ಎಂ.ಪ್ರಶಾಂತ್‌, ಬೆಂಗಳೂರು ಗ್ರಾಮಾಂತರ ಬೆಂಗಳೂರು ಗ್ರಾಮಾಂತರ: ಕರ್ನಾಟಕ ಸಕಾಲ ಸೇವೆಗಳ ಅಧಿನಿಯಮ 2014 ಮಾರ್ಗಸೂಚಿಯಲ್ಲಿ ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್‌ ರಾಜ್‌ ಇಲಾಖೆ 12 ಸೇವೆಗಳನ್ನು ಸಕಾಲಕ್ಕೆ ಸೇರ್ಪಡೆ ಮಾಡಿದ್ದು, ಗುರುತಿಸಿರುವ ಅಗತ್ಯ ಸೇವೆಗಳಿಗೆ ನಾಗರಿಕರು ಆನ್‌ಲೈನ್‌ ಮೂಲಕ ಅರ್ಜಿ ಸಲ್ಲಿಸಿ ಪಡೆದುಕೊಳ್ಳಬೇಕಿತ್ತು. ಆದರೇ ಬಹುತೇಕ ಗ್ರಾಪಂಗಳಲ್ಲಿ ಸಕಾಲದಲ್ಲಿ ಪ್ರಮಾಣ ಪತ್ರಗಳನ್ನು ಪಡೆಯಲು ನಿಗದಿತ ದಿನದವರಿಗೂ ಕಾಯಬೇಕಾಗುತ್ತದೆ ಎಂದು ಅಧಿಕಾರಿಗಳೊಂದಿಗೆ ಅಡ್ಜಸ್ಟ್‌ ಮೆಂಟ್‌ ಮಾಡಿಕೊಳ್ಳುತ್ತಿದ್ದ ಮಧ್ಯವರ್ತಿಗಳು ಅಧಿಕಾರಿಗಳ ಕೈಬರವಣಿಗೆಯಲ್ಲಿಯೇ ಪ್ರಮಾಣಪತ್ರಗಳನ್ನು ಕ್ಷಣಾರ್ಧಲ್ಲಿ ಪಡೆದುಕೊಳ್ಳುತ್ತಿದ್ದರು. ಎಲ್ಲವೂ ಪಾರದರ್ಶಕವಾಗಿ ನಾಗರಿಕರಿಗೆ ಸೇವೆ ಸಿಗಬೇಕು ಎಂಬ ಹಿನ್ನೆಲೆಯಲ್ಲಿ ಸಕಾಲ ಸೇವೆಗಳ ಅರ್ಜಿಗಳನ್ನು ಆನ್‌ಲೈನ್‌ ಮೂಲಕ ಸ್ವೀಕರಿಸಿ ಬಾಪೂಜಿ ಸೇವಾ ಕೇಂದ್ರದ ತಂತ್ರಾಂಶದಲ್ಲಿಯೇ ಇವುಗಳನ್ನು ವಿತರಣೆ ಮಾಡಲು ಸೂಚಿಸಿದ್ದು, ತೆರಿಗೆ ಪಾವತಿ, ಸಕಾಲ ಸೇವೆಗಳ ಅರ್ಜಿ, ಸ್ವೀಕೃತಿ, ವಿಲೇವಾರಿ ಮತ್ತು ಡಿಜಿಟಲ್‌ ಸೇವಾ ಪ್ರಮಾಣ ಪತ್ರಗಳ ವಿತರಣೆಗೆ ಅಭಿವೃದ್ಧಿಪಡಿಸಿರುವ ಬಾಪೂಜಿ ಸೇವಾ ಕೇಂದ್ರ ತಂತ್ರಾಂಶ ಕಡ್ಡಾಯಗೊಳಿಸಲಾಗಿದೆ. ಇದಲ್ಲದೆ ನಾಗರಿಕರಿಂದ ಸ್ವೀಕೃತವಾಗುವ ಅರ್ಜಿಗಳನ್ನು ಪಂಚತಂತ್ರ ತಂತ್ರಾಂಶದಲ್ಲಿ ಆಳವಡಿಸಿ ಸಂಸ್ಕರಿಸಿ ವಿಲೇವಾರಿ ಮಾಡುವುದು ಕಡ್ಡಾಯ. ಇದಕ್ಕಾಗಿ ಬಾಪೂಜಿ ಸೇವಾ ಕೇಂದ್ರದ ತಂತ್ರಾಂಶವನ್ನು ಅಭಿವೃದ್ಧಿಪಡಿಸಿ ಸಕಾಲ ತಂತ್ರಾಂಶದೊಂದಿಗೆ ಸಂಯೋಜಿಸಲಾಗಿದೆ. ಈ ಮೊದಲು ಗ್ರಾಪಂಗಳಲ್ಲಿ ಇ-ಸ್ವತ್ತುಗೆ ಮಾತ್ರ ಡಿಜಿಟಲ್‌ ಸಹಿಯಿತ್ತು. ಈಗ 11 ದಾಖಲೆಗಳಿಗೂ ಬೀಳಲಿದೆ. ಆರ್‌ಡಿಪಿಆರ್‌ ಆದೇಶವೇನು? ನಾಗರಿಕರಿಂದ ಸ್ವೀಕೃತವಾಗುವ ಅರ್ಜಿಗಳನ್ನು ಸಕಾಲ ತಂತ್ರಾಂಶದಲ್ಲಿ ನೋಂದಣಿ ಮಾಡದೆ, ಸಕಾಲ ಅರ್ಜಿ ಸಂಖ್ಯೆ ಇಲ್ಲದೆ, ಪಿಡಿಒ ಡಿಜಿಟಲ್‌ ಸಹಿ ಇಲ್ಲದೆ ವಿತರಿಸಲಾಗುವ ಯಾವುದೇ ಪ್ರಮಾಣ ಪತ್ರಗಳಿಗೆ ಕಾನೂನು ಬದ್ಧವಾಗಿ ಮಾನ್ಯತೆ ಇರುವುದಿಲ್ಲ ಎಂದು ಆರ್‌ಡಿಪಿಆರ್‌ ಇಲಾಖೆ ಆದೇಶಿಸಿದೆ. ಯಾವುದಕ್ಕೆಲ್ಲ ಬೇಕು ಡಿಜಿಟಲ್‌ ಸಹಿ? ನಮೂನೆ 9/11ಎ. ನಮೂನೆ 11ಬಿ. ವಾಣಿಜ್ಯ ಮತ್ತು ಕಟ್ಟಡ ಪರವಾನಗಿ, ರಸ್ತೆ ಅಗೆಯುವುದಕ್ಕಾಗಿ ಅನುಮತಿ. ಕುಡಿಯುವ ನೀರಿನ ನಿರ್ವಹಣೆ, ಬೀದಿ ದೀಪಗಳ ನಿರ್ವಹಣೆ, ಗ್ರಾಮ ನೈರ್ಮಲ್ಯ ನಿರ್ವಹಣೆ. ಬೆಸ್ಕಾಂ ಆಕ್ಷೇಪಣೆ ರಹಿತ ಪತ್ರ ವಿತರಣೆ, ದಾಖಲೆಗಳ ವಿತರಣೆ(ಜನಸಂಖ್ಯೆ, ಬೆಳೆ, ಜಾನುವಾರು ಗಣತಿ, ಬಿಪಿಎಲ್‌ ಪಟ್ಟಿ) ಆಸ್ತಿ ತೆರಿಗೆ. ಗ್ರಾಪಂಗಳಲ್ಲಿ ವಿತರಿಸುವ ಪ್ರಮಾಣ ಪತ್ರಗಳಿಗೆ ಡಿಜಿಟಿಲ್‌ ಸಹಿ ಇಲ್ಲದಿದ್ದರೆ ಅದಕ್ಕೆ ಮಾನ್ಯತೆ ಇರುವುದಿಲ್ಲ. ಈ ಬಗ್ಗೆ ಆದೇಶ ನೀಡಲಾಗಿದೆ. ಶಿಲ್ಪಾ ನಾಗ್‌, ನಿರ್ದೇಶಕರು ಇ-ಆಡಳಿತ, ಆರ್‌ಡಿಪಿಆರ್‌
from India & World News in Kannada | VK Polls https://ift.tt/3fMrWnv
