ಜಮ್ಮು-ಕಾಶ್ಮೀರದ ಬದಲಾದ ಸ್ಥಾನಮಾನ: ಸಿಂಧುತ್ವ ಪರಿಶೀಲಿಸಲಿರುವ ಸಂವಿಧಾನ ಪೀಠ

ಹೊಸದಿಲ್ಲಿ: ಜಮ್ಮು ಮತ್ತು ಕಾಶ್ಮೀರದ ವಿಶೇಷ ಸ್ಥಾನಮಾನ ರದ್ದತಿ ಹಾಗೂ ಜಮ್ಮು-ಕಾಶ್ಮೀರ ಮತ್ತು ಲಡಾಖ್‌ಗಳನ್ನು ಎರಡು ಪ್ರತ್ಯೇಕ ಕೇಂದ್ರಾಡಳಿತ ಪ್ರದೇಶಗಳಾಗಿ ವಿಂಗಡಿಸಿದ ಕ್ರಮ ಪ್ರಶ್ನಿಸಿ ಸಲ್ಲಿಸಲಾದ ಅರ್ಜಿಗಳ ವಿಚಾರಣೆಯನ್ನು ಸುಪ್ರೀಂ ಕೋರ್ಟಿನ ನಡೆಸಲಿದೆ. ಬುಧವಾರ ಅರ್ಜಿಗಳನ್ನು ವಿಚಾರಣೆಗೆ ಎತ್ತಿಕೊಂಡಿರುವ ಕೋರ್ಟ್, ಕೇಂದ್ರ ಸರಕಾರ ಮತ್ತು ಜಮ್ಮು-ಕಾಶ್ಮೀರ ಆಡಳಿತಕ್ಕೆ ನೋಟಿಸ್ ಜಾರಿ ಮಾಡಿದೆ. ಮುಖ್ಯ ನ್ಯಾಯಮೂರ್ತಿ ರಂಜನ್ ಗೊಗೋಯ್ ನೇತೃತ್ವದ ಐವರು ನ್ಯಾಯಾಧೀಶರ ಸಂವಿಧಾನ ಪೀಠಕ್ಕೆ ಈ ಅರ್ಜಿಗಳ ವಿಚಾರಣೆಯನ್ನು ವಹಿಸಲಾಗಿದೆ. ಅಕ್ಟೋಬರ್‌ನಲ್ಲಿ ವಿಚಾರಣೆ ಆರಂಭವಾಗಲಿದೆ. ವಿವಾದಾತ್ಮಕ ವಿಷಯಕ್ಕೆ ಸಂಬಂಧಿಸಿದಂತೆ ಕೇಂದ್ರ ಸರಕಾರಕ್ಕೆ ನೋಟಿಸ್ ಜಾರಿ ಮಾಡದಂತೆ ಅಟಾರ್ನಿ ಜನರಲ್ ಕೆ.ಕೆ ವೇಣುಗೋಪಾಲ್ ಮತ್ತು ಸಾಲಿಸಿಟರ್ ಜನರಲ್ ತುಷಾರ್ ಮೆಹ್ತಾ ಮಾಡಿದ ಮನವಿಗಳನ್ನು ಕೋರ್ಟ್ ತಿರಸ್ಕರಿಸಿತು. 'ಅರ್ಜಿಗಳ ಪ್ರತಿಗಳನ್ನು ಪಡೆದುಕೊಂಡ ಬಳಿಕ ನಮ್ಮ ಪ್ರತಿಕ್ರಿಯೆ ಸಲ್ಲಿಸುತ್ತೇವೆ. ಆದರೆ ದಯವಿಟ್ಟು ನೋಟಿಸ್ ಜಾರಿ ಮಾಡಬೇಡಿ. ಕೇಂದ್ರ ಸರಕಾರ ತನ್ನ ಪ್ರತಿಕ್ರಿಯೆ ಸಲ್ಲಿಸಿದ ಬಳಿಕ, ಈ ಅರ್ಜಿಗಳ ವಿಚಾರಣೆಗೆ ಯೋಗ್ಯವೆ ಕೋರ್ಟ್ ತೀರ್ಮಾನಿಸಬಹುದು. ನೋಟಿಸ್ ಜಾರಿ ಮಾಡುವುದರಿಂದ ಗಡಿಯಾಚೆಯಿಂದಲೂ ಪ್ರತಿಕ್ರಿಯೆಗಳು ಬರಬಹುದು. ಅಲ್ಲದೆ ಅಂತಾರಾಷ್ಟ್ರೀಯ ವೇದಿಕೆಗಳಲ್ಲೂ ಚರ್ಚೆಯಾಗಬಹುದು' ಎಂದು ವರಿಷ್ಠ ಕಾನೂನು ಅಧಿಕಾರಿಗಳು ಹೇಳಿದರು. ಆದರೆ ಅರ್ಜಿದಾರರು ಅಥವಾ ಮಾಧ್ಯಮಗಳು ಈ ವಿಚಾರದಲ್ಲಿ ದುರ್ವರ್ತನೆ ತೋರಬಹುದೆ ಎಂಬ ಬಗ್ಗೆ ವಿವರಣೆ ನೀಡಿಲ್ಲ. ಈ ವಿಷಯ ಅತ್ಯಂತ ಮಹತ್ವವಾದ್ದು. ಆದ್ದರಿಂದ ಐವರು ನ್ಯಾಯಾಧೀಶರ ಸಂವಿಧಾನ ಪೀಠಕ್ಕೆ ಇದನ್ನು ವರ್ಗಾಯಿಸಲಾಗುವುದು ಎಂದು ಸಿಜೆಐ ನೇತೃತ್ವದ ಪೀಠ ಹೇಳಿತು. ಕೇಂದ್ರ ಸರಕಾರ ಪ್ರತಿಕ್ರಿಯೆ ಸಲ್ಲಿಸಿದ ಬಳಿಕ ಅಕ್ಟೋಬರ್ ಮೊದಲ ವಾರದಲ್ಲಿ ವಿಚಾರಣೆ ನಡೆಸಲಾಗುವುದು. ದೈನಂದಿನ ನೆಲೆಯಲ್ಲಿ ನಡೆಸುತ್ತಿರುವ ಅಯೋಧ್ಯೆ ವಿಚಾರಣೆ ಮುಗಿದ ಕೂಡಲೇ ಈ ವಿಷಯ ಎತ್ತಿಕೊಳ್ಳಲಾಗುವುದು ಎಂದು ಕೋರ್ಟ್ ತಿಳಿಸಿತು. ಆ ವೇಳೆಗೆ ವಿಶ್ವಸಂಸ್ಥೆಯ ಸಾಮಾನ್ಯ ಮಂಡಳಿಯಲ್ಲಿ ಪಾಕಿಸ್ತಾನ ಕಾಶ್ಮೀರ ವಿಚಾರವನ್ನು ಮತ್ತೆ ಪ್ರಸ್ತಾಪಿಸಬಹುದು. ಅಲ್ಲದೆ ಆ ಹೊತ್ತಿಗೆ ರಾಜ್ಯದಲ್ಲಿ ವಿಧಿಸಿರುವ ನಿರ್ಬಂಧಗಳನ್ನು ಸ್ವಲ್ಪ ಮಟ್ಟಿಗೆ ತೆರವಾಗಿರುತ್ತವೆ. ಹೀಗಾಗಿ ರಾಜಕೀಯ ಚರ್ಚೆಗಳು ಬಿಸಿಯೇರಬಹುದು ಎಂದು ಭಾವಿಸಲಾಗಿದೆ. ಆಗಸ್ಟ್ 5ರಂದು ರಾಷ್ಟ್ರಪತಿಗಳು ಹೊರಡಿಸಿದ ಜಮ್ಮು-ಕಾಶ್ಮೀರ ಪುನಾರಚನೆ ಆದೇಶ-2019ರ ಸಾಂವಿಧಾನಿಕ ಸಿಂಧುತ್ವದ ಬಗ್ಗೆ ಪರಿಶೀಲನೆ ನಡೆಸುವುದಾಗಿ ಹೇಳಿದೆ. ಜಮ್ಮು ಮತ್ತು ಕಾಶ್ಮೀರಕ್ಕೆ ತಾತ್ಕಾಲಿಕ ನೆಲೆಯಲ್ಲಿ ನೀಡಲಾಗಿದ್ದ ವಿಶೇಷ ಸ್ಥಾನಮಾನ 70 ವರ್ಷಗಳ ವರೆಗೂ ಮುಂದುವರಿದುಕೊಂಡು ಬಂದಿತ್ತು. ಪುನಾರಚನೆ ಕಾಯ್ದೆಗೆ ಆಗಸ್ಟ್ 9ರಂದು ರಾಷ್ಟ್ರಪತಿಗಳು ಅಂಕಿತ ಹಾಕಿದ್ದರು. ಜಮ್ಮು ಮತ್ತು ಕಾಶ್ಮೀರವನ್ನು ವಿಧಾನಸಭೆ ಸಹಿತವಾದ ಕೇಂದ್ರಾಡಳಿತ ಪ್ರದೇಶ ಮತ್ತು ಲಡಾಖ್ ಅನ್ನು ವಿಧಾನಸಭೆ ರಹಿತ ಕೇಂದ್ರಾಡಳಿ ಪ್ರದೇಶವಾಗಿ ವಿಭಜಿಸಲಾಗಿತ್ತು. ಆಗಸ್ಟ್ 6ರಂದು ರಾಷ್ಟ್ರತಿಗಳು ಹೊರಡಿಸಿದ ಆದೇಶದಲ್ಲಿ ಅಂದಿನಿಂದಲೇ 370ನೇ ವಿಧಿಯ ಎಲ್ಲ ನಿಬಂಧನೆಗಳೂ ರದ್ದಾಗುತ್ತವೆ. ಅಲ್ಲದೆ ದೇಶದ ಇತರ ಭಾಗಗಳಿಗೆ ಅನ್ವಯವಾಗುವ ಎಲ್ಲ ಕಾನೂನುಗಳೂ ಜಮ್ಮು-ಕಾಶ್ಮೀರಕ್ಕೆ ತಕ್ಷಣದಿಂದಲೇ ಅನ್ವಯವಾಗುತ್ತವೆ ಎಂದು ಹೇಳಿತ್ತು. ಈ ಆದೇಶವನ್ನೂ ಅರ್ಜಿದಾರರು ಪ್ರಶ್ನಿಸಿದ್ದಾರೆ.

from India & World News in Kannada | VK Polls https://ift.tt/328NTVR