ತಿರುವನಂತಪುರಂ: ವಾರ್ಷಿಕ ಮಂಡಲ ಉತ್ಸವ ಆರಂಭವಾದ ನಂತರ 10 ದಿನಗಳ ಅವಧಿಯಲ್ಲಿ ಶಬರಿಮಲೆಯಲ್ಲಿ 39 ಮಂದಿಗೆ ಕೊರೊನಾ ಸೋಂಕು ದೃಡಪಟ್ಟಿದೆ. ಸೋಂಕಿತರ ಪೈಕಿ 27 ಮಂದಿ ದೇವಸ್ಥಾನದ ಸ್ಥಳೀಯ ಉಸ್ತುವಾರಿ ನಿರ್ವಹಿಸುತ್ತಿರುವ ಸರಕಾರದ ವಿವಿಧ ಇಲಾಖೆಗಳ ಸಿಬ್ಬಂದಿಯಾಗಿದ್ದು, ಎಲ್ಲರನ್ನೂ ಕೊರೊನಾ ಚಿಕಿತ್ಸಾ ಕೇಂದ್ರಗಳಿಗೆ ಕಳುಹಿಸಲಾಗಿದೆ ಎಂದು ತಿರುವಾಂಕೂರು ದೇವಸ್ಥಾನ ಮಂಡಳಿ(ಟಿಡಿಬಿ) ತಿಳಿಸಿದೆ. ಸೋಂಕಿತರ ಪೈಕಿ ಮಂಡಳಿಯ ನಾಲ್ವರು ನೌಕರರು ಕೂಡ ಇದ್ದಾರೆ. ಜತೆಗೆ ಇಬ್ಬರು ತಾತ್ಕಾಲಿಕ ಅವಧಿಯ ಸಿಬ್ಬಂದಿಗೂ ಕೊರೊನಾ ದೃಢಪಟ್ಟಿದೆ. ಇನ್ನು ಕ್ಷೇತ್ರದಲ್ಲಿ ಭದ್ರತೆಗೆ ನಿಯೋಜನೆಗೊಂಡಿರುವ ಇಬ್ಬರು ಪೊಲೀಸ್‌ ಸಿಬ್ಬಂದಿಗೂ ಸೋಂಕು ಕಾಣಿಸಿಕೊಂಡಿದೆ. ಇವರೆಲ್ಲರೂ ಸನ್ನಿಧಾನ, ಪಂಬಾ ಹಾಗೂ ನಿಲಕ್ಕಲ್‌ ಬೇಸ್‌ ಕ್ಯಾಂಪ್‌ಗಳಲ್ಲಿ ಕಾರ್ಯನಿರ್ವಹಿಸುತ್ತಿದ್ದರು. ಕೇರಳ ಮತ್ತು ಕೇಂದ್ರ ಸರಕಾರದ ಸೂಚನೆಯಂತೆ ಎಲ್ಲ ಅಗತ್ಯ ಮುನ್ನೆಚ್ಚರಿಕೆ ಮಾರ್ಗಸೂಚಿಗಳನ್ನು ಜಾರಿ ಮಾಡಿದ ನಂತರವೇ ನ.16ರಿಂದ ದೇವಸ್ಥಾನದಲ್ಲಿ ಸಾರ್ವಜನಿಕರ ದರ್ಶನಕ್ಕೆ ಅವಕಾಶ ನೀಡಲಾಗಿತ್ತು. ಡಿ.26 ರಂದು ಮಂಡಲ ಪೂಜೆ ನೆರವೇರಲಿದ್ದು ಬಳಿಕ ಜ.14ರಂದು ಮಕರವಿಳಕ್ಕು ಆಚರಣೆ ನಡೆಯಲಿದೆ. ಜ.20 ರಿಂದ ಅಯ್ಯಪ್ಪಸ್ವಾಮಿ ದೇವಸ್ಥಾನದ ಬಾಗಿಲನ್ನು ಮುಚ್ಚಲಾಗುವುದು. ಕೊರೊನಾ ಸಾಂಕ್ರಾಮಿಕ ಹಾವಳಿ ನಂತರ ಶಬರಿಮಲೆಯಲ್ಲಿ ನಡೆಯುತ್ತಿರುವ ವಾರ್ಷಿಕ ವಿಶೇಷ ಪೂಜೆ ಇದಾಗಿದೆ.
from India & World News in Kannada | VK Polls https://ift.tt/33qznMd
