(ಮೈಸೂರು): ಡ್ರಾಪ್‌ ಕೊಡುವ ನೆಪದಲ್ಲಿ ವ್ಯಕ್ತಿಯೊಬ್ಬರನ್ನು ನಿರ್ಜನ ಪ್ರದೇಶಕ್ಕೆ ಕರೆದೊಯ್ದು ಹಣ, ವಾಚ್‌ ಹಾಗೂ ಮೊಬೈಲ್‌ ಕಿತ್ತುಕೊಂಡು ಪರಾರಿಯಾಗಿದ್ದ ಮೂವರು ದರೋಡೆಕೋರರನ್ನು ಬಂಧಿಸುವಲ್ಲಿ ಪಿರಿಯಾಪಟ್ಟಣ ಪೊಲೀಸರು ಯಶಸ್ವಿಯಾಗಿದ್ದಾರೆ. ಹುಣಸೂರು ಕೆಂಚನಕೆರೆ ಹೊಸಕೋಟೆ ಗ್ರಾಮದ ದೀಪು, ಅಶೋಕ ಹಾಗೂ ಪುಟ್ಟೇಗೌಡ ಬಂಧಿತರು. ಕೇರಳ ಮೂಲದ ಸಂತೋಷ್‌ ಎಂಬುವವರು ಹಾಸನ ಜಿಲ್ಲೆಯ ಅರಕಲಗೂಡು ತಾಲೂಕಿನ ಮರಿಯಾ ನಗರದಲ್ಲಿ ಗುತ್ತಿಗೆ ಆಧಾರದಲ್ಲಿ ಜಮೀನು ಪಡೆದು ಕೋಳಿ ಸಾಕಣೆ ಮಾಡುತ್ತಿದ್ದರು. ನವೆಂಬರ್ 20ರ ಶುಕ್ರವಾರ ವೈಯಕ್ತಿಕ ಕಾರಣಕ್ಕಾಗಿ ಬೆಂಗಳೂರಿಗೆ ತೆರಳಿ ವಾಪಸ್‌ ಅರಕಲಗೂಡಿಗೆ ಬರುತ್ತಿರುವಾಗ ಹುಣಸೂರಿನ ಬಸ್‌ ನಿಲ್ದಾಣದ ಬಳಿ ಶೌಚಾಲಯಕ್ಕೆ ಹೋಗಿ ಬರುವಷ್ಟರಲ್ಲಿ ಬಸ್‌ ಹೊರಟು ಹೋಗಿತ್ತು. ಬ್ಯಾಗ್‌ ಹಾಗೂ ವಸ್ತುಗಳು ಬಸ್ಸಿನಲ್ಲಿಯೇ ಉಳಿದಿದ್ದ ಕಾರಣ ಮತ್ತೊಂದು ಬಸ್ಸಿನಲ್ಲಿ ಹಿಂಬಾಲಿಸಿ ತಾಲೂಕಿನ ಕಂಪಲಾಪುರದ ಬಳಿ ಇಳಿದು ಲಗೇಜ್‌ ತೆಗೆದುಕೊಳ್ಳಲು ಹೋಗುವ ಮೊದಲೇ ಬಸ್‌ ಹೊರಟು ಹೋಗಿದೆ. ಅಷ್ಟರಲ್ಲಿ ಹಿಂಬಾಲಿಸಿ ಬಂದ ಬಸ್‌ ಸಹ ಹೊರಟು ಹೋಗಿದೆ. ನಂತರ ದಿಕ್ಕು ತೋಚದೆ ಬಾರ್‌ ಮುಂಭಾಗ ನಿಂತಿದ್ದ ದೀಪು, ಪುಟ್ಟೇಗೌಡ ಹಾಗೂ ಅಶೋಕರನ್ನು ಅರಕಲಗೂಡಿಗೆ ಡ್ರಾಪ್‌ ನೀಡುವಂತೆ ಕೋರಿಕೊಂಡಾಗ 3 ಸಾವಿರ ನೀಡಿದರೆ ಬರುವುದಾಗಿ ಹೇಳಿದ್ದಾರೆ. 2 ಸಾವಿರಕ್ಕೆ ತೀರ್ಮಾನ ಮಾಡಿ ಸಂತೋಷ್‌ನನ್ನು ಬೈಕಿನಲ್ಲಿ ಕೂರಿಸಿಕೊಂಡು ಕಂಪಲಾಪುರ-ಬೆಕ್ಯಾ ಮುಖ್ಯರಸ್ತೆಯ ಬಳಿ ದಾರಿ ತಪ್ಪಿಸಿ ಅರಣ್ಯ ಪ್ರದೇಶಕ್ಕೆ ಕರೆದೊಯ್ದು ಹಣ, ವಾಚ್‌ ಹಾಗೂ ಮೊಬೈಲ್‌ ಅಪಹರಿಸಿ ಕಾಡಿನಲ್ಲಿ ಬಿಟ್ಟು ಪರಾರಿಯಾಗಿದ್ದಾರೆ. ನಂತರ ಸಂತೋಷ್‌ ಪಕ್ಕದ ಗ್ರಾಮಕ್ಕೆ ತಲುಪಿ ಪೊಲೀಸ್‌ ಠಾಣೆಗೆ ಕರೆದೊಯ್ಯುವಂತೆ ಕೇಳಿಕೊಂಡರೂ ಯಾರೂ ಸಹಾಯಕ್ಕೆ ಬಾರದ ಕಾರಣ ಅಲ್ಲೇ ಇದ್ದ ಅಂಗಡಿ ಮುಂದೆ ಮಲಗಿ, ಬೆಳಗ್ಗೆ ಕೆಲವರ ಸಹಾಯದಿಂದ ಅರಕಲಗೂಡಿಗೆ ತೆರಳಿ ನಂತರ ಪಿರಿಯಾಪಟ್ಟಣ ಪೊಲೀಸ್‌ ಠಾಣೆಗೆ ಬಂದು ದೂರು ನೀಡಿದ್ದರು. ದೂರು ದಾಖಲಿಸಿಕೊಂಡ ಪೊಲೀಸರು ಶನಿವಾರ ಪ್ರಕರಣ ಭೇದಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಸರ್ಕಲ್‌ ಇನ್ಸ್‌ಪೆಕ್ಟರ್‌ ಬಿ.ಆರ್‌.ಪ್ರದೀಪ್‌ ನೇತೃತ್ವದಲ್ಲಿ ನಡೆದ ಕಾರ್ಯಾಚರಣೆಯಲ್ಲಿ ಸದಾಶಿವ ತಿಪ್ಪಾರೆಡ್ಡಿ, ಕ್ರೂಶ್‌, ಗವೀಗೌಡ, ಸೈಯದ್‌ ಕಬೀರುದ್ದೀನ್‌, ಅಸ್ಲಾಂ ಪಾಷ, ರವೀಶ, ಅಬೀಬುಲ್ಲಾಖಾನ್‌, ಸತೀಶ್‌ ಮತ್ತಿತರರು ಇದ್ದರು.
from India & World News in Kannada | VK Polls https://ift.tt/3mySxqZ
