ಬೆಂಗಳೂರು: ಕಾರ್ಯಪಡೆಗೆ ರಾಜ್ಯ ಸರಕಾರ 10 ಕೋಟಿ ರೂ. ಬಿಡುಗಡೆ ಮಾಡಿದ್ದು, ಅಡಕೆ ಸಂಬಂಧಿತ ಸಂಶೋಧನೆ ಇನ್ನಿತರ ಚಟುವಟಿಕೆ ನಡೆಸಲು ದಾರಿ ಸುಗಮವಾದಂತಾಗಿದೆ. ರಾಜ್ಯದಲ್ಲಿ ಕಾಫಿ, ಕಾಳು ಮೆಣಸು, ತೆಂಗು, ಏಲಕ್ಕಿ ಮತ್ತಿತರ ಬೆಳೆಗಳ ಮಾರುಕಟ್ಟೆ ವಿಸ್ತರಣೆ, ಸಂಶೋಧನಾತ್ಮಕ ಕೆಲಸಗಳಿಗೆ ಸಂಘಟಿತ ವ್ಯವಸ್ಥೆಯಿದೆ. ಕಾಫಿ ಬೋರ್ಡ್‌, ಸಾಂಬಾರು ಮಂಡಳಿಗಳು ಈ ಸಂಬಂಧದಲ್ಲಿ ಸಕ್ರಿಯವಾಗಿವೆ. ಅಡಕೆ ಬೆಳೆಗೆ ಮಾತ್ರ ಇಂತಹ ಪ್ರೋತ್ಸಾಹ ಇಲ್ಲದಿರುವುದರಿಂದ ಬೆಳೆಗಾರರ ಹಿತರಕ್ಷಣೆ ಸಾಧ್ಯವಾಗುತ್ತಿಲ್ಲ. ಈ ಹಿನ್ನೆಲೆಯಲ್ಲಿ ರಚಿಸಿರುವ ಸರಕಾರ ಇದೀಗ ಅನುದಾನದ ಬೆಂಬಲ ನೀಡಿದೆ. ವಿಕ ಅಭಿಯಾನಅಡಕೆ ಸಂಬಂಧಿತ ಕಾರ್ಯಪಡೆ ರಚಿಸುವಂತೆ 'ವಿಜಯ ಕರ್ನಾಟಕ'ದಿಂದ ವಿಶೇಷ ಅಭಿಯಾನ ನಡೆಸಲಾಗಿತ್ತು. ಪತ್ರಿಕೆ ಹಾಗೂ ಅಡಕೆ ಬೆಳೆಯುವ ಪ್ರದೇಶದ 8 ಜಿಲ್ಲೆಗಳ ವ್ಯಾಪ್ತಿಯ ಸಹಕಾರ ಸಂಸ್ಥೆಗಳ ಸಹಯೋಗದಲ್ಲಿ ಸಮಾವೇಶನ ನಡೆಸಿ ಹಕ್ಕೊತ್ತಾಯ ಸಲ್ಲಿಸಲಾಗಿತ್ತು. ಬಳಿಕ ಸಿಎಂ ಬಿ.ಎಸ್‌.ಯಡಿಯೂರಪ್ಪ ಅವರನ್ನು ಭೇಟಿಯಾಗಿ ಈ ಬಗ್ಗೆ ಮನವಿ ಸಲ್ಲಿಸಲಾಗಿತ್ತು. ಕಾರ್ಯಪಡೆ ರಚಿಸುವ ಬಗ್ಗೆ ಸ್ಥಳದಲ್ಲೇ ನಿರ್ಧಾರ ಪ್ರಕಟಿಸಿದ್ದರು. ಈ ವೇಳೆ ಸಂಸದೆ ಶೋಭಾ ಕರಂದ್ಲಾಜೆ ವಿಶೇಷ ಮುತುವರ್ಜಿ ವಹಿಸಿ ಅಡಕೆ ಬೆಳೆಗಾರರ ಹಿತ ಕಾಯಲು ಅಗತ್ಯ ಕ್ರಮ ಕೈಗೊಳ್ಳಲು ಸಿಎಂ ಅವರಿಗೆ ಮನದಟ್ಟು ಮಾಡಿಕೊಟ್ಟಿದ್ದರು. ಬಳಿಕ ತೀರ್ಥಹಳ್ಳಿ ಶಾಸಕ ಆರಗ ಜ್ಞಾನೇಂದ್ರ ಅಧ್ಯಕ್ಷತೆಯಲ್ಲಿ ಕಾರ್ಯಪಡೆ ರಚಿಸಿದ ಸರಕಾರ ಆದೇಶ ಹೊರಡಿಸಿತ್ತು. ಅಡಕೆ ಕಾರ್ಯಪಡೆಗೆ ಮೂಲಸೌಕರ್ಯ ಹಾಗೂ ಅಗತ್ಯ ನೆರವು ಒದಗಿಸುವ ಕಾರ್ಯ ಆಗಿರಲಿಲ್ಲ. ಈ ವಿಚಾರದಲ್ಲೂ ಗಮನ ಸೆಳೆಯುವ ಕೆಲಸವನ್ನು 'ವಿಕ' ಮಾಡಿತ್ತು. ಶೀಘ್ರ ಸಭೆ ಕರೆದು ಚಟುವಟಿಕೆ: ಜ್ಞಾನೇಂದ್ರ ಅಡಕೆ ಕಾರ್ಯಪಡೆಗೆ ಸರಕಾರ 10 ಕೋಟಿ ರೂ. ಬಿಡುಗಡೆ ಮಾಡಿದೆ. ಇದರಿಂದ ಕಾರ್ಯಪಡೆಗೆ ಆರ್ಥಿಕ ಶಕ್ತಿ ಬಂದಂತಾಗಿದ್ದು, ಶೀಘ್ರ ಸಭೆ ಕರೆದು ಮುಂದಿನ ಕಾರ್ಯ ಚಟುವಟಿಕೆಯ ರೂಪುರೇಷೆ ಸಿದ್ಧಪಡಿಸಲಾಗುವುದು ಎಂದು ಕಾರ್ಯಪಡೆ ಅಧ್ಯಕ್ಷ ಹಾಗೂ ತೀರ್ಥಹಳ್ಳಿ ಶಾಸಕ ಆರಗ ಜ್ಞಾನೇಂದ್ರ ತಿಳಿಸಿದ್ದಾರೆ. ಈ ಬಗ್ಗೆ 'ವಿಕ'ದೊಂದಿಗೆ ಮಾತನಾಡಿದ ಅವರು, ''ಅಡಕೆ ಕಾರ್ಯಪಡೆಗೆ ಅನುದಾನ ಒದಗಿಸಿದ ಸಿಎಂ ಹಾಗೂ ಸರಕಾರಕ್ಕೆ ಅಭಿನಂದನೆ ಸಲ್ಲಿಸುತ್ತೇನೆ. ಅಡಕೆಯಿಂದ ಆರೋಗ್ಯಕ್ಕೆ ಹಾನಿಯಾಗದು ಎಂಬ ಬಗ್ಗೆ ಕ್ಲಿನಿಕಲ್‌ ವರದಿ ತಯಾರಿಸಬೇಕಿದೆ. ಈ ಸಂಬಂಧ ಎಂ.ಎಸ್‌.ರಾಮಯ್ಯ ಸಂಸ್ಥೆಯೊಂದಿಗೆ ಒಡಂಬಡಿಕೆ ಮಾಡಿಕೊಳ್ಳಲಾಗಿದೆ. ಹಾಗೆಯೇ ಅಡಕೆಯ ಪರ್ಯಾಯ ಉಪಯೋಗದ ಬಗ್ಗೆ ಸಂಶೋಧನೆ ನಡೆಸಬೇಕಿದೆ. ಅಡಕೆ ವಿರುದ್ಧ ಸುಪ್ರೀಂಕೋರ್ಟ್‌ನಲ್ಲಿ ಪ್ರಕರಣವಿದೆ. ಅಲ್ಲಿ ವಾದ ಮಂಡಿಸಲು ಹಿರಿಯ ವಕೀಲರನ್ನು ನೇಮಿಸಲಾಗುವುದು. ಕಾರ್ಯಪಡೆ ಸಭೆ ಕರೆದು ಸಮಾಲೋಚಿಸಿ ಈ ನಿಟ್ಟಿನಲ್ಲಿ ಮುಂದುವರಿಯಲಾಗುವುದು,'' ಎಂದು ಹೇಳಿದ್ದಾರೆ.
from India & World News in Kannada | VK Polls https://ift.tt/3q9QprH
