ಹೊಸದಿಲ್ಲಿ: ಪ್ರತಿಷ್ಠಿತ ಅಮೆರಿಕನ್ ಓಪನ್ ಗ್ರ್ಯಾನ್ ಸ್ಲಾಮ್ ಟೆನಿಸ್ ಟೂರ್ನಮೆಂಟ್‌ನಲ್ಲಿ 20 ಬಾರಿಯ ಗ್ರ್ಯಾನ್ ಸ್ಲಾಮ್ ಚಾಂಪಿಯನ್ ಸ್ವಿಜರ್ಲೆಂಡ್‌ನ ಚಾಂಪಿಯನ್ ಆಟಗಾರ ರೋಜರ್ ಫೆಡರರ್‌ಗೆ ಸಡ್ಡು ನೀಡಿರುವ ಭಾರತದ ಯುವ ಪ್ರತಿಭಾವಂತ ಟೆನಿಸ್ ಪಟು ಭಾರಿ ಸುದ್ದಿ ಮಾಡಿದ್ದಾರೆ. ಹರಿಯಾಣ ಮೂಲದ ಈ 22ರ ಹರೆಯದ ಯುವ ಟೆನಿಸ್ ಪಟು ಮೊದಲ ಸೆಟ್ ಅನ್ನು 6-6ರ ಅಂತರದಲ್ಲಿ ವಶಪಡಿಸಿಕೊಳ್ಳುವ ಮೂಲಕ ಅಚ್ಚರಿಯನ್ನು ಮೂಡಿಸಿದರು. ಆದರೆ ಕೊನೆಗೂ ಚಾಂಪಿಯನ್ ಆಟಗಾರನ ಅಪಾರ ಅನುಭವ ಸಂಪತ್ತಿನ ವಿರುದ್ದ 4-6, 6-1, 6-2, 6-4ರ ಅಂತರದಲ್ಲಿ ಸೋಲೊಪ್ಪಿಕೊಂಡರು. ಅಷ್ಟಕ್ಕೂ ಸ್ವತ: ಫೆಡರರ್ ಅವರಿಂದಲೇ ಮೆಚ್ಚುಗೆಗೆ ಪಾತ್ರವಾಗಿರುವ ಸುಮಿತ್ ಬಗ್ಗೆ ನಿಮಗೆಷ್ಟು ಗೊತ್ತು? ಇಲ್ಲಿದೆ ವಿವರ... 1997ನೇ ಇಸವಿಯಲ್ಲಿ ಆಗಸ್ಟ್ 16ರದು ಹರಿಯಾಣದ ಜೈತ್ಪುರದಲ್ಲಿ ಜನಿಸಿರುವ ಸುಮಿತ್, 2015ರ ವಿಂಬಲ್ಡನ್ ಜೂನಿಯರ್ ಡಬಲ್ಸ್‌ನಲ್ಲಿ ಪ್ರಶಸ್ತಿ ಗೆದ್ದ ಸಾಧನೆ ಮಾಡಿದ್ದರು. ಈ ಮೂಲಕ ಜೂನಿಯರ್ ಗ್ರ್ಯಾನ್‌ಸ್ಲಾಮ್ ಗೆದ್ದ ಭಾರತದ ಆರನೇ ಆಟಗಾರ ಎಂದೆನಿಸಿಕೊಂಡಿದ್ದರು. ಬಳಿಕ 2016ರಲ್ಲಿ ಹೊಸದಿಲ್ಲಿಯಲ್ಲಿ ಸ್ಪೇನ್ ವಿರುದ್ಧ ನಡೆದ ಡೇವಿಸ್ ಕಪ್ ವಿಶ್ವ ಗುಂಪಿನ ಪ್ಲೇ-ಆಫ್‌ನಲ್ಲಿ ಭಾರತವನ್ನು ಪ್ರತಿನಿಧಿಸಿದ್ದರು. ಅಲ್ಲಿಂದ ಬಳಿಕ 2017ರಲ್ಲಿ ಅಗ್ರಮಾನ್ಯ ಬ್ಲಾಜ್ ಕಾವ್ಸಿಕ್ ಹಾಗೂ ಯೂಕಿ ಭಾಂಬ್ರಿ ಮಣಿಸಿ ಬೆಂಗಳೂರು ಚಾಲೆಂಜರ್ ಗೆದ್ದ ಸಾಧನೆ ಮಾಡಿದ್ದರು. 2018ರಲ್ಲಿ ಜೂನಿಯರ್ ಏಷ್ಯನ್ ಗೇಮ್ಸ್‌ನಲ್ಲಿ ರನ್ನರ್ ಅಪ್ ಆಗಿದ್ದರು. ವಿವಾದ: 2016ರಲ್ಲಿ ಚಂಡೀಗಡದಲ್ಲಿ ಕುಡಿದ ಮತ್ತಿನಲ್ಲಿ ಅಭ್ಯಾಸ ಪಂದ್ಯವನ್ನು ಮಿಸ್ ಮಾಡಿಕೊಂಡಿದ್ದ ಕಾರಣಕ್ಕಾಗಿ ಭಾರತದ ಡೇವಿಸ್ ಕಪ್ ತಂಡದಿಂದ ಕೈಬಿಡಲಾಗಿತ್ತು. ಅಖಿಲ ಭಾರತ ಟೆನಿಸ್ ಫೇಡರೇಷನ್ ನಿಕಟ ಮೂಲಗಳ ಪ್ರಕಾರ ಹಲವಾರು ಅಭ್ಯಾಸ ಅವಧಿಗಳನ್ನು ಮಿಸ್ ಮಾಡುತ್ತಿದ್ದ ನಗಾಲ್ ಯಾವುದೇ ಮಾಹಿತಿಯಿಲ್ಲದೆ ಗೆಳತಿಯನ್ನು ತರಬೇತಿ ಸ್ಥಳಕ್ಕೆ ಕರೆ ತರುತ್ತಿದ್ದರು. ಇದರಿಂದಾಗಿ ಅಶಿಸ್ತಿನ ವಿರುದ್ದ ಕ್ರಮ ಕೈಗೊಳ್ಳಲಾಗಿತ್ತು. ಆದರೆ ಈ ಎಲ್ಲ ಆರೋಪಗಳನ್ನು ನಗಾಲ್ ನಿರಾಕರಿಸಿದ್ದರು. ಅಲ್ಲದೆ ಮಾಜಿ ಭಾರತೀಯ ಆಟಗಾರ ಸೋಮದೇವ್ ದೇವವರ್ಮನ್ ಬೆಂಬಲವು ದೊರಕಿತ್ತು. ಜೀವನಶ್ರೇಷ್ಠ ಎಟಿಪಿ ರ‍್ಯಾಂಕಿಂಗ್: 190 (ಪುರುಷ ಸಿಂಗಲ್ಸ್) ಫೆಡರರ್ ವಿರುದ್ಧ ಮೊದಲ ಸೆಟ್ ಗೆಲುವು... 2019 ಅಮೆರಿಕನ್ ಓಪನ್‌ನಲ್ಲಿ ವೈಲ್ಡ್ ಕಾರ್ಡ್ ಎಂಟ್ರಿ ಪಡೆದಿರುವ ನಗಾಲ್, ಫೆಡರರ್‌ಗೆ ಸಡ್ಡು ನೀಡುವ ಮೂಲಕ ಭಾರಿ ಸದ್ದು ಮಾಡಿದ್ದಾರೆ. ಮೊದಲ ಸೆಟ್ ವಶಪಡಿಸಿಕೊಳ್ಳುವ ಮೂಲಕ ಅಪಾರ ನಿರೀಕ್ಷೆಯನ್ನು ಹುಟ್ಟು ಹಾಕಿದ್ದಾರೆ. ಫೆಡರರ್ ಶಭಾಷ್‌ಗಿರಿ... ಇಲ್ಲಿ ಬಂದು ಶ್ರೇಷ್ಠ ಪ್ರದರ್ಶನ ನೀಡುವುದು ಅಷ್ಟು ಸುಲಭವಲ್ಲ. ಆದರೆ ಇದಕ್ಕಾಗಿಯೇ ಜೀವಿಸುತ್ತಿದ್ದು ಇದನ್ನೇ ಕನಸು ಕಾಣುತ್ತಿದ್ದೇವೆ. ದೊಡ್ಡ ವೇದಿಕೆಯಲ್ಲಿ ಆಡುವುದಕ್ಕಾಗಿ ಕಠಿಣ ಪರಿಶ್ರಮ ವಹಿಸುತ್ತೇವೆ. ನನಗನಿಸುತ್ತದೆ ನಗಾಲ್ ಅತ್ಯುತ್ತಮವಾಗಿಯೇ ಆಡಿದ್ದಾರೆ ಎಂದರು. ನಗಾಲ್ ಕ್ಲೇ ಕೋರ್ಟ್ ಸ್ಪೆಷಲಿಷ್ಟ್ ತರಹನೇ ಆಡಿದರು. ಸ್ಥಿರ ಪ್ರದರ್ಶನ ಮೂಲಕ ಗಮನ ಸೆಳೆಯುವಲ್ಲಿ ಯಶಸ್ವಿಯಾಗಿದ್ದಾರೆ ಎಂದು ಫೆಡರರ್ ಹಾಡಿ ಹೊಗಳಿದರು. ಅಂತಿಮವಾಗಿ ಮುಂದಿನ ದಿನಗಳಲ್ಲಿ ಮತ್ತಷ್ಟು ಅಪ್‌ಸೆಟ್‌ಗಳನ್ನು ಎದುರು ನೋಡುತ್ತಿರುವುದಾಗಿ ಸುಮಿತ್ ನಗಾಲ್ ಆತ್ಮವಿಶ್ವಾಸದ ಮಾತುಗಳನ್ನಾಡಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2HuWTwG
