ಹೊಸದಿಲ್ಲಿ: ದೇಶದ ಅತಿ ಉದ್ದನೆಯ ನಿರ್ಮಾಣ ಒಪ್ಪಂದದ ಗುತ್ತಿಗೆಯನ್ನು ಎಲ್‌ಆ್ಯಂಡ್‌ಟಿ ಕಂಪನಿ ಪಡೆದುಕೊಂಡಿದೆ. ಅಸ್ಸಾಂ ಮತ್ತು ಮೇಘಾಲಯ ನಡುವಿನ ಬ್ರಹ್ಮಾಪುತ್ರ ನದಿಗೆ ಅಡ್ಡಲಾಗಿ 18.36 ಕಿ.ಮೀ ಉದ್ದನೆಯ ಸೇತುವೆಯನ್ನು ಆರು ವರ್ಷಗಳ ಅವಧಿಯಲ್ಲಿ ನಿರ್ಮಿಸಲು ಯೋಜಿಸಲಾಗಿದೆ. ಇದಕ್ಕೆ ತಗುಲುವ ವೆಚ್ಚ 3,166 ಕೋಟಿ ರೂಪಾಯಿ. ಸೇತುವೆ ನಿರ್ಮಾಣಗೊಂಡ ಬಳಿಕ ಎರಡೂ ರಾಜ್ಯಗಳ ನಡುವಿನ ಸಂಚಾರ ಮಾರ್ಗದಲ್ಲಿ 250 ಕಿ.ಮೀ. ಕಡಿತಗೊಳ್ಳಲಿದೆ. ಅಸ್ಸಾಂನ ಧುಬ್ರಿಯಿಂದ ಮೇಘಾಲಯದ ಫುಲ್‌ಬರಿ ನಡುವಿನ ರಾಷ್ಟ್ರೀಯ ಹೆದ್ದಾರಿ 127-ಬಿಗೆ ಪೂರಕವಾಗಿ ಸೇತುವೆ ನಿರ್ಮಾಣಗೊಳ್ಳಲಿದೆ. ಜಪಾನ್‌ ಮೂಲದ ಸಂಸ್ಥೆಯೊಂದು ಈ ಯೋಜನೆಯಲ್ಲಿ ಹಣ ಹೂಡಿಕೆ ಮಾಡಿದೆ. ಎಲ್‌ಆ್ಯಂಡ್‌ಟಿಯ ಅಂಗಸಂಸ್ಥೆ ಎಲ್‌ಆ್ಯಂಡ್‌ಟಿ ಕನ್ಸ್ಟ್ರಕ್ಷನ್‌ ಈ ಸೇತುವೆ ನಿರ್ಮಾಣ ಮಾಡಲಿದೆ. 18.36 ಕಿಲೋ ಮೀಟರ್‌ ಉದ್ದದಲ್ಲಿ, 12.625 ಕಿಲೋ ಮೀಟರ್‌ ಉದ್ದದ ಮುಖ್ಯ ಸೇತುವೆ ನಿರ್ಮಾಣವಾಗಲಿದೆ. ಧುಬ್ರಿ ಭಾಗದಲ್ಲಿ ಸೇತುವೆಯನ್ನು ಸಂಪರ್ಕಿಸಲು 3.5 ಕಿಲೋ ಮೀಟರ್‌ ಉದ್ದದ ಸಂಪರ್ಕ ರಸ್ತೆ ನಿರ್ಮಾಣವಾಗಲಿದ್ದರೆ, ಫುಲ್‌ಬರಿ ಭಾಗದಿಂದ 2.2 ಕಿಲೋ ಮೀಟರ್‌ ಉದ್ದದ ಸಂಪರ್ಕ ರಸ್ತೆ ನಿರ್ಮಾಣವಾಗಲಿದೆ ಎಂದು ಸಂಸ್ಥೆ ಹೇಳಿದೆ. ಸದ್ಯ ಫೆರ್ರಿ ಮೂಲಕ ಧುಬ್ರಿ ಮತ್ತು ಫುಲ್‌ಬರಿಯನ್ನು ಸಂಪರ್ಕಿಸಲಾಗುತ್ತಿದ್ದು ಇದಕ್ಕೆ 2.5 ಗಂಟೆ ತಗುಲುತ್ತಿದೆ. ಹೊಸ ಸೇತುವೆ ನಿರ್ಮಾಣದಿಂದ ಇದರಲ್ಲಿ ಹೆಚ್ಚಿನ ಸಮಯ ಉಳಿತಾಯವಾಗಲಿದೆ. ಇದು ಭಾರಿ ಸವಾಲಿನ ಯೋಜನೆ. ನಮ್ಮಲ್ಲಿ ನಂಬಿಕೆ ಇಟ್ಟಿದ್ದಕ್ಕಾಗಿ ರಾಷ್ಟ್ರೀಯ ಹೆದ್ದಾರಿ ಮತ್ತು ಮೂಲಸೌಕರ್ಯ ಅಭಿವೃದ್ಧಿ ನಿಗಮಕ್ಕೆ ಧನ್ಯವಾದಗಳು ಎಂದು ಎಲ್‌ಆ್ಯಂಡ್‌ಟಿಯ ಎಸ್‌ವಿ ದೇಸಾಯಿ ಹೇಳಿದ್ದಾರೆ.
from India & World News in Kannada | VK Polls https://ift.tt/3pYbPrT
