ಬೆಂಗಳೂರು: ಚಂದ್ರಯಾನ-2 ಚಂದ್ರನ ಅಂಗಳಕ್ಕೆ ಮುತ್ತಿಡುವ ಕ್ಷಣವನ್ನು ನೇರವಾಗಿ ಕಣ್ತುಂಬಿಕೊಳ್ಳುವ ಅವಕಾಶ ಪಡೆದ ಅದೃಷ್ಟವಂತೆ ಈಕೆ. ಅದಕ್ಕಿಂತಲೂ ದೊಡ್ಡ ವಿಶೇಷವೆಂದರೆ ಈಕೆ ಈ ಕ್ಷಣವನ್ನು ದೇಶದ ಪ್ರಧಾನಿ ಜೊತೆ ಕೂತು ವೀಕ್ಷಿಸಲಿದ್ದಾಳೆ. ಲಖನೌದ ಡೆಲ್ಲಿ ಪಬ್ಲಿಕ್‌ ಸ್ಕೂಲ್‌ನ 10ನೇ ತರಗತಿ ವಿದ್ಯಾರ್ಥಿನಿ ರಾಶಿ ವರ್ಮಾ ಇಂಥಹದ್ದೊಂದು ಅದೃಷ್ಟ ಪಡೆದುಕೊಂಡಿದ್ದಾಳೆ. ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ಇಸ್ರೋ) ಆಗಸ್ಟ್‌ 10ರಿಂದ 25ರ ನಡುವೆ ಹಲವು ಸುತ್ತುಗಳ ಆನ್‌ಲೈನ್‌ ಕ್ವಿಜ್‌ ನಡೆಸಿತ್ತು. 20 ಪ್ರಶ್ನೆಗಳಿಗೆ 10 ನಿಮಿಷದ ಅವಧಿಯಲ್ಲಿ ಸರಿ ಉತ್ತರ ನೀಡುವ 60 ಅದೃಷ್ಟಶಾಲಿ ವಿದ್ಯಾರ್ಥಿಗಳಿಗೆ ಲ್ಯಾಂಡರ್‌ ಮತ್ತು ರೋವರ್‌ ಚಂದ್ರನ ಮೇಲ್ಮೈ ಸ್ಪರ್ಷಿಸುವ ಕ್ಷಣವನ್ನು ನೇರ ಪ್ರಸಾರದಲ್ಲಿ ವೀಕ್ಷಿಸುವ ಅವಕಾಶ ಕಲ್ಪಿಸುವುದಾಗಿ ಹೇಳಿತ್ತು. ಅದರಂತೆ ಇದೀಗ ರಾಶಿ ವರ್ಮಾ ಆಯ್ಕೆಯಾಗಿದ್ದಾರೆ. ಸೆಪ್ಟೆಂಬರ್‌ 7 ರಂದು ಮುಂಜಾನೆ 1 ಗಂಟೆ 55 ನಿಮಿಷಕ್ಕೆ 'ಪ್ರಗ್ಯಾನ್‌' ರೋವರ್‌ ಮತ್ತು 'ವಿಕ್ರಮ್‌' ಲ್ಯಾಂಡರ್‌ ಚಂದ್ರನ ಮೇಲೆ ಇಳಿಯಲಿದೆ. ಇದರ ನೇರ ಪ್ರಸಾರದ ವೀಕ್ಷಣೆಗೆ ಬೆಂಗಳೂರಿನ ಇಸ್ರೋ ಕೇಂದ್ರ ಕಚೇರಿಯಲ್ಲಿ ವ್ಯವಸ್ಥೆ ಮಾಡಲಾಗಿದೆ. ಅಂದು ಬೆಂಗಳೂರಿಗೆ ಬರಲಿರುವ ಪ್ರಧಾನಿ ಚಂದ್ರಯಾನ -2 ಲ್ಯಾಂಡಿಂಗ್‌ನ್ನು ಈ ಬಾಲಕಿ ಹಾಗೂ 60 ವಿದ್ಯಾರ್ಥಿಗಳ ಜೊತೆ ಕುಳಿತು ನೇರವಾಗಿ ವೀಕ್ಷಿಸಲಿದ್ದಾರೆ. ಇನ್ನೊಂದೇ ಹೆಜ್ಜೆ ಬಾಕಿ ಇವೆಲ್ಲದರ ನಡುವೆ ನೌಕೆಯನ್ನು ಚಂದ್ರನಿಗೆ ಮತ್ತಷ್ಟು ಸನಿಹಕ್ಕೆ ಕೊಂಡೊಯ್ಯುವ ಕೆಲಸವನ್ನು ಇಸ್ರೋ ಇಂದು ಕೂಡ ಯಶಸ್ವಿಯಾಗಿ ನಿರ್ವಹಿಸಿದೆ. ಇದೀಗ ಕೇವಲ ಒಂದು ಹೆಜ್ಜೆ ಮಾತ್ರ ಬಾಕಿ ಉಳಿದಿದೆ ಎಂದು ಇಸ್ರೋ ಟ್ಟೀಟ್‌ ಮಾಡಿದೆ. ಸೆಪ್ಟೆಂಬರ್‌ 1 ನೌಕೆಯಲ್ಲಿರುವ ಇಂಜಿನ್‌ನ್ನು ಮತ್ತೊಮ್ಮೆ ಚಾಲನೆಗೊಳಿಸಿ ನೌಕೆಯನ್ನು ಚಂದ್ರನಿಂದ 100 ಕಿಲೋಮೀಟರ್‌ ದೂರದ ಕಕ್ಷೆಯಲ್ಲಿ ನೆಲೆಗೊಳಿಸಲಾಗುತ್ತದೆ. ನಂತರ ಸೆಪ್ಟೆಂಬರ್‌ 2ರಂದು ‘ವಿಕ್ರಮ್‌’ ಲ್ಯಾಂಡರ್‌ ಆರ್ಬಿಟರ್‌ನಿಂದ ಬೇರ್ಪಡಲಿದ್ದು ಅಂದೇ ‘ಪ್ರಗ್ಯಾನ್‌’ ರೋವರ್‌ ಜೊತೆ ಸೇರಿಕೊಳ್ಳಲಿದೆ. ಮುಂದಿನದು ಸೆಪ್ಟೆಂಬರ್‌ 7ರ ಅಂತಿಮ ಹಂತ ಎಂದು ಇಸ್ರೋ ತಿಳಿಸಿದೆ.
from India & World News in Kannada | VK Polls https://ift.tt/2LnDf6X
