ್‌ಗೆ ದೇವದತ್‌ ಪಡಿಕ್ಕಲ್‌ ಜತೆ 34 ಎಸೆತಗಳಲ್ಲಿ 49 ರನ್‌ ಸೇರಿಸಿ ಚೇತರಿಕೆ ನೀಡಿದರು. ಸ್ಟಾಲಿನ್‌ ಎಸೆದ 14ನೇ ಓವರ್‌ನ 2 ಎಸೆತವನ್ನು ಸಿಕ್ಸರ್‌ಗಟ್ಟಿದ ಗೌತಮ್ 42 ಎಸೆತಗಳಲ್ಲಿ 4 ಫೋರ್‌, 3 ಸಿಕ್ಸರ್‌ ಸಹಿತ ಪ್ರಸಕ್ತ ಟೂರ್ನಿಯಲ್ಲಿ 2ನೇ ಅರ್ಧ ಶತಕ ಪೂರೈಸಿದರು. ಇದಕ್ಕೂ ಮುನ್ನ ವಾರಿಯರ್ಸ್‌ ವಿರುದ್ಧ 92 ರನ್‌ ದಾಖಲಿಸಿದ್ದರು. ಇದೇ ಓವರ್‌ನಲ್ಲಿ ಮತ್ತೆರಡು ಫೋರ್‌ ಸಿಡಿಸಿದ ಗೌತಮ್ ಪ್ರೇಕ್ಷ ಕರ ಹರ್ಷಕ್ಕೆ ಕಾರಣರಾದರು. ಸಂಕ್ಷಿಪ್ತ ಸ್ಕೋರ್‌ ಬಳ್ಳಾರಿ ಟಸ್ಕರ್ಸ್: 20 ಓವರ್‌ಗಳಲ್ಲಿ 7 ವಿಕೆಟ್‌ಗೆ 201 (ಸಿಎಂ ಗೌತಮ್ 96, ದೇವದತ್‌ ಪಡಿಕ್ಕಲ್‌ 19, ಕಾರ್ತಿಕ್‌ ಸಿಎ 25, ಜೀಶನ್‌ ಅಲಿ ಸಯೀದ್‌ 32, ಅವಿನಾಶ್‌ ಡಿ 53ಕ್ಕೆ 2, ಜಹೂರ್‌ ಫಾರೂಕಿ 48ಕ್ಕೆ 2). ಬೆಳಗಾವಿ ಪ್ಯಾಂಥರ್ಸ್ : 20 ಓವರ್‌ಗಳಲ್ಲಿ 7 ವಿಕೆಟ್‌ಗೆ 164 (ಸ್ಟಾಲಿನ್‌ ಹೂವರ್‌ 39, ಅಭಿನವ್‌ ಮನೋಹರ್‌ 62*, ಕೆ.ಪಿ ಅಪ್ಪಣ್ಣ 26ಕ್ಕೆ 2, ಅಬ್ರಾರ್‌ ಕಾಜಿ 15ಕ್ಕೆ 1 ).
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2LidZig
