ಆತೀಶ್‌ ಬಿ.ಕನ್ನಾಳೆ ಶಿವಮೊಗ್ಗ: ಮಾರುಕಟ್ಟೆಗೆ ವಿಭಿನ್ನ ವಿನ್ಯಾಸದ ಬೈಕ್‌ಗಳು ಲಗ್ಗೆ ಇಡುತ್ತಿದ್ದಂತೇ ಬಹುತೇಕರು ಅವುಗಳಿಗೆ ಮಾರುಹೋಗಿದ್ದರು. ಹೀಗಾಗಿ, ಸೈಕಲ್‌ಗಳಿಗೆ ಹೇಳಿಕೊಳ್ಳಬಹುದಾದ ಬೇಡಿಕೆ ಇರಲಿಲ್ಲ. ಆದರೆ, ಕೋವಿಡ್‌ ಜನರ ಈ ಮನಸ್ಥಿತಿ ಬದಲಿಸಿದೆ! ಲಾಕ್‌ ಡೌನ್‌ ನಂತರ ಕಳೆದ ಏಪ್ರಿಲ್‌ನಿಂದ ಸೈಕಲ್‌ಗಳಿಗೆ ಭಾರಿ ಬೇಡಿಕೆ ಸೃಷ್ಟಿಯಾಗಿದೆ. ಜನರಲ್ಲಿ ಸೈಕಲ್‌ ಕ್ರೇಜ್‌ ಹೆಚ್ಚಾಗಿದೆ. ಆದರೆ, ಬೇಡಿಕೆಗೆ ಅನುಗುಣವಾಗಿ ಮಾರುಕಟ್ಟೆಗೆ ಪೂರೈಕೆ ಇಲ್ಲದ್ದರಿಂದ ಬೇಕಾದ ಸೈಕಲ್‌ಗಳೇ ಸಿಗುತ್ತಿಲ್ಲ. ಶಿವಮೊಗ್ಗ ಜಿಲ್ಲೆಯೊಂದರಲ್ಲೇ ಕಳೆದ ಎಂಟು ತಿಂಗಳಲ್ಲಿ ಶೇ.35-40ರಷ್ಟು ಬೇಡಿಕೆ ಹೆಚ್ಚಾಗಿದೆ. ಬಹುತೇಕ ಸೈಕಲ್‌ಗಳು ಲೂಧಿಯಾನ ಮತ್ತು ದಿಲ್ಲಿಯಿಂದ ಪೂರೈಕೆ ಆಗುತ್ತಿದ್ದು, ಲಾಕ್‌ಡೌನ್‌ ಹಿನ್ನೆಲೆಯಲ್ಲಿ ಹೊಸ ಸೈಕಲ್‌ಗಳ ಉತ್ಪಾದನೆ ಸಾಧ್ಯವಾಗಿಲ್ಲ. ಹೀಗಾಗಿ, ದಾಸ್ತಾನು ಮಾಡಲಾದ ಹಳೆಯ ಸೈಕಲ್‌ಗಳನ್ನೇ ಮಾಡಲಾಗುತ್ತಿದೆ. ಅವೂ ಸಹ ಖಾಲಿಯಾಗುವ ಹಂತದಲ್ಲಿದೆ. ಹೊಸ ಸೈಕಲ್‌ಗಳನ್ನು ಪೂರೈಸುವಂತೆ ಬೇಡಿಕೆ ಸಲ್ಲಿಸಲಾಗಿದೆ. ಆದರೆ, ಕೋವಿಡ್‌ನಿಂದಾಗಿ ಉತ್ಪಾದನಾ ಘಟಕಗಳಲ್ಲೂ ಮಾನವ ಸಂಪನ್ಮೂಲದ ಕೊರತೆ ಎದುರಾಗಿದ್ದು, ಅಗತ್ಯವಿರುವ ಸೈಕಲ್‌ಗಳು ಸಿಗುವುದೇ ಕಷ್ಟ ಸಾಧ್ಯವಾಗಿದೆ. ಸೈಕಲ್‌ ಸಿದ್ಧಗೊಂಡು ಮಾರಾಟಗಾರರ ಕೈಸೇರಲು ಕನಿಷ್ಠವೆಂದರೂ ಏಳೆಂಟು ತಿಂಗಳು ಬೇಕಾಗುವ ಸಾಧ್ಯತೆ ಇದೆ. ಬೇಡಿಕೆಗೆ ಅನುಗುಣವಾಗಿ ಇಲ್ಲದ್ದರಿಂದ ಸೈಕಲ್‌ ಬೆಲೆಯಲ್ಲಿ ಶೇ.4-5ರಷ್ಟು ಏರಿಕೆ ಕಂಡಿದೆ. 'ನಿತ್ಯ ಅಂಗಡಿಗೆ 10-15 ಜನ ಸೈಕಲ್‌ ಕೇಳಿಕೊಂಡು ಬರುತ್ತಿದ್ದು, ಅದರಲ್ಲಿ ಸರಾಸರಿ 10 ಜನ ಖರೀದಿಸುತ್ತಿದ್ದಾರೆ. ಮಾಸಿಕ ಸರಾಸರಿ 300ಕ್ಕೂ ಹೆಚ್ಚು ಸೈಕಲ್‌ ಮಾರಾಟವಾಗುತ್ತಿವೆ. ಈ ಹಿಂದೆ ಅಕ್ಟೋಬರ್‌, ನವೆಂಬರ್‌ ಹಬ್ಬದ ಸಂದರ್ಭದಲ್ಲಿ ಸೈಕಲ್‌ ಖರೀದಿ ಮಾಡಲಾಗುತ್ತಿತ್ತು. ಆದರೆ, ಆಫ್‌ ಸೀಸನ್‌ನಲ್ಲಿ ದಿನಕ್ಕೆ 2-3 ಸೈಕಲ್‌ ಖರೀದಿಸಿದರೂ ಹೆಚ್ಚಿತ್ತು. ಈ ಸಲ ಮೇ ತಿಂಗಳಿಂದ ಇಲ್ಲಿವರೆಗೆ ಖರೀದಿ ನಿರಂತರವಾಗಿ ನಡೆಯುತ್ತಿದೆ. ಬೇಡಿಕೆಯಲ್ಲಿ ಶೇ.40ರಷ್ಟು ಏರಿಕೆಯಾಗಿದೆ' ಎನ್ನುತ್ತಾರೆ ಶಿವಮೊಗ್ಗದ ಶಂಕರ್ಸ್ ಸೈಕಲೋತ್ಸವದ ಮಾಲೀಕರು. ಗ್ರಾಮೀಣರಿಂದಲೂ ಡಿಮ್ಯಾಂಡ್‌ ಶಿವಮೊಗ್ಗ ಜಿಲ್ಲೆಯ ಎಲ್ಲ ತಾಲೂಕು ಸೇರಿ ಚನ್ನಗಿರಿ, ಹೊನ್ನಾಳಿ, ತರೀಕೆರೆ ತಾಲೂಕುಗಳಿಂದಲೂ ಜನ ಒಟ್ಟಾಗಿ ಬಂದು ಮೂರ್ನಾಲ್ಕು ಸೈಕಲ್‌ಗಳನ್ನು ಏಕಕಾಲಕ್ಕೆ ಖರೀಸುತ್ತಿದ್ದಾರೆ. ಶಾಲೆಗಳು ಇನ್ನೂ ಆರಂಭ ಆಗದ ಕಾರಣ ಮಕ್ಕಳ ಸೈಕಲ್‌ಗಳಿಗೂ ನಿರಂತರ ಬೇಡಿಕೆ ಸೃಷ್ಟಿಯಾಗಿದೆ. ಇವುಗಳ ಪೂರೈಕೆಯಲ್ಲೂ ಸ್ವಲ್ಪ ಪ್ರಮಾಣದ ಕೊರತೆ ಇದೆ. 9 ಸಾವಿರದಿಂದ ಆರಂಭ ಬಹುತೇಕ ಗ್ರಾಹಕರು ಗೇಯರ್‌ ಸೈಕಲ್‌ಗಳನ್ನೇ ಕೇಳುತ್ತಿದ್ದಾರೆ. ಅದರ ಬೆಲೆ 9 ಸಾವಿರ ರೂ.ದಿಂದ 30 ಸಾವಿರ ರೂ.ವರೆಗೆ ಇದೆ. ದುಡ್ಡು ಕೊಟ್ಟು ಖರೀದಿಸಲು ಸಿದ್ಧರಿದ್ದರೂ ಅವರಿಗೆ ಬೇಕಾದ ಬಣ್ಣ, ವಿನ್ಯಾಸದ ಸೈಕಲ್‌ ಸಿಗುವುದು ಕಷ್ಟವಾಗಿದೆ.
from India & World News in Kannada | VK Polls https://ift.tt/3g0NXPK
