ಸಿಡ್ನಿ: ಟೀಮ್‌ ಇಂಡಿಯಾದ ಸ್ಟಾರ್‌ ಆಲ್‌ರೌಂಡರ್‌ ಹಾರ್ದಿಕ್ ಪಾಂಡ್ಯ ಬರೋಬ್ಬರಿ ಒಂದು ವರ್ಷಕ್ಕೂ ಹೆಚ್ಚಿನ ವಿರಾಮದ ಬಳಿಕ ಬೌಲಿಂಗ್‌ ಸಲುವಾಗಿ ಕೊನೆಗೂ ಚೆಂಡನ್ನು ಕೈಗೆತ್ತುಕೊಂಡಿದ್ದಾರೆ. ಆತಿಥೇಯ ವಿರುದ್ಧದ ಒಡಿಐ ಸರಣಿಯ 2ನೇ ಪಂದ್ಯದಲ್ಲಿ ಪ್ರಮುಖ ಬೌಲರ್‌ಗಳು ಹೆಚ್ಚು ರನ್‌ ಬಿಟ್ಟುಕೊಡುತ್ತಿದ್ದ ಕಾರಣ ಇನಿಂಗ್ಸ್‌ ಮಧ್ಯದಲ್ಲಿ ಹಾರ್ದಿಕ್ 4 ಓವರ್‌ಗಳ ಬೌಲಿಂಗ್‌ ಮಾಡಿ ಗಮನ ಸೆಳೆದರು. ಕಳೆದ ವರ್ಷ ನಡೆದ ಐಸಿಸಿ ವಿಶ್ವಕಪ್ ಟೂರ್ನಿಯ ಬಳಿಕ ಬಳಿಕ ಲಂಡನ್‌ನಲ್ಲಿ ಶಸ್ತ್ರಚಿಕಿತ್ಸೆಗೆ ಒಳಪಟ್ಟಿದ್ದರು. ಆದರೆ, ನಂತರ ಬ್ಯಾಟಿಂಗ್‌ನಲ್ಲಿ ಕಾಣಿಸಿಕೊಂಡರೂ ಕೂಡ ಬೌಲಿಂಗ್‌ ಮಾಡಿರಲಿಲ್ಲ. ತಮ್ಮ ಬೆನ್ನು ಮತ್ತಷ್ಟು ಬಲವಾಗಲಿ ಎಂಬ ಕಾರಣಕ್ಕೆ ಪಾಂಡ್ಯ ಬೌಲಿಂಗ್‌ ಮಾಡುವುದನ್ನು ಬಿಟ್ಟಿದ್ದರು. ಇತ್ತೀಚೆಗೆ ಅಂತ್ಯಗೊಂಡ ಇಂಡಿಯನ್ ಪ್ರೀಮಿಯರ್‌ ಲೀಗ್‌ ಟೂರ್ನಿಯಲ್ಲಿ ಮುಂಬೈ ಇಂಡಿಯನ್ಸ್‌ ಪರ ಕೂಡ ಅವರು ಒಂದು ಓವರ್‌ ಕೂಡ ಎಸೆದಿರಲಿಲ್ಲ. ಭಾನುವಾರದ ಪಂದ್ಯದಲ್ಲಿ ತಂಡದ ಪ್ರಮುಖ ವೇಗಿ ನವದೀಪ್‌ ಸೈನಿ, 6 ಓವರ್‌ಗಳಲ್ಲಿ 9.20ರ ಎಕಾನಮಿಯಲ್ಲಿ 55 ರನ್‌ ಬಿಟ್ಟುಕೊಟ್ಟು ದುಬಾರಿ ಸಾಬೀತಾದ ಹಿನ್ನೆಲೆಯಲ್ಲಿ ಹೆಚ್ಚುವರಿ ಅಪಾಯ ತಪ್ಪಿಸಲು ಕ್ಯಾಪ್ಟನ್‌ ವಿರಾಟ್‌ ಕೊಹ್ಲಿ ಕೊಂಚ ಬದಲಾವಣೆ ತಂದರು. ಮಯಾಂಕ್‌ ಅಗರ್ವಾಲ್‌ಗೆ ಒಂದು ಓವರ್‌ ನೀಡಿ ಯಶಸ್ಸು ಕಾಣದೇ ಇದ್ದಾಗ ಹಾರ್ದಿಕ್ ಪಾಂಡ್ಯಗೆ ಬೌಲಿಂಗ್‌ ಮಾಡುವಂತೆ ಹೇಳಿ ಅಚ್ಚರಿ ತಂದರು. ನಾಯಕ ನೀಡಿದ ಜವಾಬ್ದಾರಿಯನ್ನು ಅಚ್ಚುಕಟ್ಟಾಗಿ ನಿಭಾಯಿಸಿದ ಪಾಂಡ್ಯ, ಸ್ಪೋಟಕವಾಗಿ ಬ್ಯಾಟ್‌ ಮಾಡುತ್ತಿದ್ದ ಸ್ಟೀವ್‌ ಸ್ಮಿತ್‌ (104) ಮತ್ತು ಮಾರ್ನಸ್ ಲಾಬುಶೇನ್ (70) ಅವರ ಎದುರು ತಮ್ಮ ಮೊದಲ ಓವರ್‌ನಲ್ಲಿ ಕೇವಲ 5 ರನ್‌ ಮಾತ್ರವೇ ನೀಡಿ ಗಮನ ಸೆಳೆದರು. ತಮ್ಮ 4ನೇ ಓವರ್‌ನಲ್ಲಿ ಗ್ಲೆನ್‌ ಮ್ಯಾಕ್ಸ್‌ ವೆಲ್‌ ಅವರ ವಿಕೆಟ್‌ ಪಡೆಯುವುದಿದ್ದರಾದರೂ ಲಾಂಗ್‌ ಆಫ್‌ನಲ್ಲಿ ರವೀಂದ್ರ ಜಡೇಜಾ ಸುಲಭದ ಕ್ಯಾಚ್‌ ಕೈಚೆಲ್ಲಿದ ಪರಿಣಾಮ ಹಾರ್ದಿಕ್ ನಿರಾಸೆ ಅನುಭವಿಸಿದರು. ಬೌಲಿಂಗ್‌ನಲ್ಲಿ ತಮ್ಮ ಶ್ರೇಷ್ಠ ಲಯ ಕಂಡುಕೊಳ್ಳಲು ಈಗಷ್ಟೇ ಅಂಬೆ ಗಾಲಿಡುತ್ತಿರುವಂತೆ ಕಂಡ ಹಾರ್ದಿಕ್, ಹೆಚ್ಚು ವೇಗವಾಗಿ ಬೌಲಿಂಗ್‌ ಮಾಡುವ ಪ್ರಯತ್ನ ಮಾಡಲೇ ಇಲ್ಲ. ಇನ್ನು ಅವರ ಮಂದಗತಿಯ ಬೌಲಿಂಗ್‌ ಎದುರು ಆಸೀಸ್‌ ಬ್ಯಾಟ್ಸ್‌ಮನ್‌ಗಳು ಕೂಡ ರನ್‌ ಗಳಿಸಲು ತಿಣುಕಾಡಿದರು. ಇನ್ನು ಭಾರತದ ಆತಿಥ್ಯದಲ್ಲಿ 2021ರಲ್ಲಿ ಐಸಿಸಿ ಟಿ20 ಕ್ರಿಕೆಟ್ ವಿಶ್ವಕಪ್ ಟೂರ್ನಿ ನಡೆಯಲಿದ್ದು, ಹಾರ್ದಿಕ್ ಪಾಂಡ್ಯ ಬೌಲಿಂಗ್‌ಗೆ ಮರಳಿರುವುದು ತಂಡದ ಪಾಲಿಗೆ ಬಹುದೊಡ್ಡ ಪ್ಲಸ್‌ ಪಾಯಿಂಟ್‌ ಆದಂಗಿದೆ. ಈ ಮೂಲಕ ತಂಡವನ್ನು ಬಹುವಾಗಿ ಕಾಡುತ್ತಿದ್ದ 6ನೇ ಬೌಲರ್‌ನ ಕೊರತೆಯನ್ನು ಪಾಂಡ್ಯ ನೀಗಿಸಿದ್ದಾರೆ. 2018ರ ಇಂಗ್ಲೆಂಡ್‌ ಪ್ರವಾಸದಲ್ಲಿನ ಟೆಸ್ಟ್ ಕ್ರಿಕೆಟ್ ಸರಣಿ ವೇಳೆ ಹಾರ್ದಿಕ್ ಮೊದಲ ಬಾರಿ ಬೆನ್ನು ನೋವಿನ ಸಮಸ್ಯೆಗೆ ತುತ್ತಾಗಿದ್ದರು. ಬಳಿಕ ಲಂಡನ್‌ನಲ್ಲಿ ಚಿಕಿತ್ಸೆ ಪಡೆದಿದ್ದರಾದರೂ, ಸಮಸ್ಯೆ ಮರುಕಳಿಸಿದ ಕಾರಣ 2019ರ ಅಕ್ಟೋಬರ್‌ನಲ್ಲಿ ಶಸ್ತ್ರಚಿಕಿತ್ಸೆ ಪಡೆದಿದ್ದರು. ಪರಿಣಾಮ ನಂತರ ನಡೆದ ದಕ್ಷಿಣ ಆಫ್ರಿಕಾ ಬಾಂಗ್ಲಾದೇಶ ವಿರುದ್ಧದ ಟೆಸ್ಟ್ ಸರಣಿ ಹಾಗೂ ವೆಸ್ಟ್‌ ಇಂಡೀಸ್‌, ಶ್ರೀಲಂಕಾ ಮತ್ತು ಆಸ್ಟ್ರೇಲಿಯಾ ವಿರುದ್ಧದ ಸೀಮಿತ ಓವರ್‌ಗಳ ಸರಣಿಗಳಿಂದಲೂ ಹೊರಗುಳಿದಿದ್ದರು. ಇದೇ ಕಾರಣಕ್ಕೆ ಈ ವರ್ಷ ನ್ಯೂಜಿಲೆಂಡ್‌ ಪ್ರವಾಸಕ್ಕೂ ಪಾಂಡ್ಯ ಅವರನ್ನು ಆಯ್ಕೆ ಮಾಡಲಾಗಿರಲಿಲ್ಲ. ಆದರೆ ಐಪಿಎಲ್‌ 2020 ಟೂರ್ನಿ ಮೂಲಕ ಸ್ಪರ್ಧಾತ್ಮಕ ಕ್ರಿಕೆಟ್‌ಗೆ ಕಮ್‌ಬ್ಯಾಕ್‌ ಮಾಡಿದ ಹಾರ್ದಿಕ್, ತಮ್ಮ ಸ್ಫೋಟಕ ಬ್ಯಾಟಿಂಗ್‌ ಮೂಲಕ ಗಮನ ಸೆಳೆದಿದ್ದರು. ಆಸ್ಟ್ರೇಲಿಯಾ ವಿರುದ್ಧದ ಮೊದಲ ಒಡಿಐನಲ್ಲೂ 90 ರನ್‌ ಸಿಡಿಸಿ ಮಿಂಚಿದ್ದರು. ಆಸೀಸ್‌ ಬೃಹತ್ ಮೊತ್ತ ಏಕದಿನ ಕ್ರಿಕೆಟ್ ಸರಣಿಯ ಮೊದಲ ಪಂದ್ಯದಲ್ಲೂ ಬೃಹತ್ ಮೊತ್ತ ಪೇರಿಸಿ 66 ರನ್‌ಗಳ ಜಯ ದಾಖಲಿಸಿದ್ದ ಆಸ್ಟ್ರೇಲಿಯಾ ತಂಡ, 2ನೇ ಏಕದಿನ ಪಂದ್ಯದಲ್ಲೂ ಸ್ಟೀವ್‌ ಸ್ಮಿತ್‌ (104) ದಾಖಲಿಸಿದ ಶತಕದ ಬಲದಿಂದ 50 ಓವರ್‌ಗಳಲ್ಲಿ 389 ರನ್‌ಗಳ ಬೃಹತ್ ಮೊತ್ತ ಪೇರಿಸಿತು. ಸ್ಮಿತ್‌ ಹೊರತಾಗಿ ಆರೊನ್ ಫಿಂಚ್ (60), ಡೇವಿಡ್‌ ವಾರ್ನರ್‌ (83), ಮಾರ್ನಸ್ ಲಾಬುಶೇನ್ (70) ಮತ್ತು ಗ್ಲೆನ್‌ ಮ್ಯಾಕ್ಸ್‌ವೆಲ್‌ (63*) ಅಧರ್ಶತಕಗಳನ್ನು ದಾಖಲಿಸಿದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/37iGXcN
