ಕಿಂಗ್‌ಸ್ಟನ್‌ (ಜಮೈಕಾ): ಆತಿಥೇಯ ವೆಸ್ಟ್‌ ಇಂಡೀಸ್‌ ತಂಡದ ವಿರುದ್ಧ ಮೊದಲ ಟೆಸ್ಟ್‌ನಲ್ಲಿ ದೊಡ್ಡ ಅಂತರದ ಗೆಲುವು ಸಾಧಿಸಿರುವ ವಿರಾಟ್‌ ಕೊಹ್ಲಿ ನೇತೃತ್ವದ ಭಾರತ ತಂಡ, ಸರಣಿಯ 2ನೇ ಹಾಗೂ ಕೊನೆಯ ಪಂದ್ಯದಲ್ಲೂ ವಿಕ್ರಮ ಸಾಧಿಸಿ ಜೇಸನ್‌ ಹೋಲ್ಡರ್‌ ಬಳಗವನ್ನು ವೈಟ್‌ವಾಶ್‌ ಮಾಡುವ ಉಮೇದಿನಲ್ಲಿದೆ. ಕಿಂಗ್‌ಸ್ಟನ್‌ನ ಸಬಿನಾ ಪಾರ್ಕ್‌ ಸ್ಟೇಡಿಯಮ್‌ನಲ್ಲಿ ಶುಕ್ರವಾರ ಎರಡನೇ ಟೆಸ್ಟ್ ಶುರುವಾಗಲಿದೆ. ಇದು ಭಾರತದ ಪಾಲಿಗೆ ವಿಶ್ವ ಟೆಸ್ಟ್ ಚಾಂಪಿಯನ್‌ಷಿಪ್‌ನಲ್ಲೂ ಎರಡನೆಯ ಪಂದ್ಯವಾಗಿರುವ ಕಾರಣ ಸತತ ಜಯದ ಇರಾದೆ ಹೊಂದಿದೆ. ಪ್ರವಾಸಿ ಭಾರತ ತಂಡ ಕೆರಿಬಿಯನ್‌ ದ್ವೀಪದಲ್ಲಿ ಅದ್ವಿತೀಯ ಪ್ರದರ್ಶನ ನೀಡುತ್ತಿದ್ದು, 'ವಿಶ್ವ ಕ್ರಿಕೆಟ್‌ನ ಬಾಸ್‌' ಎಂಬುದನ್ನು ಮತ್ತೆ ಮತ್ತೆ ಸಾಬೀತು ಮಾಡುತ್ತಲೇ ಇದೆ. ಭಾರತೀಯ ಆಟಗಾರರಿಂದ ಇದೇ ಮಾದರಿಯ ಆಟವನ್ನು ಎರಡನೇ ಟೆಸ್ಟ್‌ನಲ್ಲೂ ನಿರೀಕ್ಷಿಸಬಹುದು. ಬ್ಯಾಟಿಂಗ್‌ನಲ್ಲಿ ಭಾರತ ಬಲಿಷ್ಠವಾಗಿದ್ದು, ಆರಂಭಿಕರನ್ನು ಹೊರತುಪಡಿಸಿ ಉಳಿದವರು ಅತ್ಯುತ್ತಮ ಫಾರ್ಮ್‌ನಲ್ಲಿದ್ದಾರೆ. ಬೌಲಿಂಗ್‌ ವಿಭಾಗದ ಯಶಸ್ಸಿನ ಬಗ್ಗೆ ಎರಡು ಮಾತಿಲ್ಲ. ಜಸ್‌ಪ್ರಿತ್‌ ಬುಮ್ರಾರ ಉರಿಚೆಂಡುಗಳು ವಿಂಡೀಸ್‌ ಬ್ಯಾಟಿಂಗ್‌ ಬೆನ್ನೆಲುಬಿಗೇ ಪೆಟ್ಟು ನೀಡುತ್ತಿವೆ. ಶಮಿಯ ಎಸೆತಗಳು ಆತಿಥೇಯ ಬ್ಯಾಟ್ಸ್‌ಮನ್‌ಗಳನ್ನು ತಬ್ಬಿಬ್ಬುಗೊಳಿಸುತ್ತಿವೆ. ಇಶಾಂತ್‌ ಶರ್ಮರ ಬೌಲಿಂಗ್‌ ಹಿಂದೆಂದಿಗಿಂತ ಹರಿತವಾಗಿದೆ. ಆಲ್‌ರೌಂಡ್‌ ಪ್ರದರ್ಶನ ರವೀಂದ್ರ ಜಡೇಜಾ ತಾವು ಎಲ್ಲ ಮಾದರಿಗೂ ಫಿಟ್‌ ಎಂಬುದನ್ನು ಮೊದಲ ಟೆಸ್ಟ್‌ನಲ್ಲಿ ತೋರಿಸಿಕೊಟ್ಟಿದ್ದಾರೆ. ಮೊದಲ ಇನಿಂಗ್ಸ್‌ನಲ್ಲಿ ಅಗತ್ಯ ಸಂದರ್ಭದಲ್ಲಿ ರನ್‌ ಕ್ರೋಡೀಕರಿಸುವ ಜತೆಗೆ ವಿಕೆಟ್‌ಗಳನ್ನೂ ಪಡೆದಿದ್ದಾರೆ. ನಾಯಕ ವಿರಾಟ್‌ ಕೊಹ್ಲಿ, ಉಪನಾಯಕ ಅಜಿಂಕ್ಯ ರಹಾನೆ, ಯುವ ಪ್ರತಿಭೆ ಹನುಮ ವಿಹಾರಿ ಸೇರಿದಂತೆ ತಂಡದ ಹೆಚ್ಚಿನೆಲ್ಲ ಆಟಗಾರರು ಪ್ರಚಂಡ ಫಾರ್ಮ್‌ನಲ್ಲಿದ್ದು, 2ನೇ ಟೆಸ್ಟ್‌ನಲ್ಲಿ ಅವರಿಂದ ಮತ್ತೊಮ್ಮೆ ಅಂಥದ್ದೇ ಪ್ರದರ್ಶನ ಮೂಡಿಬರುವ ಎಲ್ಲ ಸಾಧ್ಯತೆಗಳಿವೆ. ಇನ್ನು ಆತಿಥೇಯ ತಂಡದ ಬಗ್ಗೆ ಹೇಳುವುದಾದರೆ, ಬಲಿಷ್ಠ ಭಾರತ ತಂಡವನ್ನು ಸೋಲಿಸಬೇಕಾದರೆ, ಜೇಸನ್‌ ಹೋಲ್ಡರ್‌ ನಾಯಕತ್ವದ ವಿಂಡೀಸ್‌ ತಂಡ ಶತಪ್ರಯತ್ನವನ್ನೇ ಮಾಡಬೇಕಿದೆ. ತಂಡಗಳು ಭಾರತ: ವಿರಾಟ್‌ ಕೊಹ್ಲಿ (ನಾಯಕ), ಅಜಿಂಕ್ಯ ರಹಾನೆ (ಉಪನಾಯಕ), ಮಯಾಂಕ್‌ ಅಗರ್ವಾಲ್‌, ಕೆ.ಎಲ್‌ ರಾಹುಲ್‌, ಚೇತೇಶ್ವರ ಪೂಜಾರ, ಹನುಮ ವಿಹಾರಿ, ರೋಹಿತ್‌ ಶರ್ಮ, ರಿಷಭ್‌ ಪಂತ್‌, ವೃದ್ಧಿಮಾನ್‌ ಸಾಹ, ರವಿಚಂದ್ರನ್‌ ಅಶ್ವಿನ್‌, ರವೀಂದ್ರ ಜಡೇಜಾ, ಕುಲ್ದೀಪ್‌ ಯಾದವ್‌, ಇಶಾಂತ್‌ ಶರ್ಮ, ಮೊಹಮ್ಮದ್‌ ಶಮಿ, ಜಸ್‌ಪ್ರಿತ್‌ ಬುಮ್ರಾ, ಉಮೇಶ್‌ ಯಾದವ್‌. ವೆಸ್ಟ್‌ ಇಂಡೀಸ್‌: ಜೇಸನ್‌ ಹೋಲ್ಡರ್‌ (ನಾಯಕ), ಕ್ರೇಗ್‌ ಬ್ರಾತ್‌ವೇಟ್‌, ಡರೇನ್‌ ಬ್ರಾವೊ, ಶಮಾರ್‌ ಬ್ರೂಕ್ಸ್‌, ಜಾನ್‌ ಕ್ಯಾಂಬೆಲ್‌, ರಾಸ್ಟನ್‌ ಚೇಸ್‌, ರಖೀಮ್‌ ಕಾರ್ನ್‌ವಾಲ್‌, ಜಹ್‌ಮರ್‌ ಹ್ಯಾಮಿಲ್ಟನ್‌, ಶ್ಯಾನನ್‌ ಗ್ಯಾಬ್ರಿಯಲ್‌, ಶಿಮ್ರಾನ್‌ ಹೆಟ್ಮಾಯರ್‌, ಶಾಯ್‌ ಹೋಪ್‌, ಕಿಮೊ ಪಾಲ್‌, ಕೆಮರ್‌ ರೋಚ್‌. ಇನ್ನೊಂದು ಗೆಲುವು ಬೇಕು: ನಾಯಕನಾಗಿ ಇಲ್ಲಿಯ ತನಕ 27 ಟೆಸ್ಟ್ ಪಂದ್ಯಗಳನ್ನು ಜಯಿಸಿರುವ ವಿರಾಟ್‌ ಕೊಹ್ಲಿ, ಅತಿ ಹೆಚ್ಚು ಟೆಸ್ಟ್ ಜಯಿಸಿದ ಭಾರತ ತಂಡದ ನಾಯಕರ ಪಟ್ಟಿಯಲ್ಲಿ ಪ್ರಸ್ತುತ ಮಾಜಿ ನಾಯಕ ಧೋನಿ ಜತೆ ಜಂಟಿ ಅಗ್ರ ಸ್ಥಾನದಲ್ಲಿದ್ದಾರೆ. ಇನ್ನೊಂದು ಟೆಸ್ಟ್ ಜಯಿಸಿದಲ್ಲಿ ಕೊಹ್ಲಿ ಅಗ್ರ ಸ್ಥಾನಕ್ಕೇರಲಿದ್ದಾರೆ. ಔತಣ ಕೂಟ: ವಿಂಡೀಸ್‌ ಪ್ರವಾಸದಲ್ಲಿರುವ ಭಾರತ ಕ್ರಿಕೆಟ್ ತಂಡಕ್ಕೆ ವೆಸ್ಟ್‌ ಇಂಡೀಸ್‌ನಲ್ಲಿರುವ ಭಾರತದ ಹೈಕಮಿಷನರ್‌ ಸೇವಲ್‌ ನಾಯ್ಕ್‌ ಗುರುವಾರ ಔತಣ ಕೂಟ ಏರ್ಪಡಿಸಿದ್ದರು. ಟೀಮ್‌ ಇಂಡಿಯಾದ ಎಲ್ಲ ಆಟಗಾರರು ಅದರಲ್ಲಿ ಪಾಲ್ಗೊಂಡಿದ್ದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/32cQ0rF
