ವರದಿ: ಎನ್‌. ಮೂರ್ತಿ ಕೊರಟಗೆರೆ: ಗುಡಿಸಲು ಸಮೀಪದ ಬೆಟ್ಟ ಗುಡ್ಡಗಳೇ ಕೂಲಿ ಕಾರ್ಮಿಕರಿಗೆ ಪ್ರತಿನಿತ್ಯ ಶೌಚಾಲಯ. ಬಾಗಿಲೇ ಇಲ್ಲದ ಹಳೆಯ ಸೀರೆಯ ಗುಡಾರವೇ ಸ್ನಾನಗೃಹ. ಭದ್ರತೆಯಿಲ್ಲದ ಹತ್ತಾರು ಗುಡಿಸಲುಗಳೇ ಪುಟಾಣಿ ಮಕ್ಕಳ ಪಾಲಿನ ಅಂಗನವಾಡಿ ಕೇಂದ್ರ. ಈ ಎಲ್ಲಾ ಸಮಸ್ಯೆ ನಡುವೆ ಹಗಲುರಾತ್ರಿ ಎನ್ನದೆ ಎತ್ತಿನಹೊಳೆ ಪೈಪ್‌ಲೈನ್‌ ಕಾಮಗಾರಿಯಲ್ಲಿ ಕಾರ್ಮಿಕರ ಕಾಯಕ... ಇದು ಕಗ್ಗತ್ತಲೆಯಲ್ಲೇ ದಿನ ಸವೆಸುತ್ತಿರುವ 40ಕ್ಕಿಂತ ಹೆಚ್ಚಿನ ಅಲೆಮಾರಿ ಕೂಲಿ ಕಾರ್ಮಿಕರ ಬದುಕು ಬವಣೆಯಾದರೆ, ಇವರಿಗೆ ತಲುಪಬೇಕಾದ ಸವಲತ್ತು, ಸೌಲಭ್ಯಗಳನ್ನು ಒದಗಿಸಬೇಕಾದ ಕಾರ್ಮಿಕ ಇಲಾಖೆ ಮಾತ್ರ ಕಣ್ಮುಚ್ಚಿ ಕುಳಿತಿದೆ. ಕೊರಟಗೆರೆ ತಾಲೂಕು ಕಸಬಾ ಹೋಬಳಿ ತುಂಬಾಡಿ ಗ್ರಾಪಂ ವ್ಯಾಪ್ತಿಯ ದಾಸರಹಳ್ಳಿ ಬಳಿಯಲ್ಲಿ ಕಳೆದ 11 ತಿಂಗಳಿಂದ ವಾಸಿಸುತ್ತಿರುವ 40ಕ್ಕೂ ಹೆಚ್ಚು ಅಲೆಮಾರಿ ಕೂಲಿ ಕಾರ್ಮಿಕ ಕುಟುಂಬಗಳಿಗೆ ಮೂಲಸೌಕರ್ಯವೇ ಮರೀಚಿಕೆಯಾಗಿ 60ಕ್ಕೂ ಹೆಚ್ಚು ಕಾರ್ಮಿಕರ ಪುಟಾಣಿ ಮಕ್ಕಳಿಗೆ ಅಭದ್ರತೆ ಎದುರಾಗಿದೆ. ಮಕ್ಕಳ ರಕ್ಷಣೆ ಮತ್ತು ಪೋಷಣೆಯ ಬಗ್ಗೆ ಜಾಗೃತಿ ವಹಿಸಬೇಕಾದ ಮಹಿಳಾ ಮತ್ತು ಮಕ್ಕಳ ಕಲ್ಯಾಣ, ಕಾರ್ಮಿಕ, ಪೊಲೀಸ್ ಮತ್ತು ಕಂದಾಯ ಇಲಾಖೆ ಮೌನಕ್ಕೆ ಶರಣಾದ ಪರಿಣಾಮ, ಸಮಸ್ಯೆ ಈಗ ದುಪ್ಪಟ್ಟಾಗಿದೆ. ಮಧುಗಿರಿ-ಕೊರಟಗೆರೆ ಮಾರ್ಗದ ಎತ್ತಿನಹೊಳೆ ಯೋಜನೆಯ ಪೈಪ್‌ಲೈನ್‌ ಕಾಮಗಾರಿಗೆ ರಾಯಚೂರು ಜಿಲ್ಲೆಯ ಮೆಹಬೂಬ ನಗರದ ಪ್ರತಿ ಕುಟುಂಬಕ್ಕೆ 1 ಲಕ್ಷ ಮುಂಗಡ ಹಣ ನೀಡಿ 40 ಕುಟುಂಬವನ್ನು ಕಾರ್ಮಿಕ ಗುತ್ತಿಗೆದಾರ ಕತ್ತಲ್ಲಪ್ಪ ಎಂಬಾತ 10 ತಿಂಗಳ ಹಿಂದೆ ಕೆಲಸಕ್ಕಾಗಿ ಕರೆತಂದಿದ್ದಾನೆ. ದಾಸರಹಳ್ಳಿ ಸಮೀಪ ರಾಜ್ಯ ಹೆದ್ದಾರಿಯ ಬಲಭಾಗದ ರೈತನ ಜಮೀನಿನಲ್ಲಿ 60ಕ್ಕೂ ಹೆಚ್ಚು ಕಾರ್ಮಿಕರಿಗೆ ಹಳೆಯ ಸೀರೆ ಮತ್ತು ತೆಂಗಿನಗರಿಯ ಗುಡಿಸಲು ನಿರ್ಮಿಸಿ ಹಗಲುರಾತ್ರಿ ಎನ್ನದೆ ಕೆಲಸ ಮಾಡಿಸುತ್ತಿರುವ ಬಗ್ಗೆ ಕಾರ್ಮಿಕ ಇಲಾಖೆಗೆ ಮಾಹಿತಿಯೇ ಇಲ್ಲದಾಗಿದೆ. ಕನ್ನಡವೇ ಬರದಿರುವ ಅಲೆಮಾರಿ ಕೂಲಿ ಕಾರ್ಮಿಕ ಕುಟುಂಬ ಕತ್ತಲೆಯಲ್ಲಿ ಕಾಡು ಪ್ರಾಣಿಗಳಂತೆ ಬದುಕುವ ದುಸ್ಥಿತಿ ನಿರ್ಮಾಣವಾಗಿದೆ. ಕಾರ್ಮಿಕರು ಮತ್ತು ಅವರ ಪುಟಾಣಿ ಮಕ್ಕಳಿಗೆ ಅನಾಹುತ ಎದುರಾದರೆ ಎತ್ತಿನಹೊಳೆ ಯೋಜನೆಯ ಅಧಿಕಾರಿ ವರ್ಗವೇ ಜವಾಬ್ದಾರಿ ವಹಿಸಬೇಕಾಗಿದೆ. ಸಮಾಜ ಕಲ್ಯಾಣ, ಮಹಿಳಾ ಮತ್ತು ಮಕ್ಕಳ ಕಲ್ಯಾಣ, ಕಂದಾಯ, ಕಾರ್ಮಿಕ ಮತ್ತು ಪೊಲೀಸ್ ಇಲಾಖೆ ತಮ್ಮ ಕಚೇರಿಯಿಂದ ಹೊರ ಬಂದು ಇಂತಹ ಜನರ ಸಂಕಷ್ಟಕ್ಕೆ ಕೈಜೋಡಿಸಬೇಕಿದೆ. ಕಾಣೆಯಾದ ಕಾರ್ಮಿಕ ಇಲಾಖೆಕಾರ್ಮಿಕರ ಕೆಲಸದ ಅವಧಿ ಮತ್ತು ಕಾರ್ಮಿಕ ಇಲಾಖೆಯ ಪರವಾನಗಿ ಪತ್ರದ ಬಗ್ಗೆ ಗುತ್ತಿಗೆದಾರನ ಜೊತೆ ಕಾರ್ಮಿಕರಿಗೂ ತಿಳಿವಳಿಕೆ ಇಲ್ವಂತೆ. ಎತ್ತಿನಹೊಳೆ ಪೈಪ್‌ಲೈನ್‌ ಕೆಲಸ ಮಾಡುತ್ತಿರುವ ಅನ್ಯರಾಜ್ಯದ ಸಾವಿರಾರು ಕಾರ್ಮಿಕರ ಬಗ್ಗೆ ಕಾರ್ಮಿಕ ಇಲಾಖೆಗೆ ಮಾಹಿತಿಯೇ ಇಲ್ಲವೇ? ಕಾರ್ಮಿಕರಿಗೆ ನೀಡುವ ನೀರು, ಊಟ, ವಸತಿ, ಶೌಚಾಲಯ, ಬೆಳಕು, ಭದ್ರತೆ, ಆರೋಗ್ಯ ತಪಾಸಣೆ ನಡೆಸಬೇಕಾದ ಕಾರ್ಮಿಕ ಇಲಾಖೆಯೇ ಕೊರಟಗೆರೆಯಲ್ಲಿ ಕಾಣುತ್ತಿಲ್ಲ. ನಮ್ಮ ಗುತ್ತಿಗೆದಾರ ಎರಡು ಜೋಡಿ ಕಾರ್ಮಿಕರಿಗೆ 1ಲಕ್ಷ ಮುಂಗಡ ಹಣ ನೀಡಿದ್ದಾರೆ. ನಾವು 10 ತಿಂಗಳು ಹಗಲು ರಾತ್ರಿ ಕೆಲಸ ಮಾಡಿ ಅವರ ಸಾಲ ತೀರಿಸಬೇಕಾಗಿದೆ. ಕಾರ್ಮಿಕರಿಗೆ ಯಾರು ಸೌಲಭ್ಯ ನೀಡ್ತಾರೆ ಹೇಳಿ ಸ್ವಾಮಿ. ಗುಡಿಸಲು ಸಮೀಪದ ಬೆಟ್ಟಗುಡ್ಡ ಮತ್ತು ಹಳ್ಳವೇ ನಮಗೆ ಶೌಚಾಲಯ ಆಗಿದೆ. ನಮ್ಮ ಸಮಸ್ಯೆ ಹೇಳಿದರೆ ಕಾರ್ಮಿಕರ ಕೆಲಸಕ್ಕೆ ಕುತ್ತು ಎದುರಾಗಲಿದೆ. ಶ್ರೀನಿವಾಸ್ ಕೂಲಿಕಾರ್ಮಿಕ ರಾಯಚೂರು ಮಹಿಳಾ ಮತ್ತು ಮಕ್ಕಳ ಇಲಾಖೆಯಿಂದ ಮಕ್ಕಳಿಗೆ ಪೂರಕವಾದ ಪೌಷ್ಟಿಕ ನೀಡುವ ಜವಾಬ್ದಾರಿ ನಮ್ಮದಾಗಿದೆ. ಅಲೆಮಾರಿ ಕಾರ್ಮಿಕವರ್ಗ ವಾಸಿಸುತ್ತಿರುವ ಸ್ಥಳಕ್ಕೆ ಭೇಟಿ ನೀಡಿ ವರದಿ ನೀಡುವಂತೆ ಕೊರಟಗೆರೆ ಸಿಡಿಪಿಓ ಕಚೇರಿಗೆ ತಕ್ಷಣ ಸೂಚಿಸುತ್ತೇನೆ. ಹಾಗೂ ಭದ್ರತೆಯ ಬಗ್ಗೆ ಕಾರ್ಮಿಕ, ಕಂದಾಯ ಮತ್ತು ಪೊಲೀಸ್ ಇಲಾಖೆ ಕ್ರಮ ಕೈಗೊಳ್ಳಬೇಕಾಗಿದೆ. ನಟರಾಜು ಉಪ ನಿರ್ದೇಶಕ. ಮಕ್ಕಳ ಕಲ್ಯಾಣ ಇಲಾಖೆ. ತಮಕೂರು ಕಾರ್ಮಿಕರ ಬಳಕೆಯ ಬಗ್ಗೆ ಗುತ್ತಿಗೆ ಕಾರ್ಮಿಕ ಖಾಯ್ದೆಯಡಿ ಇಲಾಖೆಯಿಂದ ಪರವಾನಗಿ ಪಡೆದಿರಬೇಕಾಗಿದೆ. ಕಾರ್ಮಿಕರಿಗೆ ತಮ್ಮ ಹಕ್ಕು ಮತ್ತು ಸೌಲಭ್ಯದ ಬಗ್ಗೆ ಗುತ್ತಿಗೆದಾರ ಸಮರ್ಪಕ ಮಾಹಿತಿ ನೀಡಿರಬೇಕು. ತಕ್ಷಣ ಕಾರ್ಮಿಕ ನಿರೀಕ್ಷಕರ ತಂಡವನ್ನು ಸ್ಥಳಕ್ಕೆ ಕಳುಹಿಸಿ ಕಾರ್ಮಿಕರಿಗೆ ನೀಡಿರುವ ಭದ್ರತೆ ಮತ್ತು ಸೌಲಭ್ಯದ ಬಗ್ಗೆ ತಪಾಸಣೆ ನಡೆಸಿ ಕ್ರಮ ಕೈಗೊಳ್ಳುತ್ತೇವೆ. ಸುಭಾಷ್ ಎಂ.ಆಲದಕಟ್ಟಿ ಜಿಲ್ಲಾ ಕಾರ್ಮಿಕ ಅಧಿಕಾರಿ
from India & World News in Kannada | VK Polls https://ift.tt/3fLnOUP
