ಬ್ಯಾಂಕಾಕ್: ಕಾಲಿಲ್ಲದ ಕುಂಟನಂತೆ, ದೃಷ್ಟಿದೋಷವಿರುವವನಂತೆ ನಟಿಸಿ, ಸಾಮಾನ್ಯ ಜನರನ್ನು ಭಾವನಾತ್ಮಕವಾಗಿ ಮರಳು ಮಾಡಿ ಭಿಕ್ಷೆ ಬೇಡುತ್ತ ಬದುಕು ಸಾಗಿಸುವ ಸೋಮಾರಿ ವಂಚಕರನ್ನು ಸಾಕಷ್ಟು ಕಂಡಿರುತ್ತೇವೆ. ಆದರೆ ಕಪಟ, ಮೋಸ ಗೊತ್ತಿಲ್ಲದ ಪ್ರಾಣಿಗಳಲ್ಲಿ ನಾವಿಂತಹ ವಂಚನೆಯನ್ನು ನಿರೀಕ್ಷಿಸಲು ಸಾಧ್ಯವೇ? ಕೆಲ ದಿನಗಳಿಂದ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿರುವ ವೀಡಿಯೋವೊಂದು ಎಲ್ಲರ ಗಮನ ಸೆಳೆದಿದ್ದು, ಬೀದಿ ನಾಯಿಯ ಚತುರತೆಯೇ ಈ ವೀಡಿಯೋದ ಹೈಲೈಟ್. ಹೌದು, ಥೈಲ್ಯಾಂಡ್‌ನಲ್ಲಿ ಈ ಸ್ವಾರಸ್ಯಕರ ಪ್ರಸಂಗ ಬೆಳಕಿಗೆ ಬಂದಿದೆ. ಸ್ಥಳೀಯರು ಗೇ ಎಂದು ಹೆಸರಿಟ್ಟು ಕರೆಯುತ್ತಿರುವ ನಾಯಿಯೊಂದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಈ ವೀಡಿಯೋದಲ್ಲಿ ಗೇ ತನ್ನ ಹಿಂಬದಿ ಕಾಲು ಮುರಿದಿದೆ ಎಂದು ಬಿಂಬಿತವಾಗುವಂತೆ, ಅದನ್ನು ನೆಲದಲ್ಲಿ ಎಳೆಯುತ್ತಾ ಕಷ್ಟಪಟ್ಟು ನಡೆಯುತ್ತಿದ್ದಾನೆ. ಸ್ವಲ್ಪ ಹೊತ್ತಲ್ಲಿ 'ಗೇ' ಸರಿಯಾಗಿ ಅಂದರೆ ನಾಲ್ಕು ಕಾಲಲ್ಲಿ ನಡೆಯುತ್ತಿರುವುದು ವೀಡಿಯೋದಲ್ಲಿ ಕಂಡು ಬಂದಿದೆ. ಈ ವೀಡಿಯೋವನ್ನು ಹಂಚಿಕೊಂಡಿರುವವರು ಹೀಗೆ ಬರೆಯುತ್ತಾರೆ, ''ಗೇ ಹೆಸರಿನ ಈ ವೃದ್ಧ ಕೆಲ ವರ್ಷಗಳಿಂದ ನಾನು ಕೆಲಸ ಮಾಡುತ್ತಿರುವ ಪ್ರದೇಶದಲ್ಲಿ ವಾಸಿಸುತ್ತಿದೆ. ಅದು ಜನರಿಗೆ ವಂಚಿಸಲು ಒಂದು ಕಾಲಿಲ್ಲದ ರೀತಿಯಲ್ಲಿ ನಟಿಸುತ್ತಿರುತ್ತದೆ. ನಾನದಕ್ಕೆ ಊಟ ಕೊಡುತ್ತೇನೆ. ಆದರೆ ಅದು ಇಂತಹ ಕಪಟತನವನ್ನು ಬಿಡುತ್ತಿಲ್ಲ. ಜನರು ಕನಿಕರಪಟ್ಟು ಆಹಾರ ನೀಡಲಿ ಎಂದು ಹೀಗೆ ವರ್ತಿಸುತ್ತಿರಬೇಕು''. ನಾಯಿಯ ಹಿಂಬದಿ ಎರಡು ಕಾಲುಗಳನ್ನು ಪರೀಕ್ಷಿಸಲಾಗಿದೆ. ಏನೂ ಸಮಸ್ಯೆ ಕಂಡುಬಂದಿಲ್ಲ, ಎಂದವರು ಹೇಳಿದ್ದಾರೆ. ಇದೇ ರೀತಿ ಕಾಲನ್ನು ಎಳೆದುಕೊಂಡು ಹೋಗುತ್ತಿರುವ ನಾಯಿಗಳ ವೀಡಿಯೋ ವರ್ಷಗಳ ಹಿಂದೆ whatsappನಲ್ಲಿ ವೈರಲ್ ಆಗಿತ್ತು.
from India & World News in Kannada | VK Polls https://ift.tt/2ZAnXoh
