ಬೆಂಗಳೂರು: ‘ಚಂದ್ರಯಾನ – 2’ರಲ್ಲಿ ಮತ್ತೊಂದು ಹೆಜ್ಜೆ ಪ್ರಗತಿ ಸಾಧಿಸಿರುವ ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ಇಸ್ರೋ) ನೌಕೆಯನ್ನು ಚಂದ್ರನಿಗೆ ಮತ್ತಷ್ಟು ಸನಿಹ ಕೊಂಡೊಯ್ಯುವಲ್ಲಿ ಯಶಸ್ವಿಯಾಗಿದೆ. ಲ್ಯಾಂಡರ್‌ ಮತ್ತು ರೋವರ್‌ನ್ನು ಹೊತ್ತ ನೌಕೆಯನ್ನು ಚಂದ್ರನ ಹೊಸ ಕಕ್ಷೆಗೆ ಸೇರ್ಪಡೆಗೊಳಿಸುವಲ್ಲಿ ಬುಧವಾರ ಯಶ ಸಾಧಿಸಿದೆ. ಉಪಗ್ರಹದಲ್ಲಿರುವ ಎಂಜಿನ್‌ನ್ನು ಇಂದು ಬೆಳಿಗ್ಗೆ 9 ಗಂಟೆ 4 ನಿಮಿಷಕ್ಕೆ ಚಾಲನೆಗೊಳಿಸಲಾಯಿತು. 1,190 ನಿಮಿಷಗಳ ಕಾಲ ಎಂಜಿನ್‌ ಆನ್‌ ಮಾಡಿ ಚಂದ್ರನ 179 ಕಿ.ಮೀ ×1420 ಕಿ.ಮೀ. ಕಕ್ಷೆಗೆ ನೌಕೆಯನ್ನು ಸೇರ್ಪಡೆಗೊಳಿಸಲಾಗಿದೆ ಎಂದು ಇಸ್ರೋ ಟ್ಟೀಟ್‌ ಮಾಡಿದೆ. ಜೊತೆಗೆ ಬಾಹ್ಯಾಕಾಶ ನೌಕೆ ಎಲ್ಲಾ ರೀತಿಯಲ್ಲೂ ಅಂದುಕೊಂಡಂತೆ ಕಾರ್ಯ ನಿರ್ವಹಿಸುತ್ತಿದೆ ಎಂದು ಸಂಸ್ಥೆ ತಿಳಿಸಿದೆ. ಈ ಹಿಂದೆ ಆಗಸ್ಟ್‌ 20ರಂದು ಎಂಜಿನ್‌ ಅನ್ನು 1,228 ನಿಮಿಷಗಳ ಕಾಲ ಚಾಲನೆಗೊಳಿಸಿ 118 ಕಿ.ಮೀ×4,412 ಕಿ.ಮೀಗಳ ಕಕ್ಷೆಗೆ ನೌಕೆಯನ್ನು ಸೇರ್ಪಡೆಗೊಳಿಸಲಾಗಿತ್ತು. ಇದೇ ರೀತಿಯ ಚಟುವಟಿಕೆ ಆಗಸ್ಟ್‌ 30ರಂದು ಕೂಡ ನಡೆಯಲಿದೆ ಎಂದು ಇಸ್ರೋ ತನ್ನ ಪ್ರಕಟಣೆಯಲ್ಲಿ ತಿಳಿಸಿದೆ. ಬಳಿಕ ಸೆಪ್ಟೆಂಬರ್‌ 1 ರಂದು ಚಂದ್ರನಿಗೆ ಮತ್ತಷ್ಟು ಸನಿಹಕ್ಕೆ ನೌಕೆಯನ್ನು ಕೊಂಡೊಯ್ಯುವ ಕೆಲಸ ನಡೆಯಲಿದೆ. ಈ ಎರಡು ಪ್ರಯತ್ನಗಳ ನಂತರ ಸೆಪ್ಟೆಂಬರ್‌ 2ರಂದು ಚಂದ್ರನಿಂದ 100 ಕಿಲೋ ಮೀಟರ್‌ ಅಂತರಕ್ಕೆ ನೌಕೆ ಬರಲಿದೆ. ಇದೇ ಸಂದರ್ಭದಲ್ಲಿ ‘ವಿಕ್ರಮ್‌’ ಲ್ಯಾಂಡರ್‌ ಆರ್ಬಿಟರ್‌ನಿಂದ ಬೇರ್ಪಡಲಿದ್ದು ಅಂದೇ ‘ಪ್ರಗ್ಯಾನ್‌’ ರೋವರ್‌ ಜೊತೆ ಸೇರಿಕೊಳ್ಳಲಿದೆ. ಇವೆರಡೂ ಸೆಪ್ಟೆಂಬರ್‌ 7ರಂದು ಚಂದ್ರನ ಮೇಲ್ಮೈಯನ್ನು ಸ್ಪರ್ಷಿಸಲಿದೆ. ಅಂದುಕೊಂಡಂತೆ ನಡೆದರೆ ಅಂದು ಬೆಳಿಗ್ಗೆ 1.55ಕ್ಕೆ ಲ್ಯಾಂಡರ್‌ ಮತ್ತು ರೋವರ್‌ ತಮ್ಮ ಕಾರ್ಯಾಚರಣೆಯನ್ನು ಆರಂಭಿಸಲಿವೆ. ಮುಂದಿನ 14 ದಿನಗಳ ಕಾಲ ಚಂದ್ರನ ಮೇಲ್ಮೈ ಲಕ್ಷಣಗಳಾದ, ನೀರು, ಖನಿಜ, ಕಂಪನಗಳ ಬಗ್ಗೆ ಇವು ಅಧ್ಯಯನ ನಡೆಸಲಿವೆ.
from India & World News in Kannada | VK Polls https://ift.tt/2ZB28RO
