ಗಿರೀಶ ಎಸ್‌. ಕಲ್ಗುಡಿ ತುಮಕೂರು: ಮಾನವ ಮತ್ತು ನಡುವಿನ ಸಂಘರ್ಷ ಹೆಚ್ಚುತ್ತಿದ್ದು, ರಾಜ್ಯದಲ್ಲಿಯೇ ಹೆಚ್ಚು ಚಿರತೆಗಳು ತುಮಕೂರಿನಲ್ಲಿ ಸೆರೆಯಾಗುತ್ತಿವೆ. ಸೆರೆಸಿಕ್ಕ ಚಿರತೆಗಳನ್ನು ಜಿಲ್ಲೆಯಿಂದ 300 ಕಿ.ಮೀ ದೂರದ ಪ್ರದೇಶಗಳಿಗೆ ಸುರಕ್ಷಿತವಾಗಿ ಬಿಟ್ಟು ಬಂದರೂ ಇನ್ನೂ ಬೋನಿಗೆ ಬೀಳುತ್ತಲೇ ಇರುವುದರಿಂದ ಚಿರತೆ ಬಾಧಿತ ಪ್ರದೇಶವಾಗಿ ಜಿಲ್ಲೆ ಬದಲಾಗುತ್ತಿದೆ. 37 ಚಿರತೆ ಸೆರೆ: ಇದೇ ನವೆಂಬರ್‌ ತಿಂಗಳಿನಲ್ಲಿ ಐದು ಚಿರತೆಗಳನ್ನು ಅರಣ್ಯ ಇಲಾಖೆ ಸೆರೆ ಹಿಡಿದಿದ್ದು, 2019ರ ನವೆಂಬರ್‌ನಿಂದ 2020ರ ನವೆಂಬರ್‌ವರೆಗೆ ಒಟ್ಟು 37 ಚಿರತೆಗಳು ಸೆರೆ ಸಿಕ್ಕಿವೆ. ಅರಣ್ಯ ಇಲಾಖೆ ಇಟ್ಟಿದ್ದ ಬೋನಿಗೆ 34 ಚಿರತೆಗಳು ಬಿದ್ದಿದ್ದು, ಕಾಲುವೆ ಮತ್ತು ಬಾವಿಗೆ ಬಿದ್ದಿದ್ದ ಮೂರು ಚಿರತೆಗಳನ್ನು ಅರಣ್ಯ ಇಲಾಖೆ ರಕ್ಷಿಸಿದೆ. ಬೆಟ್ಟ, ಗುಡ್ಡ ಕಾಡುಗಳಲ್ಲಿ ಕಾಣಿಸಿಕೊಳ್ಳುತ್ತಿದ್ದ ಚಿರತೆಗಳು, ಈಗ ಗ್ರಾಮೀಣ ಪ್ರದೇಶಗಳಲ್ಲಿ ಕಾಣಿಸಿಕೊಳ್ಳಲಾರಂಭಿಸಿವೆ. ವಾರದಲ್ಲಿ ಕನಿಷ್ಟ ಎರಡು ಚಿರತೆ ದಾಳಿ ಪ್ರಕರಣಗಳಾದರೂ ಜಿಲ್ಲೆಯಲ್ಲಿ ವರದಿಯಾಗುತ್ತಿರುವುದರಿಂದ ಜನ ಭಯಭೀತರಾಗಿದ್ದಾರೆ. ಸೆರೆ ಸಿಕ್ಕ ಚಿರತೆಗಳನ್ನು ಬಂಡೀಪುರ, ನಾಗರಹೊಳೆ, ಹೊಳೆ ನರಸೀಪುರ ಪ್ರದೇಶಗಳಿಗೆ ಬಿಟ್ಟು ಬರಲಾಗಿದೆ. ಯಾವುದೇ ಚಿರತೆ ಜಿಲ್ಲೆಗೆ ವಾಪಾಸಾಗಿಲ್ಲ ಎನ್ನುತ್ತಾರೆ, ಅರಣ್ಯಾಧಿಕಾರಿಗಳು. ಚಿರತೆ ಬಾಧಿತ ಪ್ರದೇಶ: ತುಮಕೂರು, ಕುಣಿಗಲ್‌ ಹಾಗೂ ಗುಬ್ಬಿ ಸಂಧಿಸುವ ಹೆಬ್ಬೂರು ಪ್ರದೇಶಗಳು ಚಿರತೆ ಬಾಧಿತ ಪ್ರದೇಶವಾಗಿದ್ದು, ಈ ವ್ಯಾಪ್ತಿಯಲ್ಲಿ ಚಿರತೆಗಳ ಚಲನವನಗಳ ಮೇಲೆ ನಿಗಾ ಇಡಲು 24 ಕ್ಯಾಮೆರಾ ಅಳವಡಿಸಲಾಗಿದೆ. 17 ಬೋನುಗಳನ್ನು ಇಡಲಾಗಿದೆ. ತುಮಕೂರು ಜಿಲ್ಲೆ ಬೆಂಗಳೂರಿನ ಪಕ್ಕದಲ್ಲೇ ಇರುವ ಕಾರಣ ಬಹಳಷ್ಟು ಮಂದಿ ಹಳ್ಳಿ ತೊರೆದು ಪಟ್ಟಣ ಸೇರಿದ್ದಾರೆ. ಹೀಗಾಗಿ, ಜಮೀನುಗಳು ಬೀಳುಬಿದ್ದು ಪೊದೆಗಳು ಬೆಳೆದಿವೆ. ಈ ಪೊದೆಗಳು ಚಿರತೆಗಳ ಸಂತಾನೋತ್ಪತ್ತಿ ಹಾಗೂ ಮರಿಗಳ ರಕ್ಷಣೆಗೆ ಸೂಕ್ತ ಸ್ಥಳಗಳಾಗಿವೆ. ಈ ಪೊದೆಗಳು ಗ್ರಾಮಗಳ ಸುತ್ತಮುತ್ತವೇ ಇದ್ದು, ಆಹಾರವೂ ಸಿಗುತ್ತಿದೆ. ಹಾಗಾಗಿ ಚಿರತೆಗಳಿಗೆ ಮರಿಗಳ ಪೋಷಣೆ ಸುಲಭವಾಗುತ್ತಿದೆ. ಕಾಡಿನ ಚಿರತೆಗಳಲ್ಲ: ಜಿಲ್ಲೆಯಲ್ಲಿ ಸೆರೆಯಾಗಿರುವ ಚಿರತೆಗಳು ಕಾಡಿನಿಂದ ಬಂದಿರುವ ಚಿರತೆಗಳಲ್ಲ. ಗ್ರಾಮಾಂತರ ಪ್ರದೇಶದ ಪೊದೆಗಳಲ್ಲಿಯೇ ಸಂತಾನೋತ್ಪತ್ತಿ ಹೆಚ್ಚಿಸಿಕೊಂಡು ಇಲ್ಲಿಯೇ ಬೆಳೆದವುಗಳಾಗಿವೆ. ಕೋಳಿ ತ್ಯಾಜ್ಯದಿಂದ ನಾಯಿಗಳ ಸಂಖ್ಯೆ ಹೆಚ್ಚುತ್ತಿದ್ದು, ಚಿರತೆಗಳಿಗೆ ಸುಲಭವಾಗಿ ಆಹಾರವಾಗುತ್ತಿವೆ. ಹೀಗಾಗಿ ಜಿಲ್ಲೆಯಲ್ಲಿ ಕಂಡುಬರುವ ಚಿರತೆಗಳು ಕಾಡಿನವುಗಳಲ್ಲ. ಗ್ರಾಮೀಣ ಪ್ರದೇಶದ ಚಿರತೆಗಳೇ ಆಗಿವೆ. ಸೆರೆಯಾದ ಚಿರತೆಗಳ ಮೈ ಮೇಲಿನ ಚುಕ್ಕಿ, ಪಟ್ಟೆ ಗುರುತುಗಳನ್ನು ದಾಖಲಿಸಿಕೊಂಡು, ಆ ಚಿರತೆಯ ಛಾಯಾಚಿತ್ರ ತೆಗೆದುಕೊಂಡು ಸುರಕ್ಷಿತವಾಗಿ ಬಿಟ್ಟುಬರಲಾಗಿದೆ. ಈವರೆಗೆ ಬಿಟ್ಟು ಬಂದ ಚಿರತೆಗಳು ಜಿಲ್ಲೆಗೆ ವಾಪಸ್ ಬಂದಿಲ್ಲ ಎನ್ನುತ್ತಾರೆ ಜಿಲ್ಲಾ ಅರಣ್ಯ ಉಪಸಂರಕ್ಷಣಾಧಿಕಾರಿ ಗಿರೀಶ್‌. ಟಾಪ್‌ ಐದು ಜಿಲ್ಲೆಗಳು ರಾಜ್ಯದಲ್ಲಿಯೇ ಮೈಸೂರು, ತುಮಕೂರು, ಹಾಸನ, ಉಡುಪಿ ಹಾಗೂ ರಾಮನಗರದಲ್ಲಿ ಹೆಚ್ಚು ಚಿರತೆಗಳು ಸೆರೆಯಾಗಿವೆ. ತುಮಕೂರು ಜಿಲ್ಲೆಯಲ್ಲಿಯೇ 100 ರಿಂದ 150 ಚಿರತೆಗಳಿರಬಹುದು. ಈ ಹಿಂದೆ ಮೈಸೂರು, ಹಾಸನ, ಉಡುಪಿ, ರಾಮನಗರದಲ್ಲಿ ಹೆಚ್ಚು ಸೆರೆ ಹಿಡಿಯಲಾಗುತ್ತಿತ್ತು ಎಂದು ವನ್ಯಜೀವಿ ವಿಜ್ಞಾನಿ ಸಂಜಯ್‌ ಗುಬ್ಬಿ ಅವರು ತಿಳಿಸಿದ್ದಾರೆ. ಐವರು ಬಲಿ 2020ರ ಮಾರ್ಚ್‌ನಿಂದ ಈವರೆಗೆ ಜಿಲ್ಲೆಯಲ್ಲಿ ಇಬ್ಬರು ಚಿರತೆ ದಾಳಿಗೆ ಬಲಿಯಾಗಿದ್ದರೆ, 2019ರ ನವೆಂಬರ್‌ನಿಂದ ಈವರೆಗೆ ಐದು ಮಂದಿ ಬಲಿಯಾಗಿದ್ದಾರೆ. ಒಬ್ಬರು ಮಹಿಳೆ, ಇಬ್ಬರು ಮಕ್ಕಳು ಹಾಗೂ ಇಬ್ಬರು ವಯಸ್ಕರು ಮೃತಪಟ್ಟಿದ್ದಾರೆ. ಉಳಿದಂತೆ ನಾಲ್ಕೈದು ವರ್ಷಗಳ ಹಿಂದೆ ಮಾತ್ರ ಒಬ್ಬರು ಚಿರತೆ ದಾಳಿಗೆ ಬಲಿಯಾಗಿದ್ದಾರೆ.
from India & World News in Kannada | VK Polls https://ift.tt/3fJFAIb
