ಹೊಸದಿಲ್ಲಿ: ಅಯೋಧ್ಯೆಯ ರಾಮಜನ್ಮಭೂಮಿ-ಬಾಬರಿ ಮಸೀದಿ ಪ್ರದೇಶದ ವಿವಾದಿತ 2.77 ಎಕರೆ ಭೂಮಿಯ ಮಾಲೀಕತ್ವದ ಕುರಿತು ಗುರುವಾರದ ವಿಚಾರಣೆಯ ವೇಳೆ ಹಿಂದೂ ಕಕ್ಷಿದಾರರು 400 ವರ್ಷಗಳ ಹಿಂದಿನ ಮೊಘಲ್ ದೊರೆ ಶಹಜಹಾನ್‌ನ 'ಫರ್ಮಾನ್' ಗಳನ್ನು ಸುಪ್ರೀಂ ಕೋರ್ಟಿನಲ್ಲಿ ಉಲ್ಲೇಖಿಸಿದರು. ಕುತೂಹಲದ ಸಂಗತಿಯೆಂದರೆ, ಈ ಫರ್ಮಾನ್‌ಗಳಲ್ಲಿ ಬಾಬ್ರಿ ಮಸೀದಿಯನ್ನು ಇಸ್ಲಾಮಿಕ್ ಕಾನೂನಿನ ಅನುಸಾರ ಮಸೀದಿ ಎಂದು ಪರಿಗಣಿಸಲಾಗದು ಎಂಬ ಉಲ್ಲೇಖವಿದೆ. ರಾಮ ಜನ್ಮಸ್ಥಾನ್ ಪುನರುತ್ಥಾನ್ ಸಮಿತಿ ಪರವಾಗಿ ಹಿರಿಯ ವಕೀಲ ಪಿ.ಎನ್ ಮಿಶ್ರಾ, ಇಸ್ಲಾಮಿಕ್ ಕಾನೂನಿನ ಅನುಸಾರ ಒಂದು ಕಟ್ಟಡವನ್ನು ಮಸೀದಿ ಎಂದು ಪರಿಗಣಿಸಬೇಕಾದರೆ, ಸಂಪೂರ್ಣವಾಗಿ ಅಲ್ಲಾಹನಿಗೆ ಸಮರ್ಪಿತವಾದ ವ್ಯಕ್ತಿಯೊಬ್ಬನ ಮಾಲೀಕತ್ವದ ಜಾಗದಲ್ಲಿ ಕಟ್ಟಿಸಿದ ಕಟ್ಟಡವಾಗಿರಬೇಕು ಎಂದು ವಾದಿಸಿದರು. ಯಾವತ್ತೂ ಮಸೀದಿ ಎಂದು ಪರಿಗಣಿಸಿಯೇ ಇರದ ಕಟ್ಟಡವನ್ನು ಇನ್ನೊಂದು ಸಮುದಾಯದ ಧಾರ್ಮಿಕ ಕೇಂದ್ರವನ್ನು ನಾಶಪಡಿಸಿದ ಬಳಿಕ ಇತರರ ಮಾಲೀಕತ್ವದ ಜಾಗದಲ್ಲಿ ಬಲವಂತವಾಗಿ ಕಟ್ಟಲಾಗಿತ್ತು ಎಂದು ಹೇಳಿದರು. 2010ರ ಅಲಹಾಬಾದ್ ಹೈಕೋರ್ಟ್ ತೀರ್ಪಿನ ಕೆಲವು ಭಾಗಗಳನ್ನು ಓದಿ ಹೇಳಿದ ಮಿಶ್ರಾ, ರಾಮ್‌ ಲಲ್ಲಾ, ನಿರ್ಮೋಹಿ ಆಖಾಡ ಮತ್ತು ಸುನ್ನಿ ವಕ್ಫ್ ಬೋರ್ಡ್‌ಗೆ ವಿವಾದಿತ ಭೂಮಿಯನ್ನು ಹಂಚಿಕೊಡಲಾಗಿತ್ತು ಎಂದರು. ಮೊಘಲ್ ದೊರೆ ಬಾಬರ್ ಅಥವಾ ಆತನ ದಂಡನಾಯಕ ಮೀರ್ ಬಾಕಿ ಮಸೀದಿ ನಿರ್ಮಾಣಕ್ಕೆಂದು ನಿಗದಿಪಡಿಸಿದ ಸ್ಥಳದಲ್ಲಿ ಬಾಬ್ರಿ ಮಸೀದಿ ನಿರ್ಮಾಣವಾಗಿದೆ ಎಂಬುದಕ್ಕೆ ಯಾವ ಸಾಕ್ಷ್ಯಾಧಾರಗಳೂ ಇಲ್ಲ ಎಂದು ಮಿಶ್ರಾ ವಾದಿಸಿದರು. ವಿವಾದಿತ ಕಟ್ಟಡವನ್ನು 1528ರಲ್ಲಿ ಕಟ್ಟಲಾಗಿತ್ತು ಎಂದು ನಂಬಲಾಗಿದೆ. ಮುಖ್ಯ ನ್ಯಾಯಮೂರ್ತಿ ರಂಜನ್ ಗೊಗೋಯ್, ಎಸ್,ಎ ಬೊಬ್ಡೆ, ಡಿವೈ ಚಂದ್ರಚೂಡ್, ಅಶೋಕ್‌ ಭೂಷಣ್‌ ಮತ್ತು ಎಸ್. ಅಬ್ದುಲ್ ನಜೀರ್ ಅವರನ್ನೊಳಗೊಂಡ ನ್ಯಾಯಪೀಠ, 'ನಾವೀಗ ವಿವಾದಿತ ಕಟ್ಟಡದ ಬಗ್ಗೆ ಮಾತನಾಡೋಣ. ಭೂಮಿಯ ಮಾಲೀಕರು ಆ ಭೂಮಿಯನ್ನು ಮಸೀದಿ ನಿರ್ಮಾಣಕ್ಕೆಂದು ನಿಗದಿಪಡಿಸಿದ್ದರೆ ಎಂದು ನೀವು ಪ್ರಶ್ನಿಸುತ್ತಿದ್ದೀರಿ. ಆದರೆ 1992ರಲ್ಲಿ (ಕಟ್ಟಡ ಧ್ವಂಸದ ವೇಳೆ) ಅಲ್ಲಿ ಒಂದು ಮಸೀದಿ ಇತ್ತು' ಎಂದು ಹೇಳಿತು. ಆಗ ಉತ್ತರಿಸಿದ ಮಿಶ್ರಾ, 'ಶಹಜಹಾನ್ ನ ಫರ್ಮಾನ್‌ಗಳು ನನ್ನ ವಾದವನ್ನು ಪುಷ್ಟೀಕರಿಸುತ್ತವೆ. ಆ ಕಟ್ಟಡವನ್ನು ಎಂದೂ ಮಸೀದಿಯೆಂದು ಪರಿಗಣಿಸಿರಲಿಲ್ಲ. ಮುಸ್ಲಿಮರು ಮಸೀದಿಯನ್ನು ತೊರೆದಿದ್ದು, ಅಲ್ಲಿ ದಿನಕ್ಕೆರಡು ಬಾರಿ ಪ್ರಾರ್ಥನೆ ಮಾಡುತ್ತಿರಲಿಲ್ಲ. ಒಂದು ಕಟ್ಟಡ ಮಸೀದಿಯೆಂದು ಪರಿಗಣಿತವಾಗಬೇಕಾದರೆ ಕನಿಷ್ಠ ಪಕ್ಷ ಅಲ್ಲಿ ದಿನಕ್ಕೆರಡು ಬಾರಿ ಪ್ರಾರ್ಥನೆ ನಡೆಯುತ್ತಿರಬೇಕು. ಆದರೆ ತದ್ವಿರುದ್ಧವಾಗಿ ಹಿಂದೂಗಳು ಶತಮಾನಗಳಿಂದ ಅಲ್ಲಿ ರಾಮನನ್ನು ಪೂಜೆ ಮಾಡುತ್ತಿದ್ದಾರೆ. ಇಸ್ಲಾಮಿಕ್ ಕಾನೂನಿನ ಪ್ರಕಾರ, ಒಂದು ಮಸೀದಿ ಮತ್ತು ದೇವಸ್ಥಾನ ಒಟ್ಟಿಗೆ ಇರಲು ಸಾಧ್ಯವೇ ಇಲ್ಲ' ಎಂದು ವಾದಿಸಿದರು. ಶಹಜಹಾನ್ ಹೊರಡಿಸಿದ್ದ ಫರ್ಮಾನ್‌ಗಳ ವಿವರವನ್ನು ಮಿಶ್ರಾ ಕೋರ್ಟಿಗೆ ಸಲ್ಲಿಸಿದರು. ಮೊದಲ ಫರ್ಮಾನ್ 1648ರ ಆಗಸ್ಟ್‌ 3ರಂದು ಹೊರಡಿಸಲಾಗಿತ್ತು. ಶಹಜಹಾನ್‌ನ ಪುತ್ರ ಹಾಗೂ ಗುಜರಾತ್ ಆಡಳಿತಗಾರನಾಗಿದ್ದ ಔರಂಗಜೇಬ್ ಅಯೋಧ್ಯೆಯ ಸತಿ ದಾಸ್ ಜವಾಹರಿ ಎಂಬವರಿಗೆ ಸೇರಿದ ಒಂದು ದೇವಸ್ಥಾನವನ್ನು ಮಸೀದಿಯಾಗಿ ಪರಿವರ್ತಿಸಿದ ಎಂದು ಮೊದಲ ಫರ್ಮಾನ್ ಹೇಳುತ್ತದೆ. ಹೊಸದಾಗಿ ನಿರ್ಮಿಸಿದ ಮಸೀದಿಯಿಂದ ಫಕ್ರಿಗಳನ್ನು ತೆರವುಗೊಳಿಸಿದ ಔರಂಗಜೇಬ್, ಸತಿ ದಾಸ್ ನಿರ್ಮಿಸಿದ ಕಟ್ಟಡದ ಆವರಣಕ್ಕೆ ಬಂದು ಅಲ್ಲಿ ಪ್ರಾರ್ಥನೆ ನೆರವೇರಿಸಲು ಸಂಪೂರ್ಣ ಸ್ವಾತಂತ್ರ್ಯವಿರುವುದಾಗಿ ಘೋಷಿಸಿದ್ದ. ಆದರೆ ಇದು ಮತ್ತೊಂದು ಧರ್ಮಾವಲಂಬಿಯಾದ ವ್ಯಕ್ತಿಗೆ ಸೇರಿದ ಜಾಗದಲ್ಲಿರುವ ಕಟ್ಟಡವಾಗಿರುವುದರಿಂದ ಇಸ್ಲಾಮಿಕ್ ಕಾನೂನು ಪ್ರಕಾರ ಮಸೀದಿಯೆಂದು ಪರಿಗಣಿಸಲಾಗದು' ಎಂದು ಮಿಶ್ರಾ ಪ್ರತಿಪಾದಿಸಿದರು. ಪುರಾತನ ಹಿಂದೂ ದೇವಾಲಯವನ್ನು ಧ್ವಂಸಗೊಳಿಸಿ ಅದರ ಅವಶೇಷಗಳ ಮೇಲೆ ಬಾಬ್ರಿ ಮಸೀದಿ ಕಟ್ಟಿರುವುದು ನಿಜವಾದರೆ ಅದನ್ನು ಮಸೀದಿ ಎಂದು ಪರಿಗಣಿಸುವುದು ಹೇಗೆ ಎಂದು ಮಿಶ್ರಾ ಪ್ರಶ್ನಿಸಿದರು. ರಾಜಾ ಜೈಸಿಂಗ್‌ನ ಭೂಮಿಯನ್ನು ಸ್ವಾಧೀನ ಪಡಿಸಿಕೊಂಡು ತಾಜ್‌ಮಹಲ್‌ನ ವಕ್ಫ್ ಮಂಡಳಿ ರಚನೆಗೆ 1633-34ರಲ್ಲಿ ಹೊರಡಿಸಲಾದ ಇನ್ನೊಂದು ಫರ್ಮಾನ್ ಅನ್ನೂ ಮಿಶ್ರಾ ಉಲ್ಲೇಖಿಸಿದರು. ಆಗಿನ ದೊರೆ, ಸ್ವಾಧೀನ ಪಡಿಸಿದ ಭೂಮಿಗೆ ಬದಲಾಗಿ ಸಾಕಷ್ಟು ಬೇರೆ ಭೂಮಿಯನ್ನು ರಾಜಾ ಜೈಸಿಂಗ್‌ಗೆ ಪರಿಹಾರವಾಗಿ ನೀಡಿದ್ದ. ಮಂದಿರವಿದ್ದ ಭೂಮಿಯ ಮಾಲೀಕತ್ವವನ್ನು ಬಾಬರ್ ಅಥವಾ ಮೀರ್ ಬಾಕಿ ಹೊಂದಿರಲಿಲ್ಲ, ಮಂದಿರ ಕೆಡವಿ ನಿರ್ಮಿಸಿದ ಕಟ್ಟಡವನ್ನು ಮಸೀದಿಯೆಂದು ಹೇಳಲಾಗದು. ಅಲ್ಲದೆ ಅದಕ್ಕೆ ವಕ್ಫ್ ಮಂಡಳಿಯೂ ಇರಲಿಲ್ಲ ಎಂದು ಮಿಶ್ರಾ ಹೇಳಿದರು. ಹಿಂದೂ ಕಕ್ಷಿದಾರರು ತಮ್ಮ ವಾದವನ್ನು ಶುಕ್ರವಾರ ಮುಗಿಸಲಿದ್ದು, ಮುಸ್ಲಿಂ ಕಕ್ಷಿದಾರರು ಸೋಮವಾರ ಮುಕ್ತಾಯಗೊಳಿಸಲಿದ್ದಾರೆ.
from India & World News in Kannada | VK Polls https://ift.tt/34aWFEF
