ಚಿಕ್ಕಮಗಳೂರು: ಆಯೋಜಿಸಿದ್ದ 5 ದಿನಗಳ ದತ್ತಮಾಲಾ ಅಭಿಯಾನ ಗುರುವಾರ ಶ್ರೀಗುರು ದತ್ತಾತ್ರೇಯ ಬಾಬಾಬುಡನ್‌ಸ್ವಾಮಿ ದರ್ಗಾದಲ್ಲಿ ದತ್ತಪಾದುಕೆ ದರ್ಶನ, ಹೋಮ ಹವನದೊಂದಿಗೆ ತೆರೆಕಂಡಿತು. ಇನಾಂ ದತ್ತಪೀಠ ಬಳಿ ಧ್ವನಿವರ್ಧಕ ಬಳಸಿ ನಮಾಜು ಮಾಡುವುದನ್ನು ಕಳೆದ ಮಂಗಳವಾರ ವಿರೋಧಿಸಿದ್ದ ಶ್ರೀರಾಮ ಸೇನೆ ಕಾರ‍್ಯಕರ್ತರು ಗುರುವಾರ ತಮಗೂ ದತ್ತಪೀಠ ಆವರಣದಲ್ಲಿ ಧ್ವನಿವರ್ಧಕ ಬಳಕೆಗೆ ಅವಕಾಶ ನೀಡಬೇಕು ಎಂದು ಆಗ್ರಹಿಸಿ ದಿಢೀರ್‌ ಪ್ರತಿಭಟನೆ ನಡೆಸಿದರು. ಗೋರಿಗಳಿರುವ ನಿರ್ಬಂಧಿತ ಪ್ರದೇಶಕ್ಕೆ ನುಗ್ಗುವ ಪ್ರಯತ್ನವನ್ನೂ ಮಾಡಿದರು. ನಗರದ ಶಂಕರಮಠದಲ್ಲಿ ಪೂಜೆ ಸಲ್ಲಿಸಿದ ಶ್ರೀರಾಮ ಸೇನೆಯ 100ಕ್ಕೂ ಹೆಚ್ಚು ದತ್ತಮಾಲಾಧಾರಿಗಳು ನಂತರ ವಾಹನಗಳಲ್ಲಿಇನಾಂ ದತ್ತಪೀಠಕ್ಕೆ ಪ್ರಯಾಣ ಬೆಳೆಸಿದರು. ಮಂಜು ಮುಸುಕಿದ, ಮೈಕೊರೆಯುವ ಚಳಿಯ ನಡುವೆ ದತ್ತಪಾದುಕೆ ದರ್ಶನ ಪಡೆದಿದ್ದು, ನಂತರ ಹೊರಭಾಗದಲ್ಲಿ ಆಯೋಜಿಸಿದ್ದ ದತ್ತಹೋಮದಲ್ಲಿ ಪಾಲ್ಗೊಂಡರು. ಶ್ರೀರಾಮ ಸೇನೆ ರಾಜ್ಯ ಕಾರ್ಯಾಧ್ಯಕ್ಷ ಗಂಗಾಧರ ಕುಲಕರ್ಣಿ, ಕಾಳಿಮಠದ ಶ್ರೀರಿಷಿಕುಮಾರ ಸ್ವಾಮೀಜಿ, ಶ್ರೀ ಸಿದ್ದಲಿಂಗ ಸ್ವಾಮೀಜಿ, ಆನಂದ ಶೆಟ್ಟಿ ಅಡ್ಯಾರು, ಮಹೇಶ್‌ ಕಟ್ಟಿನಮನೆ, ಜಿಲ್ಲಾಧ್ಯಕ್ಷ ರಂಜಿತ್‌ ಶೆಟ್ಟಿ, ದುರ್ಗಾಸೇನೆ ಜಿಲ್ಲಾಧ್ಯಕ್ಷೆ ಶಾರದಮ್ಮ ಮತ್ತಿತರರು ಪಾಲ್ಗೊಂಡಿದ್ದರು. ದತ್ತ ಮಾಲಾಧಾರಿಗಳಿಗಿಂತ ಪೊಲೀಸರ ಸಂಖ್ಯೆಯೇ ಹೆಚ್ಚಾಗಿತ್ತು. ಆಯಕಟ್ಟಿನ ಸ್ಥಳಗಳಲ್ಲಿ ಬಿಗಿ ಪೊಲೀಸ್‌ ಬಂದೋಬಸ್ತ್ ಮಾಡಲಾಗಿತ್ತು. ಜಿಲ್ಲಾಧಿಕಾರಿ ಡಾ.ಬಗಾದಿ ಗೌತಮ್‌, ಎಸ್ಪಿ ಎಂ.ಎಚ್‌.ಅಕ್ಷಯ್‌, ಎಎಸ್ಪಿ ಎನ್‌.ಎಸ್‌.ಶ್ರುತಿ, ಎಡಿಸಿ ಡಾ.ಕುಮಾರ್‌, ಮುಜರಾಯಿ ಇಲಾಖೆ ಅಧಿಕಾರಿ ಶ್ರೀನಿವಾಸ್‌ ಸ್ಥಳದಲ್ಲಿ ಮೊಕ್ಕಾಂ ಮಾಡಿದ್ದರು. ನಿರ್ಬಂಧಿತ ಪ್ರದೇಶಕ್ಕೆ ನುಗ್ಗಲು ಪ್ರಯತ್ನ: ಇನಾಂ ದತ್ತಪೀಠದಲ್ಲಿ ಧ್ವನಿವರ್ಧಕ ಬಳಸಿ ನಮಾಜು ಮಾಡುವವರ ವಿರುದ್ಧ ಪ್ರಕರಣ ದಾಖಲಿಸಬೇಕು. ಇಲ್ಲದಿದ್ದರೆ ಅದೇ ಜಾಗದಲ್ಲಿನಮಗೂ ಧ್ವನಿವರ್ಧಕ ಬಳಸಿ ಭಜನೆಗೆ ಅವಕಾಶ ನೀಡಬೇಕು ಎಂದು ಆಗ್ರಹಿಸಿ ದತ್ತಮಾಲಾಧಾರಿಗಳು ದಿಢೀರ್‌ ಪ್ರತಿಭಟನೆ ನಡೆಸಿದರು. ಹೋಮ ಹವನ ನಡೆಸುತ್ತಿದ್ದ ಜಾಗದಲ್ಲೇ ಧರಣಿ ನಡೆಸಿದ ಮಾಲಾಧಾರಿಗಳು ಜಿಲ್ಲಾಡಳಿತದ ವಿರುದ್ಧ ಘೋಷಣೆ ಕೂಗಿದರು. ಜಿಲ್ಲಾಧಿಕಾರಿ ಸ್ಥಳಕ್ಕೆ ಆಗಮಿಸಬೇಕು ಎಂದು ಒತ್ತಾಯಿಸಿ, ನಮಾಜು ನಡೆದಿದೆ ಎನ್ನಲಾದ ಸ್ಥಳಕ್ಕೆ ನುಗ್ಗಲು ಯತ್ನಿಸಿದರು. ದತ್ತಮಾಲಾಧಾರಿಗಳನ್ನು ಪೊಲೀಸರು ಅಡ್ಡಗಟ್ಟಿದಾಗ ತೀವ್ರ ವಾಗ್ವಾದ ನಡೆಯಿತು. ಸ್ಥಳಕ್ಕೆ ಆಗಮಿಸಿದ ಜಿಲ್ಲಾಧಿಕಾರಿ, ಎಸ್ಪಿ ಜತೆಗೆ ಸ್ವಾಮೀಜಿಗಳು, ದತ್ತಮಾಲಾಧಾರಿಗಳು ವಾಗ್ವಾದ ನಡೆಸಿದರು. ವಿವಾದಿತ ಪ್ರದೇಶದಲ್ಲಿ ಯಥಾಸ್ಥಿತಿ ಕಾಪಾಡಬೇಕಿದೆ. ನಮಾಜು ಮಾಡಿರುವ ಬಗ್ಗೆ ಬುಧವಾರ ನೀವು ಮನವಿ ಸಲ್ಲಿಸಿದ್ದೀರಿ. ನ್ಯಾಯಾಲಯ, ಮುಜರಾಯಿ ಇಲಾಖೆ ಆದೇಶ, ದಾಖಲೆಗಳನ್ನು ಪರಿಶೀಲಿಸಿ ವರದಿ ನೀಡಲು ಸಂಬಂಧಿಸಿದ ಅಧಿಕಾರಿಗಳಿಗೆ ಸೂಚಿಸಿದ್ದೇನೆ. ನಮಾಜು ಮಾಡಿರುವ ಬಗ್ಗೆ ದೂರು ಕೊಟ್ಟರೆ ತಪ್ಪು ಮಾಡಿದ್ದರೆ ಪೊಲೀಸ್‌ ಅಧಿಕಾರಿಗಳ ವಿರುದ್ಧವೂ ಕ್ರಮ ಕೈಗೊಳ್ಳಲಾಗುತ್ತದೆ ಎಂದು ಜಿಲ್ಲಾಧಿಕಾರಿ ಡಾ.ಬಗಾದಿ ಗೌತಮ್‌ ಹೇಳಿದರು. ಇದಕ್ಕೆ ಒಪ್ಪಿದ ದತ್ತಮಾಲಾಧಾರಿಗಳು ಡಿಸೆಂಬರ್‌ 8ರ ಗಡುವು ನೀಡಿ ಧರಣಿ ಕೈಬಿಟ್ಟರು. ಸಿ.ಟಿ.ರವಿ ವಿರುದ್ಧ ಆಕ್ರೋಶ: ಊರು ಕಾಯೋಕೆ ಆಗದವನು ದೇಶ ಕಾಯೋಕೆ ಹೋಗಿದ್ದಾನೆ ಎಂದು ಕಾಳಿಮಠದ ಶ್ರೀರಿಷಿಕುಮಾರ ಸ್ವಾಮೀಜಿ ಆಕ್ರೋಶ ವ್ಯಕ್ತಪಡಿಸಿದರು. ಸುದ್ದಿಗಾರರೊಂದಿಗೆ ಮಾತನಾಡಿ, ಸಿ.ಟಿ.ರವಿಗೆ ಚುನಾವಣೆಗೆ ಮಾತ್ರ ದತ್ತಬೇಕು. ಆಗ ಮಾತ್ರ ಒಂದು ಶಲ್ಯ ಹಾಕುತ್ತಾರೆ. ಇಲ್ಲಿನ ಹಿಂದೂಗಳು ಬೀದಿಗೆ ಬಂದಿದ್ದಾರೆ. ಅವರನ್ನು ಮೊದಲು ಕಾಪಾಡಲಿ, ನಂತರ ತಮಿಳುನಾಡು ಹಿಂದೂಗಳ ಬಗ್ಗೆ ಮಾತಾಡಲಿ. ಇಲ್ಲಿಇಷ್ಟು ದಿನ ಧ್ವನಿವರ್ಧಕ ಬಳಸಿ ನಮಾಜು ಮಾಡುತ್ತಿದ್ದ ವಿಷಯ ಸಿ.ಟಿ.ರವಿಗೆ ಗೊತ್ತಿರಲಿಲ್ಲವೇ? ದತ್ತಪೀಠವನ್ನು ಮುಸ್ಲಿಮರಿಗೆ ಕೊಡುವ ಷಡ್ಯಂತ್ರವನ್ನು ಸಿ.ಟಿ.ರವಿ ಮಾಡುತ್ತಿದ್ದಾರೆ. ಚಳಿಗಾಲದ ಅಧಿವೇಶನದಲ್ಲಿ ಹಿಂದೂಗಳಿಗೆ ದತ್ತಪೀಠ ಒಪ್ಪಿಸುವ ತೀರ್ಮಾನ ತೆಗೆದುಕೊಳ್ಳದಿದ್ದರೆ 4-5 ಲಕ್ಷ ದತ್ತಭಕ್ತರು ಇಲ್ಲಿಗೆ ಬಂದು ವಿಗ್ರಹ ಪ್ರತಿಷ್ಠಾಪನೆ ಮಾಡುವರು ಎಂದು ಎಚ್ಚರಿಸಿದರು. ದತ್ತಪೀಠ ಹಿಂದೂಗಳಿಗೆ ಒಪ್ಪಿಸಬೇಕು. ಸಿ.ಟಿ.ರವಿ ಜಾಣಕುರುಡು ಬಿಡಬೇಕು. ಧ್ವನಿವರ್ಧಕ ಬಳಸಿ ನಮಾಜು ಮಾಡಿದವರ ವಿರುದ್ಧ ಕ್ರಮ ಜರುಗಿಸದಿದ್ದರೆ ವಿಧಾನಸೌಧ ಚಲೋ ಹಮ್ಮಿಕೊಳ್ಳುತ್ತೇವೆ ಎಂದು ಸಿದ್ದಲಿಂಗಸ್ವಾಮೀಜಿ ಹೇಳಿದರು. ಇಲ್ಲಿ ನಮಾಜು ಮಾಡಿದವರ ವಿರುದ್ಧ ಪ್ರಕರಣ ದಾಖಲಿಸದಿದ್ದರೆ ಡಿಸೆಂಬರ್‌ನಲ್ಲಿ ಮತ್ತೆ ಚಳವಳಿ ಹಮ್ಮಿಕೊಳ್ಳಲಾಗುವುದು ಎಂದು ಶ್ರೀರಾಮ ಸೇನೆ ರಾಜ್ಯ ಕಾರಾರ‍ಯಧ್ಯಕ್ಷ ಗಂಗಾಧರ ಕುಲಕರ್ಣಿ ಎಚ್ಚರಿಕೆ ನೀಡಿದರು.
from India & World News in Kannada | VK Polls https://ift.tt/36a7PfI
