ಹನೂರು (ಚಾಮರಾಜನ ನಗರ): ಬೆಟ್ಟದಲ್ಲಿ ಸಂಚಾರ ಮಾಡುವಾಗ ಜೋಕೆ..! ಅಪ್ಪಿ ತಪ್ಪಿ ರಸ್ತೆಗಿಳಿದರೆ, ಪಾಸ್ಟಿಕ್ ಹಾಕಿದರೆ, ವನ್ಯ ಪ್ರಾಣಿಗಳಿಗೆ ತೊಂದರೆ ನೀಡಿದರೆ ಭಾರಿ ದಂಡದ ಪ್ರಹಾರವಾಗಲಿದೆ. ಮಲೆಮಹದೇಶ್ವರ ಬೆಟ್ಟ ವನ್ಯಧಾಮ ವ್ಯಾಪ್ತಿಯಲ್ಲಿ ಬರುವ ಕೌದಳ್ಳಿಯಿಂದ ಮಲೆ ಮಹದೇಶ್ವರ ಬೆಟ್ಟಕ್ಕೆ ತೆರಳುವ ರಸ್ತೆಗಳಲ್ಲಿ ಅರಣ್ಯ ಇಲಾಖೆ ಇಂತಹ ಕಾರ್ಯ ಮಾಡುತ್ತಿದೆ. ಜತೆಗೆ ಅರಣ್ಯ ಸಂರಕ್ಷಣೆ ವನ್ಯಪ್ರಾಣಿಗಳಿಗೆ ಉಂಟಾಗುತ್ತಿದ್ದ ಸಮಸ್ಯೆ ನಿವಾರಿಸಲು ಕ್ರಮ ಕೈಗೊಂಡು, ರಸ್ತೆಯುದ್ದಕ್ಕೂ ಸೂಚನಾ ಫಲಕ ಹಾಕಿ ಸಿಬ್ಬಂದಿ ನಿಯೋಜಿಸಿ ಕ್ರಮ ಕೈಗೊಂಡಿದ್ದಾರೆ. ಅರಣ್ಯ ಪ್ರದೇಶದ ವ್ಯಾಪ್ತಿಯಲ್ಲಿ ಅತಿ ವೇಗ ಚಾಲನೆ, ಪ್ಲಾಸ್ಟಿಕ್ ಬೀಸಾಡುವುದು, ಅರಣ್ಯ ಅಕ್ರಮ ಪ್ರವೇಶ, ವನ್ಯ ಪ್ರಾಣಿಗಳಿಗೆ ಆಹಾರ ಪದಾರ್ಥ, ಹಣ್ಣು ನೀಡುವುದು, ಕ್ಯಾಮೆರಾ ಮತ್ತು ಮೊಬೈಲ್ ಮೂಲಕ, ವಿಡಿಯೋ ಫೋಟೋ ತೆಗೆಯುವುದು, ಮೊಬೈಲ್ನಲ್ಲಿ ಸೆಲ್ಫಿ ತೆಗೆಯುವುದು, ಮದ್ಯಪಾನ, ಧೂಮಪಾನ, ಉಪಹಾರ ಸೇವಿಸುವುದನ್ನು ಕಡ್ಡಾಯವಾಗಿ ನಿಷೇಧಿಸಿ ಸೂಚನೆ ನೀಡಿದ್ದಾರೆ. ಎಚ್ಚರಿಕೆ ಫಲಕ: ಈಗಾಗಲೇ ಬೆಟ್ಟಕ್ಕೆ ತೆರಳುವ ಹಾಗೂ ಪ್ರವಾಸಿಗರಿಗೆ ಮಾಹಿತಿ ನೀಡುವ ನಿಟ್ಟಿನಲ್ಲಿ ಈಗಾಗಲೇ ಸೂಚನಾ ಫಲಕ ಹಾಕಲಾಗಿದೆ. ಅದರಲ್ಲಿ ಅರಣ್ಯ ನಿಯಮ ಉಲ್ಲಂಘನೆ ಮಾಡಿದರೆ 1,500 ರೂ. ಭಾರಿ ದಂಡ ಕಟ್ಟಬೇಕಾಗುತ್ತದೆ ಎಂದು ಎಚ್ಚರಿಕೆ ಹಾಗೂ ಮಾಹಿತಿ ನೀಡುವ ಕಾರ್ಯ ಮಾಡಲಾಗುತ್ತಿದೆ. ಬೆಟ್ಟಕ್ಕೆ ತೆರಳುವವರು ಎಲ್ಲೆಂದರಲ್ಲಿ ವಾಹನ ಪಾರ್ಕ್ ಮಾಡಿ ಕುಳಿತುಕೊಳ್ಳುವುದು, ತಿಂಡಿ ತಿನಿಸುಗಳನ್ನು ತಿಂದು ಸ್ಥಳದಲ್ಲೇ ಬೀಸಾಡುವುದು, ವನ್ಯಪ್ರಾಣಿಗಳಿಗೆ ಆಹಾರ ಪದಾರ್ಥ ನೀಡುವುದನ್ನು ಸಂಪೂರ್ಣವಾಗಿ ನಿಷೇಧಿಸಲಾಗಿದೆ. ಅರಣ್ಯ ಇಲಾಖೆ ಈ ಕಾರ್ಯ ಪರಿಸರ ಪ್ರೇಮಿಗಳ ಮೆಚ್ಚುಗೆಗೆ ಪಾತ್ರವಾಗಿದೆ. 30 ಸಾವಿರ ದಂಡ ವಸೂಲಿ: ಈಗಾಗಲೇ ಐದಾರು ತಿಂಗಳುಗಳಿಂದ 25 ರಿಂದ 30 ಸಾವಿರದವರೆಗೆ ದಂಡ ವಸೂಲಿ ಮಾಡಲಾಗಿದೆ. ಇದಕ್ಕಾಗಿ ಒಂದು ವಾಹನ ಗಸ್ತು ತಿರುಗಲಿದೆ. ಸಿಬ್ಬಂದಿ ಕಾಲ್ನಡಿಗೆಯಲ್ಲಿ ನಿಗಾ ವಹಿಸುತ್ತಿದ್ದಾರೆ. ಎಲ್ಲಾದರೂ ವಾಹನಗಳು ನಿಂತಿರುವುದು ಕಂಡು ಬಂದರೆ ಕೂಡಲೇ ಗಸ್ತು ವಾಹನ ಸ್ಥಳಕ್ಕೆ ಬಂದು ದಂಡ ವಸೂಲಿ ಮಾಡಲಿದೆ. ವನ್ಯಪ್ರಾಣಿಗಳ ಸಂರಕ್ಷಣೆಗೆ ಕೌದಳ್ಳಿಯಿಂದ ಮಲೆಮಹದೇಶ್ವರ ಬೆಟ್ಟ ಅರಣ್ಯ ಪ್ರದೇಶ ವ್ಯಾಪ್ತಿಯ ರಸ್ತೆ ಬದಿಯಲ್ಲಿ ಸುಮಾರು 30 ಸೂಚನ ಫಲಕಗಳನ್ನು ಅಳವಡಿಸಲಾಗಿದೆ. ಭಕ್ತರು ಮತ್ತು ಪ್ರವಾಸಿಗರು ಹೆಚ್ಚಾಗಿ ಪಾರ್ಕಿಂಗ್ ಮಾಡಿ, ಫೋಟೋ, ಸೆಲ್ಫಿ ತೆಗೆಯುತ್ತಿದ್ದ ಸ್ಥಳಗಳನ್ನು ಗುರುತು ಮಾಡಿ ಅಲ್ಲಿ ಸೂಚನ ಫಲಕ ಅಳವಡಿಸಲಾಗಿದೆ. ನಿಯಮ ಉಲ್ಲಂಘಿಸುವವರು ಯಾರೇ ಆಗಿರಲಿ ದಂಡ ವಿಧಿಸಲಾಗುವುದು ಎಂದು ಮಲೈಮಹದೇಶ್ವರ ವನ್ಯಜೀವಿ ವಲಯ ಡಿಎಫ್ಒ ಏಡುಕೊಂಡಲು ಹೇಳಿದ್ದಾರೆ.
from India & World News in Kannada | VK Polls https://ift.tt/35WCKLc